□ئانار بۇلۇت\شىنجاڭ گېزىتى مۇخبىرى فەن چيۇڭيەن
ئىشىك ئېچىۋېتىلىپ، ئۆزىگە ئىشىنىش قىياپىتى نامايان قىلىندى. مەملىكەتلىك ئىككى يىغىننىڭ ئۇنتۇلغۇسىز پەيتلىرىدە، جۇڭگو - چەت ئەل تاراتقۇلىرىنىڭ كامېراسى ئالدىدا، «باھاردىكى جۇڭگو»غا گۇۋاھچى بولۇش.
بۇ يىل شىنجاڭ ئۇيغۇر ئاپتونوم رايونى قۇرۇلغانلىقىنىڭ 70 يىللىقى. مەملىكەتلىك ئىككى يىغىن مەزگىلىدە، جۇڭگو شىنجاڭ يەنە بىر قېتىم جۇڭگو ۋە چەت ئەللەرنىڭ دىققىتىنى تارتقان قىزىق نۇقتىغا ئايلاندى، ۋەكىللەر، ئەزالار يېڭى دەۋردىكى شىنجاڭ ھېكايىسىنى سۆزلەپ، شىنجاڭنىڭ ئېچىۋېتىلگەن، ئۆزىگە ئىشىنىدىغان يېڭى قىياپىتى، يېڭى كەيپىياتىنى نامايان قىلدى؛ دۇنيا شىنجاڭنى يېقىن ئارىلىقتىن كۆزىتىپ، «چەكسىز گۈزەل مەنزىرىلەرنىڭ دەل شىنجاڭدا» ئىكەنلىكىنى ھېس قىلدى.
ئوچۇق ۋە سىغدۇرۇشچان بولۇش، ھەقىقىي ئەھۋالنى نامايان قىلىش
3 - ئاينىڭ 7 - كۈنى چۈشتىن بۇرۇن، بېيجىڭ خەلق سارىيىنىڭ مەركىزىي زالىدا، مەملىكەتلىك سىياسىي كېڭەش ئەزاسى ئايىمسا توختاخۇن «ئەزالار يولى»دا مېڭىپ، تېز يوللانمىلارنىڭ كەنتلەرگە يەتكۈزۈلۈشى پۇقرالارنىڭ تۇرمۇشىغا ئېلىپ كەلگەن ئۆزگىرىشلەرنى ھەمبەھرىلىدى.
«ئۇلۇغچاتتا تاغلىق يەر پۈتۈن ناھىيە كۆلىمىنىڭ ％99.8ىنى ئىگىلەيدۇ، ئىلگىرى قاتناش ئىنتايىن قولايسىز ئىدى. بۈگۈنكى كۈندە، تېز يوللانما كەنتلەرگە يەتكۈزۈلۈپ خەلق تۇرمۇشىغا نەپ يەتكۈزدى، خەلققە قولايلىق يارىتىش مۇلازىمىتى قەلبلەرنى ئىللىتتى.» ئەزا ئايىمسا توختاخۇن تىلغا ئالغان ئۇلۇغچات ناھىيەسى ۋەتىنىمىز زېمىنىنىڭ ئەڭ غەربىي ئۇچىغا جايلاشقان.
شۇ كۈنى، 14 - نۆۋەتلىك مەملىكەتلىك خەلق قۇرۇلتىيى 3 - يىغىنى شىنجاڭ ۋەكىللەر ئۆمىكى خەلق سارىيىنىڭ شىنجاڭ زالىدا ئومۇمىي يىغىن ئۆتكۈزدى ھەم جۇڭگو - چەت ئەل تاراتقۇلىرىغا ئېچىۋەتتى. بۇ ئۆمەك، گۇرۇپپىلارنى ئېچىۋېتىش پائالىيىتى دۆلەت ئىچى - سىرتىدىكى نۇرغۇن تاراتقۇ مۇخبىرلىرىنىڭ دىققىتىنى تارتتى.
نەق مەيداندا، پاڭ زىجيەن، رۇقىيەم مەتسەيدىدىن ئىبارەت مەملىكەتلىك خەلق قۇرۇلتىيىنىڭ ئىككى ۋەكىلى جەنۇبىي شىنجاڭ رايونىنىڭ نامراتلىقتىن قۇتۇلغاندىن كېيىنكى غايەت زور ئۆزگىرىشلىرىنى، ھەر مىللەت ئامما قېرىنداشلاردەك يېقىن ئۆتۈپ، قول تۇتۇشۇپ گۈزەل تۇرمۇش يارىتىۋاتقان جانلىق ئەمەلىيەتنى ھەمبەھرىلىدى.
