تىيانشان تورى خەۋىرى (مۇخبىرىمىز دۇەن شياۋلى، ئىختىيارىي مۇخبىرىمىز جى خەيشيا خەۋىرى): 1-ئاينىڭ 30-كۈنى، مۇخبىرنىڭ جۇڭگو پوچتا گۇرۇھى چەكلىك شىركىتى شىنجاڭ شۆبىسى(تۆۋەندە شىنجاڭ پوچتىسى دېيىلىدۇ)دىن ئىگىلىشىچە، بۇ شىركەت يېشىل يول ئېچىپ، يۇقۇمنىڭ ئالدىنى ئېلىشقا ئىئانە قىلىنغان ماددىي ئەشيالارنى ھەقسىز يەتكۈزۈش مۇلازىمىتى بىلەن تەمىنلىگەن.
ئىگىلىنىشىچە، يېقىندا شىنجاڭ پوچتىسى يېشىل يول ئېچىپ، يۇقۇمنىڭ ئالدىنى ئېلىشقا ئىئانە قىلىنغان ماددىي ئەشيالارنى خالىس يەتكۈزۈش مۇلازىمىتى بىلەن تەمىنلەش توغرىسىدا جىددىي ئۇقتۇرۇش تارقاتقان ھەمدە ھەرقايسى ۋىلايەت، ئوبلاست، شەھەرلىك شۆبە شىركەتلەرنى تەشەببۇسكارلىق بىلەن قىزىل كىرېست جەمئىيىتى، سەھىيە-ساغلاملىق كومىتېتى قاتارلىقلار بىلەن ئۇدۇللاشتۇرۇشقا تەشكىللەپ، يۇقۇمنىڭ ئالدىنى ئېلىش ماددىي ئەشيالىرىنى ھەقسىز يەتكۈزۈش مۇلازىمىتى بىلەن تەمىنلىگەن.
پوچتا يوللانمىلىرىنى قوبۇل قىلىشتا توردا يەتكۈزۈش مۇلازىمىتى يولغا قويۇلدى، ئابۇنىچىلار پوچتا 11183 نومۇرغا تېلېفون قىلىش ياكى «EMS جۇڭگو پوچتا تېز يەتكۈزۈش ئەشيا ئوبوروتى» ئۈندىدار سۇپىسى ئارقىلىق زاكاس چۈشۈرسە بولىدۇ، ئاھالىلەر ئۆيدىن چىقماي تۇرۇپ پوچتىدىن يەتكۈزۈش كەسپىنى بېجىرەلەيدۇ.
توردا يەتكۈزۈش ھالقىسىدا، بۇ شىركەتنىڭ ھەر قايسى پوچتا يوللانمىلىرىنى بىر تەرەپ قىلىش مەركەزلىرى مەشغۇلات رايونىغا كىرگەن ھەر بىر خىزمەتچىنىڭ بەدەن تېمپېراتۇرىسىنى تەكشۈرۈپ، بارلىق ئىشلەپچىقىرىش خادىملىرىنىڭ ماسكا تاقاپ مەشغۇلات قىلىشىغا كاپالەتلىك قىلدى؛ يەتكۈزۈش خادىملىرى پۈتۈن مۇساپىدە ماسكا تاقاپ، ئىش ئورنىغا چىققاندا ۋە ئىسمېنا ئالماشقاندا بەدەن تېمپېراتۇرىسى تەكشۈرۈلدى؛ ھەر كۈنى ئىشلەپچىقىرىش مەيدانى ۋە پوچتا يەتكۈزۈش ئاپتوموبىللىرى ئومۇميۈزلۈك دېزىنفېكسىيە قىلىندى.
بۇنىڭدىن باشقا، شىنجاڭ پوچتىسى يەنە پوچتا پۇل مۇئامىلە مۇلازىمىتى يېشىل يولىنى ئېچىپ، تۈرلۈك پۇل ئىئانە قىلغاندا، تىجارەت تور نۇقتىلىرىدا ئىش بېجىرگەندە رەسمىيەت ھەققىنى كەچۈرۈم قىلدى.
