□ئانار بۇلۇت\شىنجاڭ گېزىتى مۇخبىرى جاڭ لېي
«قانداق قىلىپ مىڭ يىللىق ئېپوسنىڭ يېڭى ھاياتىي كۈچىنى ئۇرغۇتقىلى بولىدۇ، بۇ ئىلگىرى ماناس ئېپوسىغا ۋارىسلىق قىلىش ۋە ئۇنى قوغداشتا جىددىي ھەل قىلىشقا تېگىشلىك قىيىن مەسىلە ئىدى.» ئاپتونوم رايونلۇق سەنئەت تەتقىقات ئورنىنىڭ مۇئاۋىن باشلىقى جاڭ يۈن مۇنداق دېدى: بۈگۈنكى كۈندە، نىزام چىقىرىش ئارقىلىق بۇ قىيىن مەسىلىگە دەل جايىدا جاۋاب بېرىلدى.
3 ـ ئاينىڭ 26 ـ كۈنى، ئاپتونوم رايونلۇق 14 ـ نۆۋەتلىك خەلق قۇرۇلتىيى دائىمىي كومىتېتىنىڭ 19 ـ يىغىنىدا «شىنجاڭ ئۇيغۇر ئاپتونوم رايونىنىڭ ماناس غەيرىي ماددىي مەدەنىيەت مىراسىنى قوغداش نىزامى» قاراپ چىقىلىپ ماقۇللاندى، «نىزام» بۇ يىل 5 ـ ئاينىڭ 1 ـ كۈنىدىن باشلاپ يولغا قويۇلىدۇ.
قانۇنچىللىق جۇڭگوچە زامانىۋىلاشتۇرۇشنىڭ مۇھىم كاپالىتى، نىزام چىقىرىش قانۇنچىللىقنىڭ ئالدىنقى شەرتى ۋە ئاساسى. يېقىنقى يىللاردىن بۇيان، ئاپتونوم رايونلۇق خەلق قۇرۇلتىيى ھەم ئۇنىڭ دائىمىي كومىتېتى مەۋقەنى تەرەققىيات ئومۇمىيىتىگە مۇلازىمەت قىلىشقا قويۇپ، دەۋر تەلىپىنى گەۋدىلەندۈرىدىغان، يەرلىك ئالاھىدىلىكنى ئەكس ئەتتۈرىدىغان بىر تۈركۈم يەرلىك نىزاملارنى تۈزۈپ ۋە ئۇنىڭغا تۈزىتىش كىرگۈزۈپ، يەرلىك نىزام چىقىرىشنىڭ يولغا قويۇش خاراكتېرلىك، تولۇقلاش خاراكتېرلىك، ئىزدىنىش خاراكتېرلىك فۇنكسىيەسىنى ھەقىقىي جارى قىلدۇرۇپ، شىنجاڭ خاسلىقىغا ئىگە يەرلىك نىزام چىقىرىش سىستېمىسىنى ئۈزلۈكسىز تاكامۇللاشتۇردى ۋە مۇكەممەللەشتۈردى.
«تەرەققىياتنى كۆزلەيدىغان» پايدىلىق نىزام چىقىرىش
يېڭى يىل كىرىشى بىلەنلا، ئاپتونوم رايونلۇق خەلق قۇرۇلتىيى دائىمىي كومىتېتى جىددىي تەييارلىق كۆرۈپ 2025 ـ يىللىق يەرلىك نىزام چىقىرىش خىزمىتى يىغىنىنى ئېچىپ، 2024 ـ يىللىق ئاپتونوم رايوننىڭ يەرلىك نىزام چىقىرىش خىزمىتىنى خۇلاسىلەپ، 2025 ـ يىللىق نىزام چىقىرىش ۋەزىپىسىنى ئورۇنلاشتۇرما قىلىپ، قانۇنچىللىقنىڭ ئاساسنى مۇستەھكەملەش، كۆزلىمىنى مۇقىملاشتۇرۇش، كەلگۈسىگە مەنپەئەت يەتكۈزۈشتىكى كاپالەتلەندۈرۈش رولىنى تولۇق جارى قىلدۇردى.
