3-ئاينىڭ 31-كۈنى، «2025-يىللىق دۆلەت ئوقۇش ياردىمى قەرز پۇلىنىڭ ئۆسۈمىنى كەچۈرۈم قىلىش ۋە دىرىنى قايتۇرۇش مۇددىتىنى ئۇزارتىش خىزمىتىنى ياخشى ئىشلەش توغرىسىدىكى ئۇقتۇرۇش» ئېلان قىلىندى.
ئۇقتۇرۇشتا مۇنداق كۆرسىتىلدى: خەلق تۇرمۇشىنى كاپالەتلەندۈرۈش ۋە ياخشىلاش سالمىقىنى زورايتىپ، 2025-يىلى ئالىي مەكتەپنى پۈتكۈزىدىغانلارنى ئىشقا ئورۇنلاشتۇرۇش مۇلازىمىتى خىزمىتىنى ياخشى ئىشلەشكە مەدەت بېرىش ئۈچۈن، 2025-يىللىق دۆلەت ئوقۇش ياردىمى قەرز پۇلىنىڭ ئۆسۈمىنى كەچۈرۈم قىلىش ۋە دىرىنى قايتۇرۇش مۇددىتىنى ئۇزارتىش خىزمىتىنى ياخشى ئىشلەش توغرىسىدا تۆۋەندىكىدەك ئۇقتۇرۇش چىقىرىلدى:
بىرىنچى، 2025-يىلى 1-ئاينىڭ 1-كۈنىدىن باشلاپ، 2025-يىلى ۋە ئۇنىڭدىن بۇرۇنقى يىللاردا ئوقۇش پۈتكۈزگەن ئوقۇغۇچىلارنىڭ 2025-يىلى ئىچىدە قايتۇرۇشقا تېگىشلىك دۆلەت ئوقۇش ياردىمى قەرز پۇلىنىڭ ئۆسۈمى كەچۈرۈم قىلىنىدۇ، دۆلەت ئوقۇش ياردىمى قەرز پۇلى ئۆسۈم سىياسىتىگە ئاساسەن، كەچۈرۈم قىلىنغان ئۆسۈمنى مەركەز مالىيەسى بىلەن يەرلىك مالىيە ئايرىم-ئايرىم ئۈستىگە ئالىدۇ.
ئىككىنچى، 2025-يىلى ۋە ئۇنىڭدىن بۇرۇنقى يىللاردا ئوقۇش پۈتكۈزگەن ئوقۇغۇچىلارنىڭ 2025-يىلى ئىچىدە قايتۇرۇشقا تېگىشلىك دۆلەت ئوقۇش ياردىمى قەرز پۇلىنىڭ دىرىنى قەرز ئالغان ئوقۇغۇچى ئۆز ئالدىغا ئىلتىماس قىلىش ئارقىلىق بىر يىل كېچىكتۈرۈپ قايتۇرسا بولىدۇ، ئالاقىدار بەلگىلىمە بويىچە، قەرز مۇددىتى ئەڭ ئۇزاق بولغاندا 22 يىلدىن ئېشىپ كەتمەيدۇ، قايتۇرۇش مۇددىتى ئۇزارتىلغان قەرز پۇلغا جەرىمانە ئۆسۈم ۋە دومىلىما ئۆسۈم ھېسابلانمايدۇ، خەۋپ-خەتىرىنى تۈرگە ئايرىش بويىچە ۋاقتىنچە تۆۋەنلىتىلمەيدۇ.
ئۈچىنچى، دۆلەت ئوقۇش ياردىمى قەرز پۇلىنى بېجىرىدىغان بانكا ئۆسۈم تەڭشەلگەندىن كېيىنكى قەرز پۇل ئورۇنلاشتۇرۇشى بويىچە ئىناۋەت ئۇچۇرىنى يوللىشى، يوللاپ بولغانلىرىنى تەڭشىشى كېرەك.
بۇ ئۇقتۇرۇشتا بەلگىلەنمىگەن ئىشلار ھازىر يولغا قويۇلۇۋاتقان ئالاقىدار سىياسەتلەر بويىچە ئىجرا قىلىنىدۇ.
(باش ئىستانسا مەركىزىي تېلېۋىزىيە ئىستانسىسى مۇخبىرى تيەن چىيۇڭ)
«ئانار بۇلۇت»تىن ئېلىپ تەرجىمە قىلىندى
