□ئانار بۇلۇت\شىنجاڭ گېزىتى مۇخبىرى جاڭ تىڭ
ئاپئاق قارلار ئارىسىدا، بىرنەچچە يېڭى ئېنېرگىيەلىك ئاپتوموبىل جېمىنەي ناھىيەسىنىڭ ئۇلاستى بازىرى باي گۇشىك كەنتى جىلىن ئولتۇراق رايونىدىكى توك قاچىلاش پونكىتىدا جىمجىتقىنا توختىتىلغانىدى. توكلىغۇچنىڭ كۆرسىتىش چىرىغى قانۇنىيەتلىك چاقناپ، خۇددى بۇ كەنتتىكى يېشىل ئۆزگىرىشنى پەس ئاۋازدا تەپسىلىي بايان قىلىۋاتقاندەك تۇراتتى.
«ئىلگىرى ناھىيەگە بېرىپ توك قاچىلايتتىم، بېرىش ـ كېلىشتە ۋاقتىم يولغىلا كېتەتتى. ھازىر كەنتتە توكلىغۇچ ئورنىتىلدى، ھەر ۋاقىت كېلىپ توك قاچىلىغىلى بولىدۇ، قولايلىق!» دېدى باي گۇشىك كەنتىنىڭ كەنت ئاھالىسى شۈ جېنشياڭ تامنىڭ بۇلۇڭىدىكى ئاق رەڭلىك توكلىغۇچنى كۆرسىتىپ تۇرۇپ، بىر تال قارا رەڭلىك توك قاچىلاش سىمى ئۇنىڭ يېڭى ئېنېرگىيەلىك ئاپتوموبىلىغا ئۇلاقلىق تۇراتتى.
جېمىنەي ناھىيە بازىرىنىڭ شەرقىدىن ئۈچ كىلومېتىر كېلىدىغان جايغا جايلاشقان بۇ كەنتكە، بۈگۈنكى كۈندە يېڭى مەنزىرە قوشۇلدى − 2024 ـ يىلى 5 ـ ئايدا يېڭىدىن 12 ئاممىۋى توكلىغۇچ ئورنىتىلىپ، يېڭى ئېنېرگىيەلىك ئاپتوموبىللار ھەرقانداق ۋاقىتتا توك قاچىلىيالايدىغان، ھەپتە ئاخىرىدا ئۆز ئاپتوموبىل ساياھىتى قىلىدىغان ساياھەتچىلەرنىڭ ئايىغى ئۈزۈلمەيدىغان بولدى.
ھەر كۈنى چۈشتىن بۇرۇن سائەت 10دا، توك قاچىلاش پونكىتى بارا ـ بارا قىزىپ كېتىدۇ. ئۈرۈمچى نومۇر تاختىسى ئېسىلغان بىر يېڭى ئېنېرگىيەلىك ئاپتوموبىل سىيلىق توختىتىلىپ، ئاپتوموبىل ئىگىسى ۋاڭ ئەپەندى چۈشۈپ ئەپچىللىك بىلەن ساۋما قىلىپ توك قاچىلىدى، «يول باشلىغۇچ كەنتتە توكلىغۇچ بارلىقىنى كۆرسەتتى، مەن ئۇدۇللا ھەيدەپ كەلدىم، بۇ بىرنەچچە كۈندە ئەتراپنى قانغۇچە ساياھەت قىلماقچى بولۇۋاتىمەن!»
توك قاچىلاش پونكىتىدا، بىرنەچچە كەنت ئاھالىسى توك قاچىلىغاچ پاراڭلىشىۋاتاتتى. كەنت ئاھالىسى ۋاڭ بىڭ: «بىر قېتىم توك قاچىلىسام ئۈچ كۈن ماڭغىلى بولىدىكەن، ناھىيە بازىرىغا يۈك توشۇشتا بېنزىنلىق ئاپتوموبىل ھەيدىمەيدىغان بولدۇم» دېدى. سۆھبەت ئارىلىقىدا، بىر يېڭى ئېنېرگىيەلىك ئاپتوموبىل توك قاچىلاش پونكىتى ئىچىگە كىردى، شوپۇر شۈ شياۋۋۇ ناھىيە بازىرىدا چىراغ دۇكىنى ئاچىدىغان بولۇپ، دائىم ئەتراپتىكى يېزا ـ كەنتلەرگە مال يەتكۈزەتتى، «ھازىر ناھىيە بازىرى، كەنتلەرنىڭ ھەممىسىدە توك قاچىلىغىلى بولىدۇ، ئاپتوموبىلنى خاتىرجەم ھەيدەيمىز».
