شىنجاڭ گېزىتى پۈتۈن تاراتقۇ مۇخبىرلىرى لى چۇنشيا، جاۋ چۇنخۇانىڭ 8 - ئاينىڭ 3 - كۈنى ئاپتونوم رايونلۇق ھۆكۈمەت ئاخبارات ئىشخانىسى ئاچقان يۇقۇمنىڭ ئالدىنى ئېلىش - تىزگىنلەش خىزمىتى ئاخبارات ئېلان قىلىش يىغىنىدىن ئىگىلىشىچە، ئۈرۈمچى شەھىرىدىكى يېڭى تىپتىكى تاجسىمان ۋىرۇسلۇق ئۆپكە ياللۇغى دەپ ئېنىق دىياگنوز قويۇلغان ئاغرىق مىسالى ۋە كېسەللىك ئالامىتى كۆرۈلمىگەن يۇقۇملانغۇچىلارنىڭ ئومۇمىي سانى ئۇدا تۆت كۈن تۆۋەنلىگەن، جەمئىي ئېنىق دىياگنوز قويۇلغان ئاغرىق مىسالى سانىنىڭ كۆپىيىشى ئالدىنقى مەزگىلدىكىگە سېلىشتۇرغاندا ئاستىلاشقا يۈزلەنگەن. ھازىر يۇقۇم ۋەزىيىتى يەنىلا ئىنتايىن كەسكىن، لېكىن بىر قاتار كۈچلۈك تەدبىرلەرنىڭ تۈرتكىسىدە، يۇقۇم ۋەزىيىتىدە ئومۇمىي جەھەتتىن بىرقىسىم ئىجابىي ئۆزگىرىشلەر كۆرۈلمەكتە.
8 - ئاينىڭ 2 - كۈنى سائەت نۆلدىن سائەت 24كىچە، ئۈرۈمچى شەھىرىدە دوكلات قىلىنغان يېڭىدىن كۆپەيگەن يېڭى تىپتىكى تاجسىمان ۋىرۇسلۇق ئۆپكە ياللۇغى دەپ ئېنىق دىياگنوز قويۇلغان ئاغرىق مىسالى 28، يېڭىدىن كۆپەيگەن كېسەللىك ئالامىتى كۆرۈلمىگەن يۇقۇملانغۇچى سەككىز؛ 8 - ئاينىڭ 2 - كۈنى سائەت 24كىچە، ئۈرۈمچى شەھىرىدە ھازىر بار بولغان ئېنىق دىياگنوز قويۇلغان ئاغرىق مىسالى 586، ھازىر بار بولغان كېسەللىك ئالامىتى كۆرۈلمىگەن يۇقۇملانغۇچى 114 بولغان؛ 7 - ئاينىڭ 28 - كۈنى سائەت نۆلدىن 8 - ئاينىڭ 2 - كۈنى سائەت 24كىچە، پۈتۈن شەھەر بويىچە ساقىيىپ دوختۇرخانىدىن چىققان ئېنىق دىياگنوز قويۇلغان ئاغرىق مىسالى جەمئىي 30 بولۇپ، كېسەللىك ئالامىتى كۆرۈلمىگەن 26 يۇقۇملانغۇچىنى تېببىي كۆزىتىش بىكار قىلىنغان.
ئۈرۈمچى شەھەرلىك خەلق ھۆكۈمىتىنىڭ مۇئاۋىن باش كاتىپى شاڭ يۈلەن مۇنداق بىلدۈردى: ساقىيىپ دوختۇرخانىدىن چىققان ئاغرىق مىساللىرى ۋە تېببىي كۆزىتىش بىكار قىلىنغان كېسەللىك ئالامىتى كۆرۈلمىگەن يۇقۇملانغۇچىلار سانىنىڭ ئېشىشىغا ئەگىشىپ، پۈتۈن شەھەردىكى ھەر مىللەت ئاممىنىڭ چۈشىنىشى، قوللىشى، يۇقۇمنىڭ ئالدىنى ئېلىش - تىزگىنلەش ئۆتكەلگە ھۇجۇم قىلىش جېڭىدە بالدۇرراق غەلىبە قىلىش ئىشەنچى ۋە ئىرادىسى يەنىمۇ چىڭىدى.
