□ ئانار بۇلۇت\شىنجاڭ گېزىتى مۇخبىرى جاۋ شىيا
يېقىندا شىنجاڭ خوتەن شۆيۈەنى كۇتۇپخانىسىنىڭ يەككە گەۋدە تۈرىنىڭ ئەڭ ئاخىرقى بىر تەرىپىگە بېتون قۇيۇشنىڭ تاماملىنىشىغا ئەگىشىپ، بۇ مەكتەپنىڭ 2 - قارارلىق قۇرۇلۇش تۈرىنىڭ ئاساسىي گەۋدە قۇرۇلمىسى تاماملاندى. تۈر پۈتكەندىن كېيىن، مەكتەپ يەنىمۇ ئىلگىرىلىگەن ھالدا سۈپەتنى ئۆستۈرۈپ، سىغىمنى كېڭەيتىپ، شۇ جاينىڭ پەن - تېخنىكىدا يېڭىلىق يارىتىش، كەسىپ دەرىجىسىنى ئۆستۈرۈش ئۈچۈن كۈچلۈك مەدەت بىلەن تەمىنلەيدۇ.
ئالىي مائارىپنى ياخشى يولغا قويۇش دۆلەتنىڭ تەرەققىياتى ۋە مىللەتنىڭ كەلگۈسىگە مۇناسىۋەتلىك. شىنجاڭ باش شۇجى شى جىنپىڭنىڭ مائارىپ توغرىسىدىكى مۇھىم بايانلىرىنى چوڭقۇر ئىزچىللاشتۇرۇپ، ئەمەلىيلەشتۈرۈپ، يېڭى تەرەققىيات ئىدىيەسىنى تولۇق، دەل جايىدا، ئومۇميۈزلۈك ئىزچىللاشتۇرۇپ، مائارىپ، پەن - تېخنىكا، ئىختىساسلىقلارنىڭ تەرەققىياتىنى بىر گەۋدىلەشتۈرۈپ ئالغا سىلجىتىپ، «ئون چوڭ كەسىپ توپى» قۇرۇلۇشى قاتارلىق زور ئىستىراتېگىيەلىك ئېھتىياجنى چۆرىدەپ، ئالىي مەكتەپلەرنىڭ ئورۇنلاشتۇرۇلۇشىنى سەرخىللاشتۇرۇش قۇرۇلۇشىنى يولغا قويۇپ، پەن ۋە كەسىپلەرنىڭ تەمىنات تەرەپلىك ئىسلاھاتىنى چوڭقۇرلاشتۇرۇپ، ئىختىساسلىقلارنى ئۆز ئالدىغا يېتىشتۈرۈش سۈپىتىنى ئومۇميۈزلۈك ئۆستۈرۈپ، جۇڭگوچە زامانىۋىلاشتۇرۇش قۇرۇلۇشىغا مۇلازىمەت قىلىش، تىرەك بولۇشنى ئەقلىي كۈچ تىرىكى ۋە ئىختىساسلىقلار كاپالىتى بىلەن تەمىنلىدى.
يۇقىرى نۇقتىدىن پىلانلاپ، ئالىي مەكتەپلەرنىڭ ئورۇنلاشتۇرۇلۇشىنى سەرخىللاشتۇرۇش
يېڭى ئوقۇش مەۋسۇمى باشلىنىشى بىلەن، شىنجاڭ خوتەن شۆيۈەنىگە كىرگەندە، ئاق رەڭ بىلەن قىزىل رەڭ گىرەلىشىپ كەتكەن بىنالار رەتلىك سېلىنغان، ئوقۇتۇش رايونى، تۇرمۇش رايونى، تەنھەرىكەت رايونى قاتارلىقلار تەرتىپلىك ئورۇنلاشتۇرۇلغان بولۇپ، توپ مەيدانىدا ساۋاقداشلار قوغلىشىپ ئوينىشىۋاتقان بولۇپ، پۈتۈن مەكتەپ جۇشقۇن ھاياتىي كۈچكە تولغانىدى.
