□ئانار بۇلۇت\شىنجاڭ گېزىتى مۇخبىرى رايىدە
«سىز نېمىشقا شىنجاڭغا كېلىپ پاختا يىغىش ماشىنىسى ياساشنى ئويلىشىپ قالدىڭىز؟»
«ئارزۇيۇم ئۈچۈن».
يېقىندا، مۇخبىر تەبىئىي پەن ۋە سانائەت پەنلىرى كەسپىدە ئوقۇغان كەم سۆز يىگىت لياڭ دىڭيىنى زىيارەت قىلغاندا سورىغان بىر سوئال بىلەن، ئۇ توختىماي سۆزلەپ كەتتى.
لياڭ دىڭيى خېنەن نەنياڭدىن بولۇپ، ھازىر شىنجاڭ بوشىرەن ئەقلىي ئىقتىدارلىق يېزا ئىگىلىك ماشىنىلىرى پاي چەكلىك شىركىتى تەتقىق قىلىپ ئېچىش مەركىزىنىڭ باش نازارەتچىسى، ئىنژېنېر.
لياڭ دىڭيى لوياڭ تەبىئىي پەن ۋە سانائەت پەنلىرى شۆيۈەنىنىڭ ماتېرىيالنى شەكىلگە كەلتۈرۈش ۋە كونترول قىلىش قۇرۇلۇشى كەسپىنى پۈتكۈزگەن. داشۆدىكى ۋاقتىدا، ئۇ خۇددى «پەن - تېخنىكا مەستانىسى»غا ئوخشاپ قالغان بولۇپ، ماشىنا ئادەم جەمئىيىتىنى قۇرۇپ، ھەمراھلىرىنى يېتەكلەپ تۈرلۈك ئەقلىي ئىقتىدارلاشقان، ئۇچۇرلاشقان يېڭىلىق يارىتىش تۈرلىرىگە قاتناشقان.
«دەل تەجرىبىخانىدا مېتال ماتېرىيالىرىغا ئائىت سانلىق مەلۇماتلارنى قايتا - قايتا ئۆلچىگەن ئاشۇ كۈنلەر مېنىڭ ھازىرقى كەسپىمگە پۇختا ئاساس سالغان بولۇشى مۇمكىن» دېدى لياڭ دىڭيى.
2014 - يىلى، لياڭ دىڭيى جېجياڭ ياتې ئېلېكتىر ئۈسكۈنىلىرى پاي چەكلىك شىركىتى يېزا ئىگىلىك ماشىنىلىرى ئىشلىرى بۆلۈمىدە خىزمەت قىلدى. «يېزا ئىگىلىك ماشىنىلىرى ساھەسىدە بولغانلىقىم ئۈچۈن، دۆلىتىمىزنىڭ پاختا يىغىش ماشىنىسىنىڭ باشقىلارنىڭ چەكلىمىسىگە ئۇچراشتەك مۈشكۈل ئەھۋالدا قالغانلىقىنى ئىگىلەپ، كۆڭلۈمدە قەتئىي ئىرادىگە كېلىپ، پاختا يىغىش ماشىنىسىنى دۆلىتىمىزدە ئىشلەپچىقىرىشقا كۈچ چىقىرىشنى ئۈمىد قىلدىم» دېدى ئۇ.
پۇرسەت كەلدى، شىركەت شىخو شەھىرىدە دۆلىتىمىزدە ئىشلەنگەن پاختا يىغىش ماشىنىلىرىنى تەتقىق قىلىپ ئېچىش، ئىشلەپچىقىرىش بازىسى قۇرۇشنى قارار قىلدى، لياڭ دىڭيى قىلچە ئىككىلەنمەستىن تىزىمغا ئالدۇرۇپ، يۈك - تاقلىرىنى يىغىشتۇرۇپ، ئاۋات جياشىڭدىن ئون مىڭ چاقىرىم يىراقلىقتىكى غەربىي شىمالغا كېلىپ، شىنجاڭ بوشىرەن ئەقلىي ئىقتىدارلىق يېزا ئىگىلىك ماشىنىلىرى پاي چەكلىك شىركىتىنىڭ بىر ئەزاسىغا ئايلاندى.
