تىيانشان تورى خەۋىرى (مۇخبىرىمىز ما بېي، ئىختىيارىي مۇخبىرىمىز تۇرغۇن روزى، زۇلپىيە فوتوسى ۋە خەۋىرى): 8-ئايدا شىنجاڭنىڭ مېۋە-چېۋىلىرى خۇش پۇراق چاچتى، ئاپتونوم رايونىمىزدىكى نۇرغۇن جايلار يۇقۇمنىڭ ئالدىنى ئېلىش -تىزگىنلەش تەدبىرلىرىنى ياخشى ئىشلەش ئالدىنقى شەرتىدە، ھەر قايسى تەرەپلەرنىڭ بايلىقىنى بىرىكتۈرۈپ، ئىشلەپچىقىرىش بىلەن سېتىشنى تۇتاشتۇرۇش يوللىرىنى بەرپا قىلىپ، يېزا ئىگىلىك مەھسۇلاتلىرى بىلەن تەمىنلەشكە كاپالەتلىك قىلدى.
يېقىندا، قىزىلسۇ قىرغىز ئاپتونوم ئوبلاستى ئاتۇش شەھىرى ئازغان كەنتىدىكى ئەنجۈر 2-قېتىملىق ھوسۇل يىغىش مەزگىلىنى كۈتۈۋالدى، ئاپتونوم رايونلۇق بازار نازارەت قىلىش-باشقۇرۇش ئىدارىسىنىڭ ئازغان كەنتىدە تۇرۇشلۇق «ئەلرايىنى بىلىش، ئەلگە نەپ يەتكۈزۈش، ئەلنى مايىل قىلىش» خىزمەت ئەترىتى ۋە كەنت «ئىككى كومىتېت» بەنزىسى باغۋەنلەرنىڭ سېتىش يولى مەسىلىسىنى ھەل قىلىشىغا پائال ياردەم بېرىپ، كەنت ئاھالىلىرىنىڭ كىرىمىنى ئاشۇرۇشقا كۈچ قوشتى.
مۇخبىرنىڭ ئىگىلىشىچە، ھازىر ئاپتونوم رايونىمىزنىڭ ھەر قايسى جايلىرى ھەر قايسى ناھىيە (شەھەر)، ھەر قايسى يېزا (بازار) لارنى دېھقانلار ساتالمىغان مېۋە-چېۋىلەرنى ئستاتىستىكا قىلىپ، سېتىش سۇپىسى ئورنىتىشقا پائال تەشكىللىمەكتە، سېتىش يوللىرىنى كېڭەيتىپ، ئاپتونوم رايونىمىز ئىچى ۋە سىرتىدىكى كارخانىلارنى مۇلازىمەت بىلەن تەمىنلەپ، يۇقۇمنىڭ ئالدىنى ئېلىش-تىزگىنلەش بىلەن بىللە، شۇ جايدىكى يېزا ئىگىلىك مەھسۇلاتلىرىنىڭ سېتىلىشىغا كاپالەتلىك قىلىپ، دېھقانلارنىڭ كىرىمىنى ئاشۇرۇشىغا ياردەم بەردى.
