ئۈرۈمچى شەھەرلىك بازار نازارەت قىلىش-باشقۇرۇش ئىدارىسىنىڭ مۇئاۋىن ئىدارە باشلىقى جۇڭ مېيۋېن (ئوتتۇرىدا) مۇخبىرلارنىڭ سوئالىغا جاۋاب بەرمەكتە.
ئۈرۈمچى كەچلىك گېزىتى پۈتۈن تاراتقۇ خەۋىرى: 7-ئاينىڭ 16-كۈنىدىن بۇيان، ئۈرۈمچى شەھەرلىك بازار نازارەت قىلىش-باشقۇرۇش ئىدارىسى شەھەرلىك پارتىيە كومىتېتى، شەھەرلىك خەلق ھۆكۈمىتىنىڭ تەدبىر-ئورۇنلاشتۇرمىلىرىنى تېزدىن ئەمەلىيلەشتۈرۈپ، ئالدىنى ئېلىش-تىزگىنلەش خىزمەت لايىھەسىنى تۈزۈپ، يەتتە تەكشۈرۈش گۇرۇپپىسى قۇرۇپ، باھانى نازارەت قىلىپ باشقۇرۇشنى گەۋدىلەندۈرۈپ، يېمەكلىك، دورا بىخەتەرلىكىنى نازارەت قىلىپ باشقۇرۇش ۋە يۇقۇمدىن مۇداپىئەلىنىش ماددىي ئەشيا بازىرىنىڭ تەمىنلەشكە كاپالەتلىك قىلىش خىزمىتىنى كۈچەپ چىڭ تۇتتى. ھازىرغىچە، قانۇن ئىجرا قىلغۇچى خادىملاردىن 560 ئادەم قېتىم ئاجرىتىپ، 75 يېزا ئىگىلىك (بازارلىرى) سودا بازىرى، 237 سودا سارىيى (تاللا بازىرى)، 607 كۆكتات (ياغ، قوشۇمچە يېمەكلىك) دۇكىنىنىڭ سېتىۋېلىش يولى، مەھسۇلات سۈپىتى ۋە سېتىلىش باھاسى قاتارلىق جەھەتلەردىن نۇقتىلىق تەكشۈرۈپ، «ئىستېمالچىلارنىڭ ھوقۇق-مەنپەئەتىنى قوغداش مەسىلىسىنى تېز، قولاي ھەل قىلىش يولى» تەسىس قىلىپ، 525 پارچە ئەرز-شىكايەتنى قوبۇل قىلىپ بىر تەرەپ قىلدى. مەھەللە ۋە ئاھالىلەر ئولتۇراق رايونىدىكى كۆكتات دۇكانلىرىنىڭ باھادا قانۇنغا خىلاپ قىلمىشلىرىنى تەكشۈرۈپ بىر تەرەپ قىلىش سالمىقىنى ئاشۇرۇپ، پارچە سېتىش نۇقتىلىرىدىكى باھانىڭ ئۆسۈش نىسبىتىنى تىزگىنلىدى. شۇنىڭ بىلەن بىر ۋاقىتتا، بىڭتۇەن بىلەن يەرلىكنىڭ ماسلىشىپ بىرلىكتە ھەرىكەت قىلىشنى كۈچەيتىپ، شىنليەن بازىرى، بېييۈەنچۈن بازىرى، جيۇدىڭ بازىرى قاتارلىق توپ سېتىش بازارلىرىنى نازارەت قىلىپ تەكشۈرۈشنى كۈچەيتىپ، توپ سېتىش باھاسىنى قاتتىق كونترول قىلىپ، توپ ۋە پارچە سېتىشتا باھانى ئېنىق قىلماسلىق، مال كىرگۈزۈش ئىسپاتى بىلەن تەمىنلىمەسلىك ۋە باھانى خالىغانچە ئۆستۈرۈۋېلىشتىن ئىبارەت ئۈچ خىل قىلمىشنى نۇقتىلىق تەكشۈرۈپ بىر تەرەپ قىلىپ، مال باھاسىنىڭ مۇقىم بولۇشىغا ھەقىقىي كاپالەتلىك قىلدى.
يېزا ئىگىلىك مەھسۇلاتلىرى، دېڭىز مەھسۇلاتلىرى بازىرىنى باشقۇرۇش كۈچەيتىلىپ، ئىمپورت قىلىنغان دېڭىز مەھسۇلاتلىرى ۋە چارۋا، ئۆي قۇشلىرى گۆشى تۈرىدىكى يېمەكلىكلەرنىڭ نوكلېئىك كىسلاتاسىنى ئەۋرىشكە ئېلىپ تەكشۈرۈش خىزمىتى قانات يايدۇرۇلدى. ھازىرغا قەدەر، جەمئىي 9081 تىجارەت سۇبيېكتى تەكشۈرۈلۈپ، 15 مىڭ 308 ئەۋرىشكە ئېلىپ تەكشۈرۈلدى، تەكشۈرۈش نەتىجىسىنىڭ ھەممىسى مەنپىي چىقتى. ئەشيا ئوبوروتى، يەتكۈزۈش كەسپىدە توشۇلىدىغان بۇيۇملارغا قارىتا، ئالاقىدار تىجارەت سۇبيېكتىدىن 150ى تەكشۈرۈلۈپ، 433 ئەۋرىشكە ئېلىندى، تەكشۈرۈش نەتىجىسىنىڭ ھەممىسى مەنپىي چىقتى.
شۇنىڭ بىلەن بىر ۋاقىتتا، كۈچ مەركەزلەشتۈرۈلۈپ دورا تىجارىتى قىلىدىغان، ئىشلىتىدىغان 232 ئورۇن نازارەت قىلىپ تەكشۈرۈلۈپ، ۋىرۇسقا قارشى دورىلار، ماسكا، ئىسپىرت قاتارلىق يۇقۇمدىن مۇداپىئەلىنىش ماددىي ئەشيالىرىنىڭ كېلىش مەنبەسىنى سۈرۈشتە قىلىشقا بولىدىغان، سۈپىتىنىڭ لاياقەتلىك، تەمىناتىنىڭ يېتەرلىك، باھاسىنىڭ مۇقىم بولۇشىغا ھەقىقىي كاپالەتلىك قىلىندى. نۆۋەتتە، ليەنخۇا چىڭۋېن كاپسۇلى، ۋىرۇسقا قارشى دورىسى(抗病毒颗粒)، بەنلەنگېن، 84 دېزىنفېكسىيە سۇيۇقلۇقى، ئىسپىرت، ماسكا قاتارلىق بۇيۇملارنىڭ پارچە سېتىلىش باھاسى مۇقىم بولدى.