2024 - يىلى، شىنجاڭ خوتەن شۆيۈەنى، شىنجاڭ تىيانشان كەسپىي تېخنىكا داشۆسىنىڭ قىزىلسۇ قىرغىز ئاپتونوم ئوبلاستىدىكى مەكتەپ رايونى كەينى - كەينىدىن قۇرۇلدى، جەنۇبىي شىنجاڭنى تولۇق كۇرس مائارىپى بىلەن تولۇق قاپلاش ئىشقا ئاشۇرۇلۇپ، شىنجاڭنىڭ ئالىي مائارىپ تەرەققىياتىدىكى بەلگە خاراكتېرلىك، ئابىدە خاراكتېرلىك ئەھمىيەتكە ئىگە چوڭ ئىشقا ئايلاندى.
شىنجاڭ خوتەن شۆيۈەنى ئاپتونوم رايوننىڭ «ئون چوڭ كەسىپ توپى» ۋە خوتەن ۋىلايىتىنىڭ زامانىۋى كەسىپ سىستېمىسىغا زىچ يېقىنلىشىپ، ئەمەلىي قوللىنىشچان خىمىيە سانائىتى تېخنىكىسى، يېزا ئىگىلىك مەھسۇلاتلىرىنى پىششىقلاش ۋە سۈپەت تەكشۈرۈش قاتارلىق 18 يېڭىدىن گۈللەنگەن كەسىپنى تەسىس قىلغان بولۇپ، بەش يىل ئىچىدە بارلىق تولۇق كۇرس كەسىپلىرىگە ئوقۇغۇچى قوبۇل قىلىشنى ئىشقا ئاشۇرۇشنى پىلانلىدى.
«شۆيۈەنىمىز يېڭى سانائەت پەنلىرى، يېڭى تېببىي پەنلەر، يېڭى يېزا ئىگىلىك پەنلىرى، يېڭى ئىجتىمائىي پەنلەر قاتارلىق ساھەلەرنى چۆرىدەپ، يېڭىلىق يارىتىش روھىغا ۋە ئەمەلىي ئىقتىدارغا ئىگە تېخىمۇ كۆپ يۇقىرى ساپالىق ئىختىساسلىقلارنى يېتىشتۈرۈپ، يەرلىك خاراكتېرگە، كۆپ پەن خاراكتېرىگە ئىگە، ئەمەلىي قوللىنىشچان تولۇق كۇرس ئالىي مەكتىپىنى پۈتۈن كۈچ بىلەن بەرپا قىلىدۇ» دېدى شىنجاڭ خوتەن شۆيۈەنى پارتىيە كومىتېتىنىڭ مۇئاۋىن شۇجىسى، مۇدىر ۋاڭ جىجيەن.
شىنجاڭ بىر تاختا شاھمات، جەنۇبىي شىنجاڭ «شاھمات كۆزى». جەنۇبىي شىنجاڭ ئالىي مائارىپىنىڭ يۇقىرى سۈپەتلىك تەرەققىياتىغا تۈرتكە بولۇش جەنۇبىي شىنجاڭ رايونىنىڭ ئىقتىساد، جەمئىيەت تەرەققىياتىنى ئىلگىرى سۈرۈش، ھەر مىللەت ئاممىنىڭ يۇقىرى سۈپەتلىك مائارىپ ۋە گۈزەل تۇرمۇشقا بولغان ئارزۇسى ھەم ئىنتىلىشىنى قاندۇرۇشتا مۇھىم ئەھمىيەتكە ئىگە.
ئاپتونوم رايونىمىز جەنۇبىي شىنجاڭ ئالىي مائارىپىنىڭ تەرەققىياتىنى مۇھىم نۇقتا قىلىپ، قەشقەر داشۆ قاتارلىق مەكتەپلەرنىڭ سۈپەتنى ئۆستۈرۈپ، سىغىمنى كېڭەيتىشىگە زور كۈچ بىلەن تۈرتكە بولۇپ، تەبىئىي پەن ۋە سانائەت پەنلىرى ئالىي مەكتەپلىرىنى پىلانلاش، قۇرۇشنى تېزلىتىپ، تەبىئىي پەن ۋە سانائەت پەنلىرى بويىچە كەسپىي ئىختىساسلىقلارنى يېتىشتۈرۈش نىسبىتىنى سىجىل ئۆستۈرۈپ، پەن قۇرۇلۇشىدىكى ئالدىن كۆرەرلىك ۋە كەسىپلەرنىڭ ماس كېلىش دەرىجىسىنى كۈچەيتتى، جەنۇبىي شىنجاڭ ئالىي مائارىپىنىڭ تەرەققىياتىدا يېڭى كەيپىيات نامايان بولدى.
