− شىنجاڭدىكى ھەر دەرىجىلىك كەنتتە تۇرۇشلۇق خىزمەت ئەترەتلىرى ھەر مىللەت ئامما بىلەن بايرامنى بىرلىكتە ئۆتكۈزدى
□ ئانار بۇلۇت\شىنجاڭ گېزىتى مۇخبىرلىرى
3 - ئاينىڭ 31 - كۈنى روزى ھېيت، بايرام مەزگىلىدە ئاپتونوم رايونىمىزدىكى ھەر دەرىجىلىك كەنتتە تۇرۇشلۇق خىزمەت ئەترەتلىرى دېھقانلارنىڭ ھويلا - ئارانلىرىغا، ئېتىز - ئېرىق باشلىرىغا بېرىپ، ھەر مىللەت ئامما بىلەن بىرلىكتە بايرامنى خۇشال - خۇرام ئۆتكۈزۈپ، ئىللىقلىق ۋە غەمخورلۇقنى ئاممىنىڭ قەلبىگە يەتكۈزدى. كۈلكە سادالىرىغا تولغان مەززىلىك تائاملارنى تەييارلاش نەق مەيدانىدىن ناخشا - ئۇسسۇل قاينىغان مەدەنىيەت پائالىيىتى سەھنىسىگىچە؛ ھاياتىي كۈچكە تولغان مۇنبەت ئېتىزلاردىن پۈتۈن كۈچ بىلەن ئىشلەپچىقىرىشقا كىرىشتۈرۈلگەن يېزا - كەنت زاۋۇتلىرىغىچە... تىيانشاننىڭ جەنۇبى - شىمالىدىكى ھەممە جاي خۇشال - خۇرام ۋە ئىناق بايرام كەيپىياتىغا چۆمدى.
بايرامدا ئىللىقلىق يەتكۈزۈلۈپ، قەلبلەر مۇجەسسەملەندى
3 - ئاينىڭ 29 - كۈنى سەھەردە، قورغاس ناھىيەسىنىڭ چىڭسىخوزا بازىرى چىڭسىخوزا كەنتىنىڭ كەنت ئاھالىسى تۇرسۇنمەمەت خېلىل ھويلىسىدا ئالدىراش بولۇپ كەتتى. ئۇ ئۆيىگە كەنتتە تۇرۇشلۇق خىزمەت ئەترىتىدىكىلەرنىڭ كېلىپ ھال سورايدىغانلىقىنى بىلگەندىن كېيىن، ھويلىسىنى پاكىز تازىلىدى.
چۈشتىن بۇرۇن سائەت 11دە قورغاس ناھىيەلىك ئادەم كۈچى بايلىقى ۋە ئىجتىمائىي كاپالەت ئىدارىسىنىڭ چىڭسىخوزا كەنتىدە تۇرۇشلۇق خىزمەت ئەترىتىنىڭ 1 - شۇجىسى لياڭ يۇڭ بايراملىق سوۋغاتلارنى ئېلىپ ھال سورىغىلى كەلدى. تۇرسۇنمەمەت لياڭ يۇڭنى ئۆيىگە قىزغىن تەكلىپ قىلدى، لياڭ يۇڭ گۈرۈچ، ئۇن، ياغ ۋە يېڭى كۆكتاتلارنى ئېلىپ ئۆيگە كىرىپ، ياشىنىپ قالغان تۇرسۇنمەمەت بىلەن چۆرىدىشىپ ئولتۇرۇپ پاراڭلىشىپ ئۇنىڭ تۇرمۇش ئەھۋالىنى ئىگىلىدى ھەم ئۇنىڭغا سالامەتلىكىنى ئاسراشنى تاپىلىدى. «پارتىيە ۋە ھۆكۈمەتكە رەھمەت، تۇرمۇشۇم بارغانسېرى ياخشى بولۇپ كەتتى» دېدى تۇرسۇنمەمەت مىننەتدارلىق بىلەن.
