شىنجاڭ گېزىتى، ئۈرۈمچى، 4 - ئاينىڭ 1 - كۈنى خەۋىرى ئانار بۇلۇت\شىنجاڭ گېزىتى مۇخبىرى جاۋ يۆ خەۋەر قىلىدۇ: 4 - ئاينىڭ 1 - كۈنى، «باج . قانۇنچىللىق . ئادىللىق» باش تېما قىلىنغان بىر مەيدان يۇقىرى قاتلاملىقلار سۆھبىتى ئۈرۈمچىدە ئۆتكۈزۈلۈپ، شىنجاڭنىڭ 34 - قېتىملىق مەملىكەتلىك باج تەشۋىقات ئېيى پائالىيىتىنىڭ مۇقەددىمىسى باشلاندى.
بۇ يىل 4 - ئاي 34 - قېتىملىق مەملىكەتلىك باج تەشۋىقات ئېيى، شۇنداقلا ئاپتونوم رايوننىڭ 22 - قېتىملىق ئاساسىي قانۇن، قانۇن تەشۋىقات ئېيى. شۇ كۈنى، دۆلەت باج باش ئىدارىسى خەلقئارا باج مەھكىمىسى، ئاپتونوم رايونلۇق باج ئىدارىسى، ئاپتونوم رايونلۇق ئەدلىيە نازارىتى، ئاپتونوم رايونلۇق سودا نازارىتى، ئاپتونوم رايونلۇق سودا - سانائەتچىلەر بىرلەشمىسى، ئاپتونوم رايوننىڭ «بىر بەلباغ، بىر يول» قۇرۇلۇشىنى يولغا قويۇشنى ئالغا سىلجىتىش رەھبەرلىك گۇرۇپپىسى ئىشخانىسىدىكى ئالاقىدار مەسئۇللار مۇتەخەسسىسلەر، ئالىملار، مەملىكەتلىك خەلق قۇرۇلتىيىنىڭ شىنجاڭدىكى ۋەكىللىرى، A دەرىجىلىك باج تاپشۇرغۇچىلار ۋەكىللىرى بىلەن يۇقىرى، يېڭى ئىختىساسلىقلار سارىيىغا جەم بولۇپ، ئاساسىي قانۇنغا، قانۇنغا ھۆرمەت قىلىش، باجنى قانۇن بويىچە ئىدارە قىلىش، بەلگىلىمىگە ئۇيغۇن تىجارەت قىلىش، سەمىمىي باج تاپشۇرۇش ھەم قانداق قىلىپ يۇقىرى سەۋىيەدە سىرتقا ئېچىۋېتىشنى ئالغا سىلجىتىش، تىجارەت - سودا مۇھىتىنى ئەلالاشتۇرۇش قاتارلىقلارنى چۆرىدەپ سۆھبەت ئېلىپ باردى.
ئاپتونوم رايونلۇق ئەدلىيە نازارىتىنىڭ 2 - دەرىجىلىك كۆزەتكۈچىسى جاڭ ۋېيپىڭ مۇنداق تونۇشتۇردى: بۇ يىل، باج قانۇنى تەشۋىقاتى پۈتۈن شىنجاڭنىڭ قانۇنچىللىق تەشۋىقات سىستېمىسىغا كىرگۈزۈلدى. ئاپتونوم رايوننىڭ قانۇن يۈرگۈزۈش تارماقلىرى باج تارماقلىرى بىلەن بىرلىكتە باج تەشۋىقات ئېيى ۋە ئاساسىي قانۇن، قانۇن تەشۋىقات ئېيى پائالىيىتىنى ماس قەدەمدە قانات يايدۇرىدۇ. ئاساسىي قانۇن بىلەن باج قانۇنى تەشۋىقاتى ماس قەدەمدە ئىلگىرىلەپ، چوڭقۇر يۇغۇرۇلۇپ، جەمئىيەت قاتلىمىدا ياخشى بولغان قانۇن ئومۇملاشتۇرۇش تۈرتكىلىك ئۈنۈمىنى جارى قىلدۇرىدۇ.
قانۇن يۈرگۈزۈش تارماقلىرى بىلەن ھەمكارلىشىپ، «ئاساسىي قانۇن» «باج» يۇغۇرما تەشۋىقاتىنى قانات يايدۇرغاندىن باشقا، ئاپتونوم رايونلۇق باج ئىدارىسى يەنە كەسىپ مۇتەخەسسىسلىرىنى باج قانۇنى تەشۋىقات سۇپىسىغا چىقىرىپ، «سىرتقا چىقىرىش» كارخانىلىرىنى ئەقلىي كۈچ مەدىتى بىلەن تەمىنلەيدۇ.
