□ئانار بۇلۇت\شىنجاڭ گېزىتى مۇخبىرى شېن زۇشياۋ
3 - ئاينىڭ 31 - كۈنى 30 - قېتىملىق مەملىكەتلىك ئوتتۇرا - باشلانغۇچ مەكتەپ ئوقۇغۇچىلىرى بىخەتەرلىك تەربىيەسى كۈنى، بىرقانچە كۈندىن بۇيان، ئاپتونوم رايونىمىزنىڭ ھەرقايسى جايلىرىدىكى ئوتتۇرا - باشلانغۇچ مەكتەپلەر شەكلى كۆپ خىل بىخەتەرلىك تەربىيەسى پائالىيەتلىرىنى تەشكىللەپ قانات يايدۇردى، ئوقۇتقۇچى - ئوقۇغۇچىلار پائالىيەتكە قاتنىشىش جەريانىدا بىخەتەرلىك ئېڭىنى كۈچەيتىپ، بىخەتەرلىك بىلىملىرىنى ئىگىلەپ، ئۆزىنى قوغداش، ئۆزىنى قۇتقۇزۇش ئىقتىدارىنى ئۆستۈردى.
3 - ئاينىڭ 28 - كۈنى، ئۈرۈمچى شەھەرلىك 10 - ئوتتۇرا مەكتەپنىڭ قانۇنچىللىق بويىچە مۇئاۋىن مەكتەپ مۇدىرى، ئۈرۈمچى شەھەرلىك گۇڭئەن ئىدارىسى سايباغ رايونلۇق شۆبە ئىدارىسى خوتەن كوچىسى ساقچىخانىسىنىڭ خوتەن كوچىسى مەھەللىسىگە مەسئۇل خەلق ساقچىسى پەن جېنجوۋ بۇ مەكتەپتىكى ئوقۇغۇچىلارغا بىر مەيدان مەزمۇنى مول، ئەمەلىي قوللىنىشچانلىقى كۈچلۈك بولغان بىخەتەرلىك بىلىملىرى لېكسىيەسى سۆزلىدى.
لېكسىيە سۆزلەش داۋامىدا، پەن جېنجوۋ مەكتەپ ئەتراپىدا يۈزبەرگەن دېلو مىساللىرى ئارقىلىق، قۇرامىغا يەتمىگەنلەرنىڭ جىنايەت ئۆتكۈزۈشىنىڭ ئالدىنى ئېلىش، مەكتەپتىكى بوزەك قىلىش قىلمىشلىرىنىڭ ئالدىنى ئېلىش قاتارلىق بىخەتەرلىك بىلىملىرىنى جانلىق چۈشەندۈرۈپ، ئوقۇغۇچىلارنىڭ بىخەتەرلىك، ئالدىنى ئېلىش ئېڭى ۋە قانۇنچىللىق قارىشىنى ئۆستۈردى.
لېكسىيە ئۇيۇشتۇرۇش بىلەن بىللە، بۇ ئوتتۇرا مەكتەپ يەنە مەكتەپ رادىيو پونكىتى، كۆرگەزمە تاختىسى، ئېلېكتىرونلۇق ئېكران قاتارلىقلاردىن پايدىلىنىپ، ئوقۇغۇچىلارغا بىخەتەرلىك تەربىيەسى بەردى.
3 - ئاينىڭ 26 - كۈنى، قاراماي شەھەرلىك ئوت ئۆچۈرۈش، قۇتقۇزۇش - ياردەم بېرىش تارماق ئەترىتىنىڭ ئوت ئۆچۈرۈش، قۇتقۇزۇش - ياردەم بېرىش خادىملىرى قاراماي شەھەرلىك نەنشىن باشلانغۇچ مەكتىپىگە بېرىپ، بۇ مەكتەپتىكى ئوقۇغۇچىلارغا بىر قېتىملىق جانلىق ئوت مۇداپىئە بىخەتەرلىكى تەربىيەسى دەرسى ئۆتتى.
دەرسخانىدا، ئوت ئۆچۈرۈش، قۇتقۇزۇش - ياردەم بېرىش خادىملىرى سۈرەت بىلەن يېزىق بىرلەشتۈرۈلگەن PPT ۋە ھەقىقىي ھادىسە مىساللىرى سىنى ئارقىلىق، ئوت ئاپىتى يۈزبېرىشنىڭ سەۋەبى، زىيىنى ھەمدە ئالدىنى ئېلىش تەدبىرلىرىنى چوڭقۇر مەزمۇنلۇق ۋە چۈشىنىشلىك قىلىپ تونۇشتۇردى، ئوتتىن مۇداپىئەلىنىش ساۋاتلىرى، 119 ساقچىغا مەلۇم قىلىش تېلېفونىغا قانداق تېلېفون قىلىش، ئوت كەتكەن جايدىن قېچىپ قۇتۇلۇش، ئۆزىنى قۇتقۇزۇش، ئوت ئۆچۈرگۈچنى ئىشلىتىش ئۇسۇلى قاتارلىق بىلىملەرنى نۇقتىلىق چۈشەندۈرۈپ، ئوقۇغۇچىلارغا ئوت مۇداپىئە بىخەتەرلىكى بىلىملىرىنى ئىگىلەشنىڭ مۇھىملىقىنى تونۇتتى.
