شىنخۇا ئاگېنتلىقى، بېيجىڭ، 3 - ئاينىڭ 28 - كۈنى تېلېگراممىسى (مۇخبىرلار دۇڭ شۆ، فېڭ شىنرەن) 3 - ئاينىڭ 28 - كۈنى چۈشتىن بۇرۇن، دۆلەت رەئىسى شى جىنپىڭ بېيجىڭ خەلق سارىيىدا بېنگال ۋاقىتلىق ھۆكۈمىتىنىڭ باش مەسلىھەتچىسى يۇنۇس بىلەن كۆرۈشتى.
شى جىنپىڭ مۇنداق كۆرسەتتى: جۇڭگو بىلەن بېنگال خەلقىنىڭ دوستانە ئالاقىسى ئۇزاق تارىخقا ئىگە، قەدىمىي يىپەك يولى ئىككى دۆلەتنى بىر - بىرىگە زىچ باغلىدى. دىپلوماتىك مۇناسىۋەت ئورناتقاندىن بۇيان، ئىككى تەرەپ باشتىن - ئاخىر بىر - بىرىنى قوللاپ، ئۆزئارا باراۋەر مۇئامىلىدە بولۇپ، ھەمكارلىشىپ ئورتاق پايدا ئالدى. جۇڭگو بېنگال بىلەن بولغان ئىناق قوشنىدارچىلىق، دوستلۇق سىياسىتىدە يۈكسەك مۇقىملىق ۋە ئىزچىللىقنى ساقلاپ، پۈتكۈل بېنگال خەلقىگە يۈزلەنگەن ئىناق قوشنىدارچىلىق، دوستلۇق سىياسىتىگە قەتئىي ئەمەل قىلىدۇ، بېنگال تەرەپ بىلەن ئۆزئارا ئىشىنىدىغان ياخشى قوشنا، ياخشى دوست، ياخشى ھەمراھلاردىن بولۇشتا چىڭ تۇرىدۇ. بۇ يىل جۇڭگو بىلەن بېنگال دىپلوماتىك مۇناسىۋەت ئورناتقانلىقىنىڭ 50 يىللىقى ۋە جۇڭگو - بېنگال ئادىمىيەت جەھەتتىكى ئالماشتۇرۇش يىلى. جۇڭگو تەرەپ بېنگال تەرەپ بىلەن بىللە تىرىشىپ، جۇڭگو - بېنگال ھەمكارلىقىنىڭ ئۈزلۈكسىز يېڭى باسقۇچقا كۆتۈرۈلۈشىگە تۈرتكە بولۇپ، ئىككى دۆلەت خەلقىگە تېخىمۇ ياخشى بەخت يارىتىشنى خالايدۇ.
شى جىنپىڭ مۇنداق تەكىتلىدى: جۇڭگو بىلەن بېنگال ئىككى تەرەپ سىياسىي جەھەتتە ئۆزئارا ئىشىنىشنى سىجىل چوڭقۇرلاشتۇرۇپ، بىر - بىرىنىڭ يادرولۇق مەنپەئىتىگە مۇناسىۋەتلىك ۋە كۆڭۈل بۆلىدىغان مۇھىم مەسىلىلەردە قەتئىي ئۆزئارا قوللىشى كېرەك. جۇڭگو تەرەپ بېنگال تەرەپنىڭ دۆلەتنىڭ ئىگىلىك ھوقۇقى، مۇستەقىللىقى ۋە زېمىن پۈتۈنلۈكىنى قوغداپ، ئۆز دۆلىتىنىڭ دۆلەت ئەھۋالىغا ئۇيغۇن كېلىدىغان تەرەققىيات يولى ئۈستىدە ئىزدىنىشىنى قوللايدۇ. جۇڭگو يەنىمۇ ئىلگىرىلىگەن ھالدا ئىسلاھاتنى ئومۇميۈزلۈك چوڭقۇرلاشتۇرۇپ، يۇقىرى سەۋىيەلىك سىرتقا ئېچىۋېتىشنى كېڭەيتىدۇ، بۇ، بېنگالنى ئۆز ئىچىگە ئالغان دۇنيادىكى ھەرقايسى دۆلەتلەرنىڭ تەرەققىياتىغا يېڭى پۇرسەت ئېلىپ كېلىدۇ. جۇڭگو تەرەپ بېنگال تەرەپ بىلەن «بىر بەلباغ، بىر يول»نى يۇقىرى سۈپەتلىك ئورتاق بەرپا قىلىشنى ئالغا سىلجىتىپ، رەقەملىك ئىقتىساد، يېشىل ئىقتىساد، دېڭىز - ئوكيان ئىقتىسادى، ئۇل ئەسلىھە قۇرۇلۇشى، سۇچىلىق قاتارلىق ساھەلەردىكى ھەمكارلىقنى كېڭەيتىپ، ئادىمىيەت جەھەتتىكى ئالماشتۇرۇشنى ئىلگىرى سۈرۈپ، خەلقلەرنىڭ بىر - بىرىنى چۈشىنىشى، يېقىن ئۆتۈشىنى ئىلگىرى سۈرۈشنى خالايدۇ. جۇڭگو تەرەپ باراۋەر، تەرتىپلىك بولغان دۇنيانىڭ كۆپ قۇتۇپلىشىشى، ئومۇمىي مەنپەئەتدار، سىغدۇرۇشچان بولغان ئىقتىسادنىڭ دۇنياۋىلىشىشىنى تەشەببۇس قىلىدۇ، بېنگال تەرەپ بىلەن كۆپ تەرەپلىك ماسلىشىش، ھەمكارلىشىشنى كۈچەيتىپ، يەرشارىنىڭ جەنۇبىنىڭ ئىتتىپاقلىشىپ ئۆزىنى قۇدرەت تاپتۇرۇشىغا تۈرتكە بولۇپ، ئىنسانىيەت تەقدىرى ئورتاق گەۋدىسىنى بەرپا قىلىشنى خالايدۇ.
يۇنۇس مۇنداق بىلدۈردى: بېنگال بىلەن جۇڭگونىڭ دوستلۇقى چوڭقۇر، باشتىن - ئاخىر ئۆزئارا چۈشىنىپ، ئۆزئارا ھۆرمەت قىلىپ، ئۆزئارا ئىشىنىپ كەلدى، جۇڭگو بېنگالنىڭ ئىشەنچلىك ھەمراھى ۋە دوستى. بېنگال تەرەپ قەتئىي تۈردە بىر جۇڭگو پىرىنسىپىنى قوللايدۇ، «تەيۋەن مۇستەقىللىقى»گە قارشى تۇرىدۇ. بېنگال تەرەپ بۇ يىلقى بېنگال بىلەن جۇڭگونىڭ دىپلوماتىك مۇناسىۋەت ئورناتقانلىقىنىڭ 50 يىللىقىنى پۇرسەت بىلىپ، جۇڭگو تەرەپ بىلەن بىرلىكتە ئىككى دۆلەتنىڭ ئومۇميۈزلۈك ئىستراتېگىيەلىك ھەمكارلىق ھەمراھىلىق مۇناسىۋىتىدە تېخىمۇ زور تەرەققىياتنى قولغا كەلتۈرۈشكە تۈرتكە بولۇشنى خالايدۇ. ئىككى دۆلەت «بىر بەلباغ، بىر يول»نى ئورتاق بەرپا قىلىش ھەمكارلىقىنى چوڭقۇرلاشتۇرۇشى كېرەك، بېنگال تەرەپ تېخىمۇ كۆپ جۇڭگو كارخانىلىرىنىڭ بېنگالغا بېرىپ مەبلەغ سېلىپ، بېنگال ئىقتىسادىنىڭ تىپ ئۆزگەرتىشنى ئىلگىرى سۈرۈشىنى قارشى ئالىدۇ. بېنگال تەرەپ رەئىس شى جىنپىڭ ئوتتۇرىغا قويغان ئۈچ چوڭ يەرشارىۋى تەشەببۇس قاتارلىق مۇھىم ئىدىيەنى يۈكسەك ئالقىشلايدۇ، جۇڭگو تەرەپ بىلەن زىچ ماسلىشىپ، پۇرسەتنى ئورتاق ئىگىلەپ، خىرىسقا ئورتاق تاقابىل تۇرۇپ، دۇنيانىڭ تىنچلىقى، مۇقىملىقى ۋە تەرەققىياتى، گۈللىنىشىنى ئورتاق قوغداشنى خالايدۇ.
ۋاڭ يى كۆرۈشۈشكە قاتناشتى.
