ئانار بۇلۇت\شىنجاڭ گېزىتى ئۇنىۋېرسال خەۋىرى
شىنجاڭ مېتېئورولوگىيە ئىستانسىسى دوۋيىن سۇپىسىنىڭ ئەڭ يېڭى ئالدىن مەلۇماتىغا ئاساسلانغاندا، بۇ يىل چىڭمىڭلىق دەم ئېلىش مەزگىلىدە، شىنجاڭغا ئاجىز سوغۇق ھاۋا ئېقىمى تەسىر كۆرسىتىپ، كۆپ قىسىم جايلاردا ھۆل ـ يېغىنلىق، بورانلىق ھاۋا رايى كۆرۈلىدىكەن.
ئالدىن مەلۇماتقا ئاساسلانغاندا، 4-ئاينىڭ 5-كۈنىدىن 4-ئاينىڭ 6-كۈنىگىچە، ئالتاي ۋىلايىتى، تارباغاتاي ۋىلايىتىنىڭ شىمالى، ئىلى دەرياسى ۋادىسى، قىزىلسۇ ئوبلاستىدىكى تاغلىق رايونلار، تىيانشاننىڭ تاغلىق رايونلىرىنىڭ قىسمەن رايونلىرىدا ئازراق يامغۇر ياكى قار (تاغلىق رايوندا قار) ياغىدىكەن، يۇقىرىدا تىلغا ئېلىنغان رايونلارنىڭ قىسمەن رايونلىرىدا ئوتتۇراھال يامغۇر، قاتتىق يامغۇر ياكى قار ياغىدىكەن، ئالتاي ۋىلايىتىنىڭ شىمالىدىكى تاغلىق رايونلارنىڭ قىسمەن جايلىرىدا قاتتىق قار ياغىدىكەن؛ يۇقىرىدا تىلغا ئېلىنغان كۆپ قىسىم رايونلاردا بەش بال ئەتراپىدا غەربىي شىمال شامىلى چىقىدىكەن، شامال ئېغىزلىرىدا 10 بالدىن 11 بالغىچە بوران چىقىدىكەن. دەم ئېلىش مەزگىلىدىن باشقا ۋاقىتلاردا، پۈتۈن شىنجاڭنىڭ كۆپ قىسىم رايونلىرىدا ھاۋا ئوچۇق، بەزىدە بۇلۇتلۇق بولىدىكەن، شامال كۈچى ئانچە كۈچلۈك بولمايدىكەن.
جۇڭگو ھاۋا رايى تورىنىڭ خەۋىرىگە ئاساسلانغاندا، چىڭمىڭلىق دەم ئېلىش باھار سەيلىسى قىلىدىغان، سەيلە-ساياھەتكە بارىدىغان ياخشى مەزگىل بولۇپلا قالماي، يەنە قەبرە يوقلاپ ئەجدادلارغا تەزىيە بىلدۈرىدىغان يۇقىرى پەللە مەزگىلى ئىكەن. بۇ يىللىق دەم ئېلىش مەزگىلىدە، غەربىي شىمال قاتارلىق كۆپ ساندىكى جايلاردا ئەڭ تۆۋەن نىسپىي نەملىك %20كە يەتمەيدىكەن ھەم ئىنتايىن قۇرغاق بولىدىكەن، شۇنداقلا چۈشتىن كېيىن بورانلىق ھاۋا رايى كۆپ كۆرۈلۈپ، كۆپ ساندىكى جايلاردا ئورمان ئوت ئاپىتى قاتارلىقلارنىڭ كۆرۈلۈش خەۋپى بىرقەدەر يۇقىرى بولىدىكەن، ئاممىغا ئىمكانقەدەر ئوت يېقىشتىن ساقلىنىپ، ئوت ئاپىتى كۆرۈلۈشتىن ھوشيار تۇرۇشنى تەۋسىيە قىلىمىز.
دەم ئېلىش مەزگىلىدە، ئەگەر ئامما ئاپتوموبىل ھەيدەپ سەپەرگە چىقسا، سەپەر جەريانىدا ھاۋا رايىدىن ئالدىن مەلۇمات ۋە يول ئەھۋالى ئۇچۇرلىرىنى ئالدىن تەكشۈرۈش، يول لىنىيەسىنى مۇۋاپىق پىلانلاشنى تەۋسىيە قىلىمىز. قار-يامغۇر ياغسا، ئامما ئاپتوموبىل ھەيدىگەندە چوقۇم ئارىلىق ساقلىشى، يانداپ ئۆتكەندە ئېھتىيات قىلىشى، مۇۋاپىق پەيتتە يىراق-يېقىننى يورۇتۇش چىرىغى، دائىرە چىرىغى، تۇمان چىرىغىنى ياندۇرۇشى كېرەك.
ئەتىيازلىق تېرىلغۇ مەزگىلىدە، تېمپېراتۇرىنىڭ ئۆرلىشى ـ تۆۋەنلىشى روشەن بولىدۇ، ئەتىگەندە ۋە كەچتە بەدەن يەنىلا سوغۇق ھېس قىلىدۇ، شىنجاڭنىڭ كۆپ قىسىم جايلىرىدا كېچە بىلەن كۈندۈزنىڭ تېمپېراتۇرا پەرقى 10 سېلسىيە گىرادۇستىن ئاشىدۇ، شۇڭا مۇۋاپىق قېلىنلىقتا كىيىنىپ، بويۇن، قورساق ۋە بوغۇملارنى ئىسسىق ساقلاشنى، شۇنداقلا كىيىم ـ كېچەكلەرنى ۋاقتىدا كۆپەيتىش ۋە ئازايتىشقا قولايلىق بولۇش ئۈچۈن، «پىياز شەكلى»دە كىيىم كىيىش ئۇسۇلىنى قوللىنىشنى تەۋسىيە قىلىمىز، .
«ئانار بۇلۇت»تىن ئېلىپ تەرجىمە قىلىندى
