□ئانار بۇلۇت\شىنجاڭ گېزىتى مۇخبىرى ۋاڭ جىڭجىڭ
3 - ئاينىڭ 21 - كۈنى چۈشتىن بۇرۇن، دۆلەت جىڭجۈ تىياتىرخانىسىنىڭ رېپېتىتسىيە زالىدا لەرزان مۇزىكا ساداسى ياڭرىدى، يېڭىدىن ئىشلەنگەن تارىخىي جىڭجۈ تىياتىرى «ئەسلىي زېمىننى يېڭىدىن قايتۇرۇۋېلىش»نى ئورۇنلاش ئۈچۈن بۇ تىياتىرخانىنىڭ سىناق تىياتىرخانىسىدا رېپېتىتسىيە قىلىش مۇراسىمى ئۆتكۈزۈلدى، بۇ، بۇ تىياتىرنىڭ رەسمىي رېپېتىتسىيە باسقۇچىغا كىرگەنلىكىدىن دېرەك بەردى.
چىڭ سۇلالىسىنىڭ ئاخىرقى مەزگىللىرىدىكى داڭلىق سەركەردە زو زۇڭتاڭنىڭ گۇەنسەي كۆتۈرۈپ غەربكە يۈرۈش قىلغانلىقى، شىنجاڭنى قايتۇرۇۋالغانلىقى ھېكايە قىلىنغان يېڭىدىن ئىشلەنگەن بۇ تارىخىي جىڭجۈ تىياتىرىنى ئۈرۈمچى شەھەرلىك جىڭجۈ تىياتىرى ئۆمىكى (شىنجاڭ جىڭجۈ تىياتىرى ئۆمىكى) دۆلەت جىڭجۈ تىياتىرخانىسى بىلەن بىرلىكتە ئىجاد قىلىپ تەييارلىدى. بۇ، بۇ زور تارىخىي ۋەقەنى جىڭجۈ تىياتىرى سەنئىتى ئارقىلىق تۇنجى قېتىم تولۇق كۆرۈنۈشلۈك نامايان قىلىش بولۇپلا قالماي، يەنە دۆلەت دەرىجىلىك تىياتىر ئۆمىكىدىكىلەرنىڭ شىنجاڭدىكى ئەدەبىيات - سەنئەت خىزمەتچىلىرى بىلەن چوڭقۇر ھەمكارلىشىش ئەندىزىسىنى ئېچىشتىكى يېڭى باشلىنىش نۇقتىسى ھېسابلىنىدۇ.
دۆلەت جىڭجۈ تىياتىرى ئۆمىكى نېمە ئۈچۈن شىنجاڭنى تاللايدۇ؟ ئىككى تەرەپ زو زۇڭتاڭنىڭ ھېكايىسىنى قانداق قىلىپ جىڭجۈ تىياتىرى شەكلىدە سەھنىگە ئېلىپ چىقتى؟ بۇنىڭ ئۈچۈن مۇخبىر ئاساسلىق ئىجادىيەتچىلەرنى زىيارەت قىلىپ، بۇ تىياتىرنىڭ ئىجادىيەت شىفىرىنى يەشتى.
زامان - ماكان ھالقىغان ھېسسىيات ئورتاقلىقىنى ئىزدىدى
300 نەچچە كېچە - كۈندۈز تەييارلاش ئارقىلىق، ئىككى ئۆمەكتىكى سەنئەتكارلار ئۈرۈمچى شەھىرى، قومۇل شەھىرى ۋە ئىلى قازاق ئاپتونوم ئوبلاستى قاتارلىق جايلاردا كۆپ قېتىم تۇرمۇش ئۆگىنىپ، ئارگىنالنى كۆپ قېتىم ئۆزگەرتىپ، ئاندىن بۈگۈنكى كۈندىكى سېنارىيەنى بارلىققا كەلتۈردى. «بىز دۆلەت جىڭجۈ تىياتىرخانىسىدىكى ئوقۇتقۇچىلار بىلەن بىللە، زو زۇڭتاڭ ئەينى يىلى تىككەن سۆگەت سايىسىدە قايتا ماڭدۇق، ئىلى جياڭجۈن مەھكىمىسىنىڭ ئالا - چىپار خىش تاملىرىنى سىلىدۇق، بۇ، زامان - ماكان ھالقىغان ھېسسىيات ئورتاقلىقىنى ئىزدەش ئۈچۈندۇر» دېدى ئۈرۈمچى شەھەرلىك جىڭجۈ تىياتىر ئۆمىكى (شىنجاڭ جىڭجۈ تىياتىرى ئۆمىكى) پارتىيە ياچېيكىسىنىڭ شۇجىسى گو يۇڭخۇڭ.
