3-ئاينىڭ 31-كۈنى، دۆلەت ئۆلچىمى «تۇرالغۇ تۈرى قائىدىسى» ئېلان قىلىندى، ئۇنىڭدا بىخەتەر، راھەت، يېشىل، ئاقىل بولۇش نىشان قىلىنىپ، كۆلىمى، ئورۇنلاشتۇرۇلۇشى، رولى، ئىقتىدارى ۋە ئاچقۇچلۇق تېخنىكا تەدبىرلىرى قاتارلىق جەھەتلەردە تۇرالغۇ تۈرىنى قۇرۇش، ئىشلىتىش ۋە ئاسراش توغرىسىدا بەلگىلىمە چىقىرىلدى. «تۇرالغۇ تۈرى قائىدىسى» بۇ يىل 5- ئاينىڭ 1- كۈنىدىن باشلاپ يولغا قويۇلىدۇ.
«تۇرالغۇ تۈرى قائىدىسى»دە «ھەر بىر يۈرۈش تۇرالغۇدا كۈن نۇرى چۈشۈش ئۆلچىمىنى قانائەتلەندۈرىدىغان خانە بولۇشى، يازدا ئىسسىق، قىشتا سوغۇق بولىدىغان رايونلاردىكى تۇرالغۇلارغا پار بىلەن تەمىنلەش ئەسلىھەلىرى ئورنىتىلىشى ياكى شۇنىڭغا ئورۇن قالدۇرۇلۇشى كېرەك» دېگەن بەلگىلىمە چىقىرىلدى.
ئۆي ئىچىنىڭ ئىسسىقلىق مۇھىتىنىڭ سۈپىتى «ئىسسىق- سوغۇق» بولۇش تەسىراتىغا مۇناسىۋەتلىك بولۇپ، ئادەم بەدىنىنىڭ ساغلام، راھەت بولۇشىغا كاپالەتلىك قىلىدىغان، تۇرالغۇدىن رازى بولۇش دەرىجىسىنى ئۆستۈرىدىغان ھالقىلىق ئىقتىدار كۆرسەتكۈچى. «تۇرالغۇ تۈرى قائىدىسى»دە قىش پەسلىدە ئىسسىق ساقلاش، ياز پەسلىدە ئىسسىق ئۆتكۈزمەسلىك ۋە ئىمارەتنىڭ شامال ئۆتۈشىدىغان بولۇشىدىن ئىبارەت ئۈچ جەھەتتىن، تۇرالغۇ ئىمارەتلىرىگە ئاساسىي ئىقتىدار تەلىپى ئوتتۇرىغا قويۇلدى.
«يازدا ئىسسىق، قىشتا سوغۇق بولىدىغان رايونلاردا ياز پەسلىدە پىژغىرىم ئىسسىق، قىش پەسلىدە سوغۇق، نەم بولىدۇ، ئولتۇراقلىشىشقا ماس كېلىش نۇقتىسىدىن چىقىش قىلغاندا، بەلگىلىك تەدبىر قوللىنىپ، ئۆي ئىچىنىڭ ئىسسىق مۇھىتىغا كاپالەتلىك قىلىش كېرەك»، دېدى جۇڭگو قۇرۇلۇش ئىلمى تەتقىقات ئاكادېمىيەسى چەكلىك شىركىتىنىڭ پىروفېسسور دەرىجىلىك ئالىي ئىنژېنېرى ۋاڭ چىڭچىن تونۇشتۇرۇپ: بۇ قېتىمقى «تۇرالغۇ تۈرى قائىدىسى»دە يازدا ئىسسىق، قىشتا سوغۇق بولىدىغان رايونلار، مەسىلەن، چاڭجياڭ دەرياسى ۋادىسىنى ۋەكىل قىلغان رايونلاردىكى پۇقرالارنىڭ قىشتا ئىسسىنىش ئېھتىياجى كۆزدە تۇتۇلۇپ، يازدا ئىسسىق، قىشتا سوغۇق بولىدىغان رايونلاردىكى تۇرالغۇ ئىمارەتلىرىنى پار بىلەن تەمىنلەش، ھاۋا تەڭشىگۈچ ئورنىتىش ياكى ئورنىتىدىغان ئورۇننى ئالدىن قالدۇرۇش كۆزدە بەلگىلەندى.
كۈن نۇرىنىڭ چۈشۈشى ئادەمنىڭ فىزىيولوگىيەلىك ۋە پىسخىكىلىق ساغلاملىقىغا نىسبەتەن ناھايىتى مۇھىم. بۇ قېتىم «تۇرالغۇ تۈرى قائىدىسى»دە ھەر بىر يۈرۈش تۇرالغۇدا كۈن نۇرى چۈشۈش ئۆلچىمىنى قانائەتلەندۈرىدىغان خانە بولۇشى كېرەكلىكى تەلەپ قىلىندى. مۇتەخەسسىس مۇنۇلارنى بىلدۈردى: بۇ، تۇرالغۇ تۈرىنى ئۆلچەملىك لايىھەلەشتە ئىمارەتلەرنىڭ ئارىسىدىكى ئارىلىقنى ياخشى كونترول قىلىپلا قالماي، يەنە تەكشىلىك لايىھەسىنىمۇ ئەلالاشتۇرۇپ، ئۆي ئىچى بوشلۇقىنى مۇۋاپىق ئورۇنلاشتۇرۇشنى تەلەپ قىلغانلىق.
