□ ئانار بۇلۇت\شىنجاڭ گېزىتى مۇخبىرى جاڭ يۈنمېي
بۇ يىل «14 - بەش يىل»لىق يىرىك پىلان تاماملىنىدىغان يىل.
قانداق قىلغاندا «14 - بەش يىل»لىق يىرىك پىلاندىكى نىشان - ۋەزىپىلەرنى يۇقىرى سۈپەتتە تاماملاپ، «15 - بەش يىل»نى ياخشى باشلاشنى ئىشقا ئاشۇرۇشقا پۇختا ئاساس سالغىلى بولىدۇ؟ ھۆكۈمەت خىزمىتىدىن دوكلاتتا ۋەزىپەنامە تۈزۈلۈپ، يول خەرىتىسى سىزىپ چىقىلدى.
شىنجاڭدىن كەلگەن مەملىكەتلىك خەلق قۇرۇلتىيى ۋەكىللىرى، مەملىكەتلىك سىياسىي كېڭەش ئەزالىرى شىنجاڭنىڭ تەرەققىياتىغا بولغان ئارزۇسى ۋە ئويلىنىشىنى ئېلىپ، مەملىكەتلىك ئىككى يىغىندا تەكلىپ بېرىپ، تەرەققىيات ئۈستىدە توختىلىپ، ئورتاق تونۇشنى مۇجەسسەملەپ، «14 - بەش يىل»دا ھەل قىلغۇچ غەلىبە قىلىش ئىشەنچىگە تولۇپ، شىنجاڭنىڭ جۇڭگوچە زامانىۋىلاشتۇرۇش يولىدا چوڭ قەدەم بىلەن ئىلگىرىلىشىگە جاسارەت بىلەن تۈرتكە بولدى.
نىشاننى چىڭ كۆزلەپ، پۇرسەتنى چىڭ تۇتۇش
ئىچكى ئىشلەپچىقىرىش ئومۇمىي قىممىتىنى ％5 ئەتراپىدا ئاشۇرۇش؛ شەھەر - بازارلاردا يېڭىدىن 12 مىليوندىن ئارتۇق ئادەمنى ئىشقا ئورۇنلاشتۇرۇش؛ ئاشلىق ھوسۇلى 1 تىرىليون 400 مىليارد جىڭ ئەتراپىدا بولۇش... ھۆكۈمەت خىزمىتىدىن دوكلاتتا بۇ يىللىق تەرەققىياتنىڭ ئاساسلىق كۆزلىمە نىشانى ئوتتۇرىغا قويۇلۇش بىلەن بىللە، ئىستېمال، يېڭى سۈپەتلىك ئىشلەپچىقىرىش كۈچى، ئىسلاھات قاتارلىق نۇقتىلىق خىزمەتلەرمۇ ئورۇنلاشتۇرما قىلىندى.
شىنجاڭ يىپەك يولى ئىقتىساد بەلبېغىدىكى يادرولۇق رايون، مەملىكەت بويىچە ئېنېرگىيە بايلىقى ئىستراتېگىيەلىك كاپالەت بازىسى ۋە مەملىكەت بويىچە ئەلا سۈپەتلىك دېھقانچىلىق، چارۋىچىلىق مەھسۇلاتلىرى مۇھىم تەمىنات بازىسى. ھۆكۈمەت خىزمىتىدىن دوكلاتتا تۈرلۈك نىشان - ۋەزىپىلەرنىڭ ئوتتۇرىغا قويۇلۇشى ئېنىقكى، شىنجاڭنىڭ تەرەققىياتىغا تېخىمۇ كۆپ يېڭى قۇۋۋەت قوشىدۇ.