پاختا يىغىش ماشىنىسىنى دۆلەت ئىچىدىكى ياختا يىغىش ئەندىزىسىگە تېخىمۇ ماسلاشتۇرۇش ئۈچۈن، لياڭ دىڭيى ۋە ئۇنىڭ خىزمەتداشلىرى دائىم ئېتىز باشلىرىغا بېرىپ، دېھقانلار، پېشقەدەم ئۇستاملاردىن تەجرىبە ئۆگەندى.
پاختا يىغىش ماشىنىسىنىڭ ئىقتىدارىنى سىناش ئۈچۈن، ئۇ ۋە ئۇنىڭ كوللېكتىپىدىكىلەر ئىككى پاختا يىغىش ماشىنىسىنى ئېلىپ بۈگۈر ناھىيەسىگە بېرىپ بىر ئاي تۇرۇپ، نەچچە مىڭ مو يەردە كېچە - كۈندۈز دېمەي پاختا يىغدى. «10 - ئايدىكى قۇملۇقتا كېچە سوغۇقى سۆڭەكتىن ئۆتەتتى، بىرەيلەن مەشغۇلات قىلساق، يەنە بىرەيلەن مىنىبۇستا ئەپلەپ - سەپلەپ يېتىپ ئۇخلىۋالاتتۇق» دېدى لياڭ دىڭيى.
مانا مۇشۇنداق جاپالىق مۇھىتتا، ئۇلار نۇرغۇن يېڭىلىقلارنى ياراتتى، قول بىلەن ھەرىكەتلەندۈرۈلىدىغان سۈرئەت ئۆزگەرتىش ساندۇقىنى ئېلېكتىرولىز ئېرىتمىسى ئارقىلىق كونترول قىلىنىدىغان سۈرئەت ئۆزگەرتىش ساندۇقىغا ئۆزگەرتتى، پاختا يىغىش ماشىنىسىنىڭ قول خوتىنى ئاپتوماتىك خوتقا ئۆزگەرتتى؛ پاختا يەتكۈزۈش شامال يولىنى ئۆزگەرتىپ، پاختا يىغىش ماشىنىسىنىڭ پاختا يەتكۈزۈش يولىدا پاختا تۇرۇپ قالمايدىغان قىلدى؛ موتورنىڭ ئىسسىقلىق تارقىتىش شامالدۇرغۇچىسىنىمۇ ئاپتوماتىك تازىلاشنى ئىشقا ئاشۇردى، بۇ ئۆزگەرتىشلەر دۆلىتىمىزدە ئىشلەنگەن پاختا يىغىش ماشىنىلىرىنى بىۋاسىتە «ئۇچقاندەك تەرەققىي قىلىش» ئىمكانىيىتىگە ئىگە قىلدى.
2020 - يىلى، شىركەت ئۇنىڭغا ئىنتايىن رىقابەتكە تولغان ۋەزىپە − دۆلەت ئىچى - سىرتىدىكى تۇنجى ئۈچ قۇرلۇق پاختا يىغىش - تايلاش ماشىنىسىنى يېتەكچى بولۇپ لايىھەلەش، تەتقىق قىلىپ ئېچىشنى تاپشۇردى. شۇ يىلى 2 - ئايدا ۋەزىپىنى تاپشۇرۇۋالغاندىن تارتىپ 8 - ئايدا ئۈلگە ماشىنىسىنى تەتقىق قىلىپ ئېچىپ مۇۋەپپەقىيەت قازىنىشقىچە، ئۇ پەقەت يەتتە ئايلا ۋاقىت سەرپ قىلىپ، ۋەزىپىنى شىركەت مۆلچەرلىگەن ئۈچ يىلدىن زور دەرىجىدە ئالدىغا سۈرۈپ مۇددەتتىن بۇرۇن تاماملىدى.
