شىنجاڭ گېزىتى، ئۈرۈمچى، 4 - ئاينىڭ 1 - كۈنى خەۋىرى ئانار بۇلۇت\شىنجاڭ گېزىتى مۇخبىرى سو رۇڭجى خەۋەر قىلىدۇ: 4 - ئاينىڭ 1 - كۈنى سائەت 11دىن 5 مىنۇت ئۆتكەندە، ئۈرۈمچى شەھىرىنىڭ تىيانشان رايونلۇق بازار نازارەت قىلىش - باشقۇرۇش ئىدارىسىدە، شەھەر ئاھالىسى ھەنىپە توختى شىنجاڭ بويىچە 2 مىليونىنچى بولۇپ يەككە سودا - سانائەتچىلەر تىجارەت كىنىشكىسىنى ئالدى. بۇ، ئاپتونوم رايونىمىزدىكى يەككە سودا - سانائەتچىلەر تەرەققىياتىنىڭ يېڭى پەللىگە كۆتۈرۈلگەنلىكىدىن دېرەك بېرىدۇ، شۇنداقلا شىنجاڭنىڭ ئىقتىسادىي ھاياتىي كۈچىنىڭ سىجىل ئۇرغۇغانلىقىغا گۇۋاھ بولدى.
1980 - يىلى 12 - ئايدا، مەملىكەت بويىچە تۇنجى يەككە سودا - سانائەتچىلەر تىجارەت كىنىشكىسى تارقىتىلدى. ئىسلاھاتنىڭ چوڭقۇرلىشىشى ۋە سوتسىيالىستىك بازار ئىگىلىكى تۈزۈلمىسىنىڭ بەرپا قىلىنىشى ۋە مۇكەممەللىشىشىگە ئەگىشىپ، پارتىيە ۋە دۆلەتنىڭ يەككە، خۇسۇسىي ئىگىلىكنىڭ تەرەققىياتىغا ئىلھام بېرىش، مەدەت بېرىش ۋە يېتەكچىلىك قىلىش فاڭجېن - سىياسەتلىرىنىڭ يېتەكچىلىكىدە، يەككە سودا - سانائەتچىلەر ۋەكىللىكىدىكى ئومۇمىي مۈلۈكچىلىكتىن باشقا ئىگىلىك تېز تەرەققىي قىلدى ۋە زورايدى.
1981 - يىلى 3 - ئاينىڭ ئاخىرىغىچە، شىنجاڭدىكى يەككە سودا - سانائەتچىلەر تەرەققىي قىلىپ، 13 مىڭدىن ئاشتى. پارتىيە 18 - قۇرۇلتىيىدىن بۇيان، يەككە سودا - سانائەتچىلەر جۇش ئۇرۇپ راۋاجلىنىپ، شىنجاڭدا تىزىمغا ئېلىنغان ئومۇمىي سانى 2012 - يىلىنىڭ ئاخىرىدىكى 582 مىڭ 800دىن كۆپىيىپ ھازىرقى 2 مىليونغا يەتتى.
شىنجاڭدىكى تىزىمغا ئېلىنغان 2 مىليونىنچى يەككە سودا - سانائەتچى بولغانلىقىدىن، ھەنىپە توختى ئۆزىنى ناھايىتى بەختلىك ھېس قىلدى. ئۇ مۇنداق دېدى: مەن ئىلگىرى شىنجاڭ خەلقئارا چوڭ بازاردا كىيىم - كېچەك دۇكىنى ئاچقان، ساياھەتچىلىكنىڭ ئاۋات پەسلىدە ئايلىق تىجارەت سوممام 50 مىڭ يۈەنگە يېتەتتى. تىجارەت كىنىشكىسىنى يېڭىلا ئالغان بۇ كىيىم - كېچەك دۇكىنى ئۈرۈمچى شەھىرى تىيانشان رايونىنىڭ جەنۇبىي ئازادلىق يولىدا بولۇپ، نۆۋەتتە، بۇ دۇكان بېزىلىپ بولدى، بۇ ئىككى كۈندە مال كىرگۈزگەندىن كېيىن تىجارەت باشلايدۇ.
