تىيانشان تورى خەۋىرى (مۇخبىرلىرىمىز ياڭ گۇاڭ، لۈ يىخەن خەۋىرى. فوتوسى): 8-ئاينىڭ 29-كۈنى سائەت 14:00لەردە، ئۈرۈمچى شەھىرى خەلق مەيدانى ئەتراپىدا، شەھەر ئاھالىلىرى سەيلە قىلىپ، ئارام ئېلىپ، كۆڭۈل ئېچىش بىلەن ئالدىراش بولدى. كىچىك دوستلار ۋېلىسىپتلىرىنى مىنىشىپ، چاقلىق كانكىلارنى ئويناپ، خۇشال كەيپىياتقا چۆمدى. چوڭلار چوڭ قەدەملەرنى تاشلاپ ماڭغاچ بىر تەرەپتىن كۆپكۆك ئاسماندىن ھۇزۇر ئېلىپ، يان تېلېفونلىرى بىلەن ئەتراپتىكى گۈزەل مەنزىرىلەردىن خاتىرە قالدۇردى.
8-ئاينىڭ 29-كۈنى سائەت نۆلدىن باشلاپ، ئۈرۈمچى شەھىرى تىيانشان رايونى، سايباغ رايونىنىڭ يۇقۇم خەۋپ-خەتەر دەرىجىسى يۇقىرى خەۋپ-خەتەردىن تۆۋەن خەۋپ-خەتەرگە تەڭشەلدى؛ ئۈرۈمچى ئىقتىساد-تېخنىكا تەرەققىيات رايونى(تۇدۇڭخابا رايونى)، يۇقىرى، يېڭى تېخنىكىلىق كەسىپلەر تەرەققىيات رايونى (يېڭىشەھەر رايونى)، شىمىگۇ رايونىنىڭ يۇقۇم خەۋپ-خەتەر دەرىجىسى ئوتتۇراھال خەۋپ-خەتەردىن تۆۋەن خەۋپ-خەتەرگە تەڭشەلدى. بۇنىڭ بىلەن، ئۈرۈمچى شەھىرىدىكى ھەر قايسى رايون، ناھىيەلەرنىڭ ھەممىسى يۇقۇم خەۋپ-خەتەر دەرىجىسى تۆۋەن رايونغا ئايلاندى، ئۈرۈمچى شەھىرىنىڭ ئىقتىساد، جەمئىيەت ئىشلىرىنىڭ تېز سۈرئەتتە ئەسلىگە كېلىش جەريانىدا، كىشىلەرمۇ ئىلگىرىكى خىزمەت، تۇرمۇشىنى باشلىدى.