3 - ئاينىڭ 29 - كۈنى چۈشتىن بۇرۇن، قابا ناھىيەسىنىڭ سارتام يېزىسى كۇرمىش كەنتىدە جۇڭگو بانكىسى ئالتاي شۆبە بانكىسىنىڭ كۇرمىش كەنتىدە تۇرۇشلۇق خىزمەت ئەترىتىنىڭ 1 - شۇجىسى جوۋ كەي خىزمەت ئەترىتىنىڭ ئەترەت ئەزالىرى، كەنتتىكى پارتىيەلىك پىدائىيلار بىلەن لېكسىيە سۆزلەش كىچىك شۆبە ئەترىتى تەشكىللەپ، كەنت ئاھالىلىرىنىڭ ئۆيلىرىگە باردى. ئەمىن ئۆيلەردە دومبىرا ئاۋازى لەرزان ياڭرىدى، لېكسىيە سۆزلەش شۆبە ئەترىتى ئاممىباب، چۈشىنىشلىك سۆزلەر بىلەن ناخشا ئېيتىپ، داۋالىنىش سۇغۇرتىسى ۋە ياشانغاندا كۈتۈنۈش سۇغۇرتا سىياسىتى قاتارلىق مەزمۇنلارنى تەشۋىق قىلدى. كەنت ئاھالىسى قادىر تىلېۋقان ھاياجانلانغان ھالدا مۇنداق دېدى: «سىياسەتنى چۈشىنىشلىك سۆزلەپ بەردى، ئاڭلىغاندىن كېيىن كۆڭلۈم خاتىرجەم بولدى».
ھازىر دەل ئەتىيازلىق تېرىلغۇنىڭ ئاچقۇچلۇق مەزگىلى، شايار ناھىيەسىنىڭ قىزىلبايراق بازىرى ئۆستەڭبويى كەنتىدە ئالدىراش مەنزىرە بارلىققا كەلگەنىدى. 3 - ئاينىڭ 29 - كۈنى، ئاقسۇ ۋىلايەتلىك يۇغۇرما تاراتقۇ مەركىزىنىڭ ئۆستەڭبويى كەنتىدە تۇرۇشلۇق خىزمەت ئەترىتى ئائىلىلەرگە كىرىپ زىيارەت قىلىش، ئېتىز باشلىرىغىچە بېرىش قاتارلىق شەكىللەر ئارقىلىق ھەقىقىي تۈردە كەنت ئاھالىلىرىنىڭ غەم - ئەندىشىسىنى تۈگىتىپ، قىيىنچىلىقىنى ھەل قىلىپ، ئەتىيازلىق تېرىلغۇ ئىشلەپچىقىرىشىغا كۈچ قوشتى.
75 ياشلىق كەنت ئاھالىسى تۇنىياز ھوشۇرنىڭ ئۆزى يالغۇز ئائىلىسىنىڭ ئورمان بەلبېغىدا كۆچەت تىكىۋاتقانلىقىنى بىلگەندىن كېيىن، خىزمەت ئەترىتىنىڭ ئەزالىرى دەرھال بېرىپ ياردەملەشتى. خىزمەت ئەترىتى ئەزالىرىنىڭ ياردىمىدە، بوۋاينىڭ تەخمىنەن بىر مو كېلىدىغان ئورمان بەلبېغىغا ناھايىتى تېزلا كۆچەتلەر لىق تىكىلدى. ئەتىسى ياشىنىپ قالغان ھېنىسەم ئىمىن ئائىلىسىنىڭ كىچىك ئەگمە پارنىكىدا خىزمەت ئەترىتى ئەزالىرى ۋە كەنت كادىرلىرىدىن تەشكىللەنگەن پىدائىيلار مۇلازىمەت ئەترىتى ئۇنىڭ كۆكتات مايسىسى كۆچۈرۈشىگە ياردەملەشتى. ياشىنىپ قالغان ھېنىسەم كۈلۈپ تۇرۇپ مۇنداق دېدى: «بۇ كىچىك ئەگمە پارنىكقا كۆچۈرۈلگەن كۆكتاتلار ئۆزۈمنىڭ يېيىشىمگە يېتىدۇ، ئاشقىنىنى سېتىپ ئائىلە خىراجىتى قىلىمەن».
كەنتتە تۇرۇشلۇق خىزمەت ئەترىتى ئەزالىرىنىڭ جاپالىق ئەجرىنى كەنت ئاھالىلىرى كۆردى، ھەم قەلبىگە پۈكتى، نۇرغۇن كەنت ئاھالىسى خىزمەت ئەترىتى ئەزالىرىنى بايرامدا ئۆيلىرىگە بېرىپ مېھمان بولۇپ بىللە بايرام ئۆتكۈزۈشكە قىزغىن تەكلىپ قىلدى.
