يېڭى توشقانزەدىكى ئوتتۇرىچە مو بېشى ھوسۇلىنى 200 كىلوگىرامغا، ماشىنىلاشتۇرۇش نىسبىتىنى ％70كە يەتكۈزۈش ئىشقا ئاشۇرۇلىدۇ
شىنجاڭ گېزىتى، ئۈرۈمچى، 3 - ئاينىڭ 31 - كۈنى خەۋىرى ئانار بۇلۇت\شىنجاڭ گېزىتى مۇخبىرى ساۋ خۇانىڭ شىنجاڭ ئورمانچىلىق پەنلەر ئاكادېمىيەسىدىن ئىگىلىشىچە، كەلگۈسى ئۈچ يىلدا، شىنجاڭ توشقانزەدىكى كەسپىنى چۆرىدەپ پەن - تېخنىكىدا ئۆتكەلگە ھۇجۇم قىلىشنى قانات يايدۇرۇپ، يېڭى توشقانزەدىكىنىڭ ئوتتۇرىچە مو بېشى ھوسۇلىنى 80 كىلوگىرامدىن 200 كىلوگىرامغا ئۆستۈرۈشنى ئىشقا ئاشۇرۇپ، ماشىنىلاشتۇرۇش نىسبىتىنى ％20 ئەتراپىدىن ％70كە ئۆستۈرۈشكە تۈرتكە بولۇپ، كەسىپ ئاساسىنى يەنىمۇ پۇختىلايدىكەن.
ئاپتونوم رايوننىڭ نۇقتىلىق تەتقىق قىلىپ ئېچىش ۋەزىپىسى بولغان «شىنجاڭ توشقانزەدىكى كەسپىدە سۈپەتنى ئۆستۈرۈپ ئۈنۈمنى ئاشۇرۇش بويىچە ئاچقۇچلۇق تېخنىكىنى تەتقىق قىلىش ۋە ئۇنى قوللىنىش» تۈرىنى شىنجاڭ ئورمانچىلىق پەنلەر ئاكادېمىيەسى باش بولۇپ، شىنجاڭ پەن - تېخنىكا بايلىقىدىن ئورتاق بەھرىلىنىش مۇلازىمەت مەركىزى، ئاپتونوم رايونلۇق جۇڭيى تېبابىتى دورىلىرى، مىللىي تېبابەت دورىلىرى تەتقىقات ئورنى، دۆلەت ئورمانچىلىق ۋە ئوتلاق ئىدارىسى خاربىن ئورمانچىلىق ماشىنىلىرى تەتقىقات ئورنى، شىنجاڭ شېڭمىڭ خېلى يۇقىرى پەن - تېخنىكا پاي چەكلىك شىركىتىدىن ئىبارەت تۆت ئورۇن بىلەن بىرلىشىپ، 41 كىشىلىك تەتقىق قىلىپ ئېچىش كوللېكتىپىنى قۇرۇپ، ئۈچ يىل ئۆتكەلگە ھۇجۇم قىلىش ئارقىلىق، «ئەلا سورت + ياخشى ئۇسۇل + ياخشى ماشىنا + كۆپ خىل مەھسۇلات» كەسىپ تەرەققىيات سىستېمىسىنى بەرپا قىلىپ، توشقانزەدىكى كەسپىدە سۈپەتنى ئۆستۈرۈپ ئۈنۈمنى ئاشۇرۇشنى ئىلگىرى سۈرۈشنى پىلانلىدى.
توشقانزەدىكى ئەنئەنىۋى داڭلىق، قىممەتلىك جۇڭيى دورا ماتېرىيالى بولۇش سۈپىتى بىلەن، نۆۋەتتە شىنجاڭدا مىليون مولۇق ئۆستۈرۈش كۆلىمى شەكىللەندۈرۈلگەن بولسىمۇ، لېكىن يەنە ئۇرۇق پىلازمىسى چېكىنىش، كېسەللىك - ھاشارات زىيىنى كۆپ يۈزبېرىش، ماشىنىلىشىش نىسبىتى يېتەرلىك بولماسلىق، ئىنچىكە پىششىقلاش ئاجىز بولۇش قاتارلىق چەكلىمىلەرگە دۇچ كەلمەكتە. تەكلىماكان قۇملۇقىنىڭ گىرۋىكىدىكى توسۇپ زەربە بېرىش جېڭىنىڭ ئالغا سىلجىتىلىشىغا ئەگىشىپ، كەلگۈسىدە توشقانزەدىكى ئۆستۈرۈش كۆلىمى تېز سۈرئەتتە ئېشىپ، كەسىپنىڭ سۈپىتىنى ئۆستۈرۈپ ئۈنۈمىنى ئاشۇرۇشقا بولغان ئېھتىياج تەخىرسىز بولىدۇ.
