□ئانار بۇلۇت\شىنجاڭ گېزىتى مۇخبىرى ليۇ شياڭ
3 - ئاينىڭ 24 - كۈنى، ئاپتونوم رايون ۋە بىڭتۇەن تۇنجى قېتىم شىنجاڭ خەلق ئىشلىرى يىغىنىنى بىرلىكتە ئاچتى، بۇنىڭدىن پەقەت ئىككى كۈن ئىلگىرى، ئاپتونوم رايون ۋە بىڭتۇەن يەنە شىنجاڭ بويىچە 1 - پەسىلدىكى چوڭ - چوڭ تۈرلەردە مەركەزلىك ئىش باشلاش پائالىيىتىنى ئورتاق ئۆتكۈزگەنىدى.
تەپسىلىي سانىساق، بۇلتۇردىن باشلاپ، شىنجاڭنىڭ پەن - تېخنىكا، سىياسىي - قانۇن، مائارىپ، تەشۋىقات قاتارلىق كۆپ ساھەدىكى مۇھىم خىزمەت يىغىنلىرىنىڭ ھەممىسىدە بىڭتۇەن بىلەن يەرلىك بىرلىكتە ئېچىش شەكلى قوللىنىلىپ، ۋەزىپىلەر بىرتۇتاش ئورۇنلاشتۇرما قىلىنىپ، خىزمەتلەر بىرتۇتاش ئالغا سىلجىتىلدى.
بىڭتۇەن بىلەن يەرلىكنى يۇغۇرما تەرەققىي قىلدۇرۇش پارتىيە مەركىزىي كومىتېتىنىڭ ئىستراتېگىيەلىك ئومۇملۇق نۇقتىسىدا تۇرۇپ چىقارغان مۇھىم ئورۇنلاشتۇرمىسى، بۇ، مەۋقەنى ئىستراتېگىيەلىك ئومۇملۇققا قويۇش، تەرەققىيات چوڭ ۋەزىيىتىگە ئۇيغۇنلىشىشتىكى مۇقەررەر تاللاش بولۇپ، چوڭقۇر رېئال ئەھمىيەتكە ۋە تارىخىي ئەھمىيەتكە ئىگە.
جەمئىيەت مۇقىملىقى ۋە ئەبەدىي ئەمىنلىكنى قوغداشتىكى مۇقەررەر تەلەپ
شىنجاڭ ۋەتىنىمىزنىڭ غەربىي شىمال چېگرا بويىغا جايلاشقان بولۇپ، ئىستراتېگىيەلىك ئورنى ئىنتايىن مۇھىم. بىڭتۇەن بىلەن يەرلىكنىڭ يۇغۇرما تەرەققىياتى بىڭتۇەن بىلەن يەرلىكنىڭ مۇقىملىقنى قوغداش كۈچلىرىنى ئۈنۈملۈك بىرىكتۈرەلەيدۇ.
مەسىلەن: بەزى چېگرا رايونلاردا، بىڭتۇەننىڭ چېگرادىكى تۇەن - مەيدانلىرى بىلەن يەرلىكتىكى يېزا - بازارلار قول تۇتۇشۇپ چېگرا باشقۇرۇش - تىزگىنلەشنى كۈچەيتىپ، چارلاش، ئالدىنى ئېلىش - تىزگىنلەشنى بىرلىكتە قانات يايدۇرۇپ، چېگرا رايوننىڭ بىخەتەرلىكى، مۇقىملىقىنى ئۈنۈملۈك قوغداپ، شىنجاڭنىڭ ئەبەدىي ئەمىنلىكى ئۈچۈن پۇختا مۇداپىئە سېپىنى مۇستەھكەملىدى.
