شىنجاڭ گېزىتى، ئۈرۈمچى، 4 - ئاينىڭ 1 - كۈنى خەۋىرى ئانار بۇلۇت\شىنجاڭ گېزىتى مۇخبىرى رېن خۇا خەۋەر قىلىدۇ: 4 - ئاينىڭ 1 - كۈنى، ئاپتونوم رايوننىڭ «داۋاملاشتۇرۇش . 2025 . چىڭمىڭدا قەھرىمانلار، ئىنقىلابىي قۇربانلارغا تەزىيە بىلدۈرۈش» پائالىيىتى ئۈرۈمچى شەھىرىدىكى ئىنقىلابىي قۇربانلار قەبرىستانلىقىدا باشلاندى.
بۇ يىل جۇڭگو خەلقىنىڭ ياپون تاجاۋۇزچىلىرىغا قارشى تۇرۇش ئۇرۇشى ۋە دۇنيا فاشىزمغا قارشى تۇرۇش ئۇرۇشى غەلىبىسىنىڭ 80 يىللىقى، جۇڭگو خەلق پىدائىي قىسمىنىڭ ئامېرىكا جاھانگىرلىكىگە قارشى تۇرۇپ چاۋشيەنگە ياردەم بېرىش ئۈچۈن دۆلەتتىن چىقىپ ئۇرۇش قىلغانلىقىنىڭ 75 يىللىقى، ئاپتونوم رايوندىكى ھەربىيلىكتىن چېكىنگەنلەر ئىشلىرى تارماقلىرى 4 - ئايدا «داۋاملاشتۇرۇش . 2025 . چىڭمىڭدا قەھرىمانلار، ئىنقىلابىي قۇربانلارغا تەزىيە بىلدۈرۈش» پائالىيىتىنى قانات يايدۇرۇشنى ئورۇنلاشتۇرۇپ، «تارىخنى ئەستە چىڭ ساقلاش، ئىنقىلابىي قۇربانلارنى ياد ئېتىش، تىنچلىقنى قەدىرلەش، كەلگۈسىنى يارىتىش»تىن ئىبارەت بۇ باش تېمىنى چۆرىدەپ، ياپون تاجاۋۇزچىلىرىغا قارشى تۇرۇش ئۇرۇشىغا مۇناسىۋەتلىك ئىنقىلابىي قۇربانلارنى خاتىرىلەش ئەسلىھەلىرى، ۋەتەنپەرۋەرلىك تەربىيەسى بازىسى قاتارلىق بايلىقلاردىن تولۇق پايدىلىنىپ، خاسلىقى روشەن، ئىچكى خاس مەزمۇنى مول ئاممىۋى خاراكتېرلىك خاتىرىلەش، ئەسلەش پائالىيەتلىرىنى قانات يايدۇرىدۇ. شۇنىڭ بىلەن بىللە، ھەر دەرىجىلىك پىيونېرلار ئەترىتى تەشكىلاتلىرىنىڭ يېقىن ئەتراپتا، قولاي جايدا چىڭمىڭ بايرىمى مەزگىلىدە ئىنقىلابىي قۇربانلار قەبرىستانلىقى، ئىنقىلابىي قۇربانلار كۆرگەزمىخانىسى قاتارلىق ۋەتەنپەرۋەرلىك تەربىيەسى بازىسىغا بېرىپ، «قىزىل گالىستۇكلۇقلار قەھرىمانلار، ئىنقىلابىي قۇربانلارغا ئېھتىرام بىلدۈرۈش» باش تېمىلىق ئەترەت كۈنى قاتارلىق ئەمەلىيەت پائالىيەتلىرىنى قانات يايدۇرۇشقا يېتەكچىلىك قىلىپ، پىيونېرلارنى تارىخنى ئەستە چىڭ ساقلاشقا، قەھرىمانلارغا ئېھتىرام بىلدۈرۈشكە يېتەكلەيدۇ.