شىنجاڭ قانداق قىلغاندا ۋەزىيەتكە تايىنىپ ئالغا ئىلگىرىلەپ تېخىمۇ زور تۆھپە قوشالايدۇ؟
ھۆكۈمەت خىزمىتىدىن دوكلاتتا: يېڭىلىق يارىتىش ۋە ئىستېمال ھالىتىنى بېيىتىش كېرەك، دەپ ئوتتۇرىغا قويۇلدى. «بۇ، شىنجاڭ ئۈچۈن ھەم نىشان، ھەم پۇرسەت، بىز تېپىلغۇسىز پۇرسەتنى چىڭ تۇتۇشىمىز كېرەك، دېدى مەملىكەتلىك خەلق قۇرۇلتىيى ۋەكىلى كۇڭ فېيفېي.
شىنجاڭ مەدەنىيەت بايلىقى جەھەتتە چوڭ رايون، ساياھەت بايلىقى مول توپلانغان رايون، نۇرغۇن ساياھەتچى تەلپۈنىدىغان «ئارزۇدىكىدەك جاي». بۇلتۇر شىنجاڭ پۈتۈن يىلدا كۈتۈۋالغان ساياھەتچى 300 مىليون ئادەم قېتىمدىن ئاشتى، ساياھەتچىلەرنىڭ ئىستېمال خىراجىتى 359 مىليارد 542 مىليون يۈەنگە يېتىپ، ئايرىم - ئايرىم ھالدا ％14 ۋە ％21 ئاشتى، شىنجاڭ ساياھەت چوڭ رايونىدىن ساياھەت كۈچلۈك رايونىغا قاراپ قەدەم تاشلىماقتا.
يېڭىلىق يارىتىش ۋە ئىستېمال ھالىتىنى بېيىتىشقا ۋەكىل كۇڭ فېيفېينىڭ ئىشەنچىسى تولۇق.
بۇلتۇر، ۋەكىل كۇڭ فېيفېي چاپچال شىبە ئاپتونوم ناھىيەسى چاپچال بازىرىنىڭ بازار باشلىقىلىق ئورنىدىن ئالمىشىپ مەدەنىيەت - ساياھەت سېپىدىكى «يېڭى ئەسكەر»گە ئايلاندى. ساياھەتچىلىكنىڭ شىددەت بىلەن ئېشىشىغا قارىتا، ئىلى قازاق ئاپتونوم ئوبلاستى ساياھەت مۇلازىمەت ئەسلىھەلىرىنى كۆپەيتىش، ساياھەت كەسىپ ھالىتىنى بېيىتىش، باشقا كەسىپ ھالىتىنىڭ ئومۇمىي تەرەققىياتىغا تۈرتكە بولۇش قاتارلىق تەدبىرلەر ئارقىلىق، ساياھەتچىلەرنىڭ مۇلازىمەتكە بولغان ئېھتىياجىنىڭ ئېشىشى ئېلىپ كەلگەن يېڭى خىرىسلارغا تاقابىل تۇرۇش ئۈستىدە پائال ئىزدەندى. ئۇ مۇنداق قارىدى: دەم ئېلىش تۈزۈمىنى ئەمەلىيلەشتۈرۈش ۋە ئەلالاشتۇرۇش ساياھەت كەسپىنىڭ تەرەققىياتىغا نىسبەتەن ئېنىقكى ياخشى خەۋەر، ساياھەت ئۇل ئەسلىھە قۇرۇلۇشى ۋە مۇلازىمەت كاپالىتى سەۋىيەسىنى ئۆستۈرۈشنى چۆرىدەپ، خىزمەت سالمىقىنى سىجىل زورايتىپ، ساياھەت كەسپى تەرەققىياتىنىڭ ئومۇمىي سۈپىتى ۋە ئۈنۈمىنى ئاشۇرۇش كېرەك.
دۆلەتنى پەن مائارىپ ئارقىلىق گۈللەندۈرۈش ئىستراتېگىيەسىنى چوڭقۇر يولغا قويۇپ، يېزا ئىگىلىكى، يېزا، دېھقانلار خىزمىتىنى كۈچەپ ياخشى تۇتۇش كېرەك... ھۆكۈمەت خىزمىتىدىن دوكلاتتا ئوتتۇرىغا قويۇلغان نىشان مەملىكەتلىك سىياسىي كېڭەش ئەزاسى ۋاڭ ۋېيغا مەسئۇلىيىتىنىڭ ئېغىرلىقىنى، بۇرچىنىڭ شەرەپلىك ئىكەنلىكىنى ھېس قىلدۇردى.
