□ئانار بۇلۇت\شىنجاڭ گېزىتى مۇخبىرى گاۋ فېڭ
3 - ئاينىڭ 24 - كۈنى، «ئوتتۇرا، كىچىك كارخانىلارنىڭ پۇلىنى بېرىشكە كاپالەتلىك قىلىش نىزامى» ئېلان قىلىندى، تۆت كۈندىن كېيىن ئېچىلغان گوۋۇيۈەن دائىمىي ئىشلار يىغىنىدا يەنە كارخانىلارنىڭ نېسى قالغان پۇلىنى ئېنىقلاش خىزمىتىنى تېزلىتىش مەخسۇس ئورۇنلاشتۇرما قىلىندى.
پۇقراۋى كارخانىلارنىڭ مۇتلەق كۆپ قىسمى ئوتتۇرا، كىچىك كارخانىلار بولۇپ، كارخانىلارنىڭ نېسى قالغان پۇلىنى كۈچەپ ئېنىقلاشنى تېزلىتىش دەل پۇقراۋى كارخانىلارنىڭ ئىنكاسى كۈچلۈك بولغان مەسىلىلەرگە بىۋاسىتە يۈزلىنىشتىكى ھەقىقىي تەدبىر.
باش شۇجى شى جىنپىڭ مۇنداق كۆرسەتتى: يېڭى دەۋر، يېڭى مۇساپىدە پۇقراۋى ئىگىلىكنىڭ تەرەققىيات ئىستىقبالى پارلاق، چوڭ ئىشلارنى قىلالايدۇ، كەڭ پۇقراۋى كارخانىلار ۋە پۇقراۋى كارخانىچىلار كارامىتىنى كۆرسىتىدىغان پەيت يېتىپ كەلدى.
پۈتۈن مەملىكەتتىكى باشقا ئۆلكە، ئاپتونوم رايونلارغا ئوخشاش، شىنجاڭدىكى تۈرلۈك تىجارەت ئاساسىي گەۋدىلىرى ئومۇمىي مىقدارىنىڭ ％97ىدىن كۆپرەكىنى ئىگىلەيدىغان پۇقراۋى كارخانىلار ئىقتىساد، جەمئىيەتنىڭ يۇقىرى سۈپەتلىك تەرەققىياتىغا تۈرتكە بولۇشتا كەم بولسا بولمايدىغان كۈچكە ئايلاندى.
يېڭى دەۋردە بازار دولقۇنى تېز ئەۋج ئالماقتا، قانداق قىلغاندا شىنجاڭدىكى پۇقراۋى كارخانىلارغا تېخىمۇ ياخشى تەرەققىيات مۇھىتى يارىتىپ بەرگىلى بولىدۇ؟ قانداق قىلغاندا پۇقراۋى كارخانىچىلارنىڭ ئاكتىپلىقى ۋە ئىجادچانلىقىنى يەنىمۇ قوزغاتقىلى بولىدۇ؟ كەڭ پۇقراۋى كارخانىلار پۇرسەتنى قانداق چىڭ تۇتۇپ، تەرەققىياتنى تېزلىتىشى كېرەك؟ بۇلار پۈتۈن جەمئىيەت كۆڭۈل بۆلىدىغان دەۋر تېمىسىغا ئايلاندى.
ئوخشاش يۆنىلىشتە ماس قەدەمدە تەرەققىي قىلىش
ھەرىكەتلەندۈرگۈچ كۈچ ۋە ھاياتىي كۈچنى ئاشۇرۇش
شىنجاڭ لۇڭجۈ يېڭى ماتېرىيال چەكلىك شىركىتىنىڭ ئىشلەپچىقىرىش سېخىدا، ئاق رەڭلىك ئاكرىلونىترىل دەستىسى پىششىقلانغاندىن كېيىن قارا رەڭلىك كاربون تالا دەستىسىگە ئايلاندى، بۇ، 3000 سېلسىيە گىرادۇسلۇق يۇقىرى تېمپېراتۇرىغا بەرداشلىق بېرەلەيدۇ، چىدامچانلىقى پولات - تۆمۈرنىڭ يەتتە ھەسسىسىدىن توققۇز ھەسسىسىگە باراۋەر كېلىدىغان بولۇپ، ئىشلىتىلىش دائىرىسى كەڭ. بۇ يىل بۇ شىركەت 4500 توننا كاربون تالالىق مەھسۇلات ئىشلەپچىقىرىشنى پىلانلىغان بولۇپ، بۇلتۇرقىدىن ئىككى ھەسسە كۆپ.
