گۈزەل شىنجاڭنى ھېس قىلىش، دوستلۇق مېھرىنى بىرلىكتە بايان قىلىش
شىنجاڭ بېيجىڭدا ئالاقىدار دۆلەتلەرنىڭ جۇڭگودا تۇرۇشلۇق ئەلچىلىرى پىكىر ئالماشتۇرۇش يىغىنى ئۆتكۈزدى
ما شىڭرۇي قاتناشتى، ئەركىن تۇنىياز ئەھۋال تونۇشتۇردى، يېرمەكبايېف، چېن شياۋدۇڭ سۆز قىلدى، لى كېشىن، جاۋ شىتۇڭ، يۈەن مىنداۋ قاتناشتى
3 - ئاينىڭ 31 - كۈنى، شىنجاڭ بېيجىڭدا ئالاقىدار دۆلەتلەرنىڭ جۇڭگودا تۇرۇشلۇق ئەلچىلىرى پىكىر ئالماشتۇرۇش يىغىنى ئۆتكۈزدى. ئاپتونوم رايونلۇق پارتىيە كومىتېتىنىڭ شۇجىسى ما شىڭرۇي پائالىيەتكە قاتناشتى. سۈرەتتە: ئاپتونوم رايونلۇق پارتىيە كومىتېتىنىڭ مۇئاۋىن شۇجىسى، ئاپتونوم رايوننىڭ رەئىسى ئەركىن تۇنىياز پىكىر ئالماشتۇرۇش يىغىنىدا شىنجاڭنىڭ ئىقتىساد، جەمئىيەت تەرەققىياتى ۋە كىشىلىك ھوقۇقنى كاپالەتلەندۈرۈش مۇۋەپپەقىيەتلىرىنى تونۇشتۇرماقتا.□ ئانار بۇلۇت\شىنجاڭ گېزىتى مۇخبىرى سۈي جىجيەن فوتوسى
شىنجاڭ گېزىتى، بېيجىڭ، 3 - ئاينىڭ 31 - كۈنى خەۋىرى ئانار بۇلۇت\شىنجاڭ گېزىتى مۇخبىرى ۋاڭ شىڭرۇي خەۋەر قىلىدۇ: 3 - ئاينىڭ 31 - كۈنى چۈشتىن كېيىن، شىنجاڭ بېيجىڭدا ئالاقىدار دۆلەتلەرنىڭ جۇڭگودا تۇرۇشلۇق ئەلچىلىرى پىكىر ئالماشتۇرۇش يىغىنى ئۆتكۈزۈپ، شىنجاڭنىڭ ئىسلاھات، تەرەققىيات، مۇقىملىقىغا دائىر يېڭى مۇۋەپپەقىيەتلەرنى ھەمبەھرىلەپ، شىنجاڭنىڭ ئوچۇق، سىغدۇرۇشچان، ئۆزىگە ئىشىنىدىغان يېڭى قىياپىتىنى نامايان قىلىپ، ئەنئەنىۋى دوستلۇقنى يەنىمۇ مۇستەھكەملەپ، چۈشىنىش، ئۆزئارا ئىشىنىشنى كۈچەيتىپ، جۇڭگو شىنجاڭنىڭ ھەرقايسى دۆلەتلەر بىلەن بولغان يەرلىكلەر ئارا دوستانە ئالماشتۇرۇشى ۋە ئەمەلىي ھەمكارلىشىشىنىڭ يېڭى پەللىگە كۆتۈرۈلۈشىنى ئىلگىرى سۈردى. ئاپتونوم رايونلۇق پارتىيە كومىتېتىنىڭ شۇجىسى ما شىڭرۇي پائالىيەتكە قاتناشتى.