مۇقىم بولغان جەمئىيەت مۇھىتى ئىقتىسادنى تەرەققىي قىلدۇرۇش، خەلق تۇرمۇشىنى ياخشىلاشنىڭ ئالدىنقى شەرتى، بىڭتۇەن بىلەن يەرلىك كۈچنى بىرىكتۈرۈپ بەرپا قىلغان مۇقىملىق ئەندىزىسى شىنجاڭنىڭ سېلىنما جەلپ قىلىشى، كەسىپلەرنى تەرەققىي قىلدۇرۇشى، ئالماشتۇرۇشنى ئىلگىرى سۈرۈشىگە پايدىلىق شارائىت يارىتىپ بېرىپ، ھەر مىللەت خەلقنى تىنچ، خاتىرجەم مۇھىتتا بەختلىك ياشاش ئىمكانىيىتىگە ئىگە قىلدى.
ئىقتىسادنىڭ يۇقىرى سۈپەتلىك تەرەققىياتىنى ئىلگىرى سۈرۈشتىكى مۇھىم يول
شىنجاڭدا مول ئېنېرگىيە بايلىقى، خاس يېزا ئىگىلىك بايلىقى ۋە ساياھەت بايلىقى بار، بىڭتۇەن بىلەن يەرلىك ئىقتىسادىي تەرەققىياتتا ھەرقايسىسى ئۆزىگە خاس ئەۋزەللىككە ئىگە.
يېزا ئىگىلىكىنى زامانىۋىلاشتۇرۇش، سانائەتنى كۆلەملەشتۈرۈش جەھەتتە، بىڭتۇەننىڭ نەتىجىسى كۆرۈنەرلىك؛ بازار بايلىقى، كەسىپلەرنى يۈرۈشلەشتۈرۈش قاتارلىق جەھەتلەردە، يەرلىك ئۆزگىچە خاسلىققا ئىگە. بىڭتۇەن بىلەن يەرلىكنىڭ يۇغۇرۇلۇشى ئارقىلىق بايلىقلارنى ئەلالاشتۇرۇپ تەقسىملەش ۋە كەسىپلەرنىڭ ماس تەرەققىياتىنى ئىشقا ئاشۇرغىلى بولىدۇ.
مەسىلەن: ئېنېرگىيە بايلىقى ساھەسىدە، بىڭتۇەن بىلەن يەرلىك ئورتاق مەبلەغ سېلىپ نېفىت - تەبىئىي گاز چارلاش، ئېچىش شىركىتى قۇرۇپ، قومۇل، شەرقىي جۇڭغار، جەنۇبىي شىنجاڭدىكى تارىم ئويمانلىقىنى چۆرىدىگەن 10 مىليون كىلوۋات دەرىجىلىك ئۈچ يېڭى ئېنېرگىيە بازىسى قۇرۇلۇشىنى ئورتاق ئالغا سىلجىتتى؛
يېزا ئىگىلىكى جەھەتتە، بىڭتۇەننىڭ ئىلغار يېزا ئىگىلىك تېخنىكىسى ۋە باشقۇرۇش تەجرىبىلىرى بىلەن يەرلىكنىڭ يەر بايلىقى بىرلەشتۈرۈلۈپ، خاس يېزا ئىگىلىك مەھسۇلاتلىرىنى تېرىش، پىششىقلاشنى بىر گەۋدىلەشتۈرۈپ تەرەققىي قىلدۇرۇشقا تۈرتكە بولۇنۇپ، يېزا ئىگىلىكىنىڭ قوشۇلما قىممىتى ئاشۇرۇلدى؛
ساياھەت ساھەسىدە، ئاپتونوم رايون ۋە بىڭتۇەن بىڭتۇەن بىلەن يەرلىكنىڭ ساياھەت يۇغۇرما تەرەققىياتىنىڭ چوڭقۇرلۇقى ۋە كەڭلىكىنى ئۈزلۈكسىز كېڭەيتىپ، ساياھەت تەرەققىيات يىرىك پىلانىنى ئورتاق تۈزۈش، ساياھەت ئېسىل لىنىيەسى ۋە داڭلىق ماركىسىنى ئورتاق بەرپا قىلىش، بىڭتۇەن بىلەن يەرلىكنىڭ بىر گەۋدىلەشكەن ساياھەت ئاممىۋى مۇلازىمىتىنى بەرپا قىلىش قاتارلىق جەھەتلەردە ئۇزاق ئۈنۈملۈك ھەمكارلىق مېخانىزمى ئورنىتىپ، مەدەنىيەت - ساياھەت كەسپىنىڭ گۈللىنىشى، راۋاجلىنىشىنى ئورتاق ئىلگىرى سۈرۈپ، «شىنجاڭ ياخشى جاي» ئالتۇن خەتلىك ۋىۋىسكىسىنى جۇلالاندۇردى؛