لۇڭجۈ شىركىتى قۇرۇلغان قىسقىغىنا بەش يىل ۋاقىتتا، تېز سۈرئەتتە تەرەققىي قىلىپ شىنجاڭدىكى بىردىنبىر كاربون تالاسى ئىشلەپچىقىرىش كارخانىسىغا ئايلاندى. شىركەتنىڭ باش مۇدىرى، قوشۇمچە باش دىرېكتورى ۋاڭ كەيرۇي مۇنداق قارىدى: شىنجاڭنىڭ ئۈزلۈكسىز ياخشىلىنىۋاتقان تىجارەت - سودا مۇھىتى كارخانا تەرەققىياتىنى پۇختا كاپالەت بىلەن تەمىنلىدى.
− بىر گۇرۇپپا سانلىق مەلۇمات پۇقراۋى ئىگىلىكنىڭ ھاياتىي كۈچىنى ئەكس ئەتتۈرۈپ بېرەلەيدۇ:
− تىجارەت ئاساسىي گەۋدىلىرىنىڭ سانى پۇختا ئاشتى. 2024 - يىلىنىڭ ئاخىرىغىچە، شىنجاڭدا تىزىمغا ئېلىنغان پۇقراۋى ئىگىلىك تىجارەت ئاساسىي گەۋدىسى 2 مىليون 525 مىڭ 100 بولۇپ، 2023 - يىلىدىكىدىن ％5.96 ئېشىپ، تۈرلۈك تىجارەت ئاساسىي گەۋدىلىرى ئومۇمىي مىقدارىنىڭ ％97.32ىنى ئىگىلىدى؛
− پۇقراۋى سانائەتنىڭ ھاياتىي كۈچى ئاشتى. 2024 - يىلى، شىنجاڭدىكى كۆلەمدىن يۇقىرى سانائەت پۇقراۋى كارخانىلىرىنىڭ قوشۇلما قىممىتى 2023 - يىلىدىكىدىن ％17.3 ئاشتى، ئېشىش سۈرئىتى كۆلەمدىن يۇقىرى سانائەت قوشۇلما قىممىتىدىن 9.3 پىرسەنت پوئېنت يۇقىرى بولدى؛
− خەلق ئىچى سېلىنما تىرىكى كۈچلۈك بولدى. 2024 - يىلى، شىنجاڭنىڭ خەلق ئىچى سېلىنمىسى 2023 - يىلىدىكىدىن ％24.3 ئېشىپ، تۇراقلىق مۈلۈك سېلىنمىسىنىڭ ％37.2ىنى ئىگىلەپ، تۇراقلىق مۈلۈك سېلىنمىسىنىڭ 7.8 پىرسەنت پوئېنت ئېشىشىغا تۈرتكە بولدى؛
− تاشقى سودىنىڭ يۇقىرى سۈرئەتتە ئېشىشىغا تۈرتكە بولدى. 2024 - يىلى، شىنجاڭدىكى پۇقراۋى كارخانىلارنىڭ ئىمپورت - ئېكسپورت قىممىتى 403 مىليارد 110 مىليون يۈەن بولۇپ، 2023 - يىلىدىكىدىن ％21.1 ئېشىپ، تاشقى سودا ئىمپورت - ئېكسپورت ئومۇمىي قىممىتىنىڭ ％92.6ىنى ئىگىلىدى...
سانلىق مەلۇماتلار شۇنى چۈشەندۈرۈپ بېرىدۇكى، يېڭى دەۋرگە كىرگەندە، شىنجاڭدىكى پۇقراۋى كارخانىلار ئۈزلۈكسىز تىپ ئۆزگەرتىپ دەرىجىسىنى ئۆستۈرۈپ، يۇقىرى سۈپەتلىك تەرەققىيات يولىغا تېز قەدەم قويۇپ، ئېشىشنى مۇقىملاشتۇرۇش، ئىشقا ئورۇنلىشىشنى ئىلگىرى سۈرۈش، خەلق تۇرمۇشىغا نەپ يەتكۈزۈش، مۇقىملىققا كاپالەتلىك قىلىش قاتارلىق جەھەتلەردە مۇھىم رولىنى جارى قىلدۇرماقتا.