قول تۇتۇشۇپ بىرلىكتە شادلىنىپ، قەلبلەر تېخىمۇ يېقىنلاشتى
3 - ئاينىڭ 30 - كۈنى، تۇرپان شەھىرى ئىدىقۇت رايونى بۇيلۇق كوچا باشقارمىسى دەپسەنگە مەھەللىسىنىڭ مەدەنىيەت پائالىيەت مەركىزى ئادەتتىن تاشقىرى قىزىپ كەتتى. تۇرپان شەھەرلىك خەلق دوختۇرخانىسىنىڭ دەپسەنگە مەھەللىسىدە تۇرۇشلۇق خىزمەت ئەترىتى مەھەللە بىلەن بىرلىشىپ ھەر مىللەت ئاھالىلەرنى بىرلىكتە ساڭزا سېلىشقا تەشكىللەپ، بايرامنى كۈتۈۋالدى.
شۇ كۈنى خىزمەت ئەترىتى يېمەكلىك ماتېرىياللىرىنى تەييارلىدى، مەھەللىدىكى ساڭزا سېلىشقا ئۇستا ئاھالىلەر «ئوقۇتقۇچى» بولۇپ كۆپچىلىككە ساڭزا سېلىش ماھارىتىنى ئۆگەتتى. مۆمىن تۇرسۇن قازانغا ياغ قۇيغاچ مۇنداق ئەسكەرتتى: «ياغنىڭ تېمپېراتۇرىسى ئالتە ئۈلۈش قىزىسا ئەڭ ياخشى بولىدۇ، بولمىسا ساڭزىنىڭ تەمىگە تەسىر يېتىدۇ.» كۆپچىلىك ئىش تەقسىم قىلىۋېلىپ ھەمكارلاشتى، ياخشى ماسلاشتى، پات - پات خىزمەت، تۇرمۇش توغرىسىدا پاراڭلاشتى، ئالتۇندەك سېرىق، چۈرۈك ساڭزا پىشىپ، خۇش ھىدىنىڭ ئەتراپقا تارىلىشىغا ئەگىشىپ، بايرام كەيپىياتى شۇ ھامان قويۇقلاشتى.
3 - ئاينىڭ 31 - كۈنى، بورتالا دەرياسى ۋادىسىنى باشقۇرۇش باشقارمىسىنىڭ جىڭ ناھىيەسىنىڭ ماندان يېزىسى چىڭگۇەن كەنتىدە تۇرۇشلۇق خىزمەت ئەترىتىنىڭ 1 - شۇجىسى يۈ يىڭ ۋە ماندان يېزىسى «گۈلى لېكسىيە سۆزلەش ئەترىتى»نىڭ ئەترەت ئەزالىرى، چىڭگۇەن كەنتىدىكى پىدائىيلاردىن تەشكىللەنگەن ھال سوراش گۇرۇپپىسى تەييارلىغان ساڭزىنى كەنتتىكى قىيىنچىلىقى بار ياشانغانلارنىڭ ئۆيىگە يەتكۈزۈپ بەردى. 78 ياشلىق يالغۇز تۇرىدىغان ئەخمەت سەمەت بوۋاينىڭ ئۆيىدە، پىدائىيلار ئۇنىڭغا مەززىلىك يېمەكلىكلەرنى يەتكۈزۈپلا قالماي، يەنە ئۇنىڭ ھويلا - ئارانلىرىنى تازىلىشىغا ياردەم بېرىپ، قان بېسىمىنى ئۆلچەپ قويدى. «بالىلار ماڭا ساڭزا ئەكېلىپ بەردى، كادىرلارمۇ دائىم ئۆيۈمگە كېلىپ ئېھتىياجىمنى سوراپ تۇرىدۇ، ناھايىتى ئىللىقلىق ھېس قىلدىم» دېدى ئەخمەت.
شۇ كۈنى، ماندان يېزىسى چىڭگۇەن كەنتى قاتارلىقلارنى تەشكىللەپ بىر قاتار خەلق ئۆرپ - ئادىتى بويىچە ماھارەت كۆرسىتىش، مەدەنىيەت ئارقىلىق خەلققە نەپ يەتكۈزۈش پائالىيەتلىرىنى قانات يايدۇردى ھەم ھال سوراش گۇرۇپپىسى تەشكىللەپ قىيىنچىلىقى بار ياشانغانلارنى ھويلا - ئارانلارنى تازىلاش، سالامەتلىكىنى تەكشۈرۈش قاتارلىق ئىللىقلىق يەتكۈزۈش مۇلازىمىتى بىلەن تەمىنلەپ، «مەدەنىيەت بىلەن ئوزۇقلاندۇرۇش + ئەمەلدە كۆرسىتىش» ئارقىلىق مەدەنىي يېزا ئىستىلى ئاكتىپ كۈچىنى يەتكۈزدى.