2023 - يىلىنىڭ كېيىنكى يېرىمىدا، دۆلەت جىڭجۈ تىياتىرخانىسى ئۈرۈمچى شەھەرلىك جىڭجۈ تىياتىرى ئۆمىكى (شىنجاڭ جىڭجۈ تىياتىرى ئۆمىكى) بىلەن بىر قاتار كېلىشىملەرنى ئىمزالىدى. ئىككى تەرەپ ئېنىق قىلىپ «ئەسلىي زېمىننى يېڭىدىن قايتۇرۇۋېلىش» ناملىق جىڭجۈ تىياتىرىنى ۋاسىتە قىلىپ، زو زۇڭتاڭنىڭ شىنجاڭنى قايتۇرۇۋالغانلىقىدىن ئىبارەت بۇ قاينام - تاشقىنلىققا تولغان تارىخنى سەھنىگە ئېلىپ چىقىپ، چوڭقۇر ۋەتەننى سۆيۈش ھېسسىياتىنى ئىزھار قىلدى.
دۆلەت جىڭجۈ تىياتىرخانىسى بىلەن ئۈرۈمچى شەھەرلىك جىڭجۈ تىياتىرى ئۆمىكى )شىنجاڭ جىڭجۈ تىياتىرى ئۆمىكى(نىڭ ئاساسلىق ئىجادىيەتچىلىرى 2023 - يىلى 11 - ئايدا ئۈرۈمچى، ئىلى قاتارلىق جايلارغا بېرىپ ئىجادىيەت ئۈچۈن تۇرمۇش ئۆگىنىپ، 2024 - يىلى 1 - ئايدا سېنارىيەنىڭ دەسلەپكى ئارگىنالىنى تاماملىدى. كېيىنكى ئون ئايدا، ھەرقايسى تەرەپلەرنىڭ پىكرىگە ئاساسەن، ھېكايە قۇرۇلمىسى، پېرسوناژلارنىڭ رولى، تىياتىر تۈرىنىڭ ئالاھىدىلىكى قاتارلىق جەھەتلەردىن سېنارىيەنى ئالتە قېتىم چوڭقۇر تەڭشىدى ۋە ئۆزگەرتتى.
2024 - يىلى 12 - ئايدا، تىياتىر گۇرۇپپىسىنىڭ ئاساسلىق ئىجادىيەتچىلىرى يەنە ئۈرۈمچى شەھىرى، قومۇل شەھىرى قاتارلىق جايلارغا بېرىپ تۇرمۇش ئۆگەنگەندىن كېيىن، سەھنىدە نامايان قىلىش تەسەۋۋۇرىغا ئاساسەن، يەنە سېنارىيەنى ئىلگىرى - كېيىن بولۇپ 7 - قېتىم ۋە 8 - قېتىم ئۆزگەرتتى، كېيىنكى تىياتىرنى رېپېتىتسىيە قىلىش جەريانىدا يەنە تەپسىلاتلارنى پىششىقلىدى.
«بۇ تىياتىردا، شىددەتلىك جەڭلەرگە ئانچە كۆپ قەلەم تەۋرىتىلمىدى، بەلكى مۇھىم نۇقتا پېرسوناژلارنىڭ ئىچكى دۇنياسىنى يارىتىشقا قارىتىلدى.» «ئەسلىي زېمىننى يېڭىدىن قايتۇرۇۋېلىش» ناملىق تىياتىرنىڭ رېژىسسورى لى جيې مۇنداق تونۇشتۇردى: تىياتىردا زو زۇڭتاڭنىڭ ئەسىرلەرگە بولغان كۆيۈنۈشى، غەمخورلۇق قىلىشى، شۇنداقلا ئۇ ئايرىلىش ئالدىدا ئۆزىنىڭ قېرى ئېتىنىڭ شىنجاڭدا قېلىپ يۇرتىنى قوغداۋاتقانلىقىدەك ئىنچىكە ئارىيەلەر بار، «بۇ تىياتىردا يەنە لىن زېشۈ بىلەن زو زۇڭتاڭنىڭ شياڭجياڭ دەرياسى كېچىسىدىكى سۆھبىتى سەھنىگە ئېلىپ چىقىلىپ، ئىككى پېرسوناژنىڭ بىر - بىرىنى قەدىرلەيدىغانلىقى، كۆپ تەرەپتىن كۈچ چىقىرىدىغانلىقى نامايان قىلىنىپ، ھەم دۆلەت مۇھەببىتى، ھەم ھەقىقىي ھېسسىياتقا ئىگە ئىستېرېئولۇق زو زۇڭتاڭ ئوبرازى يارىتىلدى».
