2-ئاينىڭ 13-كۈنى، جاڭ مېي(ئوڭدا) كۇچا شەھىرى شىنچېڭ كوچا باشقارمسى سەھىيە مۇلازىمەت مەركىزىنىڭ ئالدىن تەكشۈرۈش، ئايرىپ دىياگنوز قويۇش ئۆيىدە تېببىي خادىمنىڭ ئۆلچەملەشكەن مەشغۇلاتىغا يېتەكچىلىك قىلماقتا.
شۈ مىڭمىڭ خەۋىرى، فوتوسى: تيەن ياۋېي جىنەن تېببىي شۆيۈەنى كىلىنكىلىق داۋالاش 2-يىللىقىنىڭ ئوقۇغۇچىسى بولۇپ، 1-ئاينىڭ 2-كۈنى تەتىل قىلىپ كۇچا شەھىرىگە قايتىپ كەلگەندىن كېيىن، ئەڭ چوڭ ئارزۇسى ئاتا-ئانىسىغا ھەمراھ بولۇپ، جەم بولۇش تامىقى يېيىش ئىدى.
ئەمما يۇقۇمنىڭ ئالدىنى ئېلىش-تىزگىنلەش خىزمىتى قانات يايدۇرۇلغاندىن بۇيان، كۇچا شەھىرى شىنچېڭ كوچا باشقارمىسى دوستلۇق مەھەللىسى پارتىيە ياچېيكىسىنىڭ شۇجىسى بولغان دادىسى تيەن چىتاۋ ئىزچىل خىزمەت ئورنىدا چىڭ تۇرۇپ كەلدى. دادىسى تېلېفوندا مۇنداق دېدى: «يۇقۇمنىڭ ئالدىنى ئېلىش خىزمىتى ئاھالىلەرنىڭ ھاياتىي بىخەتەرلىكىگە مۇناسىۋەتلىك، بىخەستىلىك قىلىشقا بولمايدۇ، بۇ بىر مەزگىللىك ئالدىراشلىق تۈگىگەندىن كېيىن ئۆيگە قايتىمەن».
بۇ مەزگىلدە كۇچا شەھىرى شىنچېڭ كوچا باشقارمىسى سەھىيە مۇلازىمەت مەركىزىنىڭ مۇدىرى بولغان ئاپىسى جاڭ مېيمۇ يۇقۇمنىڭ ئالدىنى ئېلىش -تىزگىنلەش بىرىنچى سېپىدە خىزمەت قىلىۋاتاتتى. تيەن ياۋېي ئاپىسى بىلەن ئاساسەن ئۈندىداردا ئالاقىلىشەتتى. «ئاپا، ئۆزىڭىزنى ياخشى ئاسراڭ»، «ھېچقىسى يوق قوزام، دوختۇرخانىدا كۆز ئاسراش ئەينىكى، مۇداپىئە كىيىمى، ماسكا، مۇداپىئە قالپىقى، مۇداپىئە ئايىغى بار، ئاپىڭىز ناھايىتى بىخەتەر»، «ئاپا، ۋاقتىدا تاماق يەڭ، چارچىغاندا بىردەم ئارام ئېلىڭ»، «بولىدۇ، ئاپىڭىز بىر پارتىيە ئەزاسى، ھازىر ئاغرىقلار ماڭا موھتاج...» بۇ ئۇنىڭ ئاپىسى بىلەن بولغان كۈندىلىك ئۈندىدار خاتىرىسى ئىدى.
«دادا، ئاپا، سىلەر ھەممىدىن قالتىس، سىلەر قەھرىمان، يۇقۇمغا تاقابىل تۇرۇش جەڭچىسى!» دېدى تيەن ياۋېي.
