ئانار بۇلۇت: يېقىنقى يىللاردىن بۇيان، بۇرۇلتوقاي ناھىيەسى جەمئىي 5 مىليون 200 مىڭ يۈەن مەبلەغ سېلىپ، ئىلگىرى-كېيىن بولۇپ 58 كەنت دەرىجىلىك داۋالاش ئۆيلىرىنى ئۆلچەملەشتۈرۈش قۇرۇلۇشىنى تاماملاپ، ئومۇمىي خەلق ساغلاملىق سەھىيە كاپالىتى سىستېمىسىنى كۈچەپ بەرپا قىلىپ، ھەر مىللەت دېھقان-چارۋىچىلارنىڭ تەن ساغلاملىقىنى قوغدىدى.
بۇرۇلتوقاي ناھىيەسى يەتتە ئارال بازىرى ئالماباغ كەنتىدىكى ئۆلچەملەشكەن كەنت داۋالاش ئۆيى 2017-يىلى 7-ئايدىن باشلاپ رەسمىي ئىشقا كىرىشتۈرۈلگەندىن بۇيان، تۈرلۈك داۋالاش ئەسلىھەلىرى ئۈزلۈكسىز تولۇقلاندى ۋە مۇكەممەللەشتۈرۈلدى، بۇ كەنت ئاھالىلىرىنىڭ داۋالىنىشىغا قولايلىق يارىتىپ بەردى. بۇ كەنتتىكى كەنت ئاھالىسى يۈ جياچۈەن بۇ يىل 70 ياشقا كىرگەن بولۇپ، يۇقىرى قان بېسىم كېسىلىگە گىرىپتار بولغانلىقتىن، ئۇ دائىم كەنت داۋالاش ئۆيىگە كېلىپ كېسەل كۆرسىتەتتى، كەنت دوختۇرلىرى ھەر قېتىم ئۇنىڭ قان بېسىمىنى سەۋرچانلىق بىلەن ئۆلچەپ، قان بېسىمىنى چۈشۈرىدىغان دورا يېزىپ بېرەتتى، كەنت داۋالاش ئۆيى تىلغان ئېلىنسا، ئۇ توختىماي ماختاپ كېتەتتى.
ۋاڭ ئەيلەن يەتتە ئارال بازىرى ئالماباغ كەنتىنىڭ كەنت دوختۇرى بولۇپ، ئۇنىڭ كەنت دوختۇرى بولۇپ ئىشلەۋاتقىنىغا ئون نەچچە يىل بولدى، ئۇ بۇرۇلتوقاي ناھىيەسى داۋالاش-سەھىيە ئىشلىرى ۋە كەنت دەرىجىلىك سەھىيە ئۆيىنىڭ تەرەققىياتىنى كۆردى. ئۇ مۇنداق دېدى: «كەنت دوختۇرى بولۇش سۈپىتىم بىلەن كەنت ئاھالىلىرىگە تېخىمۇ ياخشى مۇلازىمەت قىلىمەن، دۆلەت مۇشۇنداق ياخشى ئەسلىھەلەرنى، مۇشۇنداق ياخشى مۇلازىمەت تۈرلىرىنى بەردى، شۇڭا كۆپچىلىككە چوقۇم ياخشى مۇلازىمەت قىلىمەن».
بۇ يىل، بۇرۇلتوقاي ناھىيەسى كەنت دەرىجىلىك داۋالاش ئۆيىدىن 16نى قۇردى ھەم پۈتۈن ناھىيەدىكى 58 كەنت داۋالاش ئۆيىنى ئۆلچەملەشتۈرۈپ قۇردى، كەنت داۋالاش ئۆيىنىڭ ئۆلچەمگە يېتىش نىسبىتى %100كە يەتتى. شۇنىڭ بىلەن بىللە، ھەر بىر كەنت داۋالاش ئۆيىگە بىردىن دوختۇر سەپلىنىپ، ناھىيە (يېزا، كەنت)دىن ئىبارەت ئۈچ دەرىجىلىك ئومۇمىي خەلق ساغلاملىق سەھىيە كاپالەت سىستېمىسى تەدرىجىي مۇكەممەللەشتۈرۈلدى.
مەنبە: بۇرۇلتوقاي ناھىيەلىك يۇغۇرما تاراتقۇ مەركىزى،: مەلىك، ۋاڭ جىڭرۇ