ئۆتكەن بىر يىلدا، ئاپتونوم رايونلۇق خەلق قۇرۇلتىيى دائىمىي كومىتېتى جەمئىي ئاپتونوم رايوننىڭ 16 نىزامىنى، ئون نىزام خاراكتېرلىك قارار ـ بېكىتمىسىنى قاراپ چىقىپ ماقۇللىدى، ئاپتونوم رايوننىڭ يەتتە نىزامىنى تۇنجى قېتىم قاراپ چىقتى، تەستىقلاشقا يوللانغان 39 نىزامنى تەكشۈرۈپ تەستىقلىدى. «نىزام چىقىرىش خىزمىتىدە سانى كۆپ بولۇش، سالمىقى ئېغىر بولۇش، سۈپىتى يۇقىرى بولۇشتىن ئىبارەت روشەن ئالاھىدىلىك نامايان بولدى.» دېدى ئاپتونوم رايونلۇق خەلق قۇرۇلتىيى دائىمىي كومىتېتى قانۇنچىلىق خىزمىتى كومىتېتىنىڭ مۇدىرى لى جۈەن.
شىنجاڭ دۆلىتىمىزنىڭ مۇھىم قېزىلما بايلىقلارنى ئېچىش رايونى. يېقىنقى يىللاردىن بۇيان، قېزىلما بايلىقلارنى باشقۇرۇش جەريانىدا، شىنجاڭدىكى قىسمەن كان تەكشۈرۈش ھوقۇقىغا ئېرىشكۈچىلەردە قانۇندا بەلگىلەنگەن چارلاش ـ تەكشۈرۈش سېلىنمىسىنى تاماملىيالماسلىق مەسىلىسى كۆرۈلۈپ، قېزىلما بايلىقلاردىن ئۈنۈملۈك ئېچىپ پايدىلىنالماسلىقنى كەلتۈرۈپ چىقاردى. ئاپتونوم رايونلۇق خەلق قۇرۇلتىيى دائىمىي كومىتېتى «شىنجاڭ ئۇيغۇر ئاپتونوم رايونىنىڭ قېزىلما بايلىقلارنى چارلاش ـ تەكشۈرۈش سېلىنمىسىنى نازارەت قىلىش ـ باشقۇرۇش بەلگىلىمىسى»نى ئىجادىي تۈزۈپ، «كىچىك دائىرىلىك» نىزام چىقىرىش ئارقىلىق كان تەكشۈرۈش ھوقۇقىدىكى «قاشالاپ قويۇپ چارلىماسلىق» مەسىلىسىنى قانۇن بويىچە ھەل قىلىپ، قېزىلما بايلىقلارنى ئېچىش تەرتىپىنى قانۇن بويىچە قېلىپلاشتۇردى.
جۇش ئۇرۇپ راۋاجلىنىۋاتقان مەدەنىيەت ۋە ساياھەت بازىرىنى چۆرىدەپ، ئاپتونوم رايونلۇق خەلق قۇرۇلتىيى دائىمىي كومىتېتى ۋە پۈتۈن ئاپتونوم رايوندىكى ھەر دەرىجىلىك نىزام چىقىرىش ھوقۇقىغا ئىگە خەلق قۇرۇلتايلىرى «شىنجاڭ ئۇيغۇر ئاپتونوم رايونىنىڭ قەشقەر قەدىمىي شەھىرىنى قوغداش نىزامى» «ئىلى قازاق ئاپتونوم ئوبلاستىنىڭ ئائىلىۋى مېھمانخانىلارنى باشقۇرۇش ۋە ئىلگىرى سۈرۈش نىزامى» «قاراماي شەھىرىنىڭ شەھەر باغچىسى ـ مەيدانىنى باشقۇرۇش نىزامى» قاتارلىق بىر تۈركۈم خاسلىقى روشەن يەرلىك نىزاملارنى تۈزۈپ، قانۇنچىللىق ئارقىلىق مەدەنىيەت ـ ساياھەت كەسپىنىڭ ساغلام تەرەققىياتىغا كاپالەتلىك قىلدى. 2024 ـ يىلى، شىنجاڭ 302 مىليون ئادەم قېتىم ساياھەتچى كۈتۈۋېلىشنى ئىشقا ئاشۇرۇپ، تۈرلۈك كۆرسەتكۈچلەردە تارىخىي يېڭى يۇقىرى سەۋىيە ياراتتى، ساياھەت قىزغىنلىقى تەرتىپىدە مەملىكەت بويىچە 2 ـ ئورۇندا تۇردى.
