[مۇھەررىردىن]
خوتەن ناھىيەسىنىڭ ئاۋات يېزىسىدا، بىر پارچە «تيەنئەنمېن» ئارقا كۆرۈنۈش قىلىنغان دېكىراتسىيەلىك پەردە كەنت ئاھالىلىرىنىڭ داكا قىلىش نۇقتىسىغا ئايلاندى. ئۇلار پايتەخت بېيجىڭغا بولغان تەلپۈنۈشى ۋە قىزغىن مۇھەببىتى بىلەن «تيەنئەنمېن» ئالدىدا سۈرەتكە چۈشۈپ خاتىرە قالدۇردى. «<تيەنئەنمېن> خاتىرە سۈرىتىنىڭ ئارقىسىدىكى ھېكايە»دىن ئاشۇ سۈرەتلەرنىڭ ئارقىسىدىكى جەنۇبىي شىنجاڭدىكى ئاممىنىڭ ھەقىقىي تۇرمۇشى ۋە ئۇلارنىڭ ئاددىي ـ ساددا ھەم قويۇق بولغان دۆلەت ھېسسىياتىنى ھېس قىلالايسىز.
□ئانار بۇلۇت\شىنجاڭ گېزىتى مۇخبىرى رايىدە
«كېلىڭلار، ياغدا پىشۇرۇلغان يېڭى بېلىق، تېتىمىسا پۇل ئالمايمەن!» 3 ـ ئاينىڭ 29 ـ كۈنى چۈشتىن كېيىن، خوتەن ناھىيەسىنىڭ ئاۋات يېزىسىدىكى بازار ئادەتتىن تاشقىرى قىزىپ كەتكەنىدى. 56 ياشلىق ئامىنە ئابلا يايما ئورنىدا بىر تەرەپتىن ياغدا بېلىق پىشۇرغاچ، بىر تەرەپتىن خېرىدارلار بىلەن پاراڭلىشىۋاتاتتى.
«تيەنئەنمېن ئالدىدا خاتىرە سۈرەتكە چۈشتىڭىزمۇ؟» دەپ سورىدى خېرىدار ئۇنىڭدىن.
«ئەلۋەتتە چۈشتۈم، بەك ياخشى بولدى!» دېدى ئامىنە خۇشال ھالدا.
ئامىنەنىڭ ئۆيىدىكى تامنىڭ ئەڭ كۆزگە چېلىقىدىغان يېرىگە ئاشۇ خاتىرە سۈرەت ئېسىلغان بولۇپ، ئۇ «تيەنئەنمېن» ئارقا كۆرۈنۈش قىلىنغان دېكىراتسىيەلىك پەردە ئالدىدا قىزىلگۈل كەشتىلەنگەن پوپايكا كىيىپ، مەرۋايىت زەنجىر تاقاپ لەرزان ئۇسسۇلغا چۈشكەنىدى.
3 ـ ئاينىڭ 24 ـ كۈنى، ئاۋات يېزىسىنىڭ ئاقچال كەنتىدىكى بايراق چىقىرىش مۇراسىمى ئاخىرلاشقاندىن كېيىن، ئامىنە كەنت مەيدانىدىن ئۆتۈپ كېتىۋېتىپ، بىر توپ كىشىنىڭ بىر يەرگە توپلىشىۋالغانلىقىنى كۆرۈپ، ئالدىغا بېرىپ سورىۋېدى، يېزىدىكى تەشۋىقات كادىرى خۇ چۇنفاڭنىڭ «تيەنئەنمېن» ئارقا كۆرۈنۈش قىلىنغان چوڭ دېكىراتسىيەلىك پەردىنى ئېلىپ كېلىپ، كۆپچىلىكنى ھەقسىز سۈرەتكە تارتىپ قويۇۋاتقانلىقىنى بىلدى.
دېكىراتسىيەلىك پەردىنىڭ ئالدىغا كېلىپ تۇرغاندا، ئامىنە دەسلەپتە ئازراق جىددىيلەشكەن بولسىمۇ، لېكىن ناھايىتى تېزلا ھېس ـ تۇيغۇسىغا ئەگىشىپ ئۇسسۇلغا چۈشتى. ئىككى كۈندىن كېيىن، سۈرەتنى تاپشۇرۇۋالغان ئامىنە ناھايىتى خۇشال بولۇپ، رەسىم جازىسى سېتىۋېلىپ، سۈرەتنى ئۆينىڭ ئەڭ كۆزگە چېلىقىدىغان يېرىگە ئېسىپ قويدى.