ئەزا ۋاڭ ۋېينىڭ ئۇرۇق پىلازمىسى بايلىقىنى ئېچىش ۋە قوغداش خىزمىتى بىلەن شۇغۇللىنىۋاتقىنىغا 39 يىل بولدى، ئىلگىرى - كېيىن بولۇپ 14 تۈرلۈك ساھە ئۆلچىمى، بەش تۈرلۈك دۆلەت ئۆلچىمىنى تەتقىق قىلىپ ياساشقا قاتناشقان، ئۈچ تۈرلۈك ئۆلكە، مىنىستىرلىق دەرىجىلىك پەن - تېخنىكا تەرەققىياتى مۇكاپاتىغا ئېرىشكەن. بۇ يىل ئاشلىق بىخەتەرلىكى ۋە ئۇرۇقچىلىق تەرەققىياتىغا مەدەت بېرىش ئۈچۈن ئەزا ۋاڭ ۋېي يىغىنغا قاتناشقاندا بىر باغلام بۇغداي باشىقىنى ئېلىپ كەلدى.
قەد كۆتۈرگەن «غەربىي رايون ئاشلىق ئامبىرى» بولۇش سۈپىتى بىلەن، بۇلتۇر شىنجاڭنىڭ ئاشلىق ئومۇمىي ھوسۇلى 46 مىليارد 600 مىليون جىڭ بولۇپ، مەملىكەت بويىچە 13 - ئورۇندا تۇردى، ئاشلىقنىڭ مو بېشى بىرلىك ھوسۇلى 524.8 كىلوگىرام بولۇپ، مەملىكەت بويىچە 1 - ئورۇندا تۇردى، شىنجاڭ مەملىكەت بويىچە ئاشلىق ئىشلەپچىقىرىش ئىقتىدارىنىڭ ئېشىش مىقدارى ئەڭ كۆپ بولغان ئۆلكە بولۇپ قالدى. بۇ يىل، شىنجاڭ كەڭ كۆلەمدە بىرلىك ھوسۇلنى ئاشۇرۇش ھەرىكىتىنى سىجىل قانات يايدۇرۇپ، ئاشلىق ھوسۇلىنى يەنە 1 مىليارد جىڭ ئاشۇرۇشقا تىرىشىدۇ.
«بىرلىك ھوسۇلنىڭ ئاچقۇچى ئەلا سورتتا.» ئەزا ۋاڭ ۋېي مۇنداق قارىدى: سىياسەت جەھەتتىن يۆلەش سالمىقىنى يەنىمۇ زورايتىپ، دېھقانلارنىڭ ئاشلىق تېرىش ئاكتىپلىقىنى تولۇق قوزغاش كېرەك. شۇنىڭ بىلەن بىللە، پەن - تېخنىكىنى تىرەك قىلىشنى كۈچەيتىپ، ئۇرۇقچىلىقنى باشقۇرۇش سىياسىتىنى ئەلالاشتۇرۇپ، مۇكەممەللەشتۈرۈپ، سورت يېتىشتۈرۈشتە يېڭىلىق يارىتىشقا تېخىمۇ ياخشى ئىلھام بېرىپ، ئۇرۇقچىلىقنىڭ يۇقىرى سۈپەتلىك تەرەققىياتىغا تۈرتكە بولۇپ، «جۇڭگو تاماق قاچىسى»غا تېخىمۇ كۆپ ئەلا سۈپەتلىك شىنجاڭ ئاشلىقى قاچىلاشقا تۆھپە قوشۇش كېرەك.
ئىسلاھاتنى چىڭ تۇتۇپ، باتۇرلۇق بىلەن دەۋرنىڭ ئالدىدا تۇرۇش
بۇ يىل يەنىمۇ ئىلگىرىلىگەن ھالدا ئىسلاھات ئومۇميۈزلۈك چوڭقۇرلاشتۇرۇلىدىغان مۇھىم يىل.