«مەدەنىيەت ـ ساياھەت كەسپىنىڭ ئاپتونوم رايوننىڭ <ئون چوڭ كەسىپ توپى> قاتارىغا كىرگۈزۈلگەنلىكىدەك پۇرسەتنى چىڭ تۇتۇپ، يەرلىك نىزاملارنىڭ تەسىر كۈچىنى كېڭەيتىش خىزمىتىنى ياخشى ئىشلەشتە چىڭ تۇرىمىز.» ئاپتونوم رايونلۇق مەدەنىيەت ۋە ساياھەت نازارىتى پارتىيە گۇرۇپپىسىنىڭ ئەزاسى، مۇئاۋىن نازىر جاڭ يۇڭدۇڭ مۇنداق بىلدۈردى: ئالاقىدار سىياسەت ـ ھۆججەتلەر، مەخسۇس تۈر يىرىك پىلانى ۋە كەسپىي خىزمەت تەدبىرى قاتارلىقلارنىڭ ئارقا ـ ئارقىدىن ئوتتۇرىغا قويۇلۇشىغا ئەگىشىپ، نىزام چىقىرىشنىڭ «كۈچ ئۇلاش تايىقى» بولۇش ئۈنۈمى ئۈزلۈكسىز نامايان بولدى.
«خەلقنى غەمدىن خالاس قىلىدىغان» ئۈنۈملۈك نىزام چىقىرىش
خەلقنىڭ بەخت ـ سائادىتى قانۇن بىلەن مۇناسىۋەتلىك. يېقىنقى يىللاردىن بۇيان، ئاپتونوم رايونلۇق خەلق قۇرۇلتىيى ۋە ئۇنىڭ دائىمىي كومىتېتى خەلق تۇرمۇشى، جەمئىيەت ساھەسىگە دائىر نىزام چىقىرىشنى تېز ئالغا سىلجىتىپ، خەلققە نەپ يەتكۈزىدىغان، خەلققە پايدا يەتكۈزىدىغان ئەمەلىي ئىشلارنى ھەقىقىي ياخشى قىلىشقا كۈچەپ، تىرىشىپ خەلق ئاممىسى خاتىرجەم ياشاپ خۇشال ـ خۇرام ئىشلەيدىغان ياخشى جەمئىيەت مۇھىتى بەرپا قىلىش ئۈچۈن قانۇنچىللىق كۈچىنى قوشتى.
3 ـ ئايدىكى شامال تەكلىماكان قۇملۇقىنى سىيپاپ ئۆتتى، بىپايان قۇملۇقنىڭ گىرۋىكىنى قاشالاپ تۇرغان قاتار ـ قاتار «يېشىل شارپا»لار كۆزگە ئالاھىدە چېلىقىپ تۇراتتى. «قۇم ئىلگىرىلەپ، ئادەم چېكىنىش»تىن «بوستانلىق ئىلگىرىلەپ، قۇملۇق چېكىنىش»كىچە، ئاندىن «ئادەم بىلەن قۇمنىڭ ئىناق ئۆتۈشى»گىچە بولغان بۇ ئۆزگىرىشلەردە يەرلىك نىزام چىقىرىشنىڭ تۆھپىسى بار. 1 ـ ئاينىڭ 1 ـ كۈنى، يېڭىدىن ئۆزگەرتىلگەن «شىنجاڭ ئۇيغۇر ئاپتونوم رايونىنىڭ <جۇڭخۇا خەلق جۇمھۇرىيىتىنىڭ قۇمدىن مۇداپىئەلىنىش، قۇم تىزگىنلەش قانۇنى>نى يولغا قويۇش چارىسى» رەسمىي يولغا قويۇلدى. بۇ چارىدە قۇمدىن مۇداپىئەلىنىش، قۇم تىزگىنلەش يىرىك پىلانى، يەر قۇملىشىشنىڭ ئالدىنى ئېلىش، قۇملاشقان يەرنى تۈزەش، قۇملاشقان يەردىن پايدىلىنىش قاتارلىق مەزمۇنلار تەپسىلىي بەلگىلىنىپ، قۇمدىن مۇداپىئەلىنىش، قۇم تىزگىنلەش خىزمىتىنىڭ يۇقىرى سۈپەتلىك تەرەققىياتىغا قانۇن بويىچە تۈرتكە بولۇندى.