ئاپتونوم رايونلۇق پارتىيە كومىتېتىنىڭ مۇئاۋىن شۇجىسى، ئاپتونوم رايوننىڭ رەئىسى ئەركىن تۇنىياز پائالىيەتكە قاتناشتى ھەم شىنجاڭنىڭ ئىقتىساد، جەمئىيەت تەرەققىياتى ۋە كىشىلىك ھوقۇقنى كاپالەتلەندۈرۈش مۇۋەپپەقىيەتلىرىنى تونۇشتۇردى. شاڭخەي ھەمكارلىق تەشكىلاتىنىڭ باش كاتىپى يېرمەكبايېف، دىپلوماتىيە مىنىستىرلىقىنىڭ مۇئاۋىن مىنىستىرى چېن شياۋدۇڭ سۆز قىلدى. مەركىزىي كومىتېت تاشقى ئىشلار ئىشخانىسىنىڭ مۇئاۋىن مۇدىرى لى كېشىن، مەركىزىي كومىتېت تاشقى ئالاقە بۆلۈمىنىڭ بۆلۈم باشلىقى ياردەمچىسى جاۋ شىتۇڭ، مەملىكەتلىك دوستلۇق جەمئىيىتىنىڭ مۇئاۋىن باشلىقى يۈەن مىنداۋ قاتناشتى.
بېيجىڭدىكى شىنجاڭ سارىيىنىڭ مۇقام زالى يېپيېڭى تۈستە ئورۇنلاشتۇرۇلغان بولۇپ، ئەزىز مېھمانلار بىلەن لىق تولغانىدى، 43 دۆلەتنىڭ جۇڭگودا تۇرۇشلۇق باش ئەلچىلىرى، دىپلوماتىيە ئەمەلدارلىرى ۋە ئالاقىدار خەلقئارا تەشكىلاتلارنىڭ ۋەكىللىرى خۇشال جەم بولدى. يىغىن ئاساسىي ئۈستەل رايونى ئىچىدىكى «شىنجاڭ ياخشى جاي» باش تېمىسىنىڭ لايىھەلىنىشى ئۆزگىچە، نەپىس ئىدى. قارلىق تاغ، كۆل، قۇملۇق، ئوتلاق، گۈل دېڭىزى قاتارلىق ئېلېمېنتلار بىر - بىرىگە ھۆسن قوشۇپ، نەپىس جۇڭگو تۈگۈچى شەكلىنىڭ ئەتراپىنى چۆرىدەپ، گۈزەل شىنجاڭنىڭ رەڭدار مەنزىرىسىنى ھاسىل قىلغانىدى.
پىكىر ئالماشتۇرۇش يىغىنى قىزغىن كەيپىيات ئىچىدە باشلاندى.
ئەركىن تۇنىياز مۇنداق دېدى: جۇڭگو كوممۇنىستىك پارتىيەسى 18 - قۇرۇلتىيىدىن بۇيان، يولداش شى جىنپىڭ يادرولۇقىدىكى جۇڭگو كوممۇنىستىك پارتىيەسى مەركىزىي كومىتېتىنىڭ كۈچلۈك رەھبەرلىكىدە، شىنجاڭ يېڭى دەۋردىكى جۇڭگو كوممۇنىستىك پارتىيەسىنىڭ شىنجاڭنى ئىدارە قىلىش تەدبىرىنى تولۇق، دەل جايىدا، ئومۇميۈزلۈك ئىزچىللاشتۇرۇپ، دۆلەت ئومۇملۇقىدىكى «بەش چوڭ ئىستراتېگىيەلىك ئورۇن بېكىتمىسى»نى چىڭ كۆزلەپ، شىنجاڭنى قانۇن بويىچە ئىدارە قىلىش، شىنجاڭنى ئىتتىپاقلىشىپ مۇقىم قىلىش، شىنجاڭنى مەدەنىيەت ئارقىلىق ئوزۇقلاندۇرۇش، خەلقنى بېيىتىپ شىنجاڭنى روناق تاپتۇرۇش، شىنجاڭنى ئۇزاققىچە گۈللەندۈرۈشنى پۇختا ئالغا سىلجىتتى، تىيانشاننىڭ جەنۇبى - شىمالىدا تىنچ - ئىناق بولغان، جۇش ئۇرۇپ راۋاجلانغان يېڭى كەيپىيات نامايان بولدى. ئەركىن تۇنىياز يېڭى تەرەققىيات ئەندىزىسى بەرپا قىلىشتا پۇختا قەدەم تاشلاش، تەرەققىيات نەتىجىلىرىدىن خەلق تۇرمۇشىغا تېخىمۇ كۆپ، تېخىمۇ ياخشى نەپ يەتكۈزۈش، جۇڭخۇا مىللىتى ئورتاق گەۋدىسى ئېڭىنى قەلبلەردىن تېخىمۇ چوڭقۇر ئورۇن ئالدۇرۇش، ئاز سانلىق مىللەتلەرنىڭ تۈرلۈك ھوقۇق - مەنپەئىتىنى قانۇن بويىچە كاپالەتلەندۈرۈش، خەلقئارا ئالماشتۇرۇش، ھەمكارلىشىشتا تارىخىي بۆسۈش ھاسىل قىلىش قاتارلىق جەھەتلەردىن تەپسىلىي تونۇشتۇردى. ئۇ مۇنداق كۆرسەتتى: شىنجاڭنىڭ ئىقتىساد، جەمئىيەت تەرەققىياتى ۋە كىشىلىك ھوقۇقنى كاپالەتلەندۈرۈش مۇۋەپپەقىيەتلىرى ھەممىگە ئايان، لېكىن بەزى غەرب دۆلەتلىرىدىكى سىياسەتۋازلار پۈتۈن كۈچى بىلەن ئاتالمىش «ئىرقىي يوقىتىش» «مەجبۇرىي ئەمگەككە سېلىش» قاتارلىق ئۇچىغا چىققان يالغان - ياۋىداق سۆزلەرنى ئويدۇرۇپ چىقىپ، توقۇپ چىقىپ، باشقىلارغا دېگىلى بولمايدىغان رەزىل سۇيىقەستىنى ئىشقا ئاشۇرۇشقا ئۇرۇندى. شىنجاڭدىكى ھەر مىللەت خەلقنىڭ گۈزەل تۇرمۇشقا ئىنتىلىش قەدىمىنى ھەرگىزمۇ ئاساسسىز ئەيىبلەش ۋە يامان غەرەزدە ئارىلىشىش توسۇپ قالالمايدۇ. شىنجاڭ جەزمەن ۋەتەن قوينىدا تېخىمۇ پارلاق ئەتىنى يارىتىدۇ.
يېرمەكبايېف مۇنداق بىلدۈردى: شىنجاڭ جۇڭگونىڭ غەربكە ئېچىۋېتىشتىكى كۆۋرۈك بېشى ئىستىھكامى ۋە يىپەك يولى ئىقتىساد بەلبېغى يادرولۇق رايونى بولۇش سۈپىتى بىلەن، شاڭخەي ھەمكارلىق تەشكىلاتى چوڭ ئائىلىسىدىكى كۆپ دۆلەت بىلەن چېگرالىنىدۇ، ھەمكارلىق يوشۇرۇن كۈچى غايەت زور، شاڭخەي ھەمكارلىق تەشكىلاتىغا ئەزا ھەرقايسى دۆلەتلەر شىنجاڭنىڭ مۇھىم ۋاسىتىلىك رولىغا يۈكسەك باھا بېرىدۇ. يېقىنقى يىللاردىن بۇيان، شىنجاڭ مەۋقەنى ئۆزگىچە جۇغراپىيەلىك ئەۋزەللىكى، مول بايلىقى ۋە مەدەنىيەتنىڭ كۆپ خىللىقىغا قويۇپ، شاڭخەي ھەمكارلىق تەشكىلاتىغا ئەزا دۆلەتلەر بىلەن بولغان ئومۇميۈزلۈك ھەمكارلىقنى كۈچەيتىپ، رايون ئىچى ھەمكارلىقىنىڭ مۇھىم تۈگۈنى ۋە ئۈلگە كۆرسىتىش رايونىغا ئايلاندى. ئۇزاقتىن بۇيان، شىنجاڭ شاڭخەي ھەمكارلىق تەشكىلاتىغا ئەزا دۆلەتلەر ئارا خەۋپسىزلىك، مۇقىملىق قاتارلىق ساھەلەردىكى ھەمكارلىقنى قانات يايدۇرۇش ئۈچۈن مۇھىم تۆھپە قوشتى، جۇڭگو (شىنجاڭ) ئەركىن سودا سىناق رايونى قۇرۇلۇشىنىڭ تېزلىتىلىشى، تۈرلۈك ئىشلارنىڭ سىجىل تەرەققىي قىلىشىغا ئەگىشىپ، جۇڭگونىڭ شاڭخەي ھەمكارلىق تەشكىلاتىغا ئەزا دۆلەتلەر بىلەن بولغان ھەمكارلىقىنى ئىلگىرى سۈرۈشتە بارغانسېرى مۇھىم رولىنى جارى قىلدۇرىدۇ. شاڭخەي ھەمكارلىق تەشكىلاتى كاتىبات باشقارمىسى شىنجاڭنىڭ ئالاقىدار خىزمەتلەرنى قانات يايدۇرۇشىغا پائال ھەمكارلىشىپ، شىنجاڭنىڭ خەۋپسىزلىك ۋە مۇقىملىقنى قوغداش، ئىقتىسادنى گۈللەندۈرۈش ۋە مىللەتلەر ئىتتىپاقلىقى قاتارلىق جەھەتلەردە داۋاملىق يېڭى نەتىجىلەرنى قولغا كەلتۈرۈشىگە تىلەكداشلىق بىلدۈرىدۇ.