«بىز جەنۇبىي شىنجاڭنى مۇھىم نۇقتا قىلىپ ئورۇنلاشتۇرۇلىدىغان تەبىئىي پەن ۋە سانائەت پەنلىرى تۈرىدىكى، ئەمەلىي قوللىنىشچان تولۇق كۇرس ئالىي مەكتەپلىرىنى قۇرۇپ، ئالىي مائارىپنىڭ شىنجاڭنىڭ يۇقىرى سۈپەتلىك تەرەققىياتىغا تىرەك بولۇش ئىقتىدارى ۋە تۆھپە قوشۇش دەرىجىسىنى ئۆستۈردۇق.» ئاپتونوم رايونلۇق مائارىپ نازارىتىنىڭ ئالاقىدار مەسئۇلى مۇنداق تونۇشتۇردى: ئاپتونوم رايون ئالىي مائارىپ تەرەققىياتىنى جەنۇبىي شىنجاڭنىڭ مائارىپ خىزمىتىدىكى باشلامچى قىلىشتا چىڭ تۇرۇپ، مەكتەپلەرنىڭ ئورۇنلاشتۇرۇلۇش قۇرۇلمىسى ۋە مائارىپ بايلىقىنى تەقسىملەشنى ئەلالاشتۇرۇپ، ئوقۇتقۇچىلار قوشۇنىنىڭ ساپا، ئىقتىدار قۇرۇلۇشىنى كۈچەيتىپ، تەبىئىي پەن ۋە سانائەت پەنلىرى تۈرىدىكى پەن - كەسىپلەرنى كۈچەيتىپ، جەنۇبىي شىنجاڭنىڭ يۇقىرى سۈپەتلىك تەرەققىياتىنى ئىلگىرى سۈرۈشنى ئىشەنچلىك ئىختىساسلىقلار كاپالىتى ۋە ئەقلىي كۈچ تىرىكى بىلەن تەمىنلىدى.
شۇنىڭ بىلەن بىللە، ئاپتونوم رايون ئالىي مائارىپ بايلىقىنى تەقسىملەشنى يەنىمۇ ئەلالاشتۇرۇپ، «ھەممە جايدا تولۇق كۇرس مائارىپى بولۇش» نىشانىنى تەدرىجىي ئىشقا ئاشۇردى. شىنجاڭ داشۆنىڭ «قوش بىرىنچى دەرىجىلىك» قۇرۇلۇشىغا تۈرتكە بولدى، شىنجاڭ يېزا ئىگىلىك كەسپىي تېخنىكا داشۆسىنى يېڭىدىن تەسىس قىلدى، باشقا كەسپىي تېخنىكا داشۆلىرىنى قۇرۇشقا تەييارلىق قىلىش خىزمىتىنى تېز ئالغا سىلجىتتى.
كەسىپلەرنى چىڭ كۆزلەپ، كەسىپلەرنىڭ تەسىس قىلىنىشىنى تەڭشەش
بۇ يىل، شىنجاڭ داشۆ «ئەلا سۈپەتلىك تولۇق كۇرس سىغىمىنى كېڭەيتىش» پىلانىنى باشلىدى، تولۇق كۇرسقا يېڭىدىن 355 ئوقۇغۇچى كۆپەيتىپ قوبۇل قىلىنىدۇ.
