تىيانشان تورى خەۋىرى (ئىختىيارىي مۇخبىرلىرىمىز ئەزھەر، ما چىڭيەن، ليۇ شۈەي فوتوسى، خەۋىرى): «سىلەرگە كۆپ رەھمەت، يىلنىڭ بېشىدا يول كۆرسەتتىڭلار، ھازىر سېتىش يولىنى ھەل قىلىپ بەردىڭلار، سىلەر پارتىيە ئەۋەتكەن ياخشى كادىرلار.» 8-ئاينىڭ 7-كۈنى، شىنجاڭ بايىنغولىن موڭغۇل ئاپتونوم ئوبلاستى يەنجى ناھىيەسى ساغانچىكە يېزىسىنىڭ موخورسۇم كەنتىنىڭ كەنت ئاھالىسى نىياز قاسىمنىڭ 27 مو يەردىكى تاۋۇزلىقىدا بولۇق ئۆسكەن پېلەكلەردە ھەم چوڭ ھەم يۇمىلاق تاۋۇزلار چۈشۈپ كەتكەن ئىدى، يەنجى ناھىيەلىك پارتكوم سىياسىي-قانۇن كومىتېتى، جامائەت خەۋپسىزلىكى ئىدارىسىنىڭ كەنتتە تۇرۇشلۇق خىزمەت ئەترىتىنىڭ ئەترەت ئەزالىرى ۋە كەنت كادىرلىرى تاۋۇزلارنى توشۇش، ئاپتوموبىلغا بېسىش بىلەن ئالدىراش بولۇپ كەتتى.
بۇ يىلنىڭ بېشىدا، خىزمەت ئەترىتى ئۆيمۇئۆي كىرىپ يوقلاش جەريانىدا، 76 ياشلىق نىياز قاسىمنىڭ بۇ يىللىق زىرائەت تېرىش ئۈچۈن بېشى قېتىۋاتقانلىقىنى بىلدى. غەم باسقان نىياز قاسىمنى كۆرگەن خىزمەت ئەترىتى ۋە كەنت «ئىككى كومىتېت»ىدىكىلەر ھەر تەرەپتىن يېقىنقى نەچچە يىلدىكى بازار ئەھۋالى ۋە بازار ئېھتىياجىنى ئىگىلەش ئارقىلىق، بوۋايغا تاۋۇز تېرىش تەكلىپىنى بەردى. خىزمەت ئەترىتى ئۇرۇق تاللاش، تېرىش، ئېتىز پەرۋىشى قاتارلىق ھەر قايسى ھالقىلاردا قولمۇقول يېتەكچىلىك قىلىپ، نىياز ئائىلىسىدىكىلەرنى غەمدىن ئۈزۈل-كېسىل خالاس قىلدى.
ھازىر تاۋاز بازارغا سېلىنىدىغان ياخشى مەزگىل، تاۋۇزلىرىنىڭ پىشقانلىقىنى كۆرگەن نىياز ناھايىتى خۇشال بولدى، لېكىن يەنە تاۋۇزنىڭ سېتىلىش يولىدىن غەم قىلىشقا باشلىدى.
كەنتنىڭ 1-شۇجىسى، خىزمەت ئەترىتىنىڭ ئەترەت باشلىقى سەي كۈن ئەھۋالدىن خەۋەر تاپقاندىن كېيىن، ئارقا تىرەك ئورۇنلار بىلەن تاۋۇزنىڭ سېتىلىش يولى مەسىلىسى ھەققىدە پائال كېڭەشتى، خىزمەت ئەترىتى، كەنت «ئىككى كومىتېت»ى، ئارقا تىرەك ئورۇنلار قاتارلىق ھەرقايسى كۈچلەر ھەرىكەتكە كېلىپ، تاۋۇزلارنى تاللاپ، ئۈزۈپ، توشۇپ، قاچىلاپ، كارخانىلار، تاللا بازارلىرى بىلەن ئالاقىلىشىپ، ئۈندىدار، QQ ئارقىلىق تەشۋىق قىلدى. كۆپچىلىكنىڭ ئورتاق تىرىشچانلىقىدا، ھازىر تاۋۇزنىڭ يېرىمى سېتىلىپ بولدى.
نىياز مۇنداق دېدى: «ھەر مو يەرنىڭ مەھسۇلات مىقدارى 5 توننا ئەتراپىدا، ساپ پايدىسى 3000 يۈەن بولۇپ، ھازىر ئەتراپتىكى ناھىيە بازىرىدىن بۇ يەرگە كېلىپ تاۋۇز سېتىۋالىدىغانلارنىڭ ئايىغى ئۈزۈلمەيدۇ. مۆلچەرلىشىمچە، بۇ يىل 80 مىڭ يۈەن ئەتراپىدا كىرىم قىلىمەن.»
