ئىشچىلار رەخت كەسمەكتە.
تىيانشان تورى خەۋىرى(مۇخبىرلار گو لىڭ، لۈ يىخەن، جۇڭ جاۋفېڭ خەۋىرى، فوتوسى): «مەن بىر كۈنلەردە ئۆزۈمنىڭ تىككۈچىلىك ماشىنىسى ئىشلىتەلەيدىغانلىقىمنى، يەنە بۇنىڭغا تايىنىپ كىرىمىمنى ئاشۇرۇپ، نامراتلىقتىن قۇتۇلىدىغانلىقىمنى ئويلىماپتىكەنمەن» دېدى مۇتەللىپ روزىمەمەت كۈلۈپ تۇرۇپ. خوتەن ۋىلايىتى قاراقاش ناھىيەسى زاۋا بازىرىدىكى بىر كىيىم-كېچەك كارخانىسىدا، مۇتەللىپكە ئوخشاش 1050 خادىم ۋە ئىشقا ئورۇنلىشىپ كىرىمىنى ئاشۇرغان تېخىمۇ كۆپ كەنت ئاھالىسى بار بولۇپ، كارخانا ئۈزلۈكسىز تەرەققىي قىلىپ زورايغاچقا، ئۇلار نامراتلىقتىن قۇتۇلۇپ بېيىپ، ھاللىق سەۋىيەگە قاراپ ماڭدى.
10-ئاينىڭ 24-كۈنى، مۇخبىر خوتەن ۋىلايىتى قاراقاش ناھىيەسى زاۋا بازىرى لەڭگەر كەنتىدىكى بۇ كارخانىغا كېلىپ، كۆرگەزمىخانىغا تۈرلۈك كىيىم-كېچەكلەرنىڭ قويۇلغانلىقىنى، يەنە T شەكىللىك سەھنە بارلىقىنى كۆردى. «ئۆزىمىزنىڭ خىزمەتچىلىرىدىن تەشكىللەنگەن مودېل ئەترىتىمىز بار، كىيىم-كېچەكلەر لايىھەلىنىپ بولغاندىن كېيىن، ئۇلار ئاۋۋال T شەكىللىك سەھنىدە كۆپچىلىككە كۆرسىتىدۇ، ياخشى بولسا، بازارغا كېڭەيتىمىز» دېدى بۇ كارخانىنىڭ مەسئۇلى ئوبۇلھەسەن ئوبۇلقاسىم تونۇشتۇرۇپ. ئۇنىڭ دېيىشىچە، ئۇلارنىڭ كىيىم-كېچەك كارخانىسىنىڭ خوتەن ۋىلايىتىدە سەككىز ئىشلەپچىقىرىش بازىسى بار ئىكەن، يىلدا ئىككى مىليون يۈرۈش كىيىم-كېچەك ئىشلەپچىقىرىدىكەن، يەنە يوتقان-كۆرپە، ماسكا، مۇداپىئە كىيىمى قاتارلىق مەھسۇلاتلارمۇ بار بولۇپ، مەملىكەتنىڭ ھەرقايسى جايلىرىغا سېتىلىدىكەن. نۆۋەتتە، كارخانىدا 1010 كىشى ئىشقا ئورۇنلاشقان، بۇنىڭ ئىچىدە 532سى ئارخىپ تۇرغۇزۇلۇپ كارتا بېجىرىلگەن نامرات ئائىلە بولۇپ، ھازىر ھەممىسى نامراتلىقتىن قۇتۇلغان.
مۇتەللىپنىڭ ئائىلىسى قاراقاش ناھىيەسى ئۇرچى يېزىسى قوشئاۋات كەنتىدە بولۇپ، ئىلگىرى ئائىلىدىكى تۆت جان ئىككى مو يەر ۋە ئۇششاق ئىشلارغا تايىنىپ تۇرمۇش كەچۈرەتتى، 2018-يىلى 7-ئايدا، ئۇ بۇ كىيىم-كېچەك كارخانىسىغا كېلىپ خىزمەت قىلدى. «كەنت ماڭا بۇ يەردە ئىشلەشكە تونۇشتۇردى، دەسلەپتە، ئۆزۈمنىڭ تىككۈچىلىك تېخنىكىسىنى ئۆگىنەلمەيدىغاندەك ھېس قىلاتتىم، ئازراقمۇ ئىشەنچىم يوق ئىدى، ئەمما زاۋۇتتىكىلەر ئەستايىدىللىق بىلەن ئاز-ئازدىن ئۆگەتتى، ھازىر مەن ھەممىنى ئۆگىنىۋالدىم، كىرىمىممۇ دەسلەپ كەلگەن ۋاقىتتىكىدىن بىر ھەسسە ئاشتى» دېدى مۇتەللىپ، ھازىر ئۇنىڭ ئىككى بالىسى مەكتەپتە ئوقۇيدۇ، خوتۇنى بىر توپ تارقىتىش دۇكىنىدا ئىشلەيدۇ، كىرىمى ئىنتايىن مۇقىم.
