بالىلارنى يېتىلەپ، جورىلىرىنى قولتۇقلاپ، ياشانغانلارنى يۆلەپ، ئەتىۋارلىق كىيىملىرىنى كىيىپ سۈرەتكە چۈشتى − يان تېلېفوندا ھەر ۋاقىت، ھەر جايدا سۈرەتكە چۈشكىلى بولىدىغان بۈگۈنكى كۈندە، خوتەن ناھىيەسى ئاۋات يېزىسىدىكى يۇرتداشلارنى ئەستايىدىللىق بىلەن سۈرەتكە چۈشۈشكە دەۋەت قىلغىنى نېمە؟ ئۇ بولسىمۇ «تيەنئەنمېن» ئارقا كۆرۈنۈش قىلىنىپ بېسىپ چىقىرىلغان بىر پارچە دېكىراتسىيەلىك پەردە. «تيەنئەنمېن» بىلەن بولغان ھەربىر پارچە خاتىرە سۈرەتكە تولۇپ تاشقان ئىپتىخارلىق ۋە قىزغىنلىق مۇجەسسەملەنگەن بولۇپ، ئەڭ ئاددىي - ساددا، تەسىرلىك بولغان ۋەتەننى سۆيۈش ھېسسىياتى نامايان بولۇپ تۇراتتى.
«مەن بېيجىڭ تيەنئەنمېننى سۆيىمەن، چۈنكى تيەنئەنمېن قۇياش كۆتۈرۈلگەن جاي»، بۇ ناخشا نەچچە ئەۋلاد ئېيتىلىپ، تيەنئەنمېننىڭ ھەر مىللەت خەلقنىڭ قەلبىدىكى ئەھمىيىتى ۋە سالمىقىنى دەلىلەپ كەلمەكتە، ئۇ دۆلەت گېربىگە چۈشۈرۈلگەن، تېخىمۇ مۇھىمى، دۆلىتىمىز پۇقرالىرىنىڭ قەلبىگە چوڭقۇر ئورنىغان. ۋەتىنىمىزنىڭ غەربىي شىمال چېگرا رايونىدىكى خوتەن دېھقانلىرىنىڭ سۈرەتكە چۈشكەندە «ئارقا كۆرۈنۈش بېيجىڭ تيەنئەنمېن بولغان بولسا ياخشى بولاتتى» دەپ ئۈمىد قىلغانلىقى ئاساسىي قاتلام كادىرلىرىنى تەسىرلەندۈردى، شۇنداقلا بۇ خىل ھېسسىياتنى چوڭقۇر چۈشىنىدىغان سىز ۋە مېنى ھاياجانلاندۇردى؛ تۈرلۈك چارە - ئاماللار بىلەن جۇڭگولۇقلارغا خاس بۇ ئارزۇ - ئارماننىڭ رېئاللىققا ئايلاندۇرۇلۇشى شۇ جايدىكى ئاممىنىڭ كۆڭلىدىكىدەك ئىش بولدى، شۇنداقلا كەڭ تورداشلارنىڭ قىزغىن قۇۋۋەتلىشىگە ئېرىشتى.
پارتىيە ئىزنىكىنى ياخشى تاقاش، پۈرلەشكەن كىيىملەرنى تۈزەشتۈرۈش، بالىلارنىڭ ئوماق قولىنى ئېگىز كۆتۈرۈپ سالام بېرىشى، يۇرتداشلارنىڭ «تيەنئەنمېن»نى ئارقا كۆرۈنۈش قىلغان بۇ دېكىراتسىيەلىك پەردە ئالدىدا خاتىرە سۈرەتكە چۈشكەندىكى «مۇراسىم تۇيغۇسى» كىشىنى تەسىرلەندۈرىدۇ. ئۇلارغا نىسبەتەن «تيەنئەنمېن» پايتەختىمىز بېيجىڭنىڭ، ئۇلۇغ ۋەتىنىمىزنىڭ سىمۋولى بولۇپ، ئۇنىڭغا جۇڭخۇا مىللىتىنىڭ ئورتاق مەدەنىيەت بەلگىلىرى مۇجەسسەملەنگەن. گەرچە خاتىرە سۈرەتنىڭ ئارقا كۆرۈنۈشى بېسىپ چىقىرىلغان سۈرەت بولسىمۇ، لېكىن ئۇلارنىڭ قەلبىدىكى ئىنتىلىش ۋە قىزغىن مۇھەببەت سەمىمىيدۇر. ئەڭ چوڭقۇر، ئەڭ ئۇزاق داۋاملىشىدىغان بۇ خىل ھېسسىياتنى تىل ئارقىلىق تولۇق ئىپادىلەپ بېرىش تەس، ئەمما ئۇ تەنتەنىلىك ئىنچىكە تەپسىلاتلاردا، ساپ قەلبتىن ئۇرغۇپ چىققان تەبەسسۇملاردا ئىپادىلىنىپ تۇرىدۇ، بۇلارغا ئېيتىپ تۈگەتكۈسىز چىن مىننەتدارلىق ھېسسىياتى، ئوتتەك قىزغىن ۋەتەنپەرۋەرلىك ھېسسىياتى سىڭگەن.
بۇ ھېكايىگە قارىماققا بىر قېتىملىق ئېتىز بېشىدىكى تاسادىپىي ئۇچرىشىش سەۋەب بولغاندەك كۆرۈنىدۇ، ئەمەلىيەتتە ئۇ بۇ تۇپراقتىكى ئورتاق سادا قوزغايدىغان يۈرەك تارىنىڭ چېكىلىشى. 70 نەچچە يىل ئىلگىرى، قۇربان تاغا ئېشەككە مىنىپ بېيجىڭغا بارماقچى بولغان، ئۇ خوتەننىڭ بېيجىڭدىن قانچىلىك يىراقلىقتا ئىكەنلىكىنى ئېنىق بىلمىسىمۇ، لېكىن قەد كۆتۈرۈپ ئۆزىگە ئۆزى ئىگە بولۇشنىڭ ئەھمىيىتىنىڭ قانچىلىك مۇھىم ئىكەنلىكىنى چوڭقۇر بىلەتتى؛ بۈگۈنكى شىنجاڭ پۈتۈن مەملىكەت بىلەن بىرلىكتە نامراتلىقتىن قۇتۇلدۇرۇش ئۆتكىلىگە ھۇجۇم قىلىش جېڭىدە غەلىبە قىلدى، كەڭ يېزا - كەنتلەر يېزا - كەنتلەرنى گۈللەندۈرۈش يولىدا چوڭ قەدەم بىلەن ئالغا ئىلگىرىلىمەكتە. تۇرمۇش بارغانسېرى ياخشىلىنىۋاتقان كۈنلەردە، تيەنئەنمېن باشتىن - ئاخىر ھەر مىللەت ئامما كۆرۈشنى ئەڭ ئارزۇ قىلىدىغان جاي بولۇپ كەلدى، گەرچە ئارىلىقىمىز نەچچە مىڭ چاقىرىم بولسىمۇ، ئۇ مەڭگۈ قەلبىمىزدىكى ئەڭ يېقىملىق، ئەڭ يېقىن جاي.
(«جياڭ شياۋيەن» ماقالە ئەۋەتىش پوچتا ساندۇقى: xjrbplb@126.com )