ياخشى ئېكولوگىيە ـ مۇھىت ئەڭ ئومۇمىي مەنپەئەتدار بولغان خەلق تۇرمۇشى بەخت ـ سائادىتى. «قومۇل دەرياسى دۆلەت سۇلۇق يەر باغچىسىنى قوغداش نىزامى» «تۇرپان شەھىرىنىڭ ئايدىڭكۆل سۇلۇق يېرىنى قوغداش نىزامى» قاتارلىق ئېكولوگىيەگە دائىر نىزاملارنى چىقىرىش ئاسمىنى دائىم كۆك بولىدىغان، زۇمرەتتەك سۇلار توختىماي ئېقىپ تۇرىدىغان، يېشىل تاغلار مەڭگۈ ساقلىنىپ تۇرىدىغان گۈزەل شىنجاڭ قۇرۇشنى كۈچلۈك قانۇنچىللىق تىرىكىگە ئىگە قىلدى.
يېقىنقى يىللاردىن بۇيان، بەزى جايلاردا يۇقىرى سوممىلىق تويلۇق ئېلىش، توينى ھەشەمەتلىك ئۆتكۈزۈش، تۈرلۈك ناملاردا ئادەمگەرچىلىك سوۋغىتى ئېلىش قاتارلىق ئەھۋاللار كۆپ كۆرۈلۈپ، ئۆيلىنىش نۇرغۇن ياش ئۈچۈن «بەرداشلىق بەرگۈسىز ئېغىر بېسىم»غا ئايلىنىپ قالدى. كونا ئۆرپ ـ ئادەتلەرنى ئۆزگەرتىش بويىچە نۇقتىلىق ساھەلەردىكى تۈرلۈك مەسىلىلەرگە قارىتا، تۇرپان شەھىرى پۈتۈن شىنجاڭ بويىچە باشلامچىلىق بىلەن «تۇرپان شەھىرىنىڭ توي ـ تۆكۈن ۋە ئۆلۈم ئىشلىرىدىكى كونا ئۆرپ ـ ئادەتلەرنى ئۆزگەرتىش بەلگىلىمىسى»نى چىقىرىپ، يۇقىرى سوممىلىق تويلۇق ئېلىش، ھەشەمەتلىك توي مۇراسىمى ئۆتكۈزۈشنى چەكلەپ، توينى يېڭىچە ئۆتكۈزۈشنى تەشەببۇس قىلىپ، توي ـ تۆكۈن، ئۆلۈم ئىشلىرىدا مەدەنىي يېڭى كەيپىياتنىڭ يارىتىلىشىغا تۈرتكە بولدى.