يوتقان-كۆرپە پىششىقلاش زاۋۇتىدا، 23 ياشلىق ئابدۇۋەلى تۇرسۇن ئىشچىلار بىلەن ئىنتايىن ئالدىراش ئىدى. «ھەممىسى ماشىنىدا مەشغۇلات قىلىنىدۇ، بىز بىر نەچچە كۇنۇپكىنى بېسىپ، ماشىنا تىكىپ بولغان كۆرپىلەرنى رەتلەپ قويساقلا بولىدۇ، ئىنتايىن تېز». ئابدۇۋەلىنىڭ ئائىلىسى قاراقاش ناھىيەسى توخۇلا يېزىسىدا بولۇپ، بۇلتۇر يۇرتداشلىرى بىلەن بىللە ئىشلەمچى بولغان، كۆپچىلىك بۇ كىرىمى مۇقىم خىزمەتنى ئىنتايىن قەدىرلەيدۇ، ھەركۈنى ئىشتىن چۈشۈپ يەنە دېھقانچىلىق ئىشلىرىنى قىلىدۇ، تۇرمۇشى ئىنتايىن خاتىرجەم.
بۇ كارخانىنىڭ ئىشخانا بىناسىدا، مۇخبىر تامدىكى لەۋھەلەرنى كۆردى، بۇلارنى ئەتراپتىكى مەكتەپ، كەنت ئاھالە كومىتېتى، يەسلى، خىزمەت ئەترىتى قاتارلىقلار تەقدىم قىلغان بولۇپ، كۆپىنچىسى كارخانا ئىئانە قىلغان پۇل ۋە ماددىي بۇيۇملارغا بىلدۈرۈلگەن مىننەتدارلىق ئىدى.
ئىگىلىنىشىچە، بۇ كارخانا ئۈزلۈكسىز تەرەققىي قىلىپ زورىيىش بىلەن بىللە، لەڭگەر كەنتىنىڭ نامراتلىق قالپىقىنى تەلتۆكۈس چۆرۈپ تاشلىشىغا ئىمكانىيەت يارىتىش ئۈچۈن، نامراتلارنى يۆلەش، نامراتلىقتىن قۇتۇلدۇرۇشنىڭ يېڭى يولى ئۈستىدە ئۈزلۈكسىز ئىزدەنگەن، شارائىتقا قاراپ ئىش كۆرۈش يېڭى ئەندىزىسىنى قوللىنىپ، بەش مىليون يۈەن مەبلەغ سېلىپ، سودا-تىجارەت، ساياھەت-ئېكسكۇرسىيە، مەدەنىيەت، كۆڭۈل ئېچىش، ئۆرپ-ئادەت باغچىسى، دېھقانلار ئارامگاھى، ئېسىل تائاملار، خاس باقمىچىلىق كەسپى بىر گەۋدە قىلىنغان نامراتلارنى يۆلەش-ئىگىلىك تىكلەش كوچىسدىن بىرنى قۇرۇپ چىققان.
بۇنىڭدىن باشقا، بۇ كارخانا «مېھىر-شەپقەت تاللا بازىرى»، «مېھىر-شەپقەت ساتىراشخانىسى» قۇرۇپ، كەنتتىكى ئەمگەك كۈچى يوق ئاممىنى ھەقسىز ئاشلىق، گۆش، تۈرلۈك كۆكتات، مېۋە-چېۋە، تۆت پەسىللىك كىيىم قاتارلىق زۆرۈر تۇرمۇش لازىمەتلىكلىرى بىلەن ھەقسىز تەمىنلىگەن.
