تىيانشان تورى خەۋىرى (مۇخبىرىمىز خۇ شياۋشياۋ، ئىختىيارىي مۇخبىر جاڭ يىڭشيا خەۋىرى): 2- ئاينىڭ 28- كۈنى، مۇخبىرنىڭ جۇڭگو بانكا نازارەتچىلىكى كومىتېتى ئاقسۇ نازارەت قىلىپ باشقۇرۇش شۆبە ئىدارىسىدىن ئىگىلىشىچە، ئاقسۇ ۋىلايىتىدىكى چوڭ تىپتىكى بانكا ئاپپاراتلىرى ئاقسۇ بانكا نازارەتچىلىكى شۆبە ئىدارىسى ۋە كەسپىي جەمئىيەتنىڭ «يۇقۇم مەزگىلىدە ئاقسۇ بانكىچىلىق، سۇغۇرتىچىلىق ساھەسىدە ئىشنى، ئىشلەپچىقىرىشنى ئەسلىگە كەلتۈرۈپ، بىخەتەر تىجارەت قىلىش ۋە خېرىدارلارغا مۇلازىمەت قىلىشقا ئالاقىدار ئىشلارنى ياخشى ئىشلەش توغرىسىدىكى ئۇقتۇرۇش»نى قاتتىق ئەمەلىيلەشتۈرۈپ، ئارقا-ئارقىدىن ئىشنى ئەسلىگە كەلتۈرۈشنى تەلەپ قىلغان.
ئاقسۇ ۋىلايىتىنىڭ ھەرقايسى چوڭ بانكا ئاپپاراتلىرىدىكى ئىشىك ئاچقۇچى تور نۇقتىسى ئىشچى-خىزمەتچىلىرى يېرىم سائەت ئىلگىرى تور نۇقتىسىغا يېتىپ بېرىپ، ماسكا تاقاپ، بەدەن تېمپېراتۇرىسىنى ئۆلچىتىپ، تىجارەت ئىش ئورنىغا كىرىپ، تىجارەت سورۇنى، ئاپتوماتىك ئەسلىھەلەر، ماشىنا-سايمانلار، زاپاس نەق پۇل قاتارلىقلارنى دېزىنفېكسىيەلەپ بىر تەرەپ قىلغان. تىجارەت قىلىۋاتقان مەزگىلدە خىزمەتچى خادىملار پۈتۈن خىزمەت جەريانىدا ماسكا تاقاپ، ھەركۈنى ئۈچ قېتىم بەدەن تېمپېراتۇرىسىنى ئۆلچەپ، ئاپتوماتىك ئەسلىھە قاتارلىقلارنى دېزىنفېكسىيەلەپ بىر تەرەپ قىلغان. مۇلازىمەتتە تور نۇقتىسىغا كەسىپ بېجىرگىلى كەلگەن خېرىدارلارغا ماسكا تاقىمىسا قوبۇل قىلماسلىق، بەدەن تېمپېراتۇرىسىنى ئۆلچەتمىسە قوبۇل قىلماسلىق، بەدەن تېمپېراتۇرىسى بىنورمال بولسا كىرگۈزمەسلىكتەك ئالدىنى ئېلىش-تىزگىنلەش تەدبىرلىرىدە چىڭ تۇرغان، بۇ ئارقىلىق ئىشچى- خىزمەتچىلەر خېرىدارلارنىڭ ساغلاملىقى ۋە بىخەتەرلىكىگە ھەقىقىي كاپالەتلىك قىلغان.