«شىنجاڭدىكى پۇقراۋى كارخانىلارنىڭ تەرەققىياتىدا بىر روشەن ئالاھىدىلىك نامايان بولدى، يەنى ئاپتونوم رايوننىڭ ئوخشاش بولمىغان مەزگىلدىكى تەرەققىيات ئىستراتېگىيەسىنى باشتىن - ئاخىر چۆرىدەپ، ئوخشاش يۆنىلىشتە ماس قەدەمدە تەرەققىي قىلدى» دېدى ئاپتونوم رايونلۇق سودا - سانائەتچىلەر بىرلەشمىسىنىڭ مۇئاۋىن رەئىسى لۇ ۋېيدۇڭ.
1985 - يىلى، شىنجاڭدىكى تۇنجى خۇسۇسىي كارخانا تىجارەت كىنىشكىسىنىڭ شىنجاڭ خۇڭدا چەكلىك مەسئۇلىيەت شىركىتىگە تارقىتىپ بېرىلىشى شىنجاڭدىكى پۇقراۋى ئىگىلىكنىڭ جۇش ئۇرۇپ راۋاجلىنىشىنىڭ بەلگىسى بولۇپ قالدى.
1996 - يىلى، شىنجاڭدا تۇنجى سودىگەرلەر ئۇيۇشمىسى تەشكىلاتى بار بولدى، پۇقراۋى ئىگىلىكنىڭ تەرەققىياتى يېڭى باسقۇچقا كىردى، پۇقراۋى كارخانىلار تېخىمۇ ئېنىق، تېخىمۇ ئاقىلانە تەرەققىيات ئېڭىغا ئىگە بولدى. سودا ساھەسىدە خىلمۇخىل ئۆزگىرىش ۋە خىرىسلارنى باشتىن كەچۈرۈپ، چوڭ دولقۇندا قۇم تاسقىلىپ، بىر تۈركۈم پۇقراۋى كارخانىلار تەدرىجىي ئۆسۈپ يېتىلىپ، زورىيىپ، جەمئىيەت مەسئۇلىيىتىنى زىممىسىگە ئېلىپ، شەرەپلىك ئىشلارغا ئاتلىنىپ، جەمئىيەتنىڭ ھۆرمىتىگە ئېرىشتى.
بۈگۈنكى كۈندە، كەڭ پۇقراۋى كارخانىلار شىنجاڭنىڭ ئىقتىسادىي تەرەققىياتىدىكى مۇھىم تىرەك، مالىيە باج كىرىمىنىڭ مۇھىم مەنبەسى، ئىشقا ئورۇنلاشتۇرۇشنى كېڭەيتىشتىكى مۇھىم يول بولۇپ قالدى. پۇقراۋى كارخانىلار ئىچىدە بەزىلىرى دۆلەت ئىچى - سىرتىدا تەسىر كۈچكە ئىگە چوڭ كارخانا گۇرۇھى بولۇپ ئۆسۈپ يېتىلدى، بەزىلىرى كەركىدان كارخانا بولۇپ ئۆسۈپ يېتىلىپ، ئۆزى تۇرۇشلۇق ساھەدە ئالاھىدە ئورۇندا تۇردى. شىنجاڭنىڭ دۆلەت ئومۇملۇقىدىكى ئىستراتېگىيەلىك ئورۇن بېكىتمىسىنى چىڭ كۆزلەپ، پۇقراۋى كارخانىلار شىنجاڭنىڭ «ئون چوڭ كەسىپ توپى» قۇرۇلۇشىغا پائال قاتنىشىپ، تېخىمۇ يۇقىرى سەۋىيەلىك ئىچكى - تاشقى ئېچىۋېتىشكە سىڭىشىپ، شىنجاڭنىڭ ئىقتىسادىي قۇرۇلۇشىدىكى بىر جەڭگىۋار قوشۇن بولۇپ قالدى.
سىياسەتتىن بىۋاسىتە تېز بەھرىمەن بولۇش
تەرەققىياتتىكى قىيىن مەسىلىلەرنى ھەل قىلىش
پۇقراۋى كارخانىلار ئىسلاھات - ئېچىۋېتىش ئۇلۇغ مۇساپىسىگە ئەگىشىپ جۇش ئۇرۇپ راۋاجلاندى. پارتىيەنىڭ خەلقنى بېيىتىش سىياسىتى كىشىلەرنىڭ سودا ئېڭىنى ئويغىتىپ، پۇقراۋى ئىگىلىك ۋە پۇقراۋى كارخانىلارنى بارلىققا كەلتۈردى. پۇقراۋى ئىگىلىكنىڭ تەرەققىياتىنى قوللاش پارتىيە مەركىزىي كومىتېتىنىڭ ئىزچىل فاڭجېنى.