باغچە رايونى بەرپا قىلىش جەھەتتە، ئاقسۇ ئارال دۆلەت يۇقىرى، يېڭى تېخنىكىلىق كەسىپلەر تەرەققىيات رايونى قۇرۇلۇشى مەزگىلىدە، بىڭتۇەن بىلەن يەرلىك ئىككى تەرەپ سىياسەت تۈزۈش، سۇپا قۇرۇلۇشى، كەسىپ تەرەققىياتى قاتارلىق جەھەتلەردە زىچ ھەمكارلىشىپ، ئەۋزەللىكلەر ئارقىلىق بىر - بىرىنى تولۇقلاشنى ئىشقا ئاشۇرۇپ، رايون كەسىپلىرىنىڭ رىقابەت كۈچىنى ئاشۇرۇپ، ئەتراپتىكى رايونلار ئىقتىسادىنىڭ ئېشىشىغا تۈرتكە بولۇپ، شىنجاڭنىڭ زامانىۋىلاشقان كەسىپ سىستېمىسى بەرپا قىلىشىغا كۈچلۈك ھەرىكەتلەندۈرگۈچى كۈچ قوشتى.
رايونلارنىڭ ماس تەرەققىياتىغا تۈرتكە بولۇشتىكى زۆرۈر ۋاسىتە
شىنجاڭنىڭ تۇپرىقى كەڭ، ئوخشاش بولمىغان رايونلارنىڭ تەرەققىيات سەۋىيەسىدە پەرق مەۋجۇت. بىڭتۇەن بىلەن يەرلىك ئارىسىدا يۇغۇرۇلۇش، چوڭقۇر گىرەلىشىش، ئەۋزەللىكلەر ئارقىلىق بىر - بىرىنى تولۇقلاش قانچە كۈچەيتىلسە، بىرىكمە كۈچنى شۇنچە مۇجەسسەملەپ، ماسلىشىش ئۈنۈمىنى شۇنچە جارى قىلدۇرۇپ، تەرەققىيات رىتىمىنى تېخىمۇ قويۇقلاشتۇرغىلى، ھەرىكەتنى تېخىمۇ ماسلاشتۇرغىلى بولىدۇ.
بىڭتۇەن بەيياڭ شەھىرىنىڭ ئورۇنلاشتۇرۇش قۇرۇلۇشى بۇنىڭ ئىچىدىكى ئىنتايىن ۋەكىللىك خاراكتېرگە ئىگە بىر ئۈلگە. بۇلتۇردىن باشلاپ، ئاپتونوم رايونلۇق پارتىيە كومىتېتى يېڭىدىن تەستىقلىنىپ تەسىس قىلىنغان بەيياڭ شەھىرى بىلەن چۆچەك شەھىرىنى بىر گەۋدىلەشتۈرۈپ پىلانلاپ قۇرۇشقا پائال تۈرتكە بولۇپ، بۇ ئىككى شەھەرنىڭ چوڭقۇر گىرەلىشىپ تەرەققىي قىلىشىنى ئىلگىرى سۈردى. بەيياڭ شەھىرىنىڭ ئورنى تاللانغاندا چۆچەك شەھىرىگە يېقىن قوشنا قىلىنغان بولۇپ، ئىككى تەرەپ بىڭتۇەن بىلەن يەرلىك ئۇل ئەسلىھە قۇرۇلۇشىنىڭ «بىر تور» «بىر پارچە خەرىتە»دە بولۇشىدا چىڭ تۇرۇپ، بىڭتۇەن بىلەن يەرلىكنىڭ ئىلگىرىكى شەھەر پاسىلى ئېنىق بولۇش، ھەرقايسىسى ئۆز ئالدىغا قۇرۇش ۋەزىيىتىنى ئۆزگەرتتى. بۈگۈنكى كۈندە، مەيلى شەھەر مەمۇرىيىتى قۇرۇلۇشى، باغچە رايونى قۇرۇلۇشى ياكى سىرتقا ئېچىۋېتىش جەھەتتە بولسۇن، بەيياڭ شەھىرى بىلەن چۆچەك شەھىرىدە بىردەك يۈكسەك يۇغۇرۇلۇش ۋەزىيىتى بارلىققا كېلىپ، بىڭتۇەن بىلەن يەرلىك ھەمتۈرتكە بولۇپ بىر گەۋدىلىشىپ تەرەققىي قىلىش يېڭى مەنزىلى يارىتىلدى.