ياخشى تۇرمۇش مۇھىتى بەرپا قىلىش، ئاممىنىڭ ئاساسىي ھوقۇق ـ مەنپەئىتىگە كاپالەتلىك قىلىش، پۇقرالارنىڭ مەنىۋى مەدەنىيەت ئېھتىياجىنى قاندۇرۇش قاتارلىق خەلق تۇرمۇشىدىكى كۆڭۈل بۆلۈنۈۋاتقان مەسىلىلەرنى چۆرىدەپ، بۇلتۇر ئاپتونوم رايونلۇق خەلق قۇرۇلتىيى دائىمىي كومىتېتى «شىنجاڭ ئۇيغۇر ئاپتونوم رايونىنىڭ شەھەر ـ بازار تۇرمۇش ئەخلىتىنى باشقۇرۇش نىزامى» «شىنجاڭ ئۇيغۇر ئاپتونوم رايونىنىڭ <جۇڭخۇا خەلق جۇمھۇرىيىتىنىڭ ئىشقا ئورۇنلاشتۇرۇشنى ئىلگىرى سۈرۈش قانۇنى>نى يولغا قويۇش چارىسى» قاتارلىق نۇرغۇن يەرلىك نىزاملارنى قاراپ چىقىپ ماقۇللىدى. ھەربىر نىزامنىڭ ماقۇللىنىشى خەلق ئاممىسى ئالدىراۋاتقان، قىينىلىۋاتقان، غەم قىلىۋاتقان، ئارزۇ قىلىۋاتقان مەسىلىلەرنى تېخىمۇ ياخشى ھەل قىلىپ، ھەربىر نىزامنى خەلق رايىنى مۇجەسسەملەيدىغان، خەلق تۇرمۇشىغا يېقىنلىشىدىغان، خەلق رايىغا ئۇيغۇنلىشىدىغان قىلىش ئۈچۈندۇر.
«يېڭىلىق يارىتىشقا ماھىر بولغان» ياراملىق نىزام چىقىرىش
پارتىيە 20 ـ نۆۋەتلىك مەركىزىي كومىتېتىنىڭ 3 ـ ئومۇمىي يىغىنىدا يەنىمۇ ئىلگىرىلىگەن ھالدا ئىسلاھاتنى ئومۇميۈزلۈك چوڭقۇرلاشتۇرۇشقا قارىتا سىستېمىلىق ئورۇنلاشتۇرما چىقىرىلدى، نىزام چىقىرىش ساھەسى ئىسلاھاتىنى چوڭقۇرلاشتۇرۇش بۇنىڭ ئىچىدىكى بىر تۈرلۈك مۇھىم ۋەزىپە. ئاپتونوم رايونلۇق 10 ـ نۆۋەتلىك پارتىيە كومىتېتى 12 ـ ئومۇمىي يىغىنىدا دىققەت شىنجاڭنى قانۇن بويىچە ئىدارە قىلىش تۈزۈلمە ـ مېخانىزمىنى مۇكەممەللەشتۈرۈشكە مەركەزلەشتۈرۈلۈپ، نۇقتىلىق ساھە، يېڭىدىن گۈللەنگەن ساھە، چەت ئەلگە ئالاقىدار ساھەلەرگە دائىر نىزام چىقىرىشنى كۈچەيتىشكە قارىتا ئېنىق تەلەپلەر ئوتتۇرىغا قويۇلدى.
«2024 ـ يىلى، ئاپتونوم رايوننىڭ يەرلىك نىزام چىقىرىش نەتىجىلىرى مول بولدى، چەت ئەلگە ئالاقىدار قانۇنچىللىق ساھەسىدە يېڭىلىق يارىتىپ بۆسۈش ھاسىل قىلىندى.» 2025 ـ يىللىق شىنجاڭنىڭ ئىككى يىغىنىنىڭ 2 ـ مەيدان ئاخبارات ئېلان قىلىش يىغىنىدا، ئاپتونوم رايونلۇق 14 ـ نۆۋەتلىك خەلق قۇرۇلتىيى 3 ـ يىغىنىنىڭ ئاخبارات باياناتچىسى جاۋ ۋېنچۈەن شۇنداق دېدى.