بىراق، ئۇزاقتىن بۇيان پۇقراۋى ئىگىلىك تەرەققىياتىنىڭ سىياسەت چەكلىمىسى، بايلىق كەمچىل بولۇش، بازار ئىجازىتى قاتارلىق نۇرغۇن خىرىسقا دۇچ كېلىۋاتقانلىقى مۇنازىرە تەلەپ قىلمايدىغان پاكىت، بۇ، شىنجاڭدىكى مەلۇم جايلار، مەلۇم ساھەلەردە يەنىلا مەۋجۇت. بەزى يۆلەش سىياسەتلىرى دەل جايىدا ئەمەلىيلەشمىدى، بەزى ساھەلەردە پۇقراۋى كارخانىلارغا قارىتا چەك قويۇلدى، بەزى جايلاردا ئامىل كاپالىتى دەل جايىدا بولمىدى، بەزى تارماقلار ۋە چوڭ كارخانىلارنىڭ پۇقراۋى كارخانىلارنىڭ پۇلىنى نېسى قالدۇرۇش ئەھۋالى ئېغىر بولدى، بەزى پۇقراۋى كارخانىلار، بولۇپمۇ ئوتتۇرا، كىچىك كارخانىلارنىڭ مەبلەغ يۈرۈشتۈرۈشى قىيىن، مەبلەغ يۈرۈشتۈرۈشى قىممەت بولدى ھەم ئىچكى ئېھتىياج يېتەرلىك بولماسلىق سەۋەبىدىن بەزى كارخانىلارنىڭ تىجارەت تەرەققىياتى بىرقەدەر ئېغىر بېسىم ۋە قىيىنچىلىققا دۇچ كەلمەكتە قاتارلىقلار، بۇلارنىڭ ھەممىسى پۇقراۋى ئىگىلىكنىڭ يۇقىرى سۈپەتلىك تەرەققىياتىنى بەلگىلىك دەرىجىدە چەكلەپ قويماقتا.
يېقىنقى يىللاردىن بۇيان، شىنجاڭ باش شۇجى شى جىنپىڭنىڭ پۇقراۋى ئىگىلىكنىڭ تەرەققىياتى توغرىسىدىكى مۇھىم بايانلىرىنى چوڭقۇر ئۆگىنىپ، ئىزچىللاشتۇرۇپ، «ئىككىدە قىلچە تەۋرەنمەسلىك»نى قەتئىي تەۋرەنمەي ئەمەلىيلەشتۈرۈپ، ئىزچىل تۈرلۈك چارە - ئاماللار بىلەن كۈچ توپلاپ، چارە - تەدبىر كۆرسىتىپ، پۇقراۋى ئىگىلىكنىڭ زورىيىشى، كۈچىيىشىنى پۈتۈن كۈچ بىلەن قوللىدى.
«شىنجاڭ ئۇيغۇر ئاپتونوم رايونىنىڭ پۇقراۋى ئىگىلىكنىڭ تەرەققىي قىلىپ زورىيىشىنى ئىلگىرى سۈرۈش توغرىسىدىكى بىرقانچە سىياسەت - تەدبىرى» قاتارلىق بىر قاتار سىياسەت - ھۆججەتلەر ئېلان قىلىنىپ، پۇقراۋى ئىگىلىكنىڭ تەرەققىياتىغا ئىلھام بېرىدىغان، مەدەت بېرىدىغان، يېتەكچىلىك قىلىدىغان سىياسەت مۇلازىمىتى سىستېمىسى شەكىللەندى. ئاپتونوم رايونلۇق پارتىيە كومىتېتى ۋە ھۆكۈمەتنىڭ ئاساسلىق رەھبەرلىرى پۇقراۋى كارخانىلارغا ئالاقىدار خەلق قۇرۇلتىيى تەكلىپى، سىياسىي كېڭەش تەكلىپلىرىنى بېجىرىشكە باش بولۇپ ھەيدەكچىلىك قىلىپ، شىنجاڭ كارخانىلىرى . رەئىسلەر يۈزتۇرا كېڭىشىش سۆھبەت يىغىنىنى دائىملىق ئۆتكۈزۈپ، تىجارەت - سودا مۇھىتىنى ئەلالاشتۇرۇپ دەرىجىسىنى ئۆستۈرۈش ئۈچ يىللىق ھەرىكىتىنى يولغا قويۇشنى سىجىل ئالغا سىلجىتىپ، پۈتۈن جەمئىيەتكە سودىگەرلەرنى ھۆرمەتلەيدىغان، سودىگەرلەرگە ئەھمىيەت بېرىدىغان، سودىگەرلەرگە يېقىن بولغان، سودىگەرلەرنى قوغدايدىغان روشەن يۆنىلىشنى يەتكۈزۈپ، ياخشى بولغان سىياسەت مۇھىتى ۋە جەمئىيەت كەيپىياتى ياراتتى.
