تىيانشان تورى خەۋىرى(ئىختىيارىي مۇخبىر لى دەندەن خەۋىرى، فوتوسى): مەكتەپلەر مائارىپ سىستېمىسىنىڭ «يۇقۇم»غا قارشى جەڭ قىلىدىغان ئاساسلىق جەڭ مەيدانى. 3-ئاينىڭ 23-كۈنى، كۇچا شەھىرى دۇڭچىڭ دوختۇرخانىسى سەككىز مۇتەخەسسىسنى تەشكىللەپ تەشۋىق قىلىش ئەترىتى قۇرۇپ، ياڭمىڭ باشلانغۇچ مەكتىپى، كۇچا شەھەرلىك 8-باشلانغۇچ مەكتەپ ۋە ئوچا بازىرى ساقاغۇ باشلانغۇچ مەكتىپىگە بېرىپ، تۈركۈمگە بۆلۈپ، تۈرگە ئايرىپ، دېزىنفېكسىيەش، باكتېرىيە ئۆلتۆرۈش بىلىملىرى بويىچە مەكتەپتىكى داۋالاش ۋە پەرۋىش خادىملىرى، ئارقا سەپ خادىملىرىنى تەربىيەلەپ، ئوقۇغۇچىلارنىڭ ئوقۇشنى نورمال داۋاملاشتۇرۇشىغا كاپالەتلىك قىلدى.
بۇ قېتىمقى تەربىيەلەشتە يېڭى تىپتىكى تاجسىمان ۋىرۇسلۇق ئۆپكە ياللۇغى يۇقۇمىنىڭ تارقىلىش يوللىرى، ئالدىنى ئېلىش-تىزگىنلەش نەزەرىيە بىلىملىرى، شۇنداقلا دېزىنفېكسىيە سۇيۇقلۇقىنى تاللاپ ئىشلىتىش، تەڭشەش، دېزىنفېكسىيە ئەسۋابلىرىنى ئىشلىتىش قاتارلىقلار ئاساس قىلىنىپ، دېزىنفېكسىيەلەش تەرتىپى، ئۇسۇلى ۋە دېزىنفېكسىيە جەريانىدا دىققەت قىلىشقا تېگىشلىك ئىشلار قاتارلىقلار چۈشەندۈرۈلدى ۋە ئۈلگە كۆرسىتىلدى، شۇنداقلا سىنىپ، ھاجەتخانا، ئاشخانا، ياتاق، تەنتەربىيە سارىيى، كارىدور، پەلەمپەي ۋە رېشاتقا قاتارلىقلارنى قانداق قىلغاندا ئىلمىي، توغرا دېزىنفېكسىيەلىگىلى بولىدىغانلىقى توغرىسىدا ئەمەلىي يېتەكچىلىك قىلىندى.