چەت ئەلگە ئالاقىدار قانۇنچىللىق قۇرۇلۇشىنى كۈچەيتىش ھەم قۇدرەتلىك دۆلەت قۇرۇش، مىللەتنى گۈللەندۈرۈش ئۇلۇغ ئىشلىرىنى جۇڭگوچە زامانىۋىلاشتۇرۇش ئارقىلىق ئومۇميۈزلۈك ئالغا سىلجىتىشنىڭ ئۇزاق مەزگىللىك ئېھتىياجى، شۇنداقلا شىنجاڭنىڭ يۇقىرى سەۋىيەلىك سىرتقا ئېچىۋېتىشنى ئالغا سىلجىتىشىدىكى ھازىرقى جىددىي ئىشى. بۇلتۇر 8 ـ ئاينىڭ 23 ـ كۈنى ئېچىلغان ئاپتونوم رايونلۇق 14 ـ نۆۋەتلىك خەلق قۇرۇلتىيى دائىمىي كومىتېتىنىڭ 13 ـ يىغىنىدا «شىنجاڭ ئۇيغۇر ئاپتونوم رايونلۇق خەلق قۇرۇلتىيى دائىمىي كومىتېتىنىڭ ئامېرىكىنىڭ شىنجاڭغا ئالاقىدار جازالاش يۈرۈشلۈك قانۇنىغا قەتئىي قارشى تۇرۇپ، جازالاشقا ئۇچرىغان كارخانىلار ھەم ئالاقىدار كەسىپلەرنىڭ تەرەققىياتىنى قوللاش توغرىسىدىكى قارارى» ماقۇللىنىپ، ھەققانىيەت ساداسى ياڭرىتىلىپ، ئامېرىكىنىڭ ئاساسسىز جازالىشىغا قايتۇرما زەربە بېرىلىپ، ھەر مىللەت ئەمگەكچىلەرنىڭ بەختلىك تۇرمۇشقا ئىنتىلىش ھوقۇق ـ مەنپەئىتى كاپالەتلەندۈرۈلدى.
«بۇ، بىزنىڭ قانۇن قورالىدىن پايدىلىنىپ زومىگەرلىك ۋە زوراۋانلىق سىياسىيسىغا قايتۇرما زەربە بېرىشتىكى كۈچلۈك تەدبىرىمىز.» 3 ـ ئاينىڭ 7 ـ كۈنى، 14 ـ نۆۋەتلىك مەملىكەتلىك خەلق قۇرۇلتىيى 3 ـ يىغىنىغا قاتنىشىۋاتقان شىنجاڭ ۋەكىللەر ئۆمىكى ئومۇمىي يىغىن ئۆتكۈزدى ھەم جۇڭگو ـ چەت ئەل تاراتقۇلىرىغا ئېچىۋەتتى، مەملىكەتلىك خەلق قۇرۇلتىيى ۋەكىلى، ئاپتونوم رايونلۇق خەلق قۇرۇلتىيى دائىمىي كومىتېتىنىڭ مۇئاۋىن مۇدىرى ۋاڭ مىڭشەن مۇنداق بىلدۈردى: «يېقىندا بىر قىسىم جۇڭگو كارخانىلىرى شىنجاڭدا ئاتالمىش <مەجبۇرىي ئەمگەككە سېلىش> مەۋجۇت دېگەن يالغان ـ ياۋىداق، بىمەنە سەپسەتىلەرنى ئۇزاقتىن بۇيان تارقىتىپ كەلگەن تەشكىلات ۋە ئاپپاراتلار ئۈستىدىن ئەرز سۇندى، بىزمۇ تېخىمۇ كۆپ كارخانىنىڭ قانۇن قورالىدىن پايدىلىنىپ ئۆزىنىڭ قانۇنلۇق ھوقۇق ـ مەنپەئىتىنى قوغدىشىغا ئىلھام ۋە مەدەت بېرىمىز».
3 ـ ئاينىڭ 1 ـ كۈنى، شىنجاڭنىڭ تۇنجى چۆل ئېكولوگىيەسىنى قوغداشقا دائىر يەرلىك نىزامى بولغان «قومۇل شەھىرىنىڭ چۆل ئېكولوگىيە ـ مۇھىتىنى قوغداش نىزامى» رەسمىي يولغا قويۇلدى.