بۇلتۇر ئېچىلغان پارتىيە 20 - نۆۋەتلىك مەركىزىي كومىتېتى 3 - ئومۇمىي يىغىنىدا، 300دىن ئارتۇق مۇھىم ئىسلاھات تەدبىرى ئوتتۇرىغا قويۇلدى. بۇ يىلقى مەملىكەتلىك «ئىككى يىغىن»دا «ئىسلاھات» ھۆكۈمەت خىزمىتىدىن دوكلاتتا كۆپ تىلغا ئېلىنغان سۆز بولدى.
«ھۆكۈمەت خىزمىتىدىن دوكلاتتا بەلگە خاراكتېرلىك ئىسلاھات تەدبىرلىرىنى تېز ئەمەلىيلەشتۈرۈشكە تۈرتكە بولۇش تىلغا ئېلىنىپ، بىزنىڭ بۇنىڭدىن كېيىنكى خىزمەتلىرىمىزگە يۆنىلىش ئېنىق كۆرسىتىپ بېرىلدى، دېدى مەملىكەتلىك خەلق قۇرۇلتىيى ۋەكىلى مەخمۇت ئۆمەرجان.
ئاپتونوم رايون خوتەن ۋىلايىتىدە كانچىلىق ھوقۇقىنى ھەقلىق ئۆتۈنۈپ بېرىشنى تىزىملاش ئىسلاھاتىنى نۇقتىدا سىناق قىلىشنى قانات يايدۇرغاندىن بۇيان، بازارنىڭ ھاياتىي كۈچىنى ئۈنۈملۈك ئۇرغۇتۇپ، مالىيە كىرىمىنى ئاشۇرۇش بىلەن كەسىپنى تەرەققىي قىلدۇرۇشتىن ئىبارەت قوش پايدا ئېلىشقا تۈرتكە بولدى. «قىسقىغىنا بىرنەچچە ئايدا، خوتەن ۋىلايىتى كانچىلىق ھوقۇقىدىن 17نى ھەقلىق ئۆتۈنۈپ بەردى، ئومۇمىي پايدا 826 مىليون يۈەن بولۇپ، ئىسلاھاتتىن ئىلگىرىكى ئۈچ يىلدا كانچىلىق ھوقۇقىنى ھەقلىق ئۆتۈنۈپ بېرىشتە پۈتۈشۈلگەن سومما ئومۇمىي يىغىندىسىنىڭ 1.08 ھەسسىسىگە توغرا كەلدى.» ۋەكىل مەخمۇت ئۆمەرجان مۇنداق دېدى: خوتەن ۋىلايىتىنىڭ «بايلىق مول رايون»دىن «كەسىپ توپلاشقان رايون»غا ئۆزگىرىش قەدىمىنى تېزلەتكەنلىكىنى، شىنجاڭنىڭ مەملىكەت بويىچە ئېنېرگىيە بايلىقى ئىستراتېگىيەلىك كاپالەت بازىسى قۇرۇپ چىقىشىغا ساناقلىقلا كۈن قالغانلىقىنى ھەقىقىي ھېس قىلدىم.
مەملىكەتلىك سىياسىي كېڭەشنىڭ ئەزاسى ما خۇادۇڭ گۇرۇپپا مۇزاكىرىسىگە قاتناشقاندا، مەملىكەتلىك سىياسىي كېڭەشنىڭ ئەزاسى چېن شياۋپىڭ ئوتتۇرىغا قويغان «خاڭجوۋدىكى ئالتە كىچىك ئەجدىھا»نىڭ كۈچلۈك قەد كۆتۈرۈشىنىڭ ئارقىسىدىكى چوڭقۇر قاتلاملىق لوگىكىغا مەپتۇن بولدى.