«بۇلتۇر، <ئون چوڭ كەسىپ توپى> ％90تىن ئارتۇق سانائەت قوشۇلما قىممىتىنى تۆھپە قىلىپ قوشۇپ، شىنجاڭنىڭ رايون ئىشلەپچىقىرىش ئومۇمىي قىممىتىنىڭ تۇنجى قېتىم 2 تىرىليون يۈەنلىك چوڭ ئۆتكەلنى بۆسۈپ ئۆتۈشىگە تۈرتكە بولدى».
«بىز جەنۇبىي شىنجاڭدىكى پۇقرالار تۇرمۇشىمىزنىڭ چوقۇم بارغانسېرى ياخشىلىنىدىغانلىقىغا ئىشىنىمىز».
«ئاپتونوم رايونلۇق پارتىيە كومىتېتى شىنجاڭدىكى ھەر مىللەت خەلقنى يېتەكلەپ تەكلىماكان قۇملۇقىنىڭ گىرۋىكىنى قاشالاش قۇرۇلۇشىنى ئالغا سىلجىتىپ، دۇنيانىڭ چۆللىشىشنى تىزگىنلىشىگە جۇڭگو تەجرىبىسىنى تەقدىم قىلدى».
...
دۇنياغا ھەقىقىي شىنجاڭنى ھېس قىلدۇردى. شۇ كۈنى، جەمئىي 74 تاراتقۇ، 102 مۇخبىر شىنجاڭ ۋەكىللەر ئۆمىكىنىڭ ئۆمەك، گۇرۇپپىلارنى ئېچىۋېتىش پائالىيىتىگە قاتناشتى. ۋەكىللەر تەپسىلىي ۋە ئېنىق سانلىق مەلۇماتلار، تەسىرلىك ھېكايىلەر، ئەمەلىي تەرەققىيات مۇۋەپپەقىيەتلىرى ئارقىلىق، دۇنياغا ئىتتىپاقلىشىپ جاسارەت بىلەن ئىلگىرىلىگەن، گۈللىنىپ تەرەققىي قىلغان، ئېچىۋېتىلگەن، ئۆزىگە ئىشىنىدىغان، ھاياتىي كۈچكە تولغان جۇڭگو شىنجاڭنى نامايان قىلدى.
«ئاتالمىش <مەجبۇرىي ئەمگەككە سېلىش> ئەمەلىيەتكە ئۇيغۇن ئەمەس، قائىدىگە توغرا كەلمەيدۇ، قانۇن ئاساسى يوق، بۇ، شىنجاڭدىكى كارخانىلارنىڭ قانۇنلۇق ھوقۇق - مەنپەئىتىگە ئېغىر زىيان يەتكۈزگەنلىك، شىنجاڭدىكى ھەر مىللەت ئەمگەكچىلەرنىڭ ئىشقا ئورۇنلىشىش ھوقۇقى، تەرەققىي قىلىش ھوقۇقىغا ئېغىر دەخلى - تەرۇز قىلغانلىق، شىنجاڭدا <ئىشسىز قېلىشقا مەجبۇر بولۇش> <نامراتلىشىپ كېتىشكە مەجبۇر بولۇش>نى پەيدا قىلغانلىق، بىز قەتئىي قارشى تۇرىمىز!» شىنجاڭ ۋەكىللەر ئۆمىكىنىڭ ئېچىۋېتىش كۈنىدە، مەملىكەتلىك خەلق قۇرۇلتىيى ۋەكىلى ۋاڭ مىڭشەن مۇنداق دېدى: شىنجاڭ تېخىمۇ كۆپ كارخانىنىڭ قانۇن قورالىدىن پايدىلىنىپ قانۇنلۇق ھوقۇق - مەنپەئىتىنى قوغدىشىغا ئىلھام ۋە مەدەت بېرىدۇ!
«نۇرغۇن غەرب تاراتقۇلىرى شىنجاڭغا قارا چاپلىدى، ئۇلار خاتالاشتى!» جۇڭگو ئەرەب سۈنئىي ھەمراھ تېلېۋىزىيەسى مۇخبىرى بىنو مۇنداق دېدى: «مەن شىنجاڭغا بارغان، ۋاھ، شىنجاڭ ناھايىتى ياخشى جاي ئىكەن».
