3-ئاينىڭ 10-كۈنى، مۇخبىرنىڭ ھاۋا ئارمىيەسىگە ئۇچقۇچى قوبۇل قىلىش ئىدارىسى لەنجوۋ تاللاش مەركىزىدىن ئىگىلىشىچە، شىنجاڭنىڭ 2025-يىللىق ھاۋا ئارمىيەسىگە ئۇچقۇچى قوبۇل قىلىش بويىچە تاللاپ بېكىتىش-تەكشۈرۈش خىزمىتى 3-ئاينىڭ 24-كۈنىدىن 3-ئاينىڭ 25-كۈنىگىچە قانات يايدۇرۇلىدىكەن.
بۇ قېتىمقى تەكشۈرۈشكە قاتنىشىش ئوبيېكتى 2025-يىللىق ھاۋا ئارمىيەسىگە ئۇچقۇچى قوبۇل قىلىش بويىچە ئالدىنقى قارارلىق تاللاشتا لاياقەتلىك بولغان ھەم ئالىي مەكتەپ ئىمتىھان نەتىجىسى شىنجاڭ بويىچە بىرتۇتاش قوبۇل قىلىنىدىغان تولۇق كۇرس 1-تۈركۈم نومۇر چېكىگە يېتىدۇ دەپ ئالدىن مۆلچەرلەنگەن ئوقۇغۇچىلار بولۇپ، تاللاپ بېكىتىش-تەكشۈرۈش ھاۋا ئارمىيەسى ئۇچقۇچى قوبۇل قىلىش ئىدارىسىنىڭ چېڭدۇ تاللاش مەركىزىدە ئېلىپ بېرىلىدۇ (ئادرېس: سىچۇەن ئۆلكىسىنىڭ چېڭدۇ شەھىرى ۋۇخوۋ رايونى گۇڭخې يولى 4-نومۇر).
تاللاپ بېكىتىش-تەكشۈرۈشتە باشتىن-ئاخىر يەككە تۈر بويىچە شاللاش تۈزۈمى يولغا قويۇلىدۇ، تەكشۈرۈش مەزمۇنى تېببىي تاللاش، پىسخىكىلىق تاللاش ھەمدە سىياسىي باھالاش، سۆزلىشىشنى ئۆز ئىچىگە ئالىدۇ، ھەممە تەكشۈرۈش تۈرىنى تاماملاشقا ئىككى-ئۈچ كۈن كېتىدۇ؛ تاللاپ بېكىتىش-تەكشۈرۈشكە قاتنىشىدىغان ئوقۇغۇچىلار ئۆزىنىڭ كىملىكى (ياكى ئائىلە نوپۇس دەپتىرى)، يېقىنقى بىر قېتىملىق مەكتەپ دەرىجىلىكتىن يۇقىرى ئىمتىھاننىڭ يىللىقلار بويىچە نەتىجە رەت تەرتىپى ۋە نەتىجە قەغىزى، «ھاۋا ئارمىيەسىگە ئۇچقۇچى قوبۇل قىلىش بويىچە كېسەللىك تارىخىنى تەكشۈرۈش ھەم تەكشۈرۈشكە سەمىمىي قاتنىشىش ۋەدىنامىسى» قاتارلىق ماتېرىياللارنى ئېلىپ كېلىدۇ، سالامەتلىك تەكشۈرتكەندە ئازادە كىيىم-كىچەك ۋە تەنھەرىكەت ئايىغى كىيىپ كېلىش كېرەك.
تەكشۈرۈشكە قاتناشقان ئوقۇغۇچىلارنىڭ چۈشەنمىگەن جايلىرى بولسا، ھاۋا ئارمىيەسىگە ئۇچقۇچى قوبۇل قىلىش ئىدارىسى لەنجوۋ تاللاش مەركىزىدىن مەسلىھەت سورىسا بولىدۇ، مەسلىھەت سوراش-ئالاقىلىشىش تېلېفونى: 4865353-0931، 8958033-0931
ھاۋا ئارمىيەسىنىڭ ئوقۇغۇچى قوبۇل قىلىشى ھەربىي مەكتەپكە ئوقۇغۇچى قوبۇل قىلىشقا تەۋە بولۇپ، قوبۇل قىلىنغان ئۇچقۇچى كۇرسانتلار ھاۋا ئارمىيەسى ئاۋىياتسىيە داشۆسىدە ئوقۇيدۇ، نەتىجىسى ئەلا بولغانلار چىڭخۇا داشۆ، بېيجىڭ داشۆ، بېيجىڭ ئاۋىياتسىيە-ئالەم قاتنىشى داشۆسىنىڭ «قوش ئوقۇش تەۋەلىكى» ئۇچقۇچىلار سىنىپىغا كىرىپ ئوقۇيدۇ.
«شىنجاڭ گېزىتى» ۋىيشىن ئاممىۋى سۇپىسىدىن ئېلىپ تەرجىمە قىلىندى