چېن شياۋدۇڭ مۇنداق بىلدۈردى: يولداش شى جىنپىڭ يادرولۇقىدىكى جۇڭگو كوممۇنىستىك پارتىيەسى مەركىزىي كومىتېتى شىنجاڭ خىزمىتىگە يۈكسەك ئەھمىيەت بېرىپ، ئىستراتېگىيەلىك ئومۇملۇق يۈكسەكلىكىدىن ئۇزاق مەزگىللىك تەدبىر ئۈستىدە ئىزدىنىپ، ئاساسنى پۇختىلاش تەدبىرلىرىنى يولغا قويۇپ، ئەبەدىي ئەمىنلىك ۋەزىيىتىنى يارىتىپ، ئەبەدىي ئەمىنلىك ئىشلىرىنى ۋۇجۇدقا چىقاردى. بۈگۈنكى شىنجاڭدا جەمئىيەت ئىناق، مۇقىم بولۇپ، خەلق خاتىرجەم ياشاپ خۇشال - خۇرام ئىشلىمەكتە، يۇقىرى سۈپەتلىك تەرەققىياتتا ئۈزلۈكسىز يېڭى ۋەزىيەت يارىتىلدى، ئوچۇق ئىقتىساد يېڭى ئەندىزىسى ئۈزلۈكسىز كېڭەيدى، ھەرقايسى مىللەتلەرنىڭ مۇنەۋۋەر ئەنئەنىۋى مەدەنىيىتى ياخشى قوغدالدى ۋە راۋاجلاندۇرۇلدى، ھەرقايسى مىللەتلەرنىڭ باراۋەرلىكى ۋە دىنىي ئېتىقاد ئەركىنلىكى ئاممىنىڭ تۇرمۇشىغا سىڭىشىپ كەتتى. ئايرىم دۆلەتلەردىكى ئاز ساندىكى كىشىلەر سىياسىي مۇددىئانى چىقىش قىلىپ، شىنجاڭنىڭ تەرەققىيات مۇۋەپپەقىيەتلىرىگە قارىتا «تاللاش خاراكتېرلىك كور بولۇۋالدى»، يالغان - ياۋىداق سۆزلەرنى ئويدۇرۇپ چىقىرىشقا، ھەق - ناھەقنى ئاستىن - ئۈستۈن قىلىشقا، ئاق - قارىنى ئاستىن - ئۈستۈن قىلىشقا بېرىلىپ كەتتى، جۇڭگو ھۆكۈمىتىنىڭ شىنجاڭنى ئىدارە قىلىش سىياسىتىگە رەزىل غەرەزدە ھۇجۇم قىلىپ ۋە قارا چاپلاپ، جۇڭگونىڭ تەرەققىياتىغا كاشىلا قىلىش ۋە توسقۇنلۇق قىلىشقا تەلۋىلەرچە ئۇرۇندى. جۇڭگو دىپلوماتىيە مىنىستىرلىقى ھەرقايسى دۆلەتلەردىن كەلگەن ئەزىز مېھمانلارنىڭ ئۇزاقتىن بۇيان جۇڭگو شىنجاڭغا كۆڭۈل بۆلگەنلىكى ۋە مەدەت بەرگەنلىكىگە چىن قەلبىدىن رەھمەت ئېيتىدۇ، كۆپچىلىك بىلەن بىرلىكتە گۈزەل شىنجاڭنىڭ ئىسمى - جىسمىغا لايىق داڭقىنى چىقىرىپ، شىنجاڭنى گۈللەندۈرۈش ئۈچۈن بىرلىكتە كۈچ چىقىرىشنى، رەڭدار شىنجاڭغا بىرلىكتە ھۆسن قوشۇشنى ئارزۇ قىلىدۇ.