ئوچۇق، سىغدۇرۇشچان شىنجاڭ پۈتۈن دۇنيانىڭ «سىناق»لىرىدىن ئۆتەلەيدۇ. جۇڭگو - چەت ئەل مۇخبىرلىرىنىڭ نەزەرىدە، بۇ قېتىمقى شىنجاڭ ۋەكىللەر ئۆمىكىنىڭ ئېچىۋېتىش كۈنى كۆپچىلىككە تېخىمۇ ھەقىقىي، تېخىمۇ گۈزەل، تېخىمۇ ئېچىۋېتىلگەن، تېخىمۇ ئۆزىگە ئىشىنىدىغان شۇنداقلا تەرەققىيات ھاياتىي كۈچىگە تولغان شىنجاڭنى ھېس قىلدۇردى.
ئېچىۋېتىش ۋە ئۆزىگە ئىشىنىش، يېڭىلىق يارىتىشقا قاراپ ئاتلىنىش
ئاپتونوم رايوننىڭ ئىككى يىغىنىدىن مەملىكەتلىك ئىككى يىغىنغىچە، شىنجاڭ باشتىن - ئاخىر ئېچىۋېتىلگەن، ئۆزىگە ئىشىنىدىغان قىياپىتى بىلەن دۆلەت ئىچى - سىرتىدىكىلەرنىڭ دىققىتىنى تارتتى. مەيلى ئاپتونوم رايوننىڭ ئىككى يىغىنىدا چەت ئەللەرنىڭ جۇڭگودا تۇرۇشلۇق ئەلچىلىرى، خەلقئارا تەشكىلاتلارنىڭ ۋەكىللىرىنى سىرتتىن قاتنىشىپ ئاڭلاشقا تەكلىپ قىلىش، تۇنجى قېتىم ۋەكىللەر، ئەزالار يولى تەسىس قىلىش ھەم مەملىكەت ئىچى ۋە سىرتىغا يۈزلىنىپ نەق مەيداندىن بىۋاسىتە تارقىتىش بولسۇن؛ ياكى مەملىكەتلىك ئىككى يىغىن شىنجاڭ ۋەكىللەر ئۆمىكىنىڭ ئېچىۋېتىش كۈنى، شىنجاڭدىن كەلگەن مەملىكەتلىك سىياسىي كېڭەش ئەزالىرىنىڭ «ئەزالار يولى»دا مېڭىشى بولسۇن، ھەممىسىدە شىنجاڭنىڭ دېموكراتىيە، ئېچىۋېتىش، ئۆزىگە ئىشىنىش جەھەتتىكى مەزمۇت قەدەملىرى نامايان قىلىندى.
ئۆزىمىزگە ئىشەنگەنلىكىمىز ئۈچۈن ئېچىۋەتتۇق، ئېچىۋەتكەنلىكىمىز ئۈچۈن ئۆزىمىزگە تېخىمۇ ئىشەندۇق.
مەملىكەتلىك خەلق قۇرۇلتىيى ۋەكىلى ۋاڭ كۇيرەن مۇنداق بىلدۈردى: «ئون چوڭ كەسىپ توپى»نى بەرپا قىلىشتا شىنجاڭ تېخىمۇ پائال ئېچىۋېتىش قىياپىتى بىلەن كەسىپلەرنى گۈللەندۈرۈشنىڭ كەڭ سەھنىسىنى ھازىرلاۋاتىدۇ، شىنجاڭ تۈرلۈك تىجارەت سۇبيېكتلىرىنىڭ مەبلەغ سېلىشىدىكى مېھىرلىك تۇپراققا ئايلىنىۋاتىدۇ.
يېقىندا، دۆلەت غەربىي قىسىم رايوننى رىغبەتلەندۈرۈش تۈرىدىكى كەسىپلەر مۇندەرىجىسى تىزىملىكىنى ئوتتۇرىغا قويدى، شىنجاڭدا جەمئىي 57سى بار بولۇپ، غەربىي قىسىمدىكى 12 ئۆلكە، ئاپتونوم رايون، بىۋاسىتە قاراشلىق شەھەر ئىچىدە ئىگىلىگەن سانى ئەڭ كۆپ، «ئون چوڭ كەسىپ توپى»نىڭ كۆپ قىسمىنى ئۆز ئىچىگە ئالغان. «بۇ مۇھىم، پايدىلىق ياخشى خەۋەر، تۈرلۈك كارخانىلارنىڭ شىنجاڭغا كېلىپ مەبلەغ سېلىپ كەسىپلەرنى گۈللەندۈرۈشىنى سەمىمىي قارشى ئالىمىز» دېدى ۋاڭ كۇيرەن.