«<خاڭجوۋدىكى ئالتە كىچىك ئەجدىھا>نىڭ قەد كۆتۈرۈشى پەن - تېخنىكىدا يېڭىلىق يارىتىشتىكى مۆجىزە بولۇپلا قالماي، تېخىمۇ مۇھىمى تىجارەت - سودا مۇھىتى، پۇل مۇئامىلىنىڭ كۈچ قوشۇشى، يېڭىلىق يارىتىش ئېكولوگىيەسى، كەسىپلەرنى ماسلاشتۇرۇش، ئىختىساسلىقلار مۇنبەت تۇپرىقى ۋە ئۇل تەتقىقات ئورتاق بەرپا قىلغان يېڭىلىق يارىتىش ئېكولوگىيەسىنىڭ سىستېمىلىق تىرەك بولغانلىقىنىڭ نەتىجىسى» دېدى ئەزا ما خۇادۇڭ.
بۇ يىللىق ھۆكۈمەت خىزمىتىدىن دوكلاتتا تۈرلۈك تىجارەت ئاساسىي گەۋدىلىرىنىڭ ھاياتىي كۈچىنى ئۈنۈملۈك ئۇرغۇتۇش ئىسلاھات نىشانىنىڭ بىرى قىلىندى. «بۇلتۇر، تىجارەت - سودا مۇھىتىنى سىجىل ئەلالاشتۇرۇش ئارقىلىق، شىنجاڭدىكى كارخانىلارنىڭ تەرەققىيات ۋەزىيىتى ياخشى بولدى، كۆلەمدىن يۇقىرى سانائەت كارخانىسى 5000دىن ئېشىپ، تىزىمغا ئېلىنغان تۈرلۈك تىجارەت ئاساسىي گەۋدىسى 2 مىليون 594 مىڭ 700گە يەتتى.» ئەزا ما خۇادۇڭ مۇنداق دېدى: بىز ئىسلاھاتنى ئومۇميۈزلۈك چوڭقۇرلاشتۇرۇشتىن ئىبارەت بۇ «ئاچقۇچلۇق تەدبىر»دىن ياخشى پايدىلىنىپ، تۈرلۈك تىجارەت ئاساسىي گەۋدىلىرىنىڭ ھاياتىي كۈچىنى سىجىل ئۇرغۇتۇپ، شىنجاڭنىڭ ئىقتىساد، جەمئىيىتىنىڭ يۇقىرى سۈپەتلىك تەرەققىياتىنىڭ يېڭى پەللىگە كۆتۈرۈلۈشىگە تۈرتكە بولۇشىمىز كېرەك.
«خاڭجوۋدىكى ئالتە كىچىك ئەجدىھا»نىڭ قەد كۆتۈرۈشىنىڭ ئارقىسىدىكى لوگىكا ئۈستىدە چوڭقۇر ئويلىنىش ئارقىلىق، ئەزا ما خۇادۇڭ مۇنداق قارىدى: شىنجاڭ تىجارەت - سودا مۇھىتىنى ئەلالاشتۇرۇپ، تۈرلۈك تىجارەت ئاساسىي گەۋدىسىنىڭ ھاياتىي كۈچىنى ئۈنۈملۈك ئۇرغۇتۇشتا، ئىشلەيدىغان خىزمەتلەر يەنە ناھايىتى كۆپ. ئۇ، «ئىش بولمىسا ئاۋارە قىلماسلىق» ئارقىلىق مەمۇرىي ئىشلار مۇلازىمەت ئىدىيەسىنى قايتا تۇرغۇزۇش؛ «پۈتۈن ھاياتلىق دەۋرىيلىكى» پۇل مۇئامىلە مەدىتى سىستېمىسى بەرپا قىلىش؛ «خاس كەسىپ + رەقەملىك كۈچ قوشۇش» ئېكولوگىيە يامغۇرلۇق ئورمىنى بەرپا قىلىش؛ «قوش ئايلىنىش»لىق ئىختىساسلىقلار ئىستراتېگىيەسىنى يولغا قويۇش؛ ئەمەلىي قوللىنىش يۆنىلىشىدىكى ئۇل تەتقىقات ئاساسىنى مۇستەھكەملەش تەكلىپىنى بەردى.
