ئانار بۇلۇت\شىنجاڭ گېزىتى خەۋىرى (مۇخبىر لۇ فېڭباۋ خەۋەر قىلىدۇ) 3-ئاينىڭ 29-كۈنى سائەت 7دىن 12 مىنۇت ئۆتكەندە، Y360 قېتىملىق ساياھەت مەخسۇس پويىزىنىڭ ئۈرۈمچى ۋوگزالىدىن ئاستا-ئاستا يولغا چىقىشى شىنجاڭنىڭ بۇ يىللىق ئۆلكە ھالقىغان تۇنجى ساياھەت مەخسۇس پويىزىنىڭ رەسمىي قاتنىغانلىقىدىن دېرەك بەردى، 200دىن ئارتۇق شىنجاڭلىق ساياھەتچى جۇڭگونىڭ شەرقىي جەنۇبىغا 14 كۈنلۈك باھار سەپىرىنى باشلىدى.
3-ئاينىڭ 29-كۈنى، يولۇچىلار شىنجاڭ سىرتىغا چىقىدىغان ساياھەت مەخسۇس پويىزىغا چىقماقتا. لى تيېجۈن فوتوسى
شىنجاڭ تۆمۈريول ساياھەت تەرەققىيات گۇرۇھى چەكلىك شىركىتى ساياھەت ئىشلىرى بۆلۈمى تۈر گۇرۇپپىسىنىڭ باشلىقى جياڭ مىڭ مۇنداق تونۇشتۇردى: «يىپەك يولىدىن قولتۇق رايونىغىچە، قارلىق تاغدىن دەريا-دېڭىزغىچە» بېرىش بۇ قېتىمقى سەپىرىمىزنىڭ ئالاھىدىلىكى بولۇپ، ساياھەتچىلەرنى باشلاپ لەنجوۋ، گۇاڭجوۋ، شېنجېن، گۇيلىن، ۋۇخەن، شىنىڭ قاتارلىق ۋەكىللىك خاراكتېرگە ئىگە ساياھەت شەھەرلىرىگە بارىدۇ ھەم قوش لىنىيەلىك تاللاش بىلەن تەمىنلەيدۇ، شياڭگاڭ، ئاۋمېن رايونلىرىنى ساياھەت قىلىش مۇساپىسى كۆپەيتىلگەن بولۇپ، ساياھەتچىلەر گۇاڭجوۋدا ساياھەت ئاپتوبۇسىغا ئالمىشىپ ماڭىدۇ، قايتىپ كەلگەندىن كېيىن داۋاملىق مەخسۇس پويىزغا ئولتۇرۇپ كېيىنكى سەپىرىنى داۋاملاشتۇرىدۇ.
60 ياشتىن ئاشقان ساياھەتچىلەر بىر قەدەر كۆپ بولۇش ئالاھىدىلىكىگە قارىتا، جەنۇبىي شىنجاڭدىكى بىر قىسىم ساياھەتچىلەر ئۈرۈمچىگە بېرىپ پويىزغا ئولتۇرىدىغان ئايلانما ھالقىنى ئازايتىش ئۈچۈن، شىنجاڭ تۆمۈريول تارماقلىرى مۇساپىنى كۆڭۈل قويۇپ لايىھەلەپ، مەخسۇس پويىزنى مۇددەتتىن بۇرۇن قەشقەردىن يولغا چىقىدىغان قىلدى ھەم ئاقسۇ، كۇچا، كورلا قاتارلىق جايلاردا توختاپ، ئاخىرىدا ئۈرۈمچى ئارقىلىق شىنجاڭ سىرتىغا چىقىدىغان قىلىپ ئورۇنلاشتۇردى، بۇ، ساياھەتچىلەرنىڭ سەپەرگە چىقىش ۋاقتى ۋە كۈچىنى تېخىمۇ تېجىدى.