«سىز سوراڭ، مەن جاۋاب بېرەي» «يوشۇرۇن خەۋپ بويىچە مەسىلە تېپىش» «ئۈسكۈنىلەرنى تۇتۇپ بېقىڭ»... 3 - ئاينىڭ 26 - كۈنى، پەيزاۋات ناھىيەسى بارىن بازارلىق 1 - باشلانغۇچ مەكتەپتە بىر قېتىملىق ئالاھىدە «بىخەتەرلىك تەربىيەسى دەرسى» ئۆتۈلدى، پەيزاۋات ناھىيەلىك ئوت ئۆچۈرۈش، قۇتقۇزۇش - ياردەم بېرىش چوڭ ئەترىتى شوتىلىق ئوت ئۆچۈرۈش ئاپتوموبىلىنى مەكتەپكە ھەيدەپ كىرىپ، ئوقۇغۇچىلارنى چۆكۈش شەكلىدە ھېس قىلىش داۋامىدا ئوت مۇداپىئە بىلىملىرىنى ئۆگىنىش، بىخەتەرلىكنى چۈشىنىش ئىمكانىيىتىگە ئىگە قىلدى.
ئوت ئۆچۈرۈش، قۇتقۇزۇش - ياردەم بېرىش خادىملىرى بۇ مەكتەپتىكى ئوقۇغۇچىلارغا ئوت ئۆچۈرگۈچنى ئىشلىتىشتىكى مۇھىم نۇقتىلارنى چۈشەندۈرۈپ، ئوت ئۆچۈرگۈچنى توغرا ئىشلىتىش قەدەم - باسقۇچلىرىنى نەق مەيداندا كۆرسىتىپ بېرىپ، ئوقۇغۇچىلارغا ئوت ئۆچۈرگۈچنى ئىشلەتكەندە بىخەتەر ئارىلىق ساقلاشقا دىققەت قىلىش، ئوت يالقۇنى بىلەن بىۋاسىتە ئۇچرىشىشتىن ساقلىنىش قاتارلىقلارنى ئەسكەرتتى.
«بىخەتەرلىك ئېڭىنى ئوقۇغۇچىلارغا كىچىكىدىن باشلاپ سىڭدۈرۈش كېرەك.» ئوت ئۆچۈرۈش، قۇتقۇزۇش - ياردەم بېرىش خادىمى ۋېي جىپېڭ مۇنداق دېدى: بۇ خىل «كۆرگىلى بولىدىغان، تۇتقىلى بولىدىغان، ئەستە ساقلىغىلى بولىدىغان» تەشۋىق - تەربىيە شەكلى ئارقىلىق، بىخەتەرلىك ئېڭىنى ئوقۇغۇچىلارغا سىڭدۈرۈش بىلەن بىللە، ئوقۇغۇچىلارغا ئوتتىن مۇداپىئەلىنىش ماھارىتىنى ئۆگەتتۇق.
3 - ئاينىڭ 28 - كۈنى، باي ناھىيەلىك 6 - ئوتتۇرا مەكتەپتە، باي ناھىيەلىك گۇڭئەن ئىدارىسى قاتناش باشقۇرۇش چوڭ ئەترىتىنىڭ خەلق ساقچىسى PPT ئارقىلىق چۈشەندۈرۈش، تەشۋىقات ماتېرىيالى تارقىتىش قاتارلىق شەكىللەر ئارقىلىق، ئوقۇغۇچىلارغا بىخەتەرلىك قالپىقى كىيمەسلىك، تەتۈر يۆنىلىشتە مېڭىش، قىزىل چىراغنى بۆسۈپ ئۆتۈش، يولدىن ئۆتكەندە پىيادىلەر سىزىقىدىن ماڭماسلىق قاتارلىق قاتناش قانۇنىغا خىلاپ قىلمىشلارنىڭ زىيىنى ۋە ئېغىر ئاقىۋىتىنى چۈشەندۈردى ھەم ئوقۇغۇچىلارنى «كىچىك قاتناش بىخەتەرلىكى تەشۋىقاتچىسى» بولۇپ، «كىچىكلەر چوڭلارنى يېتەكلەش» ئارقىلىق، ئاتا - ئانىلارنىڭ قاتناش قائىدىسىگە رىئايە قىلىشىنى نازارەت قىلىشقا ئۈندىدى.
«بۈگۈن ئالاھىدە ھاسىلاتقا ئېرىشتىم، نۇرغۇن قاتناش بىخەتەرلىكى بىلىمىنى ئۆگىنىۋالدىم، بۇنىڭدىن كېيىن چوقۇم قائىدىگە رىئايە قىلىپ، بىخەتەرلىك كىچىك قوغدىغۇچىسى، ئائىلىمىزنىڭ قاتناش بىخەتەرلىكى كىچىك ياردەمچىسى بولىمەن» دېدى بۇ مەكتەپنىڭ ئوقۇغۇچىسى بۇھەجەر تۇردى.
