ئۆي-زېمىن كەسپىنىڭ تەرەققىيات يېڭى ئەندىزىسىنى بەرپا قىلىشنى تېزلىتىپ، تۇرالغۇ ئۆي قۇرۇلۇشىنىڭ سۈپىتىنى يەنىمۇ ئىلگىرىلىگەن ھالدا ئۆستۈرۈپ، خەلق ئاممىسىنى تېخىمۇ ياخشى بولغان بىخەتەر، راھەت، يېشىل، ئاقىل «ياخشى ئۆي» بىلەن تەمىنلەش ئۈچۈن، 2025-يىلى 4-ئاينىڭ 10-كۈنىدىن باشلاپ، ئاپتونوم رايونلۇق تۇرالغۇ ۋە شەھەر-يېزا قۇرۇلۇشى نازارىتى پۈتۈن ئاپتونوم رايون بويىچە يېڭىدىن سېلىنىدىغان تۇرالغۇ ئۆي قۇرۇلۇشىدا «ئىككى كىنىشكا، بىر ۋىۋىسكا» تۈزۈمىنى يولغا قويۇشنى كۈچەيتىدۇ. «ئىككى كىنىشكا» دېگىنىمىز «تۇرالغۇ ئۆي سۈپىتى كاپالەتنامىسى»، «تۇرالغۇ ئۆي ئىشلىتىش چۈشەندۈرۈشى»نى، «بىر ۋىۋىسكا» مەڭگۈلۈك بەلگە تاختىسىنى كۆرسىتىدۇ.
ئاپتونوم رايونلۇق بىناكارلىق قۇرۇلۇش سۈپىتى باش پونكىتىنىڭ پونكىت باشلىقى ياڭ لېي مۇنداق تونۇشتۇردى: «ئىككى كىنىشكا، بىر ۋىۋىسكا» تۈزۈمىنى يولغا قويۇشنى يەنىمۇ كۈچەيتىپ، ھەربىر يۈرۈش تۇرالغۇ ئۆينى تېلېۋىزور، ئاپتوموبىل قاتارلىق تاۋارلارغا ئوخشاش سۈپەت كاپالەتنامىسى، ئىشلىتىش چۈشەندۈرۈشىگە ئىگە قىلغاندا، ئۆي-زېمىن تەرەققىيات ئورۇنلىرى باشچىلىقىدىكى قۇرۇلۇشقا قاتناشقان ھەرقايسى تەرەپلەرنىڭ سۈپەت مەسئۇلىيىتىنى ئۈنۈملۈك پۇختىلىغىلى، خەلق ئاممىسىنىڭ قانۇنلۇق ھوقۇق-مەنپەئىتىنى ئۈنۈملۈك قوغدىغىلى، تۇرالغۇ ئۆينىڭ سۈپەت كاپالىتىنى سېتىلغاندىن كېيىن تېخىمۇ قولايلىقلاشتۇرغىلى بولىدۇ.