«ھازىر، يەرشارى بويىچە جۇڭگو شىنجاڭ بىلەن سودا ئالاقىسى بار دۆلەت ۋە رايون 213كە يەتتى. بۇنىڭ ئىچىدە، ئافرىقا، ئوتتۇرا شەرق، لاتىن ئامېرىكىسى قاتارلىق يېڭىدىن گۈللەنگەن بازارلار تېز سۈرئەتتە كۆپەيدى، شىنجاڭ كۆتۈرەڭگۈ قىياپەت بىلەن دۇنياغا يۈزلەنمەكتە.» شىنجاڭ ۋەكىللەر ئۆمىكىنىڭ ئېچىۋېتىش كۈنىدە، مەملىكەتلىك خەلق قۇرۇلتىيى ۋەكىلى چېن ۋېيجۈن شىنجاڭنىڭ سىرتقا ئېچىۋېتىشنى كېڭەيتىشىگە ئالاقىدار سوئاللارغا جاۋاب بەرگەندە شۇنداق بىلدۈردى.
شىنجاڭ ۋەكىللەر ئۆمىكىنىڭ ئۆمەك، گۇرۇپپىلارنى ئېچىۋېتىش پائالىيىتىدە، دۆلەت ئىچى - سىرتىدىكى مۇخبىرلار شىنجاڭنىڭ يۇقىرى سۈپەتلىك تەرەققىياتىغا يۈكسەك ئەھمىيەت بېرىپ، كەسىپلەر توپى قۇرۇلۇشى، سىرتقا ئېچىۋېتىشنى كېڭەيتىش، ئۇل ئەسلىھە قۇرۇلۇشى، پەن - تېخنىكا تەرەققىياتى، يېزا ئىگىلىكىنى زامانىۋىلاشتۇرۇش قاتارلىقلار توغرىسىدا كونكرېت سوئاللارنى ئوتتۇرىغا قويدى، ۋەكىللەر كۆپچىلىك كۆڭۈل بۆلۈۋاتقان مەسىلىلەرگە پائال ئىنكاس قايتۇرۇپ شىنجاڭنىڭ ئىسلاھات - تەرەققىياتىغا بولغان ئىرادىسى ۋە ئىشەنچىنى تولۇق نامايان قىلدى.
شىنجاڭنىڭ تاشقى سودا ئىمپورت - ئېكسپورت ئومۇمىي قىممىتى ئۇدا 200 مىليارد يۈەن، 300 مىليارد يۈەن، 400 مىليارد يۈەندىن ئېشىپ، ئۈچ يىلدا ئۈچ 100 مىليارد يۈەنلىك باسقۇچتىن ھالقىپ ئۆتتى؛ «غەربىي قىسىم ئاشلىق ئامبىرى» «قۇرۇقلۇقتا بېقىلغان دېڭىز مەھسۇلاتلىرى» قاتارلىق ئاچقۇچلۇق سۆزلەرگە شىنجاڭنىڭ يېزا ئىگىلىك تەرەققىياتىدا قولغا كەلتۈرۈلگەن كىشىنى پەخىرلەندۈرىدىغان نەتىجىلەر يىغىنچاقلاندى... بۇ، جۇڭگو شىنجاڭنىڭ ئۆزىگە ئىشىنىپ ئالغا ئىلگىرىلەيدىغان، يېڭىلىق يارىتىشقا قاراپ ئاتلىنىدىغان قىياپىتىنى تولۇق نامايان قىلدى!
خەلق گېزىتى مۇخبىرى جىڭ خاۋ مۇنداق دېدى: ۋەكىللەر ناھايىتى قىزغىنلىق بىلەن پىكىر بايان قىلدى ۋە جاۋاب بەردى، شۇنداقلا ناھايىتى ئىشەنچكە تولدى، شىنجاڭنىڭ كەلگۈسى تەرەققىياتى بارغانسېرى ياخشى بولىدۇ. مۇخبىرلارنىڭ پات - پات باشلىرىنى لىڭشىتىشىدىن، قۇۋۋەتلەۋاتقان نەزەرىدىن، باش بارمىقىنى چىقىرىشىدىن ئۇلارنىڭ شىنجاڭغا ئۈمىد بىلەن قارايدىغانلىقىنى كۈچلۈك ھېس قىلغىلى بولىدۇ.
«ئاشكارىلىق دەرىجىسىنىڭ ئاشۇرۇلۇشى بىلەن بىللە، ھەر ساھە زاتلار ئېچىۋېتىلگەن، دېموكراتىك ئىككى يىغىننى كۆرۈپ، ئۆزىگە ئىشىنىدىغان، تەمكىن جۇڭگو شىنجاڭنى ھېس قىلدى» دېدى مەملىكەتلىك سىياسىي كېڭەش ئەزاسى جاڭ خۇي.