شىنجاڭ داشۆنىڭ «ئەلا سۈپەتلىك تولۇق كۇرس سىغىمىنى كېڭەيتىش» پىلانىدا دۆلەتنىڭ ئالىي مائارىپنى يۇقىرى سۈپەتلىك تەرەققىي قىلدۇرۇش ئىستراتېگىيەسىگە ئاۋاز قوشۇپ، جەمئىيەتنىڭ ئەلا سۈپەتلىك ئىختىساسلىقلارغا بولغان جىددىي ئېھتىياجىنى قاندۇرۇش مەقسەت قىلىنغان بولۇپ، مەكتەپ دۆلەت ئىستراتېگىيەسى ۋە ئاپتونوم رايوننىڭ «ئون چوڭ كەسىپ توپى» قۇرۇلۇشى ئېھتىياجىغا ئۇدۇللىشىپ، ئوقۇغۇچى قوبۇل قىلىدىغان كەسىپلەرنى تەسىس قىلىشتا پەن - كەسىپ قۇرۇلمىسىنى ھەرىكەت ھالىتىدە تەڭشەش، ئىشلەپچىقىرىش بىلەن ئوقۇتۇشنى يۇغۇرۇشنى چوڭقۇرلاشتۇرۇش ھەم بايلىقنى دەل جايىدا تەقسىملەش ئارقىلىق، ئالىي مائارىپ بىلەن رايون كەسىپلىرىنى ماسلاشتۇرۇپ دەرىجىسىنى ئۆستۈرۈشنى ئىشقا ئاشۇرىدۇ.
شىنجاڭ بايلىق ئۈستۈنلۈكى ۋە رايون ئورنى ئەۋزەللىكىگە تايىنىپ، نېفىت - تەبىئىي گاز ئىشلەپچىقىرىش، پىششىقلاش، يېشىل كانچىلىق ھەم پىششىقلاش، مەدەنىيەت ۋە ساياھەت قاتارلىق «ئون چوڭ كەسىپ توپى»نى نۇقتىلىق بەرپا قىلىپ، ئىقتىسادنىڭ يۇقىرى سۈپەتلىك تەرەققىياتىغا تۈرتكە بولۇشنى ئوتتۇرىغا قويدى.
كەسىپ تەرەققىياتى ئىختىساسلىقلار تىرىكىدىن ئايرىلالمايدۇ، ئالىي مائارىپ بىلەن كەسپىي مائارىپ ئىختىساسلىقلارنى يېتىشتۈرىدىغان ئاساسىي بازا بولۇش سۈپىتى بىلەن، پەن - كەسىپلەرنى تەسىس قىلىش بىلەن كەسىپ ئېھتىياجىنىڭ ماسلىشىشچانلىقى رايون ئىقتىسادىنىڭ تىپىنى ئۆزگەرتىپ دەرىجىسىنى ئۆستۈرۈشكە بىۋاسىتە تەسىر كۆرسىتىدۇ. ھازىر، شىنجاڭنىڭ پەن - كەسىپ قۇرۇلمىسىدا يەنىلا ئەنئەنىۋى پەنلەر زىيادە ئېشىپ كېتىش، يېڭىدىن گۈللىنىۋاتقان ساھەلەرگە دائىر پەن - كەسىپلەر يېتەرسىز بولۇش قاتارلىق مەسىلىلەر مەۋجۇت بولۇپ، سىستېمىلىق ئىسلاھ قىلىش ئارقىلىق بوغما ھالەتنى جىددىي بۇزۇپ تاشلاشقا توغرا كېلىدۇ.