پۇقراۋى كارخانىلارنىڭ ئاپتونوم رايوننىڭ مۇھىم تەرەققىيات ئىستراتېگىيەسىگە سىڭىشىپ، «ئون چوڭ كەسىپ توپى»، «بىر بەلباغ، بىر يول» يادرولۇق رايون قۇرۇلۇشى قاتارلىقلارنى چۆرىدەپ، نۇقتىلىق تۈرلەرگە مەبلەغ سېلىش قۇرۇلۇشىغا پائال قاتنىشىشىغا مەدەت بېرىش −
شىنجاڭ چىيا يېڭى ماتېرىيال چەكلىك شىركىتى مەبلەغ سېلىپ قۇرغان يىلىغا 6 مىليون توننا كۆمۈرنى ئاساس قىلغان مېتىل ئالكوھول ئىشلەپچىقىرىش تۈرى دۇنيا بويىچە ئوخشاش تۈرلەر ئىچىدىكى ئەڭ چوڭ تۈر ھېسابلىنىدۇ. نۆۋەتتە، چىيا گۇرۇھى چەكلىك شىركىتىنىڭ شىنجاڭغا سالغان مەبلىغى كىرېمنىينى ئاساس قىلغان، ئاليومىننى ئاساس قىلغان، كۆمۈر خىمىيە سانائىتى، يېڭى ئېنېرگىيە ۋە كانچىلىقتىن ئىبارەت بەش چوڭ بۆلەككە مۇناسىۋەتلىك بولۇپ، سوممىسى 60 مىليارد يۈەنگە يېتىدۇ، كەلگۈسى ئون يىلدا يەنە شىنجاڭغا مەبلەغ سېلىش سالمىقىنى داۋاملىق زورايتىدۇ.
2024 - يىلى، شىنجاڭ خەلق ئىچى كاپىتالىغا 120 تۈر تونۇشتۇردى، جەمئىي سېلىنما 75 مىليارد 327 مىليون يۈەن بولدى. بۇ يىل، شىنجاڭ يەنە پۇقراۋى كارخانىلارنىڭ تۆمۈريول، ئېنېرگىيە، سۇچىلىق، شەھەر يېڭىلاش قاتارلىق چوڭ - چوڭ ئۇل ئەسلىھە تۈر قۇرۇلۇشلىرىغا قاتنىشىشىنى داۋاملىق قوللاپ، ھۆكۈمەت ۋە جەمئىيەت كاپىتالى ھەمكارلىقى يېڭى مېخانىزمىنى قېلىپلاشتۇرۇپ يولغا قويۇپ، خەلق ئىچى سېلىنمىسى بوشلۇقىنى كېڭەيتىپ، ئۇل ئەسلىھە ۋە ئاممىۋى ئىشلار تۈر قۇرۇلۇشىنىڭ يۈرۈشۈش سەۋىيەسىنى ئۆستۈرىدۇ.
بازارلاشقان، قانۇنچىللاشقان، خەلقئارالاشقان تىجارەت - سودا مۇھىتىنى سىجىل بەرپا قىلىپ، بازار ئىجازىتىدىكى ئاشكارا، يوشۇرۇن توسۇقلارنى بۇزۇپ تاشلاپ، پۇقراۋى كارخانىلارنىڭ بايلىق ئېچىش ۋە ئۇنىڭدىن پايدىلىنىشقا قاتنىشىشىغا مەدەت بېرىش −
جۇڭمەن نېفىت - تەبىئىي گاز گۇرۇھى پاي چەكلىك شىركىتى شىنجاڭ تارىم ئويمانلىقىنىڭ ئونسۇ رايون - بۆلىكىدىكى نېفىت - تەبىئىي گاز چارلاشقا خېرىدار بولۇپ، ئادەتتىكى نېفىت - تەبىئىي گاز قېزىش ئىجازەتنامىسىگە تۇنجى ئېرىشكەن، دۆلەت ئىچىدىكى يۇقىرى ئېقىندىكى نېفىت - تەبىئىي گاز تەكشۈرۈش ھوقۇقىغا تۇنجى ئېرىشكەن، دۆلەت ئىچىدىكى نېفىت - تەبىئىي گاز زاپىسىنى يېڭىدىن تەكشۈرۈپ ئېنىقلاش دوكلاتىنى باھالاشتىن تۇنجى بولۇپ ئۆتۈپ ئەنگە ئالدۇرغان پۇقراۋى كارخانا بولۇپ قالدى. نۆۋەتتە ئونسۇ رايون - بۆلىكىدىكى ئىشلەپچىقىرىش قۇدۇقلىرىنىڭ سانى تەخمىنەن 450 بولۇپ، كۆكيار نېفىتلىكى، خۇڭچىپو نېفىتلىكى، سەيكې نېفىتلىكىنىڭ نېفىت - تەبىئىي گاز زاپىسى ئارقا - ئارقىدىن تەكشۈرۈپ ئېنىقلاندى.
