ئانار بۇلۇت\شىنجاڭ گېزىتى خەۋىرى (مۇخبىر شيې خۇيبيەن خەۋىرى) مۇخبىرنىڭ 3-ئاينىڭ 31-كۈنى شىنجاڭ مېتېئورولوگىيە ئىستانسىسىدىن ئىگىلىشىچە، بۇ ھەپتە (3-ئاينىڭ 31-كۈنىدىن 4-ئاينىڭ 6-كۈنىگىچە) پۈتۈن شىنجاڭدا ئىككى قېتىم ئاجىز سوغۇق ھاۋا ئېقىمى كۆرۈلۈپ ئاپتونوم رايونىمىزغا تەسىر كۆرسىتىدىكەن، تېمپېراتۇرا داۋالغۇش ئىچىدە ئۆرلەيدىكەن. شىنجاڭ مېتېئورولوگىيە ئىستانسىسى قار-يامغۇرنىڭ، شامال ئېغىزلىرىدىكى بوراننىڭ يول قاتنىشى، ساياھەت، دېھقانچىلىق، چارۋىچىلىق ئىشلەپچىقىرىشى قاتارلىقلارغا كۆرسىتىدىغان پايدىسىز تەسىرىدىن ساقلىنىشنى ئەسكەرتتى.
4-ئاينىڭ 1-كۈنى سائەت 8دىن 4-ئاينىڭ 2-كۈنى سائەت 8گىچە پۈتۈن مەملىكەت بويىچە ھۆل-يېغىن مىقدارىدىن بېرىلگەن ئالدىن مەلۇمات سۈرىتى.
سۈرەت جۇڭگو ھاۋارايى تورىدىن ئېلىندى
مۆلچەرلىنىشىچە، 4-ئاينىڭ 1-كۈنى كېچىدىن 4-ئاينىڭ 2-كۈنى كېچىگىچە، شىمالىي شىنجاڭنىڭ كۆپ قىسىم جايلىرى، قومۇل شەھىرىنىڭ شىمالىدا ئازراق يامغۇر ياكى قار ياغىدىكەن، ئىلى دەريا ۋادىسى، تارباغاتاي ۋىلايىتىنىڭ قىسمەن رايونلىرى ۋە تىيانشاننىڭ شىمالىي ئېتىكىدىكى قىسمەن جايلاردا ئوتتۇراھال يامغۇر ۋە قاتتىق يامغۇر ياكى قار ياغىدىكەن، يۇقىرىقى قىسمەن رايونلاردا بەش بال ئەتراپىدا غەربىي شىمال شامىلى چىقىدىكەن، شامال ئېغىزلىرىدا 11-10 بال ئەتراپىدا بوران چىقىدىكەن. 4-ئاينىڭ 5-كۈنى كۈندۈزدىن 4-ئاينىڭ 6-كۈنى كۈندۈزگىچە، ئىلى دەريا ۋادىسى، تارباغاتاي ۋىلايىتىنىڭ شىمالى، ئالتاي ۋىلايىتى، تىيانشان تاغلىق رايونلىرى، قىزىلسۇ قىرغىز ئاپتونوم ئوبلاستىنىڭ تاغلىق رايونلىرى قاتارلىق جايلارنىڭ قىسمەن رايونلىرىدا ئازراق يامغۇر ياكى قار ياغىدىكەن، يۇقىرىقى قىسمەن رايونلاردا ئوتتۇراھال يامغۇر ياكى قار ياغىدىكەن، ئالتاي ۋىلايىتىنىڭ شىمالىدىكى تاغلىق رايونلارنىڭ قىسمەن جايلىرىدا قاتتىق قار ياغىدىكەن؛ يۇقىرىقى كۆپ قىسىم رايونلاردا بەش بال ئەتراپىدا غەربىي شىمال شامىلى چىقىدىكەن، شامال ئېغىزلىرىدا 11-10 بال ئەتراپىدا بوران چىقىدىكەن.