«ئون چوڭ كەسىپ توپى» ۋە زامانىۋىلاشقان كەسىپ سىستېمىسى قۇرۇلۇشىنى چۆرىدەپ، ئاپتونوم رايونىمىز «ئاپتونوم رايوننىڭ ئادەتتىكى ئالىي مائارىپ بويىچە پەن - كەسىپلەرنىڭ تەسىس قىلىنىشىنى تەڭشەش، ئەلالاشتۇرۇشنى يولغا قويۇش لايىھەسى (2025 - يىلىدىن 2030 - يىلىغىچە)»نى بېسىپ تارقىتىپ، پەن - كەسىپلەرنى ئەلالاشتۇرۇش، تەڭشەشنى بازار ئېھتىياجى بىلەن ئۇدۇللاشتۇرۇشتا ئۇزاقتىن بۇيانقى «ئارقىدا قېلىش» توسۇقىنى بۇزۇپ تاشلاپ، پەن - تېخنىكا تەرەققىياتى، دۆلەتنىڭ ئىستراتېگىيەلىك ئېھتىياجى يېتەكچى قىلىنغان پەنلەرنى تەڭشەش مېخانىزمى ئورنىتىپ، ئاپتونوم رايوننىڭ ئەۋزەل، خاس كەسىپلەر، يىپەك يولى ئىقتىساد بەلبېغى يادرولۇق رايونى قۇرۇلۇشى قاتارلىق زور ئىستراتېگىيەلىك ئېھتىياجىنى چۆرىدەپ، جىددىي ئېھتىياجلىق تەبىئىي پەن ۋە سانائەت پەنلىرى تۈرىدىكى پەن - كەسىپلەرنى ئادەتتىن تاشقىرى ئورۇنلاشتۇرۇپ، ئىختىساسلىقلارنى ئۆز ئالدىغا يېتىشتۈرۈش ئىقتىدارىنى كۈچلۈك ئۆستۈردى.
پەن - كەسىپ ئىختىساسلىقلارنى يېتىشتۈرۈش سۈپىتى ۋە ئىقتىساد، جەمئىيەتنىڭ يۇقىرى سۈپەتلىك تەرەققىياتىغا مۇلازىمەت قىلىش ئىقتىدارىغا مۇناسىۋەتلىك. ئاپتونوم رايونىمىز ئاپتونوم رايوننىڭ ئالىي مەكتەپلەرنىڭ تولۇق كۇرس كەسىپلىرىنى تەسىس قىلىشنى باشقۇرۇش چارىسىنى ئۆزگەرتىپ، ئالىي مەكتەپلەرنى دىققەتنى جەمئىيەت ئېھتىياجى، كەسىپ ئۆلچىمى ھەم مەكتەپ خاسلىقىغا مەركەزلەشتۈرۈپ كەسىپ تەسىس قىلىشنى ئىلتىماس قىلىشقا يېتەكلىدى، 2024 - يىلى تەستىقلانغان تولۇق كۇرس كەسپىدىن 49ى، كۆرسىتىلگەن تولۇق كۇرس كەسپىدىن 51ى يېڭىدىن كۆپەيدى، 22 تولۇق كۇرس كەسپى ئەمەلدىن قالدۇرۇلدى، بۇنىڭ ئىچىدە كۆپەيتىپ تەسىس قىلىنغان ئەقلىي ئىقتىدارلىق كان قېزىش قۇرۇلۇشى، ئەقلىي ئىقتىدارلىق ياسىمىچىلىق قۇرۇلۇشى، ئېنېرگىيە ساقلاش ئىلمى ۋە قۇرۇلۇشى قاتارلىق جىددىي ئېھتىياجلىق، قىس بولۇۋاتقان تەبىئىي پەن ۋە سانائەت پەنلىرى تۈرىدىكى كەسىپلەرنىڭ ئىگىلىگەن نىسبىتى ％65تىن يۇقىرى بولدى. كەسىپلەرنى ھەرىكەت ھالىتىدە تەڭشەش مېخانىزمىنى كۈچەيتىش ئارقىلىق، ئىشقا ئورۇنلىشىش نىسبىتى تۆۋەن بولغان، جەمئىيەتنىڭ ئېھتىياجى ئاجىز بولغان پەنلەر كۆلىمى سىجىل تارايتىلىپ، رايون كەسىپلىرىنىڭ تىپىنى ئۆزگەرتىپ دەرىجىسىنى ئۆستۈرۈشكە ماس كېلىدىغان پەن - كەسىپ سىستېمىسىنى شەكىللەندۈرۈشكە تۈرتكە بولۇنۇپ، يۇقىرى سۈپەتلىك تەرەققىيات يۇقىرى سەۋىيەلىك ئىختىساسلىقلار تىرىكى ۋە ئەقلىي كۈچ كاپالىتى بىلەن تەمىنلەندى.