باي گۇشىك كەنتى پارتىيە ياچېيكىسىنىڭ شۇجىسى ۋاڭ شياۋلى مۇخبىرغا مۇنداق دېدى: ئىشىك ئالدىمىزدا توكلىغۇچنىڭ ئورنىتىلىشى بىلەن، كەنتتە يېڭى ئېنېرگىيەلىك ئاپتوموبىل سېتىۋالىدىغانلار كۆپەيدى، «بۇ يىل يېڭى ئېنېرگىيەلىك ئاپتوموبىل ھەيدەپ يۇرتقا قايتىپ باھار بايرىمى ئۆتكۈزىدىغان كەنت ئاھالىلىرى توك قاچىلاشتىن غەم قىلمايدىغان بولدى، ئۆزىمىزنىڭ ئاپتوموبىلىغا توك قاچىلايدىغان جاي بار بولۇپلا قالماي، ساياھەتچىلەر ۋە يولدىن ئۆتكەن ئاپتوموبىل ئىگىلىرىنىڭمۇ توك قاچىلاش ئېھتىياجى بىراقلا قاندۇرۇلدى».
«كەنتتە توكلىغۇچ ئورنىتىلمىغان چاغدا، مەن بېنزىنلىق يۈك ئاپتوموبىلىنىلا ھەيدىيەلەيتتىم، بىر ئايلىق بېنزىن ھەققى 800 يۈەندىن ئاشاتتى.» شۈ شياۋۋۇ يان تېلېفونىنى چىقىرىپ، توك قاچىلاش خاتىرىسىنى كۆرسىتىپ: «ھازىر يېڭى ئېنېرگىيەلىك ئاپتوموبىل ھەيدەيمەن، بىر ئايدا توك قاچىلاش ھەققى 200 نەچچە يۈەن بولىدۇ، تېجەپ قالغان پۇلغا يەنە كۆپرەك مال كىرگۈزەلەيمەن» دېدى.
يۇرتىدىكى ئۆزگىرىشلەرنى تىلغا ئالغاندا، شۈ شياۋۋۇ ھاياجانلانغان ھالدا مۇنداق دېدى: «بۇ يىللاردا يۇقىرى سۈرئەتلىك يول تۇتاشتۇرۇلدى، كەنت ئاھالىلىرى تېخىمۇ بېيىدى. نۇرغۇن يۇرتداش دېھقانلار ئارامگاھى، ئۇششاق يېمەكلىكلەر دۇكىنى ئاچتى، مېھمانخانا ئاچتى، كۆپچىلىكنىڭ تۇرمۇشى بارغانسېرى ياخشىلاندى».
ۋاڭ شياۋلى مۇنداق دېدى: يېقىنقى يىللاردىن بۇيان، جېمىنەي ناھىيەسى ئېكولوگىيە ساياھىتى ۋە تەتقىقات ـ ئۆگىنىش ساياھىتىنى زور كۈچ بىلەن تەرەققىي قىلدۇرۇپ، نۇرغۇن ساياھەتچىنى جەلپ قىلدى. ناھىيە بازىرىغا يېقىن بولغان باي گۇشىك كەنتى توك قاچىلاش پونكىتىنىڭ ئۇدۇلىدا ئۆز ئاپتوموبىل ساياھىتى لاگېرى قۇرۇلغان بولۇپ، ھەقسىز WiFi، ئىسسىق سۇ، چېنىقىش ئۆيى، چايخانا، مۇنچا، ئاممىۋى ھاجەتخانا، ئاپتوموبىل توختىتىش مەيدانى، ئورتاق بەھرىلىنىدىغان ئاشخانا، ئورتاق بەھرىلىنىدىغان جابدۇق ئۆيى، ئۆي ئىچى ۋە سىرتىدىكى بالىلار كۆڭۈل ئېچىش ئەسلىھەلىرىدىن ئىبارەت خەلققە قولايلىق ئون چوڭ مۇلازىمەت بىلەن تەمىنلەيدۇ.
«ساياھەتچىلەر كۆپىيىپ، بىزنىڭ بۇ جاينىڭ مۇلازىمەت كەسپىنىڭ تەرەققىياتىغىمۇ تۈرتكە بولدى، نۇرغۇن ساياھەتچى قەدىمىنى توختىتىپ، بىزنىڭ بۇ جايدا دېھقانلار تامىقىغا ئېغىز تېگىدۇ، يېزا مەنزىرىسىنى تاماشا قىلىدۇ» دېدى ۋاڭ شياۋلى.
بۈگۈنكى كۈندە يېزا ـ كەنتلەر قاينام ـ تاشقىنلىققا چۆمدى، ساياھەت جانلاندى، دېھقانلارنىڭ ھەميانى تېخىمۇ تومپايدى. 2024 ـ يىلى، باي گۇشىك كەنتىدىكى دائىملىق ئاھالىلەرنىڭ ئىلكىدىكى ئوتتۇرىچە كىرىم 22 مىڭ 560 يۈەن بولۇپ، 2023 ـ يىلىدىكىدىن %16 ئاشتى.
«كەنتتە 300دىن ئارتۇق ئائىلىلىك بار، يېڭى ئېنېرگىيەلىك ئاپتوموبىلدىن 5ى بار.» ۋاڭ شياۋلى ئۆزىنىڭ ئاپتوموبىل ھەيدەشنى ئۆگىنىۋاتقانلىقىنى، يېڭى ئېنېرگىيەلىك ئاپتوموبىل سېتىۋېلىپ، ئائىلىسىدىكىلەرنى ئېلىپ ساياھەتكە بارماقچى ئىكەنلىكىنى ئېيتتى.
