□ئانار بۇلۇت\شىنجاڭ گېزىتى مۇخبىرى جاڭ تىڭ
«دېكىراتسىيەلىك پەردىنى ئېسىپ بولدۇق!»
3 - ئاينىڭ 29 - كۈنى سەھەردە، خوتەن ناھىيەسىنىڭ ئاۋات يېزىسى ئاقچال كەنتى كەنت ئاھالە كومىتېتىنىڭ قورۇسىدا، 23 ياشلىق خۇ چۇنفاڭ بېيجىڭ تيەنئەنمېن ئارقا كۆرۈنۈش قىلىنغان ئۈچ مېتىر ئۇزۇنلۇقتىكى دېكىراتسىيەلىك پەردىنى تامغا ئاسقاندىن كېيىن، كەينىگە بۇرۇلۇپ يېنىدا قاراپ تۇرغان ئۇيغۇر تاغىدىن «ياخشى بوپتىمۇ؟» دەپ سورىدى. تاغا دېكىراتسىيەلىك پەردىنى سىلىغىنىچە كۈلۈپ تۇرۇپ: «بېيجىڭ ياخشى!» دېدى.
خۇ چۇنفاڭنىڭ بىر كۈنلۈك خىزمىتى شۇنىڭ بىلەن باشلاندى − ئۇ بۇ يەرگە كەلگەن ھەربىر يۇرتداشنى «تيەنئەنمېن» ئالدىدا خاتىرە سۈرەتكە تارتىشقا باشلىدى.
«شاكىچىك، بۇ ياققا قارا!»
«ئاچا، بېشىڭىزنى سەل يانتۇ قىلىڭ!»
خۇ چۇنفاڭ يەردە يېرىم تىزلىنىپ ئاپپارات كۇنۇپكىسىنى باستى.
70 نەچچە ياشلىق موماي ئالايىتەن چىرايلىق گۈللۈك كۆڭلەك كىيىۋالغانىدى، بىر چەتتە تۇرغان ئېرى دوپپىسىنى قايتا - قايتا سۈرتۈۋاتاتتى. «قىزچاق، سىزگە كۆپ رەھمەت! ئۆمۈرلۈك ئارزۇيۇمنى ئىشقا ئاشۇردىڭىز» دېدى موماي خۇ چۇنفاڭنىڭ قولىنى چىڭ سىقىپ تۇرۇپ.
2024 - يىلى 6 - ئايدا، چۇڭچىڭ ماشىنا - ئېلېكتىر كەسپىي تېخنىكا داشۆسىنىڭ 4 - يىللىقىدا ئوقۇۋاتقان خۇ چۇنفاڭ مەكتەپتىكى بىر مەيدان پائالىيەتتە خوتەن بىلەن تۇنجى قېتىم «ئۇچراشتى». تەشۋىقات فىلىمىدە، ئالتۇن رەڭلىك توغراقنىڭ شولىسى سۇلۇق يەردە ئەكس ئېتىپ تۇراتتى، دۇتار چېلىۋاتقان ئۇيغۇر بوۋاينىڭ قورۇق باسقان چېھرىدە تەبەسسۇم جىلىۋىلىنىپ تۇراتتى. «بۇ قۇربان تاغىنىڭ يۇرتى ئىكەنغۇ!» كىچىكىدىنلا «قۇربان تۇلۇم تاغىنىڭ ئېشەككە مىنىپ بېيجىڭغا بارماقچى بولغانلىقى» توغرىسىدىكى ھېكايىنى ئاڭلاپ چوڭ بولغان بۇ قىز شىنجاڭغا، ۋەتەن ئېھتىياجلىق جايغا بېرىشتىن ئىبارەت كىشىلىك ھاياتىدىكى مۇھىم بىر قارارنى چىقاردى. يولغا چىقىش ئالدىدا، ئائىلىسىدىكىلەر ئۇنىڭ يۈك - تاق ساندۇقىغا خوگو ماتېرىيالىنى لىق قاچىلاپ بەردى ھەم مۇنداق تاپىلىدى: «ياۋئېر، تاماقنى ئوبدان يەڭ، بىزنى سېغىنسىڭىز تېلېفون قىلىڭ، ئۆزىڭىزنى ئاسراڭ».