ماسلىشىپ ھەمتۈرتكە بولۇپ، «تۆت زەنجىر»نىڭ يۇغۇرۇلۇشىنى ئىلگىرى سۈرۈش
بۇلتۇر يىل ئاخىرىدا، شىنجاڭدىكى تۇنجى دۆلەت دەرىجىلىك شەھەر رايونى ئىشلەپچىقىرىش - ئوقۇتۇش بىرلەشمە گەۋدىسى − سانجى دۆلەت يېزا ئىگىلىكى يۇقىرى، يېڭى تېخنىكىلىق كەسىپلەر ئۈلگە كۆرسىتىش رايونى زامانىۋى يېزا ئىگىلىك ئىشلەپچىقىرىش - ئوقۇتۇش بىرلەشمە گەۋدىسىنىڭ يوپۇقى ئېچىلدى. بۇ بىرلەشمە گەۋدە ھۆكۈمەت، كەسىپ، كارخانا، مەكتەپنىڭ خىزمەت بىرىكمە كۈچىنى مۇجەسسەملەپ، ئىشلەپچىقىرىش بىلەن ئوقۇتۇشنىڭ يۇغۇرۇلۇشىدىكى قىيىن نۇقتا، توسۇق نۇقتا ۋە ئاغرىق نۇقتىنى ھەل قىلىشقا كۈچ چىقىرىپ، كەسىپ ۋە مائارىپ ئېكولوگىيەسىنى ئۈزلۈكسىز ئەلالاشتۇرىدۇ، بۇنىڭ ئىچىدىكى ئەڭ مۇھىم بىر تۈرلۈك خىزمەت ۋەزىپىسى دەل نىشانلىق ھالدا كەسىپ ئىختىساسلىقلىرىنى ياخشى يېتىشتۈرۈش.
باشلامچى كارخانا بولۇش سۈپىتى بىلەن، شىنجاڭ تەيكۇن گۇرۇھى چەكلىك مەسئۇلىيەت شىركىتى باشلامچىلىق بىلەن سىناق قىلىپ، 10 مىليون يۈەندىن ئارتۇق مەبلەغ سېلىپ، شىنجاڭ يېزا ئىگىلىك كەسپىي تېخنىكا داشۆسى بىلەن تەجرىبىخانا، يېڭىلىق يارىتىش مۇلازىمەت مەركىزى قاتارلىقلارنى ئورتاق قۇرۇپ، باشقا كارخانا ۋە مەكتەپلەر بىلەن بىرلىكتە زاكازلىق يېتىشتۈرۈش لايىھەسىنى ئورتاق لايىھەلەپ، مەكتەپ بىلەن كارخانا نۆۋەتلىشىپ ئوقۇتۇش قاتارلىق ئۇسۇللار ئارقىلىق ئىختىساسلىقلارنى ئورتاق يېتىشتۈرۈپ، خاس كەسىپ (توپ) قۇرۇلۇشىنى تۇتۇپ، كەسپىي ئىختىساسلىقلارنى يېتىشتۈرۈشتىكى ماسلىشىشچانلىقنى سىجىل ئۆستۈردى.
نۆۋەتتە، بىرلەشمە گەۋدىنىڭ زور كۈچ بىلەن قوللىشىدا، شىنجاڭ يېزا ئىگىلىك كەسپىي تېخنىكا داشۆسى 45 كەسىپ بويىچە شىنجاڭ ئىچىدىكى شۇ كەسىپلەرگە مۇناسىۋەتلىك 8400دىن ئارتۇق ساھە كارخانىسىنى تەكشۈرۈپ تەتقىق قىلىشنى تاماملاپ، كارخانىلارنىڭ ئىختىساسلىقلارغا بولغان ئېھتىياج تىزىملىكى قاتارلىق مەكتەپ بىلەن كارخانىنىڭ بەش تىزىملىكىنى ئورناتتى ھەم مۇكەممەللەشتۈردى، بۇنىڭ بىلەن ساھە كارخانىلىرى ئىختىساسلىقلارنى يېتىشتۈرۈشنىڭ پۈتكۈل جەريانىغا چوڭقۇر سىڭىپ كىردى.