يېقىنقى يىللاردىن بۇيان، قومۇلدا قۇم ـ بورانلىق ھاۋارايى كۆپ كۆرۈلدى، نىزام چىقىرىپ چۆل ئېكولوگىيە ـ مۇھىتىنى قوغداشنى بىر مىنۇتمۇ كېچىكتۈرۈشكە بولمايدۇ. قومۇل شەھەرلىك خەلق قۇرۇلتىيى دائىمىي كومىتېتى ئېكولوگىيە ـ مۇھىت مىنىستىرلىقى نەنجىڭ مۇھىت ئىلمىي تەتقىقات ئورنىدىن ئىبارەت «تاشقى مېڭە»دىن پايدىلىنىپ، بىۋاسىتە ماس كېلىدىغان ئۈستۈن قانۇن كەمچىل بولغان ۋە پايدىلىنىشقا بولىدىغان باشقا يەرلىك نىزاملار يوق بولغان ئەھۋالدا، قومۇل شەھەرلىك خەلق قۇرۇلتىيى دائىمىي كومىتېتى نىزام چىقىرىش خىزمىتى مېخانىزمىدا يېڭىلىق يارىتىپ، ئېكولوگىيە ـ مۇھىت مىنىستىرلىقى نەنجىڭ مۇھىت ئىلمىي تەتقىقات ئورنىنى نىزام چىقىرىش خىزمىتىگە پۈتۈن جەريانلىق ئەگىشىپ ياردەملىشىشكە تەكلىپ قىلدى، خېنەن داشۆ، خېنەن مالىيە ـ ئىقتىساد، سىياسىي قانۇن داشۆسىدە نىزام چىقىرىش بويىچە مەسلىھەت سوراش بازىسى تەسىس قىلىپ، كۆپ قېتىم پىكىر ـ تەكلىپ ئالدى.
قۇملۇقتىكى بوستانلىقلاردىن شەھەر كوچىلىرىغىچە، ئىقتىسادىي تەرەققىياتتىن خەلق تۇرمۇشىدىكى ئىنچىكە ئىشلارغىچە، قانۇنچىللىق نۇرى تىيانشاننىڭ جەنۇبى ـ شىمالىغا چېچىلدى. «نىزام چىقىرىش دەۋر بىلەن تەڭ ئىلگىرىلەيدىغان بىر تۈرلۈك خىزمەت، دەۋرگە يېقىندىن ئەگىشىپ ماڭغاندىلا، ئاندىن ئىقتىساد، جەمئىيەت تەرەققىياتى بىلەن ماس قەدەمدە ئىلگىرىلىگىلى بولىدۇ.» لى جۈەن مۇنداق دېدى: 2024 ـ يىلى ئاپتونوم رايونلۇق خەلق قۇرۇلتىيى دائىمىي كومىتېتى يۇقىرى سۈپەتلىك نىزام چىقىرىش ئارقىلىق يۇقىرى سۈپەتلىك تەرەققىياتقا كاپالەتلىك قىلىپ، ھەم ئاپتونوم رايونلۇق پارتىيە كومىتېتىنىڭ خىزمەت ئومۇمىيىتىنى زىچ چۆرىدىدى، ھەم خەلق ئاممىسىنىڭ يېڭى تەلىپى، يېڭى ئارزۇسى بىلەن «قوش يۆنىلىشلىك ئاتلاندى». بۇ يىل، ئاپتونوم رايونلۇق خەلق قۇرۇلتىيى دائىمىي كومىتېتى مۇقىملىقنى قوغداش، يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇش، «ئون چوڭ كەسىپ توپى» قۇرۇلۇشى، يۇقىرى سەۋىيەلىك سىرتقا ئېچىۋېتىش، شىنجاڭنى مەدەنىيەت ئارقىلىق ئوزۇقلاندۇرۇش، خەلق تۇرمۇشىنى كاپالەتلەندۈرۈش ۋە ياخشىلاش قاتارلىق جەھەتلەرنى چۆرىدەپ، 46 نىزام چىقىرىش تۈرىنى بېكىتتى، نىزام چىقىرىش رولىنى تولۇق جارى قىلدۇرۇپ، شىنجاڭنىڭ جەمئىيەت مۇقىملىقى ۋە ئەبەدىي ئەمىنلىكىنى كۈچلۈك قانۇنچىللىق كاپالىتى بىلەن تەمىنلەيدۇ.
يېڭى تارىخىي باشلىنىش نۇقتىسىدا تۇرغان شىنجاڭ نىزام چىقىرىش قەلىمى ئارقىلىق يۇقىرى سۈپەتلىك تەرەققىيات بىلەن يۇقىرى سەۋىيەلىك ئىدارە قىلىش يۇغۇرۇلغان گۈزەل مەنزىرىنى سىزىپ چىقماقتا.