2024 - يىلى 10 - ئاينىڭ 28 - كۈنى، خوتەندىن ئىبارەت بۇ تۇپراققا ھەقىقىي تۈردە قەدەم باسقان شياۋخۇ تەسەۋۋۇردىكى شىنجاڭ بىلەن رېئاللىقنىڭ تۈپتىن ئوخشىمايدىغانلىقىنى بايقىدى: چوڭ تىپتىكى پاختا يىغىش ماشىنىسى كېۋەزلىكتە مەشغۇلات قىلىۋاتاتتى؛ تەكشى، كەڭ كەتكەن يول بويىدا گىرەلەشتۈرۈلۈپ رەتلىك سېلىنغان چىرايلىق ئۆيلەر قەد كۆتۈرۈپ تۇراتتى. يۇرتداشلار قىزغىن، مېھماندوست ئىدى، تىل ئۇقۇشمىسىمۇ، كۈلۈمسىرەش، قول ئىشارىسى ئارقىلىق ئىللىقلىق ۋە ياخشى كۆڭلىنى يەتكۈزەتتى.
خۇ چۇنفاڭ بۇ يەردىكى قەلبلەرنى ئىللىتىدىغان نۇرغۇن ھېكايىنى بىراقلا سۆزلەپ بېرەلەيدۇ. يېقىندا، ئۇ بىر ئىشتىن قاتتىق تەسىرلەندى.
3 - ئاينىڭ باشلىرىدىكى بىر كۈنى، قۇم - بوران ئۇچۇرۇپ كەلگەن قۇم - شېغىللار يۈزلەرگە ئۇرۇلاتتى، خۇ چۇنفاڭ بېشىنى تۆۋەن سېلىپ يولدا كېتىۋاتقاندا، بىرەيلەننىڭ ئۇيغۇر تىلىدا ئۆزىنى چاقىرغانلىقىنى ئاڭلىدى. بېشىنى بۇراپ قاراپ، ئۈچ چاقلىق توكسىكلىت مىنگەن ئۇيغۇر ھەدىنىڭ ئۆزىگە توختىماي قول ئىشارىسى قىلىۋاتقانلىقىنى كۆردى.
ئۇ بۇ ھەدىنىڭ توكسىكلىتىغا چىقتى، ھەدە سۆزلىگەچ قول ئىشارىسى قىلىپ نېمىلەرنىدۇر سورىدى، خۇ چۇنفاڭ بىردىنلا ئۇنىڭ نېمە دېمەكچى ئىكەنلىكىنى چۈشەندى − ئۇ خۇ چۇنفاڭنىڭ نەگە بارىدىغانلىقىنى سوراۋاتاتتى.
خۇ چۇنفاڭ دەرھال يان تېلېفونىنى چىقىرىپ، تەرجىمە يۇمشاق دېتالى ئارقىلىق بارىدىغان جايىنىڭ نامىنى كىرگۈزدى. ھەدە كۈلۈمسىرىۋېدى، كۆز ئەتراپىدىكى قورۇقلار تېخىمۇ ئېنىق كۆرۈندى، توپا يولدا مېڭىۋاتقان توكسىكلىتنىڭ چاقىدىن چىققان شىر - شىر قىلغان ئاۋاز ئىچىدە، ھەدە ئانچە پىششىق بولمىغان دۆلەت تىلىدا «قۇمئېغىل كەنتى» دېگەن سۆزنى ئېيتقاندىن كېيىن، يەنە ئۆزىنى ئىشارە قىلدى. ئەسلىدە ئەزەلدىن تونۇشمايدىغان بۇ ھەدە قۇمئېغىل كەنتىنىڭ كەنت ئاھالىسى ئىدى. پاراڭلىشىش ئارقىلىق، خۇ چۇنفاڭ بۇ ھەدىنىڭ ئۆزىنى قۇم - بوراندا يولدىن ئېزىپ قالغان ئوخشايدۇ، دەپ قالغانلىقىنى بىلدى.
