يېزا ئېلېكتىرونلۇق سودىسىدا «مۇلازىمەت ئىستېمالى ئالدىغا ئۆتۈپ كېتىش» يېڭى ئالاھىدىلىكى كۆرۈلدى
شىنجاڭ گېزىتى، ئۈرۈمچى، 3 ـ ئاينىڭ 29 ـ كۈنى خەۋىرى ئانار بۇلۇت\شىنجاڭ گېزىتى مۇخبىرى خېي خۇڭۋېي خەۋەر قىلىدۇ: ئۈچىنچى تەرەپنىڭ ئىستاتىستىكىلىق سانلىق مەلۇماتىغا ئاساسلانغاندا، 1 ـ ئايدىن 2 ـ ئايغىچە، شىنجاڭنىڭ توردا پارچە سېتىش سوممىسى مۇقىم ئېشىپ، بۇلتۇرقى ئوخشاش مەزگىلدىكىدىن %10.32 ئاشقان، بۇنىڭ ئىچىدە ئەمەلىي بۇيۇم تىپىدىكى تاۋارلارنىڭ توردا پارچە سېتىلىش سوممىسى، مۇلازىمەت تىپىدىكى تاۋارلارنىڭ توردا پارچە سېتىلىش سوممىسىنىڭ ئېشىش سۈرئىتى بىردەك %10تىن ئاشقان. يېزا ئېلېكتىرونلۇق سودىسىنىڭ تەرەققىيات ۋەزىيىتى كۈچلۈك بولۇپ، «مۇلازىمەت ئىستېمالى ئالدىغا ئۆتۈپ كېتىش» ئالاھىدىلىكى نامايان بولغان.
1 ـ ئايدىن 2 ـ ئايغىچە، شىنجاڭ يېزىلىرىدا توردا پارچە سېتىش سوممىسى 7 مىليارد 314 مىليون يۈەنگە يەتكەن، بۇنىڭ ئىچىدە ئەمەلىي بۇيۇم تىپىدىكى تاۋارلارنىڭ توردا پارچە سېتىلىش سوممىسى 3 مىليارد 564 مىليون يۈەن بولۇپ، يېزىلاردىكى توردا پارچە سېتىش سوممىسىنىڭ %48.73ىنى ئىگىلىگەن؛ يېزىلاردىكى مۇلازىمەت تىپىدىكى تاۋارلارنىڭ توردا پارچە سېتىلىش سوممىسى 3 مىليارد 750 مىليون يۈەن بولۇپ، ئىگىلىگەن نىسبىتى %51.27كە يەتكەن، مۇلازىمەت تىپىدىكى ئىستېمالنىڭ يېزا ئېلېكتىرونلۇق سودىسىدىكى نىسبىتى ئەمەلىي بۇيۇم تىپىدىكى ئىستېمالدىن ئېشىپ، يېزا ئېلېكتىرونلۇق سودىسى تەرەققىياتىنىڭ يېڭى يارقىن نۇقتىسىغا ئايلانغان.
كەسىپ قۇرۇلمىسى جەھەتتە، ئالدىنقى ئىككى ئايدا شىنجاڭنىڭ تور ئىستېمال قۇرۇلمىسى سىجىل ئەلالاشتى. ئەمەلىي بۇيۇم تىپىدىكى تور ئىستېمالىدا، يېمەكلىك ـ ساقلىق ساقلاش، ئۈنچە ـ مەرۋايىت، زىبۇ ـ زىننەت بۇيۇملىرى، ئۆي جاھازىلىرى بۇيۇملىرى ئالدىنقى ئۈچ ئورۇندا تۇرۇپ، ئايرىم ـ ئايرىم ھالدا ئىستېمالچىلارنىڭ ساغلاملىق، گۈزەللىك ۋە ئۆي جاھازىلىرىغا بولغان تۇرمۇش ئېھتىياجىنى قاندۇردى. مۇلازىمەت تىپىدىكى ئىستېمالدا، توردىكى يېمەك ـ ئىچمەك، توردىكى ساياھەت ۋە تۇرمۇش مۇلازىمىتى ئالدىنقى ئۈچ ئورۇننى ئىگىلەپ، ئىستېمالچىلارنىڭ تۇرمۇش سۈپىتى ۋە مۇلازىمەت تەسىراتىغا بولغان ئىنتىلىشىنى نامايان قىلدى.
بۇنىڭدىن باشقا، بىۋاسىتە كۆرسىتىش ئېلېكتىرونلۇق سودىسى يېڭىدىن گۈللەنگەن ئىستېمال ئەندىزىسى بولۇش سۈپىتى بىلەن، ئىستېمال يېڭى مەنزىرىسىنى قايتا بەرپا قىلماقتا. 1 ـ ئايدىن 2 ـ ئايغىچە، شىنجاڭدا بىۋاسىتە كۆرسىتىپ پارچە سېتىش سوممىسى 1 مىليارد 42 مىليون يۈەنگە يېتىپ، 20 مىليون 90 مىڭ پارچە تاۋارنىڭ سېتىلىشىغا تۈرتكە بولدى، بىۋاسىتە كۆرسىتىش ئېلېكتىرونلۇق سودىسى ئىستېمالنىڭ ئېشىشىنى ئىلگىرى سۈرۈشتىكى مۇھىم موتورغا ئايلاندى.
مۇخبىرنىڭ ئاپتونوم رايونلۇق سودا نازارىتىدىن ئىگىلىشىچە، تور ۋە تور سىرتى يۇغۇرما ئىستېمال يېڭى مەنزىرىسىنىڭ ئۈزلۈكسىز مەيدانغا كېلىشىگە ئەگىشىپ، شىنجاڭنىڭ توردا پارچە سېتىش بازىرى سىجىل جانلىنىش ھالىتىنى ساقلىغان. كەلگۈسىدە، شىنجاڭ ئېلېكتىرونلۇق سودا ئەۋزەللىكىنى داۋاملىق جارى قىلدۇرۇپ، يېزا ئېلېكتىرونلۇق سودىسى ۋە مۇلازىمەت تىپىدىكى ئىستېمالنىڭ يەنىمۇ تەرەققىي قىلىشىغا تۈرتكە بولۇپ، ئىقتىسادنىڭ يۇقىرى سۈپەتلىك تەرەققىياتىغا يېڭى ھاياتىي كۈچ قوشىدىكەن.