«مەمۇرىي ئىشلار مۇلازىمەت <باشقۇرۇش تەپەككۇرى>دىن <ئېكولوگىيە تەپەككۇرى>غا ئۆزگەرگەندە، كەسىپ سىياسىتى <قان بېرىپ يۆلەش>تىن باسقۇچلۇق ھالدا <قان ئىشلەش ئارقىلىق كۈچ قوشۇش>قا يۈزلەنگەندە، شىنجاڭ مۇقەررەر ھالدا خاسلىققا ئىگە يۇقىرى سۈپەتلىك تەرەققىياتنىڭ يېڭى سەھىپىسىنى پۈتۈپ چىقىدۇ» دېدى ئەزا ما خۇادۇڭ.
زىچ ئىتتىپاقلىشىپ، داۋاملىق جاسارەت بىلەن ئىلگىرىلەش
ئالغا ئىلگىرىلەش مۇساپىسىدە جاسارىتىمىز ئۇرغۇماقتا، پۇختا قەدەمدە كەلگۈسىگە قاراپ ئاتلىنايلى. جۇڭگوچە زامانىۋىلاشتۇرۇشنىڭ گۈزەل مەنزىرىسىنى ھەر مىللەت خەلقنىڭ ئورتاق سىزىپ چىقىشىغا توغرا كېلىدۇ.
ھازىر، شىنجاڭدا «ئون چوڭ كەسىپ توپى» قۇرۇلۇشى قىزغىن ئېلىپ بېرىلماقتا. مەملىكەتلىك خەلق قۇرۇلتىيى ۋەكىلى ۋاڭ كۇيرەن مۇنداق بىلدۈردى: شىنجاڭ باشتىن - ئاخىر بايلىق ئۈستۈنلۈكى، رايون ئورنى ئەۋزەللىكى ۋە كەسىپ ئاساسىنى كەسىپ تەرەققىياتىنىڭ مۇھىم قوللانمىسى قىلدى، خاس، ئەۋزەل كەسىپلەرنى يېتىلدۈرۈش ۋە زورايتىشنى ئاساسىي ھۇجۇم يۆنىلىشى قىلدى. بۇ يىل، شىنجاڭ «ئون چوڭ كەسىپ توپى»نى چۆرىدەپ، شارائىتقا قاراپ ئىش كۆرۈپ، شىنجاڭ خاسلىقىغا ئىگە يېڭى سۈپەتلىك ئىشلەپچىقىرىش كۈچلىرىنى يېتىلدۈرۈپ، كەسىپلەرنى گۈللەندۈرۈپ، ئىش ئورنىنى كۆپەيتىپ، قەلبنى مۇجەسسەملەپ، بىر مەقسەتتە بولۇشنى كۈچەيتىپ، ھەقىقىي تۈردە شىنجاڭنىڭ سىياسەت، بايلىق، رايون ئورنى ئەۋزەللىكىنى ھەقىقىي ئىشلەپچىقىرىش كۈچىگە ئايلاندۇرىدۇ، ھەر مىللەت ئاممىنىڭ ئېرىشىش تۇيغۇسى، بەخت تۇيغۇسى، بىخەتەرلىك تۇيغۇسىغا ئايلاندۇرىدۇ.