«بەلكىم كېيىن پۇرسەت بولۇپ قالسا، بېيجىڭ تيەنئەنمېنگە بېرىشىم مۇمكىن.» ئامىنە بىر تەرەپتىن ياغدا بېلىق پىشۇرغاچ، يەنە بىر تەرەپتىن ئۆز ـ ئۆزىگە پىچىرلىدى، چىرايىدىن تەلپۈنۈش چىقىپ تۇراتتى.
بۇ ئىشەنچ يىلدىن يىلغا ياخشىلىنىۋاتقان ھازىرقى بەختلىك تۇرمۇشتىن كەلگەن.
ئامىنە ئاۋات يېزىسى قۇمئېغىل كەنتىنىڭ كەنت ئاھالىسى، بۇ كەنت دۆلىتىمىزدىكى ئەڭ چوڭ قۇملۇق − تەكلىماكان قۇملۇقىنىڭ ئىچكىرىسىگە جايلاشقان بولۇپ، خوتەن ناھىيەسىنىڭ ناھىيە بازىرىغا 100 نەچچە كىلومېتىر كېلىدۇ. بۇ يەردە ئىلگىرى سېرىق قۇم كۆپ، تۇپراقنىڭ قۇملىشىشى ئېغىر بولغاچقا، دېھقانچىلىق زىرائەتلىرىنىڭ ھوسۇلى تۆۋەن ئىدى. ئىلگىرى، قاتناش ئىنتايىن قولايسىز بولغاچقا، كەنت ئاھالىلىرى ناھىيە بازىرىغا بارماقچى بولسا، تاڭ يورۇماستىنلا يولغا چىقاتتى، يول بەك ئوڭغۇل ـ دوڭغۇل بولۇپ، يېتىپ بارغۇچە قاراڭغۇ چۈشۈپ كېتەتتى؛ يېزا ئىگىلىك مەھسۇلاتلىرىنى توشۇش قىيىن بولۇپ، ئۆستۈرگەن چىلاننىمۇ سېتىپ چىقىرالمايتتى، كەنت ئاھالىلىرى ئۈنۈمسىز تۇپراققىلا قاراشلىق بولغاچقا، كىرىمى ئاز ئىدى، تۇرمۇشى غۇربەتچىلىكتە ئۆتەتتى.
ئەمما بۈگۈنكى كۈندە، تۈرلۈك سىياسەتلەرنىڭ ئەمەلىيلىشىشىگە ئەگىشىپ، بۇ كىچىك كەنتتە ئالەمشۇمۇل ئۆزگىرىشلەر بولدى. ئامىنە ئائىلىسىدىمۇ ئوخشاشلا ئۆزگىرىشلەر بولدى.
ئامىنەنىڭ ئائىلىسىدە بەش جان بولۇپ، ئېرى ئىككى ھەپتە ئىلگىرى كورلىغا ئىشلىگىلى كەتكەن، ئوغلى كەنتتىكى يىگىتلەر بىلەن گۇاڭجوۋغا ئىشلىگىلى كەتكەن، ئۆيىدە پەقەت ئۇ ۋە كېلىنى، نەۋرە قىزىلا بار ئىدى.
«ئائىلىمىزدە ئون مو يەر بار، چىلان، ياڭاق ۋە ئۈزۈم ئۆستۈردۇق، تېخنىكلارنىڭ ياردىمىدە كىرىمىمىز بارغانسېرى ئاشتى، ئۇنىڭ ئۈستىگە قاتناشمۇ قولايلاشتى، سېتىپ چىقىرىشتىن غەم قىلمايدىغان بولدۇق.» ئامىنە مۇنداق دېدى: دېھقانچىلىقنىڭ ئالدىراش مەزگىلىدە دېھقانچىلىق ئىشلىرىنى قىلىمەن، بىكار ۋاقىتلىرىمدا پارچە ـ پۇرات ئىشلارنى قىلىپ ئائىلەمنى قامدايمەن.