كانچىلىق ھوقۇقىنى ھەقلىق بېرىش تۈزۈمى ئىسلاھاتى يولغا قويۇلۇپ، كانچىلىق ھوقۇقى ئاشكارا ۋىۋىسكا ئېسىش، يۇقىرى باھا قويغانلار ئېرىشىش ئۇسۇلى ئارقىلىق ھەقلىق بېرىلىپ، دۆلەت كارخانىلىرى بىلەن پۇقراۋى كارخانىلارغا ئوخشاش مۇئامىلە قىلىنىپ، تېخىمۇ كۆپ ئەمەلىي كۈچى بار كارخانىنىڭ قېزىلما بايلىقلارنى ئېچىشقا قاتنىشىشى «ئاشكارا، ئادىل، باراۋەر» سۇپا ۋە پۇرسەت بىلەن تەمىنلەندى.
سىياسەتتىن بىۋاسىتە، تېز بەھرىمەن بولۇش مېخانىزمىنى مۇكەممەللەشتۈرۈپ، ئامىل كاپالىتىنى يەنىمۇ كۈچەيتىپ، مەبلەغ يۈرۈشتۈرۈش يوللىرىنى كېڭەيتىپ، كارخانىلارنىڭ باج - ھەق يۈكىنى كۈچەپ يېنىكلىتىش −
زاكاز ئەڭ كۆپ بولغان چاغدا خام ماتېرىيالنىڭ باھاسى سىجىل ئۆرلىدى. شىنجاڭ خېڭيۈەن جۇڭخۇي رەڭلىك باسما ئوراش - قاچىلاش پاي چەكلىك شىركىتى مەبلەغ بېسىمىغا دۇچ كەلگەندە، جۇڭگو يېزا ئىگىلىك بانكىسى ئۈرۈمچى شۆبە بانكىسى «بىر مۇئامىلىدارلار توپىغا بىر لايىھە» سىياسىتىدىن پايدىلىنىپ، ئۇلارغا 9 مىليون يۈەن ساپ ئىناۋەتلىك قەرز پۇلى تارقىتىپ، مەبلەغ بېسىمىنى يېنىكلىتىشكە ياردەم بېرىپلا قالماي، يەنە كارخانا ئۈچۈن 80 مىڭ يۈەندىن ئارتۇق مالىيە تەننەرخىنى تېجەپ بەردى.
بانكا ئاپپاراتلىرى «ئىككىدە قىلچە تەۋرەنمەسلىك»نى قەتئىي ئەمەلىيلەشتۈرۈپ، پۇل مۇئامىلە مۇلازىمىتى مېخانىزمىنى مۇكەممەللەشتۈرۈپ، پۇل مۇئامىلە مەھسۇلاتلىرى تەمىناتىنى بېيىتىپ، كىرېدىت تارقىتىش سالمىقىنى زورايتىپ، پۇقراۋى كارخانىلارنىڭ مەبلەغ يۈرۈشتۈرۈش ئىمكانىيىتىنى ئاشۇرۇشقا پائال يېتەكلەندى.
...