پۈتۈن شىنجاڭدىكى تېخىمۇ كۆپ جايدا، بىڭتۇەن بىلەن يەرلىك قاتناش، سۇچىلىق، ئېلېكتىر ئېنېرگىيەسى قاتارلىق چوڭ - چوڭ تۈرلەرنى بىر گەۋدىلەشتۈرۈپ قۇرۇشنى ئورتاق ئالغا سىلجىتىپ، رايونلارنىڭ تەرەققىيات شارائىتىنى ياخشىلىدى. مەسىلەن: بىڭتۇەن 12 - شى نۇرغۇن ئۈزۈك يوللارنى تۇتاشتۇرۇپ، ئۈرۈمچى شەھىرى، سانجى شەھىرىنىڭ يول تورى بىلەن ئومۇميۈزلۈك ئۇدۇللىشىپ، بىڭتۇەن بىلەن يەرلىكنىڭ رايون ھالقىپ ئۆزئارا تۇتاشتۇرۇلۇشى، ئۆزئارا راۋانلاشتۇرۇلۇشىنى ئىشقا ئاشۇردى؛ 12 - شى بىلەن سانجى شەھىرىنى تۇتاشتۇرىدىغان تۇدۇڭخابا سەنپىڭ چوڭ كۆۋرۈكى، 1 - ماي چوڭ كۆۋرۈكى پۈتۈپ قاتناش باشلىنىپ، ئۈرۈمچى - سانجى رايونى بىلەن 12 - شى يۇغۇرما تەرەققىياتنىڭ يېڭى باسقۇچىغا قەدەم قويدى.
بىڭتۇەن بىلەن يەرلىك يەنە ئىشقا ئورۇنلاشتۇرۇش، مائارىپ، داۋالاش قاتارلىق بايلىقلاردىن ئورتاق بەھرىلىنىپ، شەھەر - يېزىلار، رايونلار ئوتتۇرىسىدىكى ئاممىۋى مۇلازىمەت پەرقىنى كىچىكلىتىپ، خەلق تۇرمۇشى بەخت - سائادىتىنى تېخىمۇ چوڭقۇرلۇققا، تېخىمۇ ھارارەتكە ئىگە قىلدى.
بىڭتۇەن بىلەن يەرلىكنىڭ يۇغۇرۇلۇشى ئارقىلىق رايون ئىچىدىكى بايلىق، ئامىللارنىڭ مۇۋاپىق يۆتكىلىشى ۋە ئەلالاشتۇرۇلۇپ تەقسىملىنىشى ئىشقا ئاشۇرۇلۇپ، شىنجاڭنىڭ ئومۇمىي تەرەققىيات سەۋىيەسىنىڭ ئۆسۈشىگە تۈرتكە بولدى.