سۈرەتكە تارتىشقا قىزىقىدىغان خۇ چۇنفاڭ ئاۋات يېزىسىنىڭ تەشۋىقات كادىرى بولۇپ، ھەپتە ئاخىرى بولسىلا ئۇ فوتو ئاپپاراتىنى ئېلىپ تەرەپ - تەرەپكە بېرىپ سۈرەتكە تارتىپ خاتىرە قالدۇراتتى. ئۇ ئېتىز باشلىرىنى، بازاردىكى كىشىلەرنىڭ تەبەسسۇم جىلۋىلەنگەن چېھرىنى، قەيسەر، ھاياتىي كۈچكە ئىگە توغراقلارنى سۈرەتكە تارتتى... ھەربىر پارچە سۈرەت، ھەربىر بۆلەك سىنغا ئۇنىڭ بۇ تۇپراققا بولغان قىزغىن مۇھەببىتى سىڭگەنىدى.
3 - ئاينىڭ باشلىرىدا، ئېتىزلىقتا ئەتىيازلىق تېرىلغۇ مەنزىرىسىنى سۈرەتكە تارتىۋاتقاندا، كەنتتىكى بىر پېشقەدەم پارتىيە ئەزاسى پاراڭلىشىش جەريانىدا خوتۇنىنى ئېلىپ تيەنئەنمېنگە بېرىپ سۈرەتكە چۈشكۈسى بارلىقىنى ئېيتتى. بۇ خۇ چۇنفاڭنى چوڭقۇر ئويغا سالدى. «مەن ئۇلارنىڭ بۇ ئارزۇسىنى ئىشقا ئاشۇرۇشىغا ياردەم قىلالارمەنمۇ؟» يېزىغا قايتىپ كەلگەندىن كېيىن، ئۇ دەرھال بۇ ئويىنى يېزىلىق پارتىيە كومىتېتىغا دوكلات قىلدى.
قوللاشقا ئېرىشكەن خۇ چۇنفاڭ توردىن تيەنئەنمېن مەيدانىنىڭ كۆرۈنۈشى بېسىلغان تەقلىدىي ئارقا كۆرۈنۈش پەردىسى سېتىۋالدى. ئارقىدىنلا، ئۇ يەنە ئۈسكۈنىلەرنى ماسلاشتۇرۇپ، سۈرەتكە تارتىدىغان ئورۇننى ئىزدەش بىلەن ئالدىراش بولدى. كەنت ئاھالە كومىتېتىنىڭ سىرتى، كىچىك مەيدانلارغا كۈن نۇرى ياخشى چۈشسىلا، مەيدان كەڭ بولسىلا، ئۇ ھەممىسىگە بىر - بىرلەپ بەلگە سالدى. تېخىمۇ كۆپ كەنت ئاھالىسىنى قاتناشتۇرۇش ئۈچۈن، ئۇ يېزا كادىرلىرى بىلەن ئۆيمۇئۆي زىيارەت قىلىپ، كۆپچىلىكنىڭ ئارزۇسىنى سورىدى. ئېرىشكەن جاۋابتىن ئۇ ناھايىتى خۇشال بولدى، يۇرتداشلارنىڭ تيەنئەنمېنگە بولغان تەلپۈنۈشى ئۇنىڭ تەسەۋۋۇرىدىكىدىن خېلىلا ئېشىپ چۈشتى، گەرچە دېھقانچىلىقنىڭ ئالدىراش مەزگىلى بولسىمۇ، كۆپچىلىكنىڭ ھەممىسى بۇنىڭغا ئاكتىپ ئاۋاز قوشتى.
بەزى كەنت ئاھالىلىرى دېھقانچىلىق ئىشلىرىنى قىلىپ بولغاندىن كېيىن، ئالايىتەن ئۆيىگە قايتىپ پاكىز كىيىملىرىنى ئالماشتۇرۇپ كېلىپ سۈرەتكە چۈشتى؛ يەنە بەزى كەنت ئاھالىلىرى توكسىكلىت مىنىپ ئالدىراپلا يېتىپ كەلدى، ئۇلارنىڭ كۆزلىرى ئۈمىدكە تولغانىدى. بىر ھەدە سۈرەتكە چۈشۈپ بولغاندىن كېيىن خۇشال ھالدا ئۇسسۇلغا چۈشتى. خۇ چۇنفاڭ بۇنىڭدىن چوڭقۇر تەسىرلەندى، ئۇ ئۆزىنىڭ قىلغانلىرىنىڭ سۈرەتكە تارتىشلا ئەمەس، بەلكى ئۈمىد ۋە ئارزۇنى يەتكۈزۈش ئىكەنلىكىنى چۈشەندى.