«چەكلەنمىگەن بولسىلا كىرگۈزۈش» كەڭ دائىرىدە يولغا قويۇلدى؛ «بىر توردا بىرتۇتاش بېجىرىش»تە ئۈنۈم قولغا كەلتۈرۈلدى، «تۇنجى قېتىم خىلاپلىق قىلغانلارنى جازالىماسلىق» ئومۇميۈزلۈك يولغا قويۇلدى... شىنجاڭ نۇقتىلىق ساھە ۋە ئاچقۇچلۇق ھالقىلاردىكى ئىسلاھاتنى ئالغا سىلجىتىپ، بازار مېخانىزمى ئۈنۈملۈك، ھۆكۈمەت كاپالىتى جايىدا بولغان تىجارەت - سودا مۇھىتى بەرپا قىلىپ، سىياسەت پايدىسىنىڭ دەل جايىدا ئەمەلىيلىشىشىگە تېخىمۇ ئەھمىيەت بېرىپ، پۇقراۋى ئىگىلىك تەرەققىياتى دۇچ كەلگەن «ئەينەك ئىشىك» «ئايلانما ئىشىك» «پۇرژىنا ئىشىك»لەرنى بۇزۇپ تاشلاپ، ئوتتۇرا، كىچىك كارخانىلارنىڭ قىيىنچىلىقىنى ھەل قىلىش، ھېساباتىدىكى نېسى قالغان پۇلنى ئېنىقلاش خىزمىتىنى ياخشى ئىشلەپ، پۇقراۋى كارخانىلارنىڭ شىنجاڭدا يىلتىز تارتىش، تەرەققىي قىلىپ زورىيىش ئىشەنچى ۋە ھاياتىي كۈچىنى ئۈزلۈكسىز ئۇرغۇتتى.
دۆلەت مۇھەببىتىنى چوڭقۇر يىلتىز تارتقۇزۇش
تەرەققىيات پۇرسىتىگە قۇچاق ئېچىش
جاپا - مۇشەققەت ئىچىدە زەپەر مارشى ياڭرىتىپ ئىلگىرىلەش.
40 نەچچە يىلدىن بۇيان، پۇقراۋى كارخانىلار تىيانشاننىڭ جەنۇبى ۋە شىمالىدىكى بىپايان تۇپراقتا يىلتىز تارتىپ تەرەققىي قىلىشتا، تىرىشىپ مۇۋەپپەقىيەت قازىنىدىغان كۆتۈرەڭگۈ روھقا تاياندى. شىنجاڭدا كۈرەش قىلىپ تەرەققىي قىلغان پۇقراۋى كارخانىچىلارنىڭ ۋۇجۇدىدا يول ئېچىپ يېڭىلىق يارىتىش، سەمىمىي - ئەمگەكچان بولۇش، چىداملىق - قەيسەر بولۇش، سىغدۇرۇشچان - كەمتەر بولۇش، جەمئىيەت مەسئۇلىيىتى ۋە دۆلەت مۇھەببىتى قاتارلىق نۇرغۇن ئېسىل پەزىلەت ۋە روھ مۇجەسسەملەنگەن.
ئۆزىنى تەرەققىي قىلدۇرۇپ زورايتىش جەريانىدا، كەڭ پۇقراۋى كارخانىلار ئاۋۋال بېيىغانلار كېيىن بېيىغانلارنى يېتەكلەپ، ئورتاق بېيىشنى ئىلگىرى سۈرۈپ، «ئونمىڭ كارخانا ئونمىڭ كەنتكە ياردەم بېرىش» ھەرىكىتى قاتارلىقلارغا پائال قاتناشتى. 2024 - يىلى 12 - ئايغىچە، شىنجاڭدا «ئونمىڭ كارخانا ئونمىڭ كەنتنى گۈللەندۈرۈش» ھەرىكىتى ھېسابات خاتىرىسى سىستېمىسىغا كىرگۈزۈلگەن پۇقراۋى كارخانا 1722، كەنتلەرنى گۈللەندۈرۈش سانى 1915، كەنتلەرنى گۈللەندۈرۈش تۈرى 2265، سېلىنما ۋە تىجارەت تۈرىدىكى تۈر مەبلىغى 8 مىليارد 541 مىليون يۈەن، ئومۇمىي مەنپەئەتدارلىق ئىئانىسى تۈرىدىكى تۈر مەبلىغى 290 مىليون يۈەن بولدى.
