8-ئاينىڭ 6-كۈنى، پىدائىي سۈن رۇي ۋېيشىندا ئاھالىلەردىن سېتىۋېلىشقا تېگىشلىك كۆكتاتلارنىڭ تىزىملىكىنى يىغماقتا.
تىيانشان تورى خەۋىرى(مۇخبىر چىن پېڭ خەۋىرى، فوتوسى): «موما، بەدەن تېمپېراتۇرىڭىز نورمالكەن، ئادەتتە دېزىنى كۆپرەك ئېچىپ ھاۋا ئالماشتۇرۇشنى ئۇنتۇماڭ. ئۆيگە نېمە لازىم بولسا بىز سىزگە ئەكىلىپ بېرىمىز، ئەگەر مىجەزىڭىز يوق بولسا، بىزنىڭ مەھەللىدىمۇ پىدائىي دوختۇرلار بار، ئۇلار ئۆيگە كېلىپ كۆرۈپ قويىدۇ...» 8-ئاينىڭ 6-كۈنى ئۈرۈمچى شەھىرى سايباغ رايونى خوتەن كوچىسى تەۋەلىك رايونى باشقۇرۇش كومىتېتى شەرقىي 1-كوچىسى مەھەللىسى 374-نومۇرلۇق چوڭ قورۇدا، پىدائىي سۈن رۇي بىر موماينىڭ بەدەن تېمپېراتۇرىسىنى ئۆلچەپ بولغاندىن كېيىن، ئۇنىڭغا شۇنداق تاپىلىدى.
شۇ كۈنى چۈشتىن بۇرۇن، داشۆسېڭ پىدائىي سۈن رۇي بىلەن ۋاڭ شىنشۈ بىرلىكتە، مۇداپىئە كىيىمى كىيىپ، ماسكا تاقاپ، پەلەي كىيىپ، 374-نومۇرلۇق قورۇدا ئاھالىلەر بىناسىدىكى ئاممىۋى رايوننى دېزىنفېكسىيە قىلدى، ئاھالىلەرنىڭ بەدەن تېمپېراتۇرىسىنى ئۆلچىدى، ئاھالىلەرگە يۇقۇمنىڭ ئالدىنى ئېلىش-تىزگىنلەش ۋەزىيىتى ۋە ئەڭ يېڭى سىياسەتلەرنى تەشۋىق قىلىپ، يالغۇز تۇرىدىغان ياشانغانلارنىڭ پىسخىكىلىق بېسىمىنى يىنىكلەتتى، ئاھالىلەرنىڭ مېۋە، كۆكتاتلىرىنى ۋاكالىتەن سېتىۋالدى ۋە يەتكۈزۈپ بەردى.
«بىز ئۆزىمىزنى ياخشى قوغداپ، ئاھالىلەرگە تېخىمۇ ياخشى مۇلازىمەت قىلىشىمىز كېرەك» دېدى پىدائىي سۈن رۇي. شەھەر ئاھالىلىرىنى غەمدىن خالاس قىلىش ئۈچۈن، بۇ قورۇدا مەھەللىنىڭ تەشكىللىشى بىلەن، بىرىنچى ۋاقىتتا پىدائىيلار مۇلازىمەت قوشۇنى قۇرۇلدى، ئۇلارنىڭ ئىچىدە داشۆسېڭ، پېنسىيەگە چىققان كادىر، خىزمەتتىكى دوختۇر قاتارلىقلار بار. ئۇلار ئاھالىلەرنى كۆكتات سېتىۋېلىش، دورا يەتكۈزۈش، ئەخلەت يىغىش، كۇەيدى ئېلىش، پىسخىكىلىق يېتەكلەش، داۋالاش قاتارلىق مۇلازىمەتلەر بىلەن تەمىنلىدى.
