تىيانشان تورى خەۋىرى (ئىختىيارىي مۇخبىرلار قارلىغاش، ئارمان فوتوسى، خەۋىرى): شىنجاڭ ئالتاي ۋىلايىتى ئالتاي شەھىرى قىزىل تاش بازىرى شيالغىنقامىس كەنتىدىكى بۇ يىل 48 ياشقا كىرگەن دېھقان جاڭ گوفېڭ پىشقان كالا بېقىش تېخنىكىسىغا تايىنىپ، شۇ جايدا خېلى نامى بار ئالا ئىنەك باقمىچىلىقى ماھىرىغا ئايلاندى، ئۇ كالا بېقىش ئارقىلىق ئائىلىسىنى نامراتلىقتىن قۇتۇلدۇرۇپلا قالماي، يەنە ئەتراپتىكى كەنت ئاھالىلىرىنىمۇ بىرلىكتە بېيىشقا يېتەكلىدى.
جاڭ گوفېڭنىڭ كىشىلەرگە بەرگەن تەسىرى زېرەك ۋە قابىل بولۇپ، ئاسانلىقچە يېڭىلگىنىگە تەن بەرمەيدۇ. «ئۆزى قىلماقچى بولغان ئىشنى، قانچىلىك قىيىنچىلىق بولۇشىدىن قەتئىينەزەر، چوقۇم ياخشى قىلىش كېرەك.» بۇ ئۇنىڭ دائىم ئېغىزىدىن چۈشۈرمەيدىغان سۆزى. 2005-يىلى، ئەسلىدە ئائىلىسىدە قىيىنچىلىقى بار جاڭ گوفېڭ نامراتلارنى يۆلەش بويىچە ئۆسۈمسىز قەرز بېرىش سىياسىتىدىن بەھرىمەن بولۇپ، 30 مىڭ يۈەن قەرز ئېلىپ، ئىلىدىن ئۈچ ئالا ئىنەك سېتىۋېلىپ، كەنتتە تۇنجى بولۇپ ئالا ئىنەك باققان كىشى بولۇپ قالدى.«ئەينى چاغدا سىياسەتنىڭ يۆلىشى مېنىڭ ئالا ئىنەك سېتىۋېلىش ئىرادەمنى چىڭىتتى» دېدى جاڭ گوفېڭ: «نامراتلىقتىن قۇتۇلۇپ بېيىش ئۈچۈن، ھۆكۈمەتنىڭ ياردىمىگە تايىنىشلا كۇپايە قىلمايدۇ، ئۆزۈممۇ كۆپرەك تىرىشىپ، ئۈچ ئالا ئىنەك سېتىۋېلىپ قايتىپ كەلگەندىن كېيىن، پۈتۈن زېھنىمنى باقمىچىلىقنى تەرەققىي قىلدۇرۇشقا قارىتىپ، مۇۋەپپەقىيەت قازىنىشقا ئىرادە باغلىدىم».
ئىلگىرى ئۇچرىشىپ باقمىغان نەسىلگە قارىتا، جاڭ گوفېڭ باقمىچىلىق تېخنىكىسىنى تەتقىق قىلىپ، ھۆكۈمەتنىڭ يېتەكلىشى ئارقىلىق، كەنت تەشكىللىگەن تۈرلۈك باقمىچىلىق بويىچە تەربىيەلەشكە قاتنىشىپ، بارا-بارا ئالا ئىنەك بېقىش تېخنىكىسىنى ئىگىلىدى. 2006-يىلى باقمىچىلىق پەن-تېخنىكىسىدىكى ئۈلگىلىك ئائىلە بولۇپ باھالاندى.
«باقمىچىلىقنى ياخشى قىلىش ئۈچۈن، ھەربىر ھالقىغا دىققەت قىلىش كېرەك.» باقمىچىلىق پەن-تېخنىكىسىدىكى ئۈلگىلىك ئائىلىگە ئايلانغاندىن كېيىن، كەنتتىكى باشقا كەنت ئاھالىلىرىمۇ بەس-بەستە جاڭ گوفېڭدىن تەلىم ئالدى، ھەربىر ئائىلە ئالا ئىنەك سېتىۋالغاندا جاڭ گوفېڭنى باقمىچىلىققا يېتەكچىلىك قىلىشقا تەكلىپ قىلدى، جاڭ گوفېڭمۇ كەنت ئاھالىلىرىگە پۈتۈن كۈچى بىلەن ياردەم بەردى. «مەن قىيىنچىلىققا ئۇچرىغاندا، سىياسەتنىڭ يۆلىشى بىلەن، تەرەققىي قىلىش پۇرسىتىگە ئېرىشتىم. ھازىر مەن ياخشى كۈنگە ئېرىشتىم، مەن چوقۇم بۇ مىننەتدارلىق ھېسسىياتىم بىلەن يۇرتداشلار بىلەن بىللە كالا بېقىپ بېيىيمەن» دېدى جاڭ گوفېڭ.