بۇ مەخسۇس پويىزغا تەجرىبىسى مول پويىز خادىملىرى ۋە كەسپىي ساياھەت يېتەكچىلىرى سەپلەنگەن بولۇپ، ساياھەتچىلەرنى كۈتۈۋېلىش، ساياھەت مۇلازىمىتى، ساياھەتچىلەرنى توشۇش، ئۇلاپ توشۇش قاتارلىق مۇلازىمەتلەرنى تەپسىلىي، ياخشى ئىشلەيدۇ، شۇنىڭ بىلەن بىللە، ئالاقىدار ۋوگزاللارغا خادىملارنى كۆپەيتىپ ئەۋەتىپ يېشىل يول ئاچىدۇ، سەمىمىي مۇلازىمەت بىلەن تەمىنلەپ، ساياھەتچىلەرنىڭ سەپەرگە چىقىشىغا قولايلىق يارىتىدۇ. ساياھەت مەخسۇس پويىزى پۈتۈن مۇساپىدە ساياھەتچىلەر كېچىسى پويىزغا چىقىش، كۈندۈزى مەنزىرە رايونلىرىنى ساياھەت قىلىشتەك «كەچتە يولغا چىقىپ، سەھەردە يېتىپ بېرىش»تەك يول يۈرۈش ئەندىزىسىنى قوللىنىپ، ساياھەتچىلەرنىڭ ساياھەت شەھەرلىرى ئارىسىدىكى قاتناش ۋاقتىنى ئۈنۈملۈك ئازايتىدۇ، شۇنىڭ بىلەن بىللە، ساياھەتچىلەرنىڭ بىر قېتىم سەپەرگە چىققاندا، كۆپ ئۆلكىدىكى ئېسىل مەنزىرە نۇقتىلىرىنى ساياھەت قىلىش ئارزۇسىنى قاندۇرىدۇ.
«خوتۇنۇم ئىككىمىز ئىزچىل دۇنيا بويىچە ئەڭ ئۇزۇن دېڭىز ھالقىغان چوڭ كۆۋرۈكنى كۆرۈپ كېلىشنى ئارزۇ قىلىپ كەلگەنىدۇق، بۇ قېتىم ئارزۇيىمىز ئىشقا ئاشىدىغان بولدى، شياڭگاڭ-جۇخەي-ئاۋمېن چوڭ كۆۋرۈكىنى ئىلگىرى تېلېۋىزوردىلا كۆرگەنىدۇق. پويىزدا پۈتۈن مۇساپىدە يۇمشاق كارىۋاتتا يېتىپ ماڭىدىكەنمىز، ئۇنىڭ ئۈستىگە پويىزدىن چۈشكەندە يۈك-تاقلىرىمىزنى ئالمىساقمۇ بولىدىكەن، بىزدەك ياشانغانلارنىڭ ساياھەتكە چىقىشىغا بەك ماس كېلىدىكەن» دېدى 67 ياشلىق ساياھەتچى ۋاڭ شىنشياڭ.
ياشانغانلارنى ياشانغاندا ساياھەت قىلىش خۇشاللىقىدىن بەھرىمان بولۇش ئىمكانىيىتىگە ئىگە قىلىش، تۆمۈريولنىڭ مەدەنىيەت-ساياھەت+ ياشانغانلار ئىقتىسادىنى گۈللەندۈرۈشى، تەرەققىي قىلدۇرۇشىغا تۈرتكە بولۇش ئۈچۈن، بۇ يىلدىن بۇيان، شىنجاڭ تۆمۈريول تارماقلىرى ياشانغانلار توپىنىڭ سەپەرگە چىقىش ئېھتىياجىغا دەل جايىدا ئۇدۇللىشىپ، ساياھەت مەخسۇس پويىزىنىڭ قاتناش سۈپىتىنى سىجىل ئۆستۈرۈپ، سەپەر لىنىيەسىنى كۆڭۈل قويۇپ لايىھەلەپ، مول ساياھەت مەھسۇلاتلىرى بىلەن تەمىنلەپ، ياشانغانلارغا ئۇيغۇنلاشتۇرۇش مۇلازىمىتىنى كۈچەيتىپ، ياشانغانلارنىڭ ساياھەتكە چىقىشىنى پۈتۈن جەريانلىق قوغدىدى. پويىزدا جىددىي ئىشلارغا تاقابىل تۇرۇش دورىلىرى، قان بېسىم ئۆلچەش ئەسۋابى قاتارلىق دائىملىق داۋالاش ئەسۋابلىرىنى سەپلىدى؛ ساياھەت جەريانىدا، شۇ جايدىكى «داڭلىق ساياھەت يېتەكچىسى»نى چوڭقۇرلاپ چۈشەندۈرۈشكە ئورۇنلاشتۇرۇپ، ساياھەتچىلەرنىڭ مەدەنىيەت-ساياھەت تەسىراتىنى ئۆستۈردى؛ شىكەر تەركىبى ئاز، تۇز تەركىبى ئاز ئالاھىدە تاماق تىزىملىكىنى تۈزۈپ، ساياھەتچىلەرنىڭ تەم سەزگۈسىنى قاندۇرۇش بىلەن بىللە، ئۇلارنى تېخىمۇ ساغلام ئوزۇقلىنىش ئىمكانىيىتىگە ئىگە قىلدى.
«ئانار بۇلۇت»تىن ئېلىپ تەرجىمە قىلىندى