پەن تەتقىقات خادىملىرى توشقانزەدىكى كەسپىدە ئۇرۇق پىلازمىسى بايلىقى، ماشىنىلاشتۇرۇش، ئىنچىكە پىششىقلاش، ئىستراتېگىيەلىك تەتقىقاتتىن ئىبارەت تۆت چوڭ يادرولۇق يۆنىلىشنى چۆرىدەپ ئۆتكەلگە ھۇجۇم قىلىشنى قانات يايدۇرىدۇ. ئۇرۇق پىلازمىسىدا يېڭىلىق يارىتىش ساھەسىدە، شىنجاڭ توشقانزەدىكىنىڭ سۈپىتىنى باھالاش سىستېمىسى بەرپا قىلىپ، توشقانزەدىكى ھەم ئۇنىڭ پارازىت ئىگىسى ئۆسۈملۈكىنىڭ ئەلا سۈپەتلىك ئۇرۇق پىلازمىسى بايلىقىنى تاللاپ چىقىپ، يېڭى مەھسۇلاتنىڭ ئوتتۇرىچە مو بېشى مەھسۇلات مىقدارىنى 80 كىلوگىرامدىن 200 كىلوگىرامغا تېز ئۆستۈرۈشنى ئىشقا ئاشۇرىدۇ. ماشىنىلاشتۇرۇشتىكى كەمتۈكلۈكلەرگە قارىتا، سۇيۇقلاندۇرۇلغان ئۇلاش دورىسىنى تەتقىق قىلىپ ياساپ، ئورمان بىنا قىلىش ۋە يىغىۋېلىش ماشىنىسىنىڭ دەرىجىسىنى ئۆستۈرۈپ، «بىر قېتىمدا تولۇق يىغىۋېلىش» ئۆستۈرۈش يېڭى ئەندىزىسى بەرپا قىلىپ، ماشىنىلاشتۇرۇش نىسبىتىنى ％20 ئەتراپىدىن ％70كە ئۆستۈرۈشكە تۈرتكە بولۇپ، ئادەم كۈچى تەننەرخى يۇقىرى بولۇش، ئۈنۈم تۆۋەن بولۇشتەك قىيىن مەسىلىنى ھەل قىلىدۇ. ئىنچىكە پىششىقلاش يۆنىلىشىدە، ئوندىن ئارتۇق ساغلاملىق يېمەكلىكى، گىرىم بۇيۇمى ھەم ئادەتتىكى يېمەكلىكلەرنى ئېچىپ، كەسىپ زەنجىرىنى ئۇزارتىشنى پىلانلىدى. كەسىپ ئىستراتېگىيەسى تەتقىقاتى جەھەتتە، توشقانزەدىكى پۈتۈن كەسىپ زەنجىرىنى ئەلالاشتۇرۇش يولى ۋە سىياسەتتە يېڭىلىق يارىتىش ئۈستىدە ئىزدىنىدۇ.
شىنجاڭدا قۇملۇق رايونىنىڭ كۆلىمى كەڭ بولۇپ، توشقانزەدىكى كەسپىنى تەرەققىي قىلدۇرۇشتا ياخشى ئاساسقا ئىگە. نۆۋەتتە، شىنجاڭدا يىلىغا 10 مىڭ توننىدىن ئارتۇق قۇرۇتۇلغان توشقانزەدىكى ئىشلەپچىقىرىلىدىغان بولۇپ، پۈتۈن مەملىكەتنىڭ يىللىق مەھسۇلات مىقدارىنىڭ ％80ىدىن كۆپرەكىنى ئىگىلەيدۇ، تارىم ئويمانلىقى، تۇرپان ئويمانلىقى ھەم جۇڭغار ئويمانلىقى قۇملۇق رايونىنى چۆرىدىگەن ئۈچ مەركەزلىك تۇتاش كەتكەن ئىشلەپچىقىرىش رايونى شەكىللەندۈرۈلگەن بولۇپ، شۇ جايدىكى دېھقان - چارۋىچىلارنىڭ كىرىمىنى ئاشۇرۇشقا غايەت زور تۆھپە قوشتى.
«تۈرنىڭ يولغا قويۇلۇشى توشقانزەدىكى ئۆستۈرۈش، پىششىقلاش، بازار پۈتۈن زەنجىرىنى يەنىمۇ راۋانلاشتۇرۇپ، ھەم قۇملۇق رايوندىكى ئامما ئۈچۈن يېڭى بېيىش يولى ئاچىدۇ، ھەم چۆللىشىشنىڭ ئالدىنى ئېلىش - تىزگىنلەشنى ئىمكانىيەتلىك سىجىل ھەل قىلىش لايىھەسى بىلەن تەمىنلەيدۇ، مۆلچەرىمىزچە، بۇ ئارقىلىق نەچچە ئونمىڭ دېھقان - چارۋىچىنىڭ ئىشقا ئورۇنلىشىشىغا تۈرتكە بولۇپ، خاس قۇملۇق كەسپىنىڭ ئېكولوگىيە قۇرۇلۇشى بىلەن ماس تەرەققىي قىلىشىدىكى شىنجاڭ ئۈلگىسىنى شەكىللەندۈرگىلى بولىدۇ» دېدى تۈر بىرلىشىپ ئۆتكەلگە ھۇجۇم قىلىش گۇرۇپپىسىنىڭ مەسئۇلى ليۇ يۇڭپىڭ.