مىللەتلەر ئىتتىپاقلىقى ۋە مەدەنىيەتنىڭ يۇغۇرۇلۇشىنى ئىلگىرى سۈرۈشتىكى ئۈنۈملۈك تەدبىر
بىڭتۇەن بىلەن يەرلىكنىڭ ماس تەرەققىياتى ئىقتىساد، خەلق تۇرمۇشى قاتلىمىدىكى بىر - بىرىگە نەپ يەتكۈزۈش، بىر - بىرىنى تولۇقلاشلا ئەمەس. ئوخشاش بىر كۆك ئاسمان ئاستىدا، بىر مېھىرلىك تۇپراقتا بىللە ياشاپ، بىڭتۇەن بىلەن يەرلىكتىكى ھەر مىللەت ئامما ئورتاق ياشاپ، ئورتاق ئۆگىنىپ، ئورتاق ئىشلەپ، ئورتاق كۆڭۈل ئېچىپ، يەنىمۇ ئىلگىرىلىگەن ھالدا ھەرقايسى مىللەتلەر ئارىسىدىكى ئارىلىشىش، ئالماشتۇرۇش، يۇغۇرۇلۇشنى ئىلگىرى سۈرۈپ، بىر - بىرىگە بولغان چۈشىنىش ۋە ئىشەنچنى ئاشۇردى.
ھازىر، بىڭتۇەن بىلەن يەرلىكنىڭ مەدەنىيەت ئالماشتۇرۇشى كۈنسېرى قويۇقلاشتى، ئىككى تەرەپ يېڭى دەۋر مەدەنىيلىك ئەمەلىيىتى مەركىزى، پۇقرالار چوڭ سەھنىسى قاتارلىق بازىلارغا تايىنىپ، ئەتراپتىكى ناھىيە، شەھەر، يېزا - بازار، تۇەن - مەيدانلار بىلەن بىرلىكتە ئەدەبىيات - سەنئەت ئويۇنى قويۇش قاتارلىق مەدەنىيەت ئالماشتۇرۇش پائالىيەتلىرىنى قانات يايدۇرۇپ، مەدەنىيەت بايلىقىدىن ئورتاق بەھرىلىنىشنى ئىلگىرى سۈرۈپ، ئۈن - تىنسىز تەسىر كۆرسىتىش داۋامىدا ھەر مىللەت ئاممىنىڭ جۇڭخۇا مەدەنىيىتىگە بولغان قەلبتىن ئېتىراپ قىلىش تۇيغۇسى ۋە تەۋەلىك تۇيغۇسىنى كۈچەيتتى.
كۈندىلىك تۇرمۇشتا، بىڭتۇەن بىلەن يەرلىكتىكى ھەر مىللەت ئامما ئۆزئارا سىڭىشىپ، ئۆزئارا يۇغۇرۇلۇپ، ئۆزئارا ياردەم بېرىدىغان، ئىتتىپاق، دوستانە ئۆتىدىغان ياخشى كەيپىياتنى شەكىللەندۈرۈپ، شىنجاڭنىڭ تەرەققىياتى ئۈچۈن قۇدرەتلىك مەنىۋى كۈچ مۇجەسسەملىدى.
بىڭتۇەن بىلەن يەرلىكنىڭ يۇغۇرۇلۇشى شىنجاڭنىڭ جەمئىيەت مۇقىملىقى ۋە ئەبەدىي ئەمىنلىك باش نىشانىنى ئىشقا ئاشۇرۇشتىكى مۇھىم تەدبىر بولۇپ، ئىقتىسادنىڭ گۈللىنىشى، مىللەتلەر ئىتتىپاقلىقى، مەدەنىيەت ئالماشتۇرۇشى ھەم رايونلارنىڭ ماس تەرەققىياتىنى ئىلگىرى سۈرۈشتە تەڭداشسىز رولى بار. يېڭى دەۋردىكى مۇساپىدە، بىڭتۇەن بىلەن يەرلىكنىڭ يۇغۇرۇلۇشى جەزمەن تېخىمۇ زور تەرەققىيات ھاياتىي كۈچىنى ئۇرغۇتۇپ، شىنجاڭنىڭ گۈزەل كەلگۈسى ئۈچۈن پۇختا ئاساس سالىدۇ.