خۇ چۇنفاڭ يەنە ھەربىر پارچە سۈرەتكە ئىككىلىك كود قوشۇشنى قارار قىلدى، ساۋما قىلسىلا ئېلېكتىرونلۇق سۈرەتكە ئېرىشكىلى بولاتتى. بۇنىڭ ئۈچۈن، خۇ چۇنفاڭ بىلەن يېزىدىكى تەشۋىقات ھەيئىتى ۋاڭ خاۋشياڭ كېچىلەپ ماتېرىيال كۆرۈپ، كەسپىي زاتلاردىن مەسلىھەت سوراپ، AI بىلەن سەھەر سائەت 4 - 5لەرگىچە ھەپىلەشتى. مۇۋەپپەقىيەت قازانغان ئاشۇ دەقىقىدە، ھاياجانلانغانلىقىدىن ئۇنىڭ كۆزىگە ئىسسىق ياش كەلدى.
پائالىيەتنىڭ قانات يايدۇرۇلۇشىغا ئەگىشىپ، خۇ چۇنفاڭنىڭ سۈرەتكە تارتىش كوللېكتىپىدىكىلەر كۆپىيىپ بەش كىشىگە يەتتى. بەزىلىرى كۆپچىلىكنىڭ سۈرەتكە چۈشۈش ئارزۇسى توغرىسىدىكى سۆزلىرىنى تەرجىمە قىلىپ بېرىشكە، بەزىلىرى سۈرەتكە تارتىش ئۈسكۈنىلىرىنىڭ تىرەك جازىسىنى تەڭشەشكە، بەزىلىرى يۇرتداشلارنىڭ كىيىم - كېچەك، زىبۇ - زىننەت، چاچ پاسونىنى تۈزەشتۈرۈشكە مەسئۇل بولدى. كۆپچىلىك بىرلىكتە مۇزاكىرە قىلىپ، بىرلىكتە پىلانلاپ، بۇ پائالىيەتنى قانداق قىلغاندا تېخىمۇ ياخشى قىلغىلى بولىدىغانلىقى ئۈستىدە ئويلاندى. ئۇلار 6 - ئاينىڭ ئاخىرىدىن بۇرۇن 4000 پارچە خاتىرە سۈرەتكە تارتىشنى تاماملاشنى پىلانلىدى.
بۈگۈنكى كۈندە، يېزىدا كېتىۋاتقاندا، كەنت ئاھالىلىرى خۇ چۇنفاڭغا قىزغىن سالام قىلىپ مۇنداق دەيدۇ: «شياۋخۇ، ئۆيگە كېلىپ ئولتۇرۇپ كېتىڭ!» «شياۋخۇ، ئائىلىمىزدە ئۆزىمىز قۇرۇتقان قۇرۇق مېۋىلەرگە ئېغىز تېگىپ بېقىڭ!»...
بۇ چۇڭچىڭلىق قىز مۇنداق دېدى: سۈرەتنى تاپشۇرۇۋالغان كەنت ئاھالىلىرىنىڭ چېھرىدە تەبەسسۇم جىلۋىلەندى ھەمدە سۈرەتكە چۈشۈپ بولغاندىن كېيىن قولۇمغا بىر سىقىم قۇرۇق ئۈزۈم، چىلانلارنى تۇتقۇزۇپ قويدى، مەن بۇنىڭدىن ئىنتايىن تەسىرلەندىم، كەنت ئاھالىلىرى خۇددى ئائىلەمدىكىلەرگە ئوخشاشلا يېقىملىق، مېھرىبان. مەن ئۆزۈمنى بۇ يەر بىلەن يۇغۇرۇلۇپ بىر گەۋدىگە ئايلىنىپ كەتكەندەك ھېس قىلىمەن.
