شىنجاڭ گېزىتى خەۋىرى(مۇخبىر رايىدە، ئىختىيارىي مۇخبىر قېيۇم قادىر): «پارتىيە ۋە ھۆكۈمەت ياردەم قىلىپ مېنى ئىشقا ئورۇنلاشتۇردى، كارخانىغا ئىشقا چۈشكەندىن كېيىن ئۆزۈمگە قاتتىق تەلەپ قويىمەن، ئىشقا ئورۇنلىشىش پۇرسىتىنى قەدىرلەپ، تىرىشىپ ئىشلەپ، ئائىلەمنى تېزرەك نامراتلىقتىن قۇتۇلدۇرىمەن» دېدى 3-ئاينىڭ 15-كۈنى قۇمۇل شەھىرى ئېۋىرغول رايونى تاشۋېلىق يېزىسى خوتۇنتام كەنتىنىڭ ئاھالىسى مىجىت مەمەت ھاياجانلانغان ھالدا.
بۇ يىل 30 ياشقا كىرگەن مىجىت مەمەتنىڭ ئائىلىسىدە تۆت جان بار بولۇپ، «ئەلرايىنى بىلىش، ئەلگە نەپ يەتكۈزۈش، ئەلنى مايىل قىلىش» بويىچە كەنتتە تۇرۇشلۇق خىزمەت ئەترىتى ۋە كەنت «ئىككى كومىتېت»ىنىڭ ياردىمىدە، بىر ئائىلىدىكى تۆتەيلەن كەينى-كەينىدىن خىزمەت تاپتى. ئۇنىڭ ئاتا-ئانىسى كەنتتە تازىلىق ئىشچىسى بولدى، ئاكىسى شەھەر رايونىدىكى خەلققە قولاي ساقچى ئىشلىرى پونكىتىدا ئىشقا ئورۇنلاشتى.
3-ئاينىڭ بېشىدا، ئېۋىرغول رايونلۇق ئەمگەك كۈچلىرىنى سىرتقا چىقىرىش ئىشخانىسىنىڭ خىزمەتچىلىرى ئەھۋال ئىگىلەش جەريانىدا مىجىت مەمەت ئائىلىسىنىڭ ئەمەلىي ئەھۋالىنى ئىگىلىگەندىن كېيىن، ئۇنىڭغا ئىش ئورۇنلىرىنىڭ ئۇچۇرىنى تەپسىلىي تونۇشتۇردى، مىجىت مەمەت ئەمگەك كۈچلىرىنى يۆتكەپ ئىشقا ئورۇنلاشتۇرۇشنى تەۋسىيە قىلىش جەدۋىلىنى تولدۇردى.
ئىگىلىنىشىچە، ھازىر خوتۇنتام كەنتىدە ئارخىپ تۇرغۇزۇلۇپ كارتا بېجىرىلگەن 28 نامرات ئائىلىدە 66 ئادەم بولۇپ، بۇنىڭ ئىچىدە 27 ئادەم ئىشقا ئورۇنلاشقان.