«تۇرالغۇ ئۆي سۈپەت كاپالەتنامىسى»گە قۇرۇلۇش نامى، بىنا ۋە ئۆي نومۇرى، قۇرۇلۇش ئورنى، نازارەت قىلغان ئورۇن، قۇرۇلۇش قىلغۇچى ئورۇننىڭ نامى ۋە تۈر مەسئۇلىنىڭ ئىسىم-فامىلىسى، ئۆي بويىچە تەكشۈرۈپ ئۆتكۈزۈۋېلىنغان ۋاقتى، قۇرۇلۇش تۈرىدە ئاساسلىق ئىشلىتىلىدىغان ماتېرىيال قاتارلىق ئۇچۇرلار ئېنىق يېزىلىشى كېرەك. شۇنىڭ بىلەن بىللە، يەنە ئۆينىڭ سۈپىتىگە كاپالەتلىك قىلىش ۋەدىسى بىلەن تەمىنلىشى، رېمونت كاپالەت دائىرىسى، مۇددىتى، مەسئۇل كىشى ۋە رېمونت قىلىش تەرتىپىنى ئېنىق يېزىشى، سېتىلىدىغان ئۆيگە قارىتا رېمونت كاپالىتى، رېمونت قىلىش مۇلازىمىتىنى قانات يايدۇرۇشى، سۈپەت سۇغۇرتىسى سېتىۋالغانلار «ئۆي-ئىمارەت قۇرۇلۇشى سۈپەت سۇغۇرتىسى ئۇقتۇرۇشى» بىلەن تەمىنلىشى كېرەك؛ «تۇرالغۇ ئۆينى ئىشلىتىش چۈشەندۈرۈشى»گە تۇرالغۇنىڭ ئاساسىي ئۇچۇرى ۋە ئولتۇراق رايوننىڭ ئاساسىي ئەھۋالى ئېنىق يېزىلىشى، تۇرالغۇ ئۆينىڭ تەكشى يۈز ئورۇنلاشتۇرۇلۇشى، ئاساسلىق ئۈسكۈنە-ئەسلىھەلىرى ۋە تېخنىكىلىق پارامېتىر تونۇشتۇرۇلۇشى، تۇرالغۇ ئۆينى ئىشلىتىشتە دىققەت قىلىدىغان ئىشلار، ئۆينىڭ بىخەتەرلىكىنى قوغداش تەدبىرلىرى ۋە بىخەتەر ئىشلىتىش مەسئۇلىيىتى ۋە مەجبۇرىيىتى چۈشەندۈرۈلۈشى كېرەك؛ مەڭگۈلۈك بەلگە تاختىسى بەلگىلەنگەن ئۆلچەم، ماتېرىيال سۈپىتى، شەكلى، مەزمۇنى بويىچە تۇرالغۇ بىناسىنىڭ كۆزگە چېلىقىدىغان يېرىگە ئورنىتىلىشى كېرەك.
ئاپتونوم رايونلۇق تۇرالغۇ ۋە شەھەر-يېزا قۇرۇلۇشى نازارىتى مۇنداق ئايدىڭلاشتۇردى: ھەرقايسى جايلاردىكى تۇرالغۇ ۋە شەھەر-يېزا قۇرۇلۇشىغا مەسئۇل تارماقلار قۇرۇلۇش ئورۇنلىرىنىڭ شارائىتقا قاراپ ئىش كۆرۈپ، «ئىككى كىنىشكا»نى «تاۋار ئۆي سېتىش-سېتىۋېلىش توختامى نۇسخىسى» («نورمىلىق سېتىش تىپىدىكى كاپالەتلىك تۇرالغۇ ئۆي سېتىش-سېتىۋېلىش توختامى نۇسخىسى»، «نورمىلىق ئىجارە بېرىش تىپىدىكى كاپالەتلىك تۇرالغۇنى ۋاكالىتەن سېلىش توختامى») قاتارلىق قانۇن نۇسخىسىدىكى ئالاقىدار ماددىلارغا كىرگۈزۈشىگە ھەيدەكچىلىك ۋە يېتەكچىلىك قىلىدۇ، تۇرالغا ئۆي قۇرۇلۇش سۈپىتى ئۆيمۇئۆي تەكشۈرۈپ ئۆتكۈزۈۋېلىشتە لاياقەتلىك بولغاندىن كېيىن، ھەربىر يۈرۈش بويىچە «ئىككى كىنىشكا» تەييارلاپ، پۈتكەن قۇرۇلۇش تەكشۈرۈپ ئۆتكۈزۈۋېلىنىپ ئەنگە ئېلىنغاندا تاپشۇرىدۇ، ئۆي ئىگىسى ئۆينى تەكشۈرۈپ لاياقەتلىك بولغاندىن كېيىن بىللە تاپشۇرىدۇ.
«تىيانشان تورى» ۋىيشىن ئاممىۋى سۇپىسىدىن ئېلىپ تەرجىمە قىلىندى