كېچە - كۈندۈز چېرتيوژ سىزىپ، ئۈلگە ماشىنىسىنى قۇراشتۇردى - چۇۋۇدى، چۇۋۇدى - قۇراشتۇردى. «شۇ چاغدا تاماق يېيىش، ئۇخلاشتىن باشقا، پەقەت بىرلا ئىشنى قىلدىم، يەنى تەتقىق قىلىپ ئېچىش بىلەنلا شۇغۇللاندىم» دېدى لياڭ دىڭيى.
ئەينى چاغدا پاختا يىغىش پەسلىگە ئۈلگۈرەلمىگەچكە، سۈنئىي ئۇسۇلدا پاختا قوشۇپ سىناق قىلىپ، پۈتۈن بەدىنىنى ماي داغلىرى ۋە پاختا قاپلاپ كەتكەن بولسىمۇ، لياڭ دىڭيى بۇلارغا قىلچە پىسەنت قىلمىدى.
«ئۈلگە ماشىنىسىنى ئېتىزدا سىناق قىلغاندا، راست گەپنى قىلسام، بەك جىددىيلىشىپ كەتتىم.» لياڭ دىڭيى كۈلۈپ تۇرۇپ مۇنداق دېدى: نەتىجىدە سىناق ئۈنۈمى ناھايىتى ياخشى بولدى، يەنە يېزا ئىگىلىك ماشىنىلىرىنى ئومۇملاشتۇرۇش، باھالاش ئېتىراپنامىسىگە ئېرىشىپ، پاختا يىغىش ماشىنىسىنىڭ تارقاق پاختا يىغىش ماشىنىسىدىن يۇمىلاق تايلاش ماشىنىسىغا ھالقىشىغا تۈرتكە بولۇپ، ئۇنى دۆلەت ئىچىدىكى تۇنجى پۈتۈنلەي ئۆز ئالدىغا بىلىم مۈلۈك ھوقۇقىغا ئىگە ئۈچ قۇرلۇق پاختا يىغىش - تايلاش ماشىنىسىغا ئايلاندۇردۇق.
2024 - يىلى، لياڭ دىڭيى يەنە كوللېكتىپىنى باشلاپ يېڭى ئېنېرگىيەلىك پاختا يىغىش ماشىنىسىنى تەتقىق قىلىپ ئېچىپ، ئېتىزدا مۇۋەپپەقىيەتلىك سىناق قىلدى، بۇ، چوڭ تىپتىكى يېزا ئىگىلىك ماشىنىلىرىنىڭ «مايلىق ماشىنا دەۋرى»دىن «توكلۇق ماشىنا دەۋرى»گە قەدەم قويغانلىقىدىن دېرەك بەردى. ئۇنىڭ ئۈستىگە ئۇ تەتقىق قىلىپ ئاچقان دۆلىتىمىزدە ئىشلەنگەن پاختا يىغىش ماشىنىسى يەنە چەت ئەللەرگە ئېكسپورت قىلىنىپ، خەلقئارا بازاردا ئىقتىدارىنى نامايان قىلدى.
خىزمەت قىلغان بۇ بىرقانچە يىلدا، لياڭ دىڭيى مول نەتىجىلەرنى قولغا كەلتۈرۈپ، 62 تۈرلۈك پاتېنت ھوقۇقىغا ئېرىشتى، يەنە نۇرغۇن شان - شەرەپلەرنى قولغا كەلتۈردى.
«ئۆگىنىش ئۆمۈرلۈك ئىش.» لياڭ دىڭيى مۇنداق دېدى: جەمئىيەت ۋە كەسىپ ئۇچقاندەك تەرەققىي قىلىۋاتىدۇ، پەقەت ئۈزلۈكسىز يېڭى بىلىم، يېڭى ماھارەت ئۆگەنگەندىلا، ئاندىن دەۋرنىڭ قەدىمىگە يېتىشكىلى بولىدۇ. كەلگۈسىدە كوللېكتىپىم بىلەن دۆلىتىمىزدە ئىشلەنگەن تېخىمۇ ئەلا سۈپەتلىك پاختا يىغىش ماشىنىسىنى تەتقىق قىلىپ ياساپ، «جۇڭگو ياسىمىچىلىقى» ئۈچۈن كۈچ قوشۇشنى ئۈمىد قىلىمەن.