شىنجاڭ قاتناش كەسپىي تېخنىكا شۆيۈەنىنىڭ سۈنئىي ئەقلىي ئىقتىدار قۇرۇلۇشى شۆيۈەنىدە، مەكتەپ بىلەن كارخانا ئورتاق قۇرغان ئەمەلىي مەشىق ئۆيى 11گە يەتتى. يېقىنقى بىرنەچچە يىلدا، بۇ شۆيۈەن كارخانىلار بىلەن بولغان چوڭقۇر يۇغۇرۇلۇشنى سىجىل كۈچەيتىپ، كەسىپ قۇرۇلۇشى، ئىختىساسلىقلارنى يېتىشتۈرۈش قاتارلىق جەھەتلەردە ماسلىشىپ ئادەم تەربىيەلەشنى ئىشقا ئاشۇردى، مەكتەپ - كارخانا ھەمكارلىقىدىكى كارخانا 128گە يەتتى، بۇ شۆيۈەننىڭ «قوش سالاھىيەتلىك» ئوقۇتقۇچىلىرى ئىچىدە 23ى كارخانىلاردىن كەلگەن بولۇپ، ئۇلار ئۈستىگە ئالغان دەرس ۋاقتى ئەمەلىيەت دەرسى ۋاقتىنىڭ ％22ىنى ئىگىلىدى.
«بىز قەرەللىك ھالدا كارخانىلارنى زىيارەت قىلىپ ئىش ئورنىنى كۆپەيتىپ، ھەمكارلىق يوللىرىنى كېڭەيتىپ، تېخىمۇ كۆپ كارخانىنىڭ ئەمەلىيەت كۆرۈنۈشىنى ئوقۇتۇش جەريانىغا كىرگۈزۈپ، ئىختىساسلىقلارنى يېتىشتۈرۈش لايىھەسىگە بىرلەشتۈرۈپ، كەسىپ تەرەققىياتىدىكى يېڭى تېخنىكا، يېڭى ئۈسكۈنە، يېڭى ھۈنەر - سەنئەت، يېڭى ئۆلچەمدىن ئىبارەت <تۆت يېڭى> مەزمۇننى دەرسلىك ئوقۇتۇشىغا ۋاقتىدا سىڭدۈرۈپ، ئوقۇغۇچىلارنىڭ پىراكتىكا - ئەمەلىي مەشىقىنى كۈچەيتتۇق.» شىنجاڭ قاتناش كەسپىي تېخنىكا شۆيۈەنى سۈنئىي ئەقلىي ئىقتىدار قۇرۇلۇشى شۆيۈەنىنىڭ مۇدىرى ۋېي خۇي مۇنداق دېدى: شۆيۈەنىمىز ساھە تەرەققىيات ئەمەلىيىتىگە بىرلەشتۈرۈپ، «ساھە كارخانىلىرىنىڭ تېخنىكا ئېھتىياجى ۋە تەمىنلەش تىزىملىكى»نى تەكشۈرۈپ تەتقىق قىلىپ ھەم تۈزۈپ، ئەنئەنىۋى كەسىپلەرنىڭ دەرىجىسىنى ئۆستۈرۈش ئىسلاھاتىنى باشلاپ، كارخانىلار بىلەن ئىختىساسلىقلارنى يېتىشتۈرۈش لايىھەسىنى ئورتاق بېكىتىپ، ئىختىساسلىقلارنى يېتىشتۈرۈشتىكى ماسلىشىشچانلىقنى ئۆستۈردى.