ئامىنە مۇخبىرغا مۇنداق دېدى: ھازىر كەنتتە تۈرلۈك كەسىپلەر بار، ئىشچى قوبۇل قىلىدىغان جايلارمۇ كۆپ. «ئىلگىرى خىزمەت تاپماقچى بولساق، ئۆيىمىزدىن ئايرىلىشقا توغرا كېلەتتى، سىرتتا ئىشلىسەك چىقىممۇ كۆپ ئىدى، ھازىر ئوبدان بولۇپ كەتتى، ئىشىك ئالدىمىزدىلا خىزمەت تاپالايدىغان بولدۇق.» ئامىنە: بازاردا ياغدا پىشۇرۇلغان بېلىق ساتسام بىر كۈندە 150 يۈەن تاپالايمەن، بىر ئايدا تۆت قېتىم ساتسام 600 يۈەن تاپالايمەن، ئادەتتە يەنە بەزى پارچە ـ پۇرات ئىشلارنى قىلىپ ئايدا ئاز دېگەندىمۇ 3000 يۈەن تاپالايمەن، دېدى. ھازىر، ئۇنىڭ ئائىلىسى تېلېۋىزور، توڭلاتقۇ، كىرئالغۇ قاتارلىق ئائىلە ئېلېكتىر سايمانلىرىنى سېتىۋالدى، تۇرمۇش سۈپىتى زور دەرىجىدە ئۆستى، يەنە ئۆزى ياخشى كۆرىدىغان كىيىم ـ كېچەك ۋە زىبۇ ـ زىننەتلەرنى سېتىۋالالايدىغان بولدى، كۈنلىرى ناھايىتى كۆڭۈللۈك ئۆتۈۋاتىدۇ.
ئىلگىرىكى ئوڭغۇل ـ دوڭغۇل، مېڭىش تەس توپا يول كەڭ، تۈز ئاسفالت يولغا ئايلاندى، سۇ، توك بىلەن تەمىنلەش مۇقىم بولدى، تور بىلەن تولۇق قاپلاندى، كەنت ئاھالىلىرى ئۆيىدە ئولتۇرۇپلا سىرتتىكى ئۇچۇرلارنى ئىگىلەپ، ئىلغار تېرىقچىلىق تېخنىكىسى ۋە ئىشقا ئورۇنلىشىش ماھارىتىنى ئۆگىنەلەيدۇ. مەكتەپ يېڭىلاندى ۋە كېڭەيتىلدى، ئوقۇتقۇچىلار قوشۇنى ئۈزلۈكسىز كۈچەيدى، بالىلارمۇ تېخىمۇ ئەلا سۈپەتلىك مائارىپنى قوبۇل قىلالايدىغان بولدى... ئامىنە كەنتتىكى ئۆزگىرىشلەرنى ماختىدى.
ئىلگىرى ئويلاپمۇ يېتەلمەيدىغان گۈزەل تۇرمۇش بۈگۈنكى كۈندە رېئاللىققا ئايلاندى، بۇ ئامىنەنى كەلگۈسىگە تەلپۈنىدىغان ئىشەنچكە ئىگە قىلدى. ئىلگىرى تيەنئەنمېنگە بېرىش يەتكىلى بولمايدىغان ئارزۇ ئىدى، بۈگۈنكى كۈندە، ئۇ بارغانسېرى ياخشىلىنىۋاتقان تۇرمۇشنى كۆرۈپ بۇ ئارزۇسىنىڭ چوقۇم ئەمەلگە ئاشىدىغانلىقىغا قەتئىي ئىشەندى. «ھازىر كۈنلىرىمىز بارغانسېرى ياخشىلىنىۋاتىدۇ، پات ئارىدا مەنمۇ بېيجىڭغا بېرىپ، تيەنئەنمېن ئالدىدا ئۇسسۇل ئوينىيالايدىغانلىقىمغا ئىشىنىمەن» دېدى ئامىنە خېرىدارلارغا ياغدا پىشۇرۇلغان بېلىقنى سۇنغاچ كۈلۈپ تۇرۇپ.
