تىيانشان تورى خەۋىرى (ئىختىيارىي مۇخبىر دۇ جيەنۋۇ): يېقىنقى مەزگىلدە، شىنجاڭ قەشقەر ۋىلايىتى يېڭىسار ناھىيەسى ماڭشىن بازىرى تۆۋەن ئارامەھەللە كەنتىنىڭ ئاھالىسى مەرىگۈل مەمەتتۇرسۇن ئائىلىسىنىڭ پارنىكى يىغىۋېلىشنىڭ بېسىق مەزگىلىنى كۈتۈۋالدى. ئۇنىڭ كۆڭۈل قويۇپ پەرۋىش قىلىشى ئارقىسىدا، ئۆسۈش ئەھۋالى كىشىنى خۇشال قىلىدىغان يۇمغاقسۈت يىغىۋېلىش باسقۇچىغا كىردى.
مەرىگۈلنىڭ مۇخبىرغا ئېيتىپ بېرىشىچە، پارنىكتا ئۆستۈرۈلگەن يۇمغاقسۈتلەر خىزمەت ئەترىتىدىكىلەرنىڭ ياردىمىدە، مەركەزلەشتۈرۈپ مال تارقىتىش ياكى پارچە سېتىش قاتارلىق شەكىللەر ئارقىلىق سېتىلغان بولۇپ، بۇنىڭدىن 4000 يۈەندىن ئارتۇق كىرىم قىلىنغان. بۇ، تۇنجى قېتىم كەڭ كۆلەمدە يۇمغاقسۈت ئۆستۈرگەن مەرىگۈلگە ئۈمىد بېغىشلاپ، ئۇنىڭ نامراتلىقتىن قۇتۇلۇپ بېيىشىغا بولغان ئىشەنچىسىنى تېخىمۇ ئاشۇرغان.
ئىگىلىنىشىچە، مەرىگۈل پارتىيەنىڭ خەلققە نەپ يەتكۈزۈش سىياسەتلىرىنىڭ يېتەكچىلىكىدە، يەنە ئۆي ھايۋانلىرىنى بېقىپ، تەشەببۇسكارلىق بىلەن باقمىچىلىقنى تەرەققىي قىلدۇرغان؛ شۇنىڭ بىلەن بىرگە، يەنە سەمەت ئۆرۈكى، كۆممىقوناق، بۇغداي تېرىقچىلىقى قاتارلىقلارنى زور كۈچ بىلەن راۋاجلاندۇرغان، بۇنىڭ بىلەن ئىقتىسادىي كىرىم قۇرۇلمىسىدا زور ئۆزگىرىش يۈز بېرىپ، كىرىم يوللىرى كۆپەيگەن. بۇلتۇر بىر يىلدا، ئۇنىڭ ئائىلىسىنىڭ يىللىق كىرىمى 50 مىڭ يۈەندىن كۆپرەككە يەتكەن بولۇپ، بۇرۇنقىغا سېلىشتۇرغاندا بىر ھەسسە قاتلانغان.
بىر يىل داۋاملاشقان ئۈزلۈكسىز سىناق ۋە ئەمەلىيەت ئارقىلىق، كەنتتە تۇرۇشلۇق خىزمەت ئەترىتىنىڭ يېتەكلىشى ۋە تۈرتكىسىدە، مەرىگۈلگە ئوخشاش «بېيىش ماھىرى» لىرى شۇ جايدا ئارقا-ئارقىدىن بارلىققا كەلدى. يۇمغاقسۈت، لازا، چەيزە، ئادەتتىكى مېۋە-چېۋە ۋە كۆكتات، گۈل-گىياھ ئۆستۈرۈش قاتارلىق تۈرلۈك كەسىپلەر يەرلىكتە تەدرىجىي گۈللەندى. كەنت ئاھالىلىرىنىڭ كىرىم ئاشۇرۇش يوللىرى كۆپىيىپ، يانچۇقى ئاستا-ئاستا تومپىيىپ، تۇرمۇشى ياخشىلىنىپ، كۈنلىرى خۇشال-خۇراملىققا تولدى، خىزمەت ئەترىتى يەرلىكتىكى كەنت ئاھالىلىرىنىڭ يۈكسەك ماختىشى ۋە بىردەك ياخشى باھاسىغا ئېرىشتى.
