□ئانار بۇلۇت\شىنجاڭ گېزىتى مۇخبىرى گو لىڭ
ھەربىر ئىش ئورنىنىڭ مەشغۇلات تەرتىپىنى پىششىق بىلىش، 300 ئىش ئورنى مەشغۇلات قائىدىسىنى ئېسىدە ساقلاش... 14 يىلدىن بۇيان، جۇ چياڭ نېفىت خىمىيە سانائىتى ئىشلەپچىقىرىشىنىڭ بىرىنچى سېپىدە چىڭ تۇرۇپ، «خاتالىق ئۆتكۈزمەسلىك» رېكورتىنى ساقلاپ كەلدى.
37 ياشلىق جۇ چياڭ شىخو شەھىرى مىڭيۈەن نېفىت خىمىيە سانائىتى چەكلىك شىركىتى تېخنىكا بۆلۈمىنىڭ مۇدىرى، 2011 - يىلى ئىشلەپچىقىرىشنىڭ بىرىنچى سېپىدە يىلتىز تارتقاندىن بۇيان، ئادەتتىكى خىزمەتچىدىن تېخنىكا تايانچى بولۇپ ئۆسۈپ يېتىلىپ، «خاتالىق ئۆتكۈزمەسلىك» مەشغۇلات رېكورتى ۋە «ھەممىنى بىلىدىغان» نامى بىلەن نېفىت خىمىيە كەسپىنىڭ ئۈلگىسىگە ئايلاندى. ئىلگىرى - كېيىن بولۇپ شىنجاڭنى ئېچىش، گۈللەندۈرۈش مېدالىغا، مەملىكەتلىك 1 - ماي ئەمگەك مېدالى قاتارلىقلارغا ئېرىشتى.
سېختىكى پومپا ئۆيى ئىنتايىن ئىسسىق ئىدى، پومپا ئۆيىگە رەت - رەت ماشىنا - پومپىلار، قاتمۇقات ئىسسىقلىق ئالماشتۇرغۇچ، يەنە نەچچە ئون مېتىر ئېگىزلىكتىكى ماشىنا - ئۈسكۈنىلەر تەرتىپلىك قويۇلغان بولۇپ، مەشغۇلاتچىلار بېسىم، تېمپېراتۇرا ئۆلچىگۈچ قاتارلىقلارنىڭ پارامېتىرىغا تىكىلىپ قاراپ تۇراتتى، بىر قولىدا ماشىنىنى ھەرىكەتلەندۈرسە، يەنە بىر قولىدا سانلىق مەلۇماتلارنى تېز سۈرئەتتە خاتىرىلەيتتى... بۈگۈنكى كۈندە، جۇ چياڭ سېخقا تۇنجى قېتىم كىرگەندە كۆرگەن مەنزىرىنى يەنىلا ئېنىق ئەسلىيەلەيدۇ.
2010 - يىلى، ئۇ جياڭشى تەبىئىي پەن ۋە سانائەت پەنلىرى داشۆسىنىڭ ئېلېكتىر قۇرۇلۇشى ۋە ئاپتوماتلاشتۇرۇش كەسپىنى پۈتكۈزۈپ، شىخو شەھىرىدىكى بىر نېفىت خىمىيە سانائىتى شىركىتىگە خىزمەتكە چۈشتى. ئۇ چاغ شىخو نېفىت خىمىيە سانائىتى كەسپىنىڭ باشلىنىش باسقۇچى بولۇپ، داشۆ پۈتكۈزگەن بۇ خىزمەتچىلەر شەندۇڭدىكى بىر كارخانىغا نېفىت ئايرىش تېخنىكىسىنى ئۆگىنىشكە ئەۋەتىلدى.
