تىيانشان تورى خەۋىرى(مۇخبىرلىرىمىز ليۇ مېڭمېڭ، دوۋ شىڭجۈن، جانات تولقىن خەۋىرى، فوتوسى): 7-ئاينىڭ 21-كۈنى چۈشتىن كېيىن سائەت 5:00تە، ئاپتونوم رايونلۇق ھۆكۈمەت ئاخبارات ئىشخانىسى ئاخبارات ئېلان قىلىش يىغىنى ئېچىپ، نۆۋەتتىكى ئۈرۈمچى شەھىرىنىڭ يېڭى تىپتىكى تاجسىمان ۋىرۇسلۇق ئۆپكە ياللۇغى يۇقۇمى ۋە ئالدىنى ئېلىش-تىزگىنلەش خىزمىتى ئەھۋالىنى ئومۇمىي ئۇقتۇرۇش قىلدى ھەمدە مۇخبىرلارنىڭ سۇئالىغا جاۋاب بەردى.
ئۈرۈمچى شەھەرلىك خەلق ھۆكۈمىتى بەنگۇڭتىڭىنىڭ مۇئاۋىن مۇدىرى لى تيەنگاڭ تونۇشتۇرۇپ مۇنداق دېدى: ئۈرۈمچى شەھىرى شەھەر رايونىنىڭ سۇ چىقىرىشنى راۋانلاشتۇرۇش خىزمىتىنى كۈچەيتىپ، سۇ چىقىرىش تۇرۇبا تورىدىكى تاسادىپىي ۋەقەلەرنى جىددىي بىر تەرەپ قىلىپ، پاسكىنا سۇنىڭ يولغا چىقىپ كەتمەسلىكى، سۇ چىقىرىشنىڭ راۋان بولۇشىغا ھەقىقىي كاپالەتلىك قىلدى. نۆۋەتتە، پۈتۈن شەھەردىكى 20 سۇ زاۋۇتىنىڭ ھەممىسى نورمال يۈرۈشمەكتە، كۈندىلىك سۇ بىلەن تەمىنلەش ئومۇمىي مىقدارى 1 مىليون 400 مىڭ كۇب مېتىر بولۇپ، پۈتۈن شەھەرنىڭ سۇ بىلەن تەمىنلەش ئىقتىدارىنىڭ %67ى ئەتراپىدا بولۇۋاتىدۇ، پۈتۈن شەھەردىكى ئاھالىلەرنىڭ تۇرمۇشقا ئىشلىتىدىغان سۇ ئېھتىياجىغا كاپالەتلىك قىلىشقا تامامەن ئىقتىدارىمىز بار.