مۆلچەرلىنىشىچە، ئۈرۈمچى شەھىرىدە 4-ئاينىڭ 2-كۈنى كۈندۈزدە كۆپ قىسىم رايونلاردا ئازراق يامغۇر يېغىپ، 4-3 بال ئەتراپىدا غەربىي شىمال شامىلى چىقىدىكەن، داۋانچىڭ رايونىدا ھاۋا بۇلۇتلۇق بولۇپ، 6-5 بال ئەتراپىدا قىيپاش غەرب شامىلى، 8 بال ئەتراپىدا ئۆتكۈنچى بوران چىقىدىكەن؛ 4-ئاينىڭ 6-كۈنى كېچىدە كۆپ قىسىم رايونلاردا ئازراق يامغۇر يېغىپ، 4 بال ئەتراپىدا غەربىي شىمال شامىلى چىقىدىكەن، داۋانچىڭ رايونىدا ھاۋا بۇلۇتلۇق بولۇپ، 6-5 بال ئەتراپىدا قىيپاش غەرب شامىلى، 8 بال ئەتراپىدا ئۆتكۈنچى بوران چىقىدىكەن، ھەر قايسى رايون، ناھىيەلەردە تېمپېراتۇرا ئازراق تۆۋەنلەيدىكەن. بۇ ھەپتىنىڭ باشقا ۋاقىتلىرىدا ھەر قايسى رايون، ناھىيەلەردە ھاۋا بەزىدە ئوچۇق، بەزىدە بۇلۇتلۇق بولۇپ، تېمپېراتۇرا سىجىل ئۆرلەيدىكەن، شەھەر رايونىدا تۆۋەن تېمپېراتۇرا 2 سېلسىيە گىرادۇستىن 9 سېلسىيە گىرادۇسقىچە، يۇقىرى تېمپېراتۇرا 11 سېلسىيە گىرادۇستىن 23 سېلسىيە گىرادۇسقىچە بولىدىكەن.
ھازىر، دەل ئەتىيازلىق تېرىلغۇنىڭ ئاچقۇچلۇق مەزگىلى بولۇپ، جەنۇبىي شىنجاڭدا يازغى بۇغداي تېرىش ئاخىرلىشاي دەپ قالدى؛ شىمالىي شىنجاڭ، شەرقىي شىنجاڭنىڭ قىسمەن رايونلىرىدا يازغى بۇغداي تېرىش باشلاندى؛ قەشقەر شەھىرى، ئاقسۇ ۋىلايىتىنىڭ قىسمەن رايونلىرىدا كېۋەز تېرىش باشلاندى؛ شىمالىي شىنجاڭنىڭ قىسمەن جايلىرىدا، جەنۇبىي شىنجاڭدا كۈزگى بۇغدايلىرى ئۆسۈش مەزگىلىگە كىردى، قەشقەر شەھىرىدە كۈزگى بۇغدايلار غول تارتتى. ھازىر تېرىش سۈرئىتى بۇلتۇرقى ئوخشاش مەزگىل بىلەن تەڭلەشتى. مۆلچەرلىنىشىچە، بۇ ھەپتە شىمالىي شىنجاڭ، شەرقىي شىنجاڭدىكى قار-يامغۇرلۇق ھاۋارايى شىمالىي شىنجاڭنىڭ غەربى، شىمالى، شەرقىي شىنجاڭنىڭ كۆپ قىسىم جايلىرىدىكى ئەتىيازلىق تېرىلغۇغا پايدىسىز تەسىر كۆرسىتىدىكەن.
بۇنىڭغا قارىتا، شىنجاڭ يېزا ئىگىلىك مېتېئورولوگىيە ئىستانسىسى مۇنداق تەكلىپ بەردى: پايدىسىز ھاۋارايى مەزگىلىدىن ساقلىنىپ، ئەتىيازلىق تېرىلغۇنى ئىلگىرى سۈرۈشنى مۇۋاپىق ئورۇنلاشتۇرۇش كېرەك. ھاۋا رايى ئۆزگىرىشى ئۆتكەندىن كېيىن، شىمالىي شىنجاڭدىكى دېھقانچىلىق رايونلىرى يازغى بۇغداي تېرىشنى ئىلگىرى سۈرۈشى ھەم كېۋەز قاتارلىق زىرائەتلەرنى تېرىشقا تەييارلىق قىلىش خىزمىتىنى تېزلىتىشى، جەنۇبىي شىنجاڭدىكى پاختىچىلىق رايونلىرى كېۋەزنى دەل ۋاقتىدا تېرىش خىزمىتىنى ياخشى ئىشلىشى كېرەك. شىنجاڭ بويىچە كۈزگى بۇغداي تېرىيدىغان رايونلار قايتا كۆكىرىدىغان كۈزگى بۇغداينىڭ ئېتىز پەرۋىشى خىزمىتىنى ياخشى ئىشلىشى كېرەك.
«ئانار بۇلۇت»تىن ئېلىپ تەرجىمە قىلىندى