«ھەر كۈنى نەق مەيداندا تەرلەپ - پىشىپ، تۈرلۈك قۇرۇلمىلارنىڭ يۈرۈشۈش ئەھۋالىنى خاتىرىلىدۇق، بىلمىگەن يەرلىرىمىزنى ماتېرىيال ئاختۇرۇپ ئۆگەندۇق» جۇ چياڭ بۇ قېتىمقى ئۆگىنىش پۇرسىتىنى بەك قەدىرلىدى. كارخانىغا قايتىپ كەلگەندىن كېيىن، ئۇ ئۆگەنگەن كەسپىي بىلىملىرىگە تايىنىپ، كارخانىنىڭ ئىشلەپچىقىرىش تەييارلىق خىزمىتىگە پائال ئاتلاندى. ئېلېكتىر ئۈسكۈنىلىرىنى كۆڭۈل قويۇپ ئورۇنلاشتۇرۇشتىن تارتىپ ئېنېرگىيە كابېلى ۋە پىرىبور كابېلىنى ئۆلچەملىك قۇراشتۇرۇشقىچە، ئاندىن ئېلېكتىر ئۈسكۈنىلىرى ۋە پىرىبور ئۈسكۈنىلىرىنى دەل جايىدا قۇراشتۇرۇشقىچە بولغان ھەربىر ھالقىنى ئۇ ئۆزى قول سېلىپ ئىشلەپ، ناھايىتى ئېھتىياتچان بولۇپ، كارخانىغا بىر ئايلىق ئۈسكۈنە قۇراشتۇرۇش ۋاقتىنى، 200 مىڭ يۈەن خىراجەتنى تېجەپ بەردى. ئۇنىڭ ئالاھىدە خىزمەت ئىپادىسى كۆزدە تۇتۇلۇپ، يېرىم يىلدىن كېيىنلا، ئۇ بىر ئادەتتىكى ئىشچىدىن بەنجاڭلىققا ئۆستۈرۈلدى، كېيىن يەنە سېخ مۇدىرى بولدى.
2014 - يىلى، جۇ چياڭ ئەمدىلا قۇرۇلغان شىخو شەھەرلىك مىڭيۈەن نېفىت خىمىيە سانائىتى چەكلىك شىركىتىگە كېلىپ، تېخنىكا بۆلۈمىنىڭ مۇدىرى بولدى. لايىھەلەش باسقۇچىدا، جۇ چياڭ ۋە تېخنىكا بۆلۈمىدىكى خادىملار تەتقىق قىلىش ئارقىلىق مېخانىكىلىق پومپا بىلەن ھاۋا چىقىرىش تېخنىكىسىنىڭ ئېنېرگىيەنى تېخىمۇ تېجەپ، پاسكىنا سۇ ھاسىل قىلمايدىغانلىقىنى بايقىدى، بۇنىڭ سىناپ ئىشلەپچىقىرىش مەزگىلىدە ئەمەلىي قوللىنىش ئۈنۈمى ناھايىتى ياخشى بولدى.
يېقىنقى يىللاردىن بۇيان، ئۆزىنىڭ پۇختا تېخنىكا ئاساسى ۋە ئالدىن كۆرەرلىكىگە تايىنىپ، جۇ چياڭ تېخنىكا بۆلۈمىدىكى خىزمەتداشلىرىنى يېتەكلەپ، تېخنىكا ئۆزگەرتىش ئارقىلىق، ئالماشتۇرۇلغان، شاللىۋېتىلگەن بىر قىسىم كونا ئۈسكۈنىلەرنى ئەلالاشتۇرۇپ دەرىجىسىنى ئۆستۈرۈپ، ئىشلەپچىقىرىش جەريانىدا ئۇلارنىڭ ھاياتىي كۈچىنى قايتىدىن ئۇرغۇتتى.