شۇنى جەزمەن سەگەكلىك بىلەن تونۇپ يېتىشىمىز كېرەككى، دۆلەت ئىچىدىكى تەرەققىي قىلغان ئۆلكىلەر بىلەن سېلىشتۇرغاندا، شىنجاڭنىڭ پۇقراۋى ئىگىلىكىدە يەنىلا خېلى چوڭ پەرق مەۋجۇت. ئىقتىساد ئومۇمىي مىقدارىدا پۇقراۋى ئىگىلىكنىڭ ئىگىلىگەن نىسبىتى يەنىلا بىرقەدەر تۆۋەن. پۇقراۋى كارخانىلار ئىچىدىكى كۆلەمدىن يۇقىرى سانائەت كارخانىلىرىنىڭ سانى، بولۇپمۇ چوڭ تىپتىكى كارخانا گۇرۇھلىرىنىڭ سانى بىرقەدەر ئاز؛ 3 - كەسىپنىڭ تەرەققىيات دەرىجىسى ۋە پۇقراۋى كارخانىلارنىڭ ئۇنىڭغا قوشقان تۆھپىسى مەملىكەتنىڭ ئوتتۇرىچە سەۋىيەسىدىن كۆرۈنەرلىك تۆۋەن.
لۇ ۋېيدۇڭ مۇنداق قارىدى: يېڭى دەۋر، يېڭى مۇساپىدە، شىنجاڭدىكى پۇقراۋى كارخانىلار ۋە پۇقراۋى كارخانىچىلار يامانغا لەنەت ئوقۇپ، ياخشىنى مەدھىيەلەپ، كونىنىڭ ئورنىغا يېڭىنى تىكلەپ، يېڭى پۇرسەتكە قۇچاق ئېچىپ، يېڭى مۇۋەپپەقىيەتلەرنى يارىتىشى كېرەك.
ھازىر شىنجاڭنىڭ ھەممىلا يېرىدە تەرەققىيات پۇرسىتى بار، كەلگۈسى يوشۇرۇن كۈچى ناھايىتى زور، ئىستىقبالى پارلاق. پارتىيە مەركىزىي كومىتېتى شىنجاڭغا دۆلەت ئومۇملۇقىدىكى «بەش چوڭ ئىستراتېگىيەلىك ئورۇن بېكىتمىسى»نى بېكىتىپ بەردى، مالىيە، مەبلەغ، باج، تۈر، ئىختىساسلىقلار، شىنجاڭغا ياردەم بېرىش قاتارلىق جەھەتلەردە بېرىلگەن بىر قاتار ئالاھىدە سىياسەت پايدىسى گىرەلىشىپ قويۇپ بېرىلىپ، يۇقىرى سەۋىيەلىك ئىچكى - تاشقى ئېچىۋېتىش پۇرسىتى مىسلىسىز بولدى. «ئون چوڭ كەسىپ توپى» تىرەك قىلىنغان زامانىۋىلاشقان كەسىپ سىستېمىسى قۇرۇلۇشى جۇش ئۇرۇپ راۋاجلاندى، شىنجاڭنىڭ بايلىق ئەۋزەللىكىنى ئىقتىسادىي ئەۋزەللىككە ئايلاندۇرۇش، تەرەققىيات ئەۋزەللىكىگە ئايلاندۇرۇشنىڭ يوشۇرۇن كۈچى غايەت زور.
پۇرسەت يەنە بىر قېتىم ئالدىمىزغا كەلدى، شىنجاڭدىكى پۇقراۋى كارخانىچىلارنىڭ دادىل يېڭىلىق يارىتىشى، باتۇرلۇق بىلەن ئىسلاھ قىلىشى تېخىمۇ زۆرۈر، كارخانىنىڭ كېلەچىكىنى دۆلەتنىڭ ئىستراتېگىيەسى، جەمئىيەتنىڭ ئېھتىياجى، خەلقنىڭ ئارزۇسى بىلەن زىچ يۇغۇرغاندىلا، ئاندىن دەۋر پۇرسىتى ئالدىدا، تېخىمۇ چوڭ تەرەققىياتنى كۈتۈۋالغىلى بولىدۇ.
ۋەتەنگە جاۋاب قايتۇرۇش ئىرادىسىنى كۆڭۈلگە پۈكۈپ، پۈتۈن ۋۇجۇدى بىلەن تەرەققىياتنى كۆزلەپ، قانۇنغا رىئايە قىلىپ، تىجارەتكە ماھىر بولۇپ، ئالدىن بېيىغانلار ئورتاق بېيىشنى ئىلگىرى سۈرۈش كېرەك. يېڭى دەۋردىكى پۇقراۋى ئىگىلىكنىڭ شىنجاڭنىڭ ئىقتىساد، جەمئىيىتىنىڭ يۇقىرى سۈپەتلىك تەرەققىياتىغا تېخىمۇ ئۇرغۇپ تۇرغان قۇۋۋەت قوشۇشىغا تەقەززامىز.