ئۆزبېكىستاننىڭ جۇڭگودا تۇرۇشلۇق باش ئەلچىسى ئارزىيېف مۇنداق بىلدۈردى: جۇڭگو شىنجاڭ جۇڭگونىڭ ئوتتۇرا ئاسىياغا تۇتىشىدىغان مۇھىم دەرۋازىسى، ئۆزبېكىستان «بىر بەلباغ، بىر يول»نى ئورتاق بەرپا قىلىش تەشەببۇسىدىكى ئىستراتېگىيەلىك ھەمراھ، ئىككى تەرەپنىڭ ھەمكارلىق مۇناسىۋىتى يېقىنقى يىللاردىن بۇيان يېڭى سەۋىيەگە يەتتى. ئۆزبېكىستان - جۇڭگو ئىككى دۆلەت قاتناش، ئەشيا ئوبوروتى، سودا ۋە سېلىنما ھەمكارلىقىنى پائال ئالغا سىلجىتماقتا، ئۆزبېكىستان جۇڭگو شىنجاڭ بىلەن بولغان سودا ھەمكارلىقىنى پائال ئىلگىرى سۈرۈپ، مائارىپ، ئىلىم - پەن ۋە ساياھەت قاتارلىق ساھەلەردىكى ھەمكارلىق بوشلۇقىنى سىجىل كېڭەيتىدۇ.
پاكىستاننىڭ جۇڭگودا تۇرۇشلۇق باش ئەلچىسى ھاشىمى مۇنداق بىلدۈردى: جۇڭگو شىنجاڭ پاكىستان - جۇڭگو ئىككى دۆلەتنى تۇتاشتۇرىدىغان چوڭ تومۇر، ئىككى دۆلەت خەلقىنىڭ دوستانە ئالاقىلىشىشىدىكى كۆۋرۈك، يېقىنقى يىللاردىن بۇيان ھەممىگە ئايان بولغان تەرەققىيات ۋە ئىلگىرىلەشلەرنى قولغا كەلتۈردى، پاكىستان بىلەن بولغان ئالماشتۇرۇش، ھەمكارلىق بوشلۇقى كەڭ. پاكىستان جۇڭگونىڭ ئىگىلىك ھوقۇقى، خەۋپسىزلىكى ۋە زېمىن پۈتۈنلۈكىنى قوغدىشىنى داۋاملىق زور كۈچ بىلەن قوللايدۇ، جۇڭگو شىنجاڭ بىلەن بولغان ئىقتىساد، سودا، سېلىنما، ساياھەت ۋە ئادىمىيەت قاتارلىق ساھەلەردىكى ھەمكارلىقنى چوڭقۇرلاشتۇرۇشقا پائال تۈرتكە بولىدۇ.
مەركىزىي كومىتېت تەشۋىقات بۆلۈمى، مەركىزىي كومىتېت بىرلىك سەپ بۆلۈمى ۋە ئادەم كۈچى بايلىقى ۋە ئىجتىمائىي كاپالەت مىنىستىرلىقى، جۇڭگو ئاممىۋى دىپلوماتىيە جەمئىيىتىدىكى ئالاقىدار يولداشلار، جۇڭگو - چەت ئەل تاراتقۇلىرىنىڭ مۇخبىرلىرى پائالىيەتكە قاتناشتى.
چېن ۋېيجۈن پائالىيەتكە رىياسەتچىلىك قىلدى. ۋاڭ جيەنشىن، ئېلزات ئەخمەتجان، قادېن كەبىن، ئاپتونوم رايوننىڭ ئالاقىدار ئورۇنلىرىدىكى مەسئۇل يولداشلار پائالىيەتكە قاتناشتى.