3 - ئاينىڭ 31 - كۈنى چۈشتىن بۇرۇن، لوپنۇر ناھىيەسىنىڭ گۈلباغ يېزىسى ئاقچىكە كەنتىدە بىر مەيدان بىرلەشمە دوستلۇق پائالىيىتى قىزغىن ئۆتكۈزۈلۈۋاتاتتى. لوپنۇر ناھىيەلىك خەلق ھۆكۈمىتى ئىشخانىسى، لوپنۇر ناھىيەلىك تۇرالغۇ ۋە شەھەر - يېزا قۇرۇلۇشى ئىدارىسىنىڭ ئاقچىكە كەنتىدە تۇرۇشلۇق خىزمەت ئەترىتى ۋە كەنت كادىرلىرى «بايرامنى بىرلىكتە ئۆتكۈزۈپ، مىللەتلەر ئىتتىپاقلىقى مېھرىنى بىرلىكتە ئىزھار قىلىش» باش تېمىلىق پائالىيەتنى كۆڭۈل قويۇپ تەشكىللىگەنىدى. نەق مەيداندا كەنت ئاھالىلىرى بەس - بەستە ماھارىتىنى نامايان قىلدى، گۈزەل، يېقىملىق ناخشىلار، قايناق ھېسسىياتقا تولغان ئۇسسۇللار كۆرگۈچىلەرنىڭ قىزغىن ئالقىشىغا ئېرىشتى.
يېزا - كەنتلەرنىڭ يېڭى مەنزىرىسى بىرلىكتە سىزىپ چىقىلدى
«يېزىمىز مۇكۇيلادىن چىقىدىغان چىلاننىڭ ئېتى قېلىن، ئۇرۇقى كىچىك، تاتلىقلىق دەرىجىسى ئىنتايىن يۇقىرى» «بۇ شۆجۈ، دېڭىز يۈزىدىن ئېگىز، كۈن نۇرى كۈچلۈك جايدا ئۆسىدۇ، بىر ئىستاكان دەملىسە خۇش ھىدى ئەتراپقا تارىلىدۇ»... 3 - ئاينىڭ 29 - كۈنى، گۇما مەرھابا مېھمانخانىسىنىڭ يېزا ئىگىلىك مەھسۇلاتلىرى كۆرگەزمە زالى ئادەتتىن تاشقىرى قىزىپ كەتكەن بولۇپ، بىر مەيدان بىۋاسىتە كۆرسىتىپ مال سېتىش قىزغىن ئېلىپ بېرىلىۋاتاتتى.
گۇما ناھىيەسىنىڭ مەدەنىيەت - ساياھەت تونۇشتۇرغۇچىسى مېھرىبان ئەركىن بىلەن گۇما ناھىيەلىك مەدەنىيەت - تەنتەربىيە - رادىيو - تېلېۋىزىيە ۋە ساياھەت ئىدارىسىنىڭ مۇكۇيلا يېزىسى كاندا كۆل كەنتىدە تۇرۇشلۇق خىزمەت ئەترىتىنىڭ ئەزاسى زورىگۈل ئابلىمىت بىۋاسىتە كۆرسىتىشنى كۆرۈۋاتقانلارغا ئەلا سۈپەتلىك يېزا ئىگىلىك قوشۇمچە مەھسۇلاتلىرىنى قىزغىن تونۇشتۇرۇۋاتاتتى. «روزا ھېيت يېقىنلاپ قالدى، بىز بىۋاسىتە كۆرسىتىپ مال سېتىش ئارقىلىق دېھقانلارنىڭ يېزا ئىگىلىك مەھسۇلاتلىرىنى سېتىشىغا ياردەم بېرىپ، ئۇلارنىڭ كىرىمىنى ئاشۇردۇق» دېدى مېھرىبان.
