قان تومۇر قان، ئوزۇقلۇق ماددىلارنى يەتكۈزۈپ بېرىش رولىنى ئويناپ، ھاياتلىق پائالىيىتىنىڭ نورمال بولۇشىنى ساقلايدۇ. لېكىن كېسەللىك، قېرىش سەۋەبىدىن قان تومۇرمۇ قېرىيدۇ، قېتىشىدۇ.
ھالبۇكى، قان تومۇرلار بەدەننىڭ ئىچكىرى قىسمىغا يوشۇرۇنغان بولىدۇ، ئۇنداقتا بىز قانداق قىلساق ئۇنىڭ ساغلام ياكى ساغلام ئەمەسلىكىنى بىلەلەيمىز؟
ئەتىگەندە ئورنىمىزدىن تۇرغاندا ئۈچ خىل ئالامەت كۆرۈلسە قان تومۇرنىڭ ساغلام ئەمەسلىكىنى بىلدۈرىدۇ
جۇڭگو جۇڭيى پەنلەر ئاكادېمىيەسى شىيۈەن دوختۇرخانىسى يۈرەك-قان تومۇر بۆلۈمىنىڭ مۇدىر ۋىراچى لى لىجى مۇنداق بىلدۈردى: ئەتىگەندە ئورنىڭىزدىن تۇرغاندا بۇ ئۈچ خىل ئالامەت كۆرۈلسە، قان تومۇرىڭىزنىڭ ساغلام ئەمەسلىكىنى بىلدۈرۈشى مۇمكىن.
قول-پۇت ئۇيۇشۇش: ئەگەر ئەتىگەندە ئورنىڭىزدىن تۇرغاندا دائىم قول-پۇت ئۇيۇشۇش ئەھۋالى كۆپ كۆرۈلسە، بۇنىڭغا چوقۇم ئەھمىيەت بېرىشىڭىز كېرەك.
يۈز قىسمى سۇلۇق ئىششىش: ئەگەر ئۇخلاشتىن بۇرۇن بەك كۆپ سۇ ئىچمىگەن بولسىڭىز، ئورنىڭىزدىن تۇرغاندىن كېيىن يۈز قىسمىڭىزدا سۇلۇق ئىششىق كۆرۈلسە، يۈرەك قان تومۇرىدا مەسىلە كۆرۈلگەن-كۆرۈلمىگەنلىكىنى، يۈرەك ئىقتىدارى ياخشى بولماسلىق ئەھۋالى بار - يوقلۇقىنى تەكشۈرتۈشىڭىز كېرەك.
باش قېيىش: ھەر كۈنى ئەتىگەندە ئورنىڭىزدىن تۇرغاندىن كىيىن بېشىڭىز قايسا، ئېغىر بولغاندا ھەتتا بېشىڭىز پىقىراۋاتقاندەك ھېس قىلىسىڭىز، بىر ئاز جىم تۇرىۋېلىپ ئاندىن ھەرىكەت قىلىڭ.
قان تومۇرنىڭ ساغلام ياكى ئەمەسلىكىنى قانداق بىلىش كېرەك؟ بېيجىڭ جۇڭيى تىبابىتى دورىگەرلىكى داشۆسى دۇڭجىمېن دوختۇرخانىسى مېڭە كېسەللىكلىرى 1-بۆلۈمىنىڭ مۇدىر ۋىراچى ۋەن جىفېڭ مۇنداق ئۈچ ھەرىكەتنى ئىشلەشنى تەۋسىيە قىلدى:
مۇشتۇمنى تۈگۈپ ئاچقاندىن كېيىن ئالقاندىكى قاننىڭ ئەسلىگە كېلىش ۋاقتىنى كۆزىتىش
كۈچەپ مۇشتۇمنى 30 سېكۇنت تۈگگەندىن كېيىن، ئالقان تېرىسى سىقىلىش سەۋەبلىك ئازراق ئاقىرىدۇ، نورمال كىشىلەر مۇشتۇمىنى ئاچقاندىن كېيىن، ئالقىنىنىڭ رەڭگى ناھايىتى تېزلا نورمال ھالەتكە قايتىدۇ، ئەگەر ئالقان تېرىسىنىڭ رەڭگى نورمال بولغىچە 20 سېكۇنتتىن ئارتۇق ۋاقىت كەتسە، بۇ، ئارتېرىيە تومۇرىدا قېتىشىش بارلىقى ياكى قان ئايلىنىشنىڭ راۋان ئەمەسلىكىنى بىلدۈرىدۇ.
تومۇر تۇتۇش
قولنىڭ بېغىشىدىكى ئارتېرىيە تومۇرىنى تۇتقاندا، ئەگەر تومۇرنىڭ سوقۇشى ئاجىزلاشسا ياكى بىر تەرەپنىڭ يەنە بىر تەرەپتىن ئاجىز بولسا، ئارتېرىيە تومۇرىدا قېتىشىش ياكى تارىيىش كۆرۈلگەنلىكىنى بىلدۈرىدۇ.
قولنىڭ ھالىتىگە قاراش
ئالقاندىكى قان تومۇرلار قېتىشىپ غول نېرۋا ئىقتىدارىغا تەسىر كۆرسەتكەندە، ئىككى قول مۇزلاش، تەرلەش، رەڭگى سۇس سۆسۈن رەڭدە بولۇش، ھەتتا ئاغرىش ئالامەتلىرى كۆرۈلىدۇ.
«مەركىزىي تېلىۋېزىيە ئىستانسىسى» ۋىيشىن ئاممىۋى سۇپىسىدىن ئېلىپ تەرجىمە قىلىندى