ئاپتونوم رايونلۇق بازار نازارەت قىلىش - باشقۇرۇش ئىدارىسى تىزىملاپ ئەنگە ئېلىش باشقارمىسىنىڭ مۇئاۋىن باشقارما باشلىقى دۇڭ ئەندۇڭ مۇنداق تونۇشتۇردى: نۆۋەتتە، يەككە سودا - سانائەتچىلەر پۈتۈن ئاپتونوم رايوندىكى تىجارەت ئاساسىي گەۋدىلىرى ئومۇمىي سانىنىڭ تۆتتىن ئۈچ قىسمىنى ئىگىلەيدۇ، ئۇلارنىڭ جانلىنىش دەرىجىسى ئىقتىساد، جەمئىيەت تەرەققىياتىنىڭ سۈپىتىگە تەسىر كۆرسىتىدۇ. يېقىنقى يىللاردىن بۇيان، يەككە سودا - سانائەتچىلەرنىڭ تەرەققىياتىغا يار - يۆلەك بولۇش ئۈچۈن، ئاپتونوم رايونىمىز ئىزدىنىش سالمىقىنى ئۈزلۈكسىز زورايتىپ، ئۇلارنىڭ تەرەققىياتقا دائىر ئىلتىماس - تەلەپلىرىنى سىجىل ئىز قوغلاپ ئىگىلەپ، كۈچنى مۇجەسسەملەپ يەككە سودا - سانائەتچىلەرنىڭ پۈتۈن ھاياتلىق دەۋرىيلىكىنى قاپلىغان پەرقلىق، دەل جايىدا بولغان سىياسەت بىلەن تەمىنلەش ۋە مۇلازىمەت قىلىش سىستېمىسىنى بەرپا قىلدى.
يەككە سودا - سانائەتچىلەر ئاممىنىڭ تۇرمۇشىغا ئەڭ بىۋاسىتە مۇلازىمەت قىلغۇچىلار، ئىشقا ئورۇنلىشىش، ئىگىلىك تىكلەشتىكى مۇھىم مەنبە ۋە «سۇ ساقلاش كۆلچىكى» بولۇپ، گەۋدىلىك بولغان خەلققە قولايلىق يارىتىش، خەلققە نەپ يەتكۈزۈش ۋە ئورتاق بېيىش، ئورتاق بەھرىلىنىش ئۈنۈمىگە ئىگە. ئىستاتىستىكىدا كۆرسىتىلىشىچە، شىنجاڭدىكى يەككە سودا - سانائەتچىلەر ئىچىدە تەخمىنەن ％90ى 3 - كەسىپكە ئاتلانغان بولۇپ، ئاممىنىڭ تۇرمۇشى بىلەن زىچ مۇناسىۋەتلىك بولغان يېمەك - ئىچمەك، پارچە سېتىش قاتارلىق ساھەلەرگە كەڭ تارقالغان. پۈتۈن شىنجاڭدىكى يەككە سودا - سانائەتچىلەر 3 مىليون 200 مىڭغا يېقىن كىشىنىڭ ئىشقا ئورۇنلىشىشىغا تۈرتكە بولغان.
«يەككە سودا - سانائەتچىلەر زور مىقداردىكى جانلىق ئىشقا ئورۇنلاشقۇچى نوپۇسنى قوبۇل قىلىپ، جەمئىيەت مۇقىملىقىنى كۈچەيتىپ، شىنجاڭنىڭ خەلق تۇرمۇشىنىڭ سىجىل ياخشىلىشىغا پۇختا ئاساس سالدى. يەككە سودا - سانائەتچىلەر جانلىقلىقى ۋە يېڭىلىق يارىتىشچانلىقىغا تايىنىپ، يېڭى كەسىپ ھالىتىنى يېتىلدۈرىدىغان مۇنبەت تۇپراق بولۇپ قالدى.» ئاپتونوم رايونلۇق پارتىيە كومىتېتى پارتىيە مەكتىپى (مەمۇرىيەت شۆيۈەنى) ئىقتىسادشۇناسلىق ئوقۇتۇش - تەتقىقات بۆلۈمىنىڭ دوتسېنتى ۋۇ جۈەن مۇنداق دېدى: يېقىنقى يىللاردىن بۇيان، نۇرغۇن يەككە سودا - سانائەتچى بازار يۈزلىنىشىنى سەزگۈرلۈك بىلەن ئىگىلەپ، ئېلېكتىرونلۇق سودا، بىۋاسىتە كۆرسىتىش ئىقتىسادى قاتارلىق يېڭىدىن گۈللەنگەن ساھەلەرگە پائال ئاتلىنىپ، ئالاقە تورى تېخنىكىسىدىن پايدىلىنىپ، پۈتۈنلەي يېپيېڭى سودا ئەندىزىسى بەرپا قىلدى. بۇ يېڭى كەسىپ ھالەتلىرى تىجارەت ئاساسىي گەۋدىلىرىنىڭ ھاياتىي كۈچىنى زور دەرىجىدە ئۇرغۇتۇپ، بازار يوشۇرۇن كۈچىنى يەنىمۇ قويۇپ بېرىپ، شىنجاڭ ئىقتىسادىنىڭ يۇقىرى سۈپەتلىك تەرەققىياتىغا ئۈزلۈكسىز ھەرىكەتلەندۈرگۈچى كۈچ قوشتى.