3 - ئاينىڭ 29 - كۈنى، سانجى خۇيزۇ ئاپتونوم ئوبلاستلىق ئوتتۇرا خەلق سوت مەھكىمىسىنىڭ جىمىسار ناھىيەسى ئەرگۇڭ بازىرى شىباخۇ كەنتىدە تۇرۇشلۇق خىزمەت ئەترىتىنىڭ 1 - شۇجىسى ما شاۋفېي خىزمەت ئەترىتىنىڭ ئەزالىرىنى باشلاپ كەنت ئاھالىسى ئەخمەت ئابدۇلنىڭ ئۆيىگە كىرىپ ھال سورىدى. خىزمەت ئەترىتى ۋە كەنت كادىرلىرىنىڭ قوللىشى بىلەن بۇلتۇر ئەخمەت ئەتىرگۈل ئۆستۈرۈشكە باشلىغانىدى. «خىزمەت ئەترىتى ماڭا ئەقىل كۆرسىتىپ ئەتىرگۈل ئۆستۈرۈشۈمگە ياردەم قىلمىغان بولسا نەدىمۇ ھازىرقىدەك ياخشى كۈنۈم بولسۇن. بۇلتۇر ئائىلىمىز 60 مو يەردىكى ئەتىرگۈلگە تايىنىپ، 100 مىڭ يۈەنگە يېقىن پۇل تاپتۇق.» ئەخمەت ھاياجانلانغان ھالدا: دېھقانچىلىقنىڭ ئالدىراش مەزگىلىدە خىزمەت ئەترىتىنىڭ ئەزالىرى ماڭا ياردەملىشىپ پەرۋىش قىلىشىپ بەردى؛ ساتىدىغان چاغدا يەنە كارخانا بىلەن ئۇدۇللىشىشىمغا ياردەم بەردى، دېدى. شۇ كۈنى كۆپچىلىك چۆرىدىشىپ ئولتۇرۇپ، بۇ يىللىق ئۆستۈرۈش پىلانىنى قىزغىن مۇزاكىرە قىلدى. «خىزمەت ئەترىتى ئالدىمىزدا يول باشلاۋاتىدۇ، بۇ يىل مەن يەنە كىرىمىمنى داۋاملىق ئاشۇرىمەن» دېدى ئەخمەت.
قىزىلسۇ قىرغىز ئاپتونوم ئوبلاستلىق سانائەت ۋە ئۇچۇرلاشتۇرۇش ئىدارىسىنىڭ ئاقتۇ ناھىيەسىنىڭ ئاقتۇ بازىرى گۈمبەز ئېرىق كەنتىدە تۇرۇشلۇق خىزمەت ئەترىتىنىڭ 1 - شۇجىسى تاڭ چاڭتىڭ بايرام ئالدىدا ئائىلىلەرگە كىرىپ زىيارەت قىلىپ ھال سورىغاندا كەنت ئاھالىلىرىگە: كەنت باشقۇرۇشىدىكى كارخانا يەنە 3000 دانە توننىلىق ئورالما تاغار زاكازى تاپشۇرۇۋالدى، دېگەن كىشىنى خۇشال قىلىدىغان خەۋەرنى يەتكۈزدى. بۇلتۇر 12 - ئايدا، خىزمەت ئەترىتىنىڭ تۈرتكە بولۇشى بىلەن، كەنتتە توننىلىق ئورالما تاغار ئىشلەپچىقىرىدىغان، پىششىقلايدىغان ئاقتۇ ناھىيەسى مىنلىشىن توقۇمىچىلىق سانائىتى چەكلىك شىركىتى قۇرۇلغانىدى. بۇ يىل 2 - ئايدا ئىش باشلانغاندىن كېيىن زاكاز ئۈزۈلۈپ باقمىدى، كەنت ئاھالىلىرىنىڭ ئىشقا ئورۇنلىشىشىغا تۈرتكە بولدى.
«يېقىندا، بىز تېخنىكا جەھەتتىن تەربىيەلەشكە تەشكىللەيمىز. كەلگۈسىدە شىركەتنىڭ كۆلىمىنى داۋاملىق كېڭەيتىپ، تېخىمۇ كۆپ كەنت ئاھالىسىنىڭ ئىشقا ئورۇنلىشىپ كىرىمىنى ئاشۇرۇشىغا تۈرتكە بولىمىز» دېدى تاڭ چاڭتىڭ.
(مۇخبىر جاڭ تىڭ، قاتناشقان مۇخبىرلار جاڭ جىلى، گې يوۋجۈن، سۇڭ ۋېيگو، پەرىزات ئابدۇل، بەي سۇجۈن، جاڭ رۇيلىن، چېن جياڭلىن، ئىختىيارىي مۇخبىرلار جياڭ مەن، يۈ ياۋ، دۇڭ چېڭجۇڭ)
