تىيانشان تورى خەۋىرى (مۇخبىرلىرىمىز گو لىڭ، دوۋ شىڭجۈن، يىن توڭيۈەن، جانات تولقىن): 8-ئاينىڭ 16-كۈنى سائەت 17دە، ئاپتونوم رايونلۇق ھۆكۈمەت ئاخبارات ئىشخانىسى ئۈرۈمچى شەھىرىنىڭ يېڭى تىپتىكى تاجسىمان ۋىرۇسلۇق ئۆپكە ياللۇغى يۇقۇمى ۋە ئالدىنى ئېلىش-تىزگىنلەش خىزمىتى توغرىسىدا 30-مەيدان ئاخبارات ئېلان قىلىش يىغىنى ئۆتكۈزدى.
ئاپتونوم رايونلۇق يېڭى تىپتىكى تاجسىمان ۋىرۇسلۇق ئۆپكە ياللۇغىنى تېببىي قۇتقۇزۇش-داۋالاش بويىچە بېكىتىلگەن دوختۇرخانىنىڭ مۇئاۋىن دوختۇرخانا باشلىقى لۇ چېننىڭ تونۇشتۇرۇشىچە، 8-ئاينىڭ 15-كۈنىگىچە، ئاپتونوم رايونلۇق يېڭى تىپتىكى تاجسىمان ۋىرۇسلۇق ئۆپكە ياللۇغىنى تېببىي قۇتقۇزۇش-داۋالاش بويىچە بېكىتىلگەن دوختۇرخانا قوبۇل قىلىپ داۋالىغان ئېنىق دىياگنوز قويۇلغان ئاغرىق مىسالى جەمئىي 826 ئىكەن، بۇنىڭ ئىچىدە ئەرلەر 366 كىشى بولۇپ، %44.3نى ئىگىلىگەن؛ ئاياللار 460 كىشى بولۇپ، %55.7نى ئىگىلىگەن؛ ئوتتۇرىچە يېشى 37.6 ياش بولۇپ، ئەڭ چوڭى 92 ياش ئىكەن، ھازىر ساقىيىپ دوختۇرخانىدىن چىققان ئاغرىقلار ۋە تېببىي كۆزىتىش بىكار قىلىنغانلار 533كە يېتىپ، ساقىيىپ دوختۇرخانىدىن چىققان ئېنىق دىياگنوز قويۇلغان جەمئىي ئاغرىق مىسالى دوختۇرخانىدا داۋالىنىۋاتقان ئېنىق دىياگنوز قويۇلغان ئاغرىق مىسالىدىن ئېشىپ كەتكەن.