«قانۇنچىللىق <بىر بەلباغ، بىر يول>نى ئورتاق بەرپا قىلىشنىڭ مۇھىم ئاساسى ۋە كاپالىتى، باجنى قانۇن بويىچە ئىدارە قىلىش چېگرا ھالقىغان مەبلەغ سالغۇچىلارنى باج ئېنىقلىقى بىلەن تەمىنلەپ، دۆلەت ھالقىغان كارخانىلارنى <سىرتقا چىقىرىش>قا كۈچ قوشىدۇ» «باج يولىنى راۋانلاشتۇرۇش» چېگرا ھالقىغان مۇلازىمەت ماركىسى قۇرۇلۇشى ئەھۋالىنى تونۇشتۇرغاندىن كېيىن، دۆلەت باج باش ئىدارىسى خەلقئارا باج مەھكىمىسىنىڭ 2 - دەرىجىلىك كۆزەتكۈچىسى، چېگرا سىرتى باج ئىشلىرى باشقارمىسىنىڭ باشقارما باشلىقى گاۋ فېڭ شۇنداق دېدى.
«قانۇنغا رىئايە قىلىپ تىجارەت قىلىش ھەرقانداق كارخانا جەزمەن ئەمەل قىلىشقا تېگىشلىك پىرىنسىپ، شۇنداقلا ئۇزاق مەزگىللىق تەرەققىيات يولى.» ئاپتونوم رايونلۇق سودا - سانائەتچىلەر بىرلەشمىسى ئىقتىساد ئالاقە بۆلۈمى (خەلقئارا ھەمكارلىق بۆلۈمى)نىڭ بۆلۈم باشلىقى ۋاڭ شياۋفېڭ مۇنداق بىلدۈردى: قانۇن بويىچە سەمىمىي باج تاپشۇرۇش كارخانىلارنىڭ باجغا ئالاقىدار قانۇن خەۋپ - خەتىرىنىڭ ئالدىنى ئېلىشىغا ياردەم بېرىپلا قالماي، يەنە قانۇنچىل ئادىل باج تىجارەت - سودا مۇھىتى بەرپا قىلىشقا پايدىلىق بولۇپ، كارخانىلارنى بازار رىقابىتىگە ئادىل، تەرتىپلىك قاتنىشىش ئىمكانىيىتىگە ئىگە قىلىدۇ.
جىنفېڭ پەن - تېخنىكا پاي چەكلىك شىركىتى دۇنيا بويىچە يېڭى ئېنېرگىيە كارخانىلىرى ئىچىدىكى 500 كۈچلۈك كارخانا بولۇش سۈپىتى بىلەن، ئۇدا ئون يىل باج تاپشۇرۇش ئىناۋەت دەرىجىسى بويىچە A دەرىجىلىك بولۇپ باھالاندى. «قانۇن بويىچە باج تاپشۇرۇش تەننەرخ ئەمەس، بەلكى سېلىنما. يىراق كەلگۈسىدىن قارىغاندا، بۇ خىل ئىناۋەت قوللاش قىممىتى كۆپ تەرەپتىن ئەمەلىي پايدىغا ئايلىنىدۇ.» جىنفېڭ پەن - تېخنىكىسىنىڭ باج ئىشلىرى مەسئۇلى جاڭ خۇەنخۇەن مۇنداق دېدى: يېقىنقى بىرنەچچە يىلدا چوڭ - چوڭ تۈرلەرگە خېرىدار چاقىرىش ۋە خەلقئارا تۈرلەرگە مەبلەغ يۈرۈشتۈرۈشتە، قېلىپلاشقان باج تاپشۇرۇش خاتىرىسى زۆرۈر شەرت بولۇپ قالدى. كەسكىن بازار رىقابىتىدە، ياخشى بولغان باج تاپشۇرۇش ئىناۋىتى كارخانىنىڭ تەرەققىياتىغا نۇرغۇن نومۇر قوشىدۇ.
ئاپتونوم رايونلۇق باج ئىدارىسىنىڭ باش بوغالتىرى شۇ ميەن مۇنداق بىلدۈردى: ئاپتونوم رايونلۇق باج ئىدارىسى كارخانىلارنى بەلگىلىمىگە ئۇيغۇن تىجارەت قىلىشقا پائال يېتەكلەپ، باجغا ئالاقىدار قانۇنغا خىلاپ دېلو مىساللىرىنى ئاشكارىلاش ۋە ياش - ئۆسمۈرلەر ئارىسىدا باج قانۇنىنى ئومۇملاشتۇرۇش قاتارلىق تەشۋىقات پائالىيەتلىرىنى تەشكىللەپ قانات يايدۇرۇپ، پۈتكۈل جەمئىيەتنىڭ باج قانۇنىغا ئەمەل قىلىش دەرىجىسى ۋە قانۇن بويىچە باج تاپشۇرۇش شان - شەرەپ تۇيغۇسىنى يەنىمۇ ئۆستۈرۈپ، شىنجاڭنىڭ ئىقتىساد، جەمئىيىتىنىڭ يۇقىرى سۈپەتلىك تەرەققىياتىغا كۈچ قوشۇپ ئۈنۈمنى ئاشۇرىدۇ.