يېقىنقى يىللاردىن بۇيان، شىنجاڭ سانائەت قۇرۇلۇش شۆيۈەنى شەرقىي جۇڭغار ئىقتىساد - تېخنىكا تەرەققىيات رايونىنىڭ كەسىپ ئېھتىياجىنى زىچ چۆرىدەپ، ئىختىساسلىقلارنى يېتىشتۈرۈش قۇرۇلمىسىنى ئەلالاشتۇرۇپ، پەن تەتقىقات مۇلازىمەت ئىقتىدارىنى ئۆستۈرۈپ، تەرەققىيات رايونىنىڭ يۇقىرى سۈپەتلىك تەرەققىياتىغا كۈچ قوشتى. بۇ مەكتەپنى پۈتكۈزگەن جەمئىي 5000دىن ئارتۇق كىشى شەرقىي جۇڭغاردا يىلتىز تارتىپ، تەرەققىيات رايونىدىكى تايانچ كارخانىلارغا مۇلازىمەت قىلدى. بۇ مەكتەپ پارتىيە كومىتېتىنىڭ شۇجىسى لى يۈخۇڭ مۇنداق بىلدۈردى: مەكتىپىمىز مەكتەپ باشقۇرۇش ئەۋزەللىكىنى داۋاملىق جارى قىلدۇرۇپ، دىققەتنى باغچە رايونىنىڭ كۆمۈر، ئېلېكتىر، ئاليومىن، كىرېمنىيدىن ئىبارەت تۆت چوڭ ئاساسلىق غول كەسپىگە مەركەزلەشتۈرۈپ، تېخىمۇ كۆپ يۇقىرى ساپالىق ئوقۇش پۈتكۈزگەنلەر ھەم يۇقىرى سەۋىيەلىك ئىختىساسلىقلار بايلىقى بىلەن تەمىنلەپ، يۇقىرى ئىقتىدار دەرىجىلىك پەن تەتقىقات سۇپىسىنى ئورتاق بەرپا قىلىپ، رايون ئىقتىسادىنىڭ يۇقىرى سۈپەتلىك تەرەققىياتىغا تېخىمۇ ياخشى كۈچ قوشىدۇ.
ھازىر، شىنجاڭ مائارىپ، پەن - تېخنىكا، ئىختىساسلىقلارنى تەرەققىي قىلدۇرۇشنى بىر گەۋدىلەشتۈرۈپ ئالغا سىلجىتىپ، كەسىپ ئېھتىياجىنى نىشانلاپ، پەن توسۇقىنى بۇزۇپ تاشلاپ، پەن - كەسىپلەر بويىچە تەمىنات تەرەپلىك ئىسلاھاتنى چوڭقۇرلاشتۇرماقتا. ئاپتونوم رايون ئالىي مەكتەپلەرنىڭ «بىر مەكتەپ، بىر لايىھە» بويىچە مەكتەپلەرنىڭ پەن - كەسىپ تەسىس قىلىش يىرىك پىلانىنى تۈزۈشىگە يېتەكچىلىك قىلىپ، ئاساسىي غول پەن تۈرلىرى، ئاساسىي غول كەسىپ چوڭ تۈرلىرىنى ئايدىڭلاشتۇرۇپ، كەسىپ زەنجىرىنىڭ توپلىشىپ تەرەققىي قىلىشىنى شەكىللەندۈرۈپ، كەسىپ تەرەققىياتىدا جىددىي كەمچىل بولغان تەبىئىي پەن ۋە سانائەت پەنلىرى، يېزا ئىگىلىك پەنلىرى، تېببىي پەن ئىختىساسلىقلىرىنى يېتىشتۈرۈپ، ئالىي مەكتەپلەرنىڭ پەن - كەسىپ قۇرۇلمىسىنى سىجىل ئەلالاشتۇرۇپ، ھەقىقىي تۈردە «ئون چوڭ كەسىپ توپى» قۇرۇلۇشى يىرىك پىلان خەرىتىسىنى يۇقىرى سۈپەتلىك تەرەققىيات ئەمەلىي كۆرۈنۈش خەرىتىسىگە ئايلاندۇرۇپ، «مائارىپ زەنجىرى، ئىختىساسلىقلار زەنجىرى، يېڭىلىق يارىتىش زەنجىرى، كەسىپ زەنجىرى»دىن ئىبارەت تۆت زەنجىرنىڭ چوڭقۇر يۇغۇرۇلۇشىنى تەدرىجىي ئالغا سىلجىتىپ، مائارىپ كۈچلۈك رايونى قۇرۇلۇشىنى كۈچلۈك ئىختىساسلىقلار تىرىكى ۋە يېڭىلىق يارىتىش قۇۋۋىتى بىلەن تەمىنلىدى.