ئىجاد قىلىپ رېپېتىتسىيە قىلىش جەريانى قالتىس، يېڭىچە بولدى
«ئەسلىي زېمىننى يېڭىدىن قايتۇرۇۋېلىش» ناملىق تىياتىردا جىڭجۈ تىياتىرىنىڭ شەكىل ئېستېتىكىسى قەدىرلىنىش ئاساسىدا يەنە نۇرغۇن يېڭىلىق يارىتىلدى ۋە بۆسۈش بولدى. بايان قۇرۇلمىسى جەھەتتە، تارىخىي ئەقىل - پاراسەت بىلەن ھازىرقى زامان قىممىتى سەھنىدە بىر - بىرىگە ھۆسن قوشۇپ، زامان - ماكان دىيالوگىدىن ئىبارەت گۈزەللىك تۇيغۇسى ھاسىل بولدى. مۇزىكا تىلى جەھەتتە ساھە ھالقىپ يۇغۇرۇلۇپ، شىنجاڭنىڭ سەنئەت ئامىللىرىغا ئەنئەنىۋى شىپى ۋە ئېرخۇاڭ، قالۇن ۋە چاڭنىڭ تەڭكەش ساداسى قوشۇلۇپ، ھەم ئەنئەنىۋى تۇپراققا چوڭقۇر يىلتىز تارتتى، ھەم دەۋر يېڭى شاخلىرىنى يېتىلدۈردى.
بۇ تىياتىرنى ئىجاد قىلىپ رېپېتىتسىيە قىلىش جەھەتتىمۇ يېڭىچە سىناقلار بار بولۇپ، تىياتىردىكى بارلىق رول A، B رول دەپ ئايرىلدى، دۆلەت جىڭجۈ تىياتىرخانىسىنىڭ ئارتىسلىرى A رولنى، ئۈرۈمچى شەھەرلىك جىڭجۈ تىياتىرى ئۆمىكى (شىنجاڭ جىڭجۈ تىياتىرى ئۆمىكى)نىڭ ئارتىسلىرى B رولنى ئېلىپ، بىرلىكتە رېپېتىتسىيە قىلدى. دۆلەت جىڭجۈ تىياتىرخانىسىدا رېپېتىتسىيە قىلىش جەريانىدا، ئىككى تەرەپ بىر تەرەپتىن رېپېتىتسىيە قىلىپ، بىر تەرەپتىن پىكىر ئالماشتۇرۇپ ئۆگىنىپ، يېڭى تىياتىرنى ئىجاد قىلىش - تەييارلاش ھەمكارلىقى ئارقىلىق ئارتىسلار ھەمدە سېنارىست، رېژىسسور، سەھنە سەنئىتى بىلەن شۇغۇللانغۇچىلار قاتارلىق ئىختىساسلىقلارنى ئورتاق يېتىشتۈرۈش خىزمىتىگە تۈرتكە بولدى. «بۇ تىياتىرغا ئارتىسلارنى سەپلەش جەھەتتە، ئۈرۈمچى شەھەرلىك جىڭجۈ تىياتىرى ئۆمىكى (شىنجاڭ جىڭجۈ تىياتىرى ئۆمىكى)دىكى پېشقەدەم، ئوتتۇرا ياش، ياش ئۈچ ئەۋلاد ئارتىسلار قاتناشتۇرۇلدى، <تىياتىر ئارقىلىق ئىختىساسلىقلارنى يېتەكلەش> ئۇسۇلى بىلەن تېخىمۇ كۆپ ياشلارغا تالانتىنى نامايان قىلىدىغان سەھنە ھازىرلاپ بېرىشنى ئۈمىد قىلىمەن» دېدى گو يۇڭخۇڭ.
شىنجاڭلىق تىياتىر مەستانىلىرى ئويۇننىڭ بالدۇرراق قويۇلۇشىغا تەقەززا بولدى
بۇ تىياتىرنىڭ رېژىسسورى لى جيې ئىلگىرى شىنجاڭغا كۆپ قېتىم كەلگەن بولۇپ، شىنجاڭدىكى جىڭجۈ تىياتىرىنى قىزغىن سۆيىدىغان ھەر مىللەت ئاممىغا قارىتا چوڭقۇر تەسىراتقا ئىگە ئىدى، تىياتىر مەستانىلىرىنىڭ ئۈمىدى يەنە ئۇنى ئىجادىيەت قىزغىنلىقىغا چۆمدۈردى. «شىنجاڭلىق نۇرغۇن يۇرتداش جىڭجۈ تىياتىرىنى ياخشى كۆرىدۇ، ئۇلار ياقتۇرۇپ ئاڭلاپلا قالماي، يەنە بەزى كىلاسسىك ئارىيەلەرنى ئېيتالايدۇ، بىزنىڭ بۇ تىياتىردىمۇ ئۇيغۇر مىللىتىدىن بولغان بىر بوۋاينىڭ ئوبرازى بار» دېدى ئۇ.