«بىر بەلباغ، بىر يول»نى ئورتاق بەرپا قىلىشنىڭ چوڭقۇر ئالغا سىلجىتىلىشى ۋە جۇڭگو (شىنجاڭ) ئەركىن سودا سىناق رايونىنىڭ تەسىس قىلىنىشىغا ئەگىشىپ، قەشقەر مىسلىسىز قىياپەت بىلەن دۆلەتنىڭ سىرتقا ئېچىۋېتىش چوڭ ئەندىزىسىگە سىڭىشمەكتە. مەملىكەتلىك خەلق قۇرۇلتىيى ۋەكىلى ئەنۋەر تۇرسۇن مۇنداق بىلدۈردى: بۇ يىل قەشقەر ئەركىن سودا سىناق رايونىنىڭ دەرىجىسىنى ئۆستۈرۈش ئىستراتېگىيەسىنى چوڭقۇر يولغا قويۇپ، خەلقئارا ئىقتىساد - سودا قائىدىسىگە يۇقىرى ئۆلچەمدە ئۇدۇللىشىپ، تۈزۈمدە يېڭىلىق يارىتىشنى يادرو قىلىپ، تۈرلۈك ئىسلاھاتنى نۇقتىدا سىناق قىلىش ۋەزىپىلىرىنىڭ ئەمەلىيلىشىشىگە تۈرتكە بولۇپ، تىجارەت - سودا مۇھىتىنى ئۈزلۈكسىز ئەلالاشتۇرۇپ، قەشقەر بۆلەك رايونىنىڭ يۇقىرى سۈپەتلىك تەرەققىياتىغا ئومۇميۈزلۈك تۈرتكە بولىدۇ.
جۇڭگوچە زامانىۋىلاشتۇرۇشنى ئالغا سىلجىتىشتا، پەن - تېخنىكا زەربىدارلىق بىلەن ئالدىدا مېڭىشى كېرەك. پەن - تېخنىكا سېپىدىن كەلگەن مەملىكەتلىك سىياسىي كېڭەشنىڭ ئەزاسى شياۋ ۋېنجياۋ مۇنداق بىلدۈردى: مائارىپ، پەن - تېخنىكا، ئىختىساسلىقلارنى بىر گەۋدىلەشتۈرۈپ ئورۇنلاشتۇرما قىلىش، بىر گەۋدىلەشتۈرۈپ ئالغا سىلجىتىشتا چىڭ تۇرۇپ، ياش سەرخىل پەن - تېخنىكا ئىختىساسلىقلىرىنى يېتىشتۈرۈشنى يەنىمۇ كۈچەيتىپ، تېخىمۇ كۆپ يۇقىرى سەۋىيەلىك پەن - تېخنىكا تەمىناتىنى يەنىمۇ يارىتىپ، ئاچقۇچلۇق، ئىجادىي، يېتەكلەش خاراكتېرلىك بىر تۈركۈم يېڭىلىق يارىتىش نەتىجىلىرىنى تېز بارلىققا كەلتۈرۈپ، پەن - تېخنىكىدا يېڭىلىق يارىتىشنى يۇقىرى سۈپەتلىك تەرەققىياتنىڭ كۈچلۈك موتورىغا ئايلاندۇرۇپ، «14 - بەش يىل»لىق يىرىك پىلاندىكى نىشان - ۋەزىپىلەرنى يۇقىرى سۈپەتتە تاماملاپ، «15 - بەش يىل»نى ياخشى باشلاشنى ئىشقا ئاشۇرۇشنى كۈچلۈك پەن - تېخنىكا تىرىكى بىلەن تەمىنلەش كېرەك.
جەڭ دۇمبىقى چېلىنىپ سەپەرگە ئاتلاندۇق، يەنە يېڭى مۇساپە باشلاندى. ۋەكىللەر، ئەزالارنىڭ ئىشەنچى چىڭىدى: ئۇلۇغۋار پىلان تۈزۈلۈپ بولدى، ئارزۇنى ئىشقا ئاشۇرۇش ئۈچۈن پۇختا قەدەم بىلەن ئىلگىرىلەش كېرەك. كۆپچىلىك ئىرادىدىن سېپىل ھاسىل قىلىپ، قىيىنچىلىققا قارشى ئالغا ئىلگىرىلەپ، ئەمەلىي ئىشلەشنى ئالدىنقى ئورۇنغا قويۇپ، يول ئېچىپ ئىلگىرىلەپ، جۇڭگوچە زامانىۋىلاشتۇرۇشنىڭ شىنجاڭ سەھىپىسىنى جاسارەت بىلەن پۈتۈپ، ئەلا نەتىجىلىرى بىلەن ئاپتونوم رايون قۇرۇلغانلىقىنىڭ 70 يىللىقىنى كۈتۈۋالىدۇ.