بۇ شىركەت جۇ چياڭ باشچىلىقىدىكى ھۈنەرۋەن، ئەمگەك نەمۇنىچىلىرى يېڭىلىق يارىتىش ئىشخانىسى قۇردى، ئىشخانا ئەزالىرىنىڭ ھەممىسى ئىشلەپچىقىرىشنىڭ بىرىنچى سېپىدىن كەلگەن. جۇ چياڭنىڭ يېتەكچىلىكىدە، خىزمەت ئىشخانىسى قۇرۇلمىنىڭ ئۇزۇن دەۋرىيلىك ئايلىنىش ئۈنۈمىگە تەسىر كۆرسىتىدىغان سەككىز تۈرلۈك مۇھىم مەسىلىنى ھەل قىلدى. بۇنىڭ ئىچىدە، ئۈچ تۈرنىڭ نەتىجىسى ئالاھىدە گەۋدىلىك بولدى، بۇلار ئايرىم - ئايرىم ھالدا سوۋۇتۇلغان سۇنى يىغىۋېلىش تۈرى، ئىسسىقلىق ئالماشتۇرۇشنى ئەلالاشتۇرۇش تۈرى ھەمدە قۇرۇق گازنى گۈڭگۈرتسىزلەشتۈرۈپ يىغىۋېلىش تۈرى.
قۇرۇق گازنى گۈڭگۈرتسىزلەشتۈرۈپ يىغىۋېلىش تۈرى، جۇ چياڭ ئاسفالت ئىشلەپچىقىرىش جەريانىدا قىسمەن قېتىشمايدىغان گاز پەيدا بولىدىغانلىقىنى، مۇھىتنى بۇلغايدىغان خەۋپى بارلىقىنى بايقاپ، بىخەتەرلىكنى باھالىغاندىن كېيىن، قېتىشمايدىغان گازنى ئوچاققا سېلىپ كۆيدۈرۈشتىن بۇرۇن بىر يۈرۈش گۈڭگۈرتسىزلەشتۈرۈش سىستېمىسى ئورنىتىش ئارقىلىق، قېتىشمايدىغان گازدىكى سۇلفىدلارنى بىر تەرەپ قىلىش ئارقىلىق بارلىققا كەلتۈرگەن تۈر. بۇ سىستېما ئىشلىتىلگەندىن كېيىن، بۇلغىنىش مەسىلىسى ھەل قىلىنىپلا قالماي، يەنە كۈندىلىك تەبىئىي گاز ئىشلىتىش مىقدارى ئىلگىرىكىدىن 700 كۇب مېتىر ئازايدى. نۆۋەتتە، ئۇ ئۆزگەرتكەن بارلىق تېخنىكا كارخانىغا جەمئىي 34 مىليون 600 مىڭ يۈەن تەننەرخنى تېجەپ بەردى.
جۇ چياڭ ئىگىلىگەن ماھارىتىنى تېخىمۇ كۆپ ياشلارغا ئۆگىتىش ئۈچۈن دەرس ئۆتۈش لايىھەسىنى كۆڭۈل قويۇپ تۈزدى، كۈندىلىك توپلىغان خىزمەت تەجرىبىسى ۋە تەربىيەلەش ماتېرىياللىرى ئىچىدىن تەپسىلىي تاللاپ، ئەستايىدىل خۇلاسىلەپ، تەربىيەلەنگەن ھەربىر كىشىگە ماس كېلىدىغان تەربىيەلەش ماتېرىيالى تۈزۈپ بەردى.
بۈگۈنكى كۈندە، جۇ چياڭ باشچىلىقىدىكى ئەمگەك نەمۇنىچىلىرى يېڭىلىق يارىتىش ئىشخانىسى 47 تېخنىكا تايانچىسىنى تەربىيەلەپ، 37 شاگىرتنى يېتىشتۈرۈپ، كارخانىنىڭ ئېنېرگىيە تېجەپ سەرپىياتنى تۆۋەنلىتىشىگە ۋە بىخەتەر ئىشلەپچىقىرىشىغا تۈرتكە بولدى. «مەن بۇ يەردە يىلتىز تارتىپ، تېخىمۇ كۆپ تېخنىكا تايانچلىرىنى تەربىيەلەپ، شىنجاڭنىڭ ئىقتىسادىي تەرەققىياتىغا كۈچ قوشىمەن» دېدى جۇ چياڭ.