ئاپتونوم رايون يەنە قەھرىمانلار، ئىنقىلابىي قۇربانلارغا ئېھتىرام بىلدۈرۈش ئەمەلىيىتىنى مەھەللىلەرگە كىرگۈزۈش پائالىيىتىگە تۈرتكە بولۇپ، ياپون تاجاۋۇزچىلىرىغا قارشى تۇرۇش ئۇرۇشىدىكى ئىنقىلابىي قۇربانلارنىڭ ئۇرۇق - تۇغقانلىرىنى زىيارەت قىلىش ۋە ئۇلاردىن ھال سوراشنى تەشكىللەپ، ئىنقىلابىي قۇربانلار ئائىلە تەۋەلىرى ئائىلىسىنىڭ ئەمەلىي قىيىنچىلىقىنى ھەل قىلىپ بېرىدۇ. پىيونېرلارنى ئىنقىلابىي قۇربانلار ئائىلە تەۋەلىرى ئائىلىسىگە غەمخورلۇق قىلىش، يار - يۆلەك بولۇشقا دەل ۋاقتىدا تەشكىللەپ، ئىللىقلىق يەتكۈزۈش پىدائىيلار مۇلازىمىتىنى قانات يايدۇرۇپ، قەھرىمانلار، ئىنقىلابىي قۇربانلارغا بولغان ھېسسىياتنى كۈچەيتىدۇ. بۇنىڭدىن باشقا، ئىنقىلابىي قۇربانلارنىڭ ئۇرۇق - تۇغقانلىرىنى ئىزدەش پائالىيىتىنى دائىملىق قانات يايدۇرۇپ، زامانىۋى تارقىتىش تېخنىكىسى ۋاسىتىسىدىن تولۇق پايدىلىنىپ، ئۇرۇق - تۇغقان ئىزدەش خەۋىرىنى ئېلان قىلىپ، ئۇرۇق - تۇغقان ئىزدەش يىپ ئۇچىنى تەكشۈرۈپ، كەڭ ئىنقىلابىي قۇربانلار ئائىلە تەۋەلىرى ۋە جەمئىيەت كۆڭۈل بۆلۈۋاتقان مەسىلىلەرگە پائال جاۋاب قايتۇرىدۇ.
چىڭمىڭ بايرىمى مەزگىلىدە، جۇڭخۇا قەھرىمانلار، ئىنقىلابىي قۇربانلار تورى، ھەربىيلىكتىن چېكىنگەنلەر ئىشلىرى مىنىستىرلىقىنىڭ تور بېكىتى، جۇڭگو پىيونېرلار ئەترىتى تور بېكىتىدە «داۋاملاشتۇرۇش . 2025 . چىڭمىڭدا قەھرىمانلار، ئىنقىلابىي قۇربانلارغا تەزىيە بىلدۈرۈش» توردا تەزىيە بىلدۈرۈش، قەبرە يوقلاش سۇپىسى تەسىس قىلدى. شىنجاڭ قەھرىمانلار، ئىنقىلابىي قۇربانلار تورى، ھەر دەرىجىلىك ھەربىيلىكتىن چېكىنگەنلەر ئىشلىرى تارماقلىرىنىڭ كۆزنەك تور بېكەتلىرى ۋە ۋىيشىن ئاممىۋى سۇپىلىرىمۇ تەزىيە بىلدۈرۈش، قەبرە يوقلاش سۇپىسى ئېچىپ، جەمئىيەتتىكى ئاممىنىڭ توردا قەھرىمانلار، ئىنقىلابىي قۇربانلار ئۈچۈن تەزىيە بىلدۈرۈشى، قەبرە يوقلىشى، ئىنقىلابىي قۇربانلارنى خاتىرىلەش ئەسلىھەلىرىگە ئېھتىرام بىلدۈرۈشىنى يول بىلەن تەمىنلەپ، پائال ئالغا ئىلگىرىلەيدىغان تور مەدەنىيلىكى كەيپىياتىنى يېتىلدۈرىدۇ.
شۇ كۈنى، «داۋاملاشتۇرۇش . 2025 . چىڭمىڭدا قەھرىمانلار، ئىنقىلابىي قۇربانلارغا تەزىيە بىلدۈرۈش» پائالىيىتى پۈتۈن شىنجاڭنىڭ ھەرقايسى جايلىرىدا ماس قەدەمدە قانات يايدۇرۇلدى.