شىنجاڭنىڭ جىڭجۈ تىياتىرى سەنئىتى چىڭ سۇلالىسىنىڭ ئاخىرقى يىللىرىدا بارلىققا كەلگەن بولۇپ، ئەينى چاغدا «جىلى تىياتىر گۇرۇپپىسى» «تيەنلى تىياتىر گۇرۇپپىسى» قاتارلىق كەسپىي جىڭجۈ تىياتىرى گۇرۇپپىلىرى بار ئىدى. 1955 - يىلى ئۈرۈمچى شەھىرىدە جىڭجۈ تىياتىرى ئۆمىكى قۇرۇلدى. 1964 - يىلى بۇ ئۆمەك ئورۇنلىغان ھازىرقى زامان جىڭجۈ تىياتىرى «قىزىل قىيا» مەملىكەتلىك ھازىرقى زامان جىڭجۈ تىياتىرى كۆرىكىگە قاتناشتۇرۇلدى.
ئۈرۈمچى شەھەرلىك جىڭجۈ تىياتىرى ئۆمىكى (شىنجاڭ جىڭجۈ تىياتىرى ئۆمىكى)نىڭ يۆلىشى ۋە تۈرتكىسىدە، ھەر يىلى نۇرغۇن شىنجاڭلىق ئىشتىن سرتقى شىچۈ تىياتىرى ئارتىسلىرى سەھنىگە چىقىپ، كەسپىي ئارتىسلار بىلەن بىر سەھنىدە ئويۇن قويدى. «بۇ بىرنەچچە يىلدا ئۈرۈمچىدە جىڭجۈ تىياتىرى سەنئىتىگە كۆڭۈل بۆلىدىغان ئامما بارغانسېرى كۆپەيدى، نۇرغۇن كىشى تىياتىر مەستانىسىگە ئايلاندى.» ئۈرۈمچى شەھەرلىك جىڭجۈ تىياتىرى سەنئىتى تەتقىقاتىنى ئىلگىرى سۈرۈش جەمئىيىتىنىڭ جەمئىيەت باشلىقى گو شياۋچىڭ مۇنداق دېدى: جىڭجۈ تىياتىرى خاسلىقىغا ئىگە مەكتەپ بولغان ئۈرۈمچى شەھەرلىك 21 - باشلانغۇچ مەكتەپ قورۇسىنىڭ ھەممىلا يېرىدە شىچۈ تىياتىر ئامىللىرىنى كۆرگىلى بولىدۇ − شىچۈ تىياتىرى رادىيو گىمناستىكىسى، شىچۈ تىياتىرى كىيىم - كېچەك، زىبۇ - زىننەتلىرى كۆرگەزمىسى، قولدا سىزىلغان ليەنپۇ قاتارلىقلار. 13 ياشلىق مۇستاپا مەمەتئېلى مەكتەپنىڭ لىيۈەنچۇن شىچۈ تىياتىرى ئۆمىكىنىڭ ئەزاسى بولۇپ، لاۋشېڭ كەسپىدە تۆت يىل ئوقۇغان، ئۇ «خۇەيخېيىڭ» «دىڭجۈنشەن» «شاجياباڭ» قاتارلىق تىياتىرلارنى پىششىق بىلىدۇ.
«ئەسلىي زېمىننى يېڭىدىن قايتۇرۇۋېلىش» ناملىق تىياتىرنىڭ رېپېتىتسىيە قىلىنىۋاتقانلىقى توغرىسىدىكى خەۋەر يېقىندا شىنجاڭلىق ئىشتىن سىرتقى شىچۈ تىياتىر ئارتىسلىرى توپىدا كەڭ تارقالدى. شىنجاڭدىكى داشۆ ئوقۇغۇچىلىرىدىن تەشكىللەنگەن جىڭجۈ تىياتىرى مەستانىلىرى ۋىيشىن توپىدا، بۇ يىل 21 ياشقا كىرگەن ليۇ سىيا ئىنتايىن خۇشال بولغان ھالدا مۇنداق دېدى: «مەن ئالايىتەن بېرىپ بۇ بۆلەك تارىخنى ئىگىلىدىم، بۇ تىياتىرنىڭ بالدۇرراق سەھنىگە ئېلىپ چىقىلىشىنى ئۈمىد قىلىمەن».
