تىيانشان تورى خەۋىرى(مۇخبىرلىرىمىز گو لىڭ، دوۋ شىڭجۈن، جانات تولقىن، يىن تۇڭيۈەن خەۋىرى، فوتوسى): 7-ئاينىڭ 23-كۈنى چۈشتىن كېيىن سائەت 5:00، ئاپتونوم رايونلۇق ھۆكۈمەت ئاخبارات ئىشخانىسى ئاخبارات ئېلان قىلىش يىغىنى ئېچىپ، نۆۋەتتىكى ئۈرۈمچى شەھىرىنىڭ يېڭى تىپتىكى تاجسىمان ۋىرۇسلۇق ئۆپكە ياللۇغى يۇقۇمى ۋە ئالدىنى ئېلىش-تىزگىنلەش خىزمىتى ئەھۋالىنى ئومۇمىي ئۇقتۇرۇش قىلدى ھەم مۇخبىرلارنىڭ سوئالىغا جاۋاب بەردى.
ئاپتونوم رايونلۇق يېڭى تىپتىكى تاجسىمان ۋىرۇسلۇق ئۆپكە ياللۇغىنى داۋالاش-قۇتقۇزۇش مۇتەخەسسىسلەر گۇرۇپپىسىنىڭ مۇئاۋىن باشلىقى لۇ چېن تونۇشتۇرۇپ مۇنداق دېدى: دۆلەت سەھىيە-ساغلاملىق كومىتېتى دۆلەت ئىچىدە ئالدىنقى قاتاردىكى سەۋىيەگە ئىگە، خۇبېي قاتارلىق جايلاردا يۇقۇمغا تاقابىل تۇرۇش ئەمەلىي جېڭىگە قاتناشقان، تەجرىبىسى مول مۇتەخەسسىسلەردىن تەشكىللەنگەن مۇتەخەسسىسلەر گۇرۇپپىسىنى بىرىنچى ۋاقىتتا شىنجاڭغا كېلىپ نەق مەيداندا يېتەكچىلىك قىلىشقا ئەۋەتتى. ئاپتونوم رايونمۇ نەپەسلىنىش، ئېغىر كېسەللىكلەر، دوختۇرخانىدا يۇقۇملىنىش، پەرۋىش، كىلىنىكىلىق داۋالاش، پىسخىكا، تەكشۈرۈش، رېنتىگىندە سۈرەتكە تارتىش قاتارلىق كەسىپلەردىكى مۇنەۋۋەر مۇتەخەسسىسلەرنى دۆلەت مۇتەخەسسىسلەر گۇرۇپپىسى بىلەن بىرلەشمە مۇتەخەسسىسلەر گۇرۇپپىسى قىلىپ تەشكىللىدى، كېيىنكى داۋالاش-قۇتقۇزۇش ئېھتىياجىغا ئاساسەن، ئالاقىدار تەتقىقات ساھەسىدىكى تېخىمۇ كۆپ مۇتەخەسسىسنى تەكلىپ قىلىمىز.