ئېچىۋېتىش ۋە ھەمكارلىشىش، كەلگۈسىگە قاراپ ئاتلىنىش
جۇڭگو شىنجاڭ ئېچىۋېتىلگەن، ئۆزىگە ئىشىنىدىغان قىياپىتى بىلەن كەلگۈسىگە قاراپ ئاتلانماقتا.
2024 - يىلى، شىنجاڭدىكى ھەرقايسى جايلار، ھەرقايسى تارماقلار شىنجاڭغا زىيارەتكە كەلگەن چەت ئەللىك سىياسىي ئەربابلار، جۇڭگودا تۇرۇشلۇق ئەلچىلەر، خەلقئارا تەشكىلاتلار، كارخانىچىلار، دىنىي زاتلار، مۇتەخەسسىس - ئالىملار، تاراتقۇ مۇخبىرلىرى قاتارلىقلارنى ئۆز ئىچىگە ئالغان 500 نەچچە تۈركۈمدىكى ئون نەچچە مىڭ ئادەم قېتىمنى كۈتۈۋالدى، بۇ، چەت ئەللىك مېھمانلار، چەت ئەل تاراتقۇ مۇخبىرلىرىنى كۈتۈۋېلىش قاتارلىق تاشقى ئىشلار پائالىيىتى ئەڭ كۆپ بولغان بىر يىل بولدى، ئېچىۋېتىلگەن دەرۋازا بارغانسېرى كەڭ ئېچىۋېتىلىپ، جۇڭگو شىنجاڭنىڭ ئۆزىگە ئىشىنىدىغانلىقىنى نامايان قىلدى.
بۇلتۇر، 8 - نۆۋەتلىك جۇڭگو − ئاسىيا - ياۋروپا كۆرگەزمىسى ئۈرۈمچىدە ئۆتكۈزۈلدى، 50 دۆلەت، رايون ۋە خەلقئارا تەشكىلات ھەم دۆلەت ئىچىدىكى 1000دىن ئارتۇق كارخانا ۋە ئاپپارات كۆرگەزمىگە قاتناشتى. تەرەپ - تەرەپتىن كەلگەن مېھمانلار تەرەققىيات ئۈستىدە ئورتاق ئىزدىنىپ، پۇرسەتتىن ئورتاق بەھرىلىنىپ، ئېچىۋېتىش ۋە ھەمكارلىشىشنىڭ «ئورتاق پايدا ئېلىش كۈيى»نى ياڭراتتى.
بۇلتۇر قىشتا، گىرۇزىيە پايتەختى تىبىلىستا ئۆتكۈزۈلگەن 2024 - يىللىق (10 - نۆۋەتلىك) گىرۇزىيە − جۇڭگو شىنجاڭ تاۋارلىرى كۆرگەزمىسىدە، «گۈزەل شىنجاڭ، ئېچىۋېتىلگەن شىنجاڭ» ئوبرازى نامايان قىلىنغان ئالاھىدە بېزەلگەن كۆرگەزمە رايونىدا، كەسىپلەر توپى قۇرۇلۇشىنىڭ نەتىجىلىرى نۇقتىلىق كۆرگەزمە قىلىنىپ، شىنجاڭدىكى 14 ۋىلايەت، ئوبلاست، شەھەرنىڭ تارىخ، ئادىمىيەت، ئىقتىساد ھەم كەسىپ تەرەققىياتى ئەھۋالى نامايان قىلىنىپ، گىرۇزىيەدىكى ھەر ساھە زاتلارنىڭ جۇڭگو شىنجاڭغا بولغان چۈشىنىشى ۋە تونۇشىنى ئىلگىرى سۈردى.
2024 - يىلى، شىنجاڭ «تەكلىپ قىلىش، سىرتقا چىقىش» ئىقتىساد - سودا پائالىيىتى ئارقىلىق يېڭى ھەمكارلىق ھاسىل قىلدى، يېڭى زاكازلارغا ئېرىشتى، بۇنىڭ بىلەن يېڭى ھەرىكەتلەندۈرگۈچى كۈچ قوشۇلۇپ، ئېچىۋېتىش قەدىمى بارغانسېرى تېزلەشتى.
«دۇنياۋىلىشىش ۋە رايون ئىقتىسادىنى بىر گەۋدىلەشتۈرۈش دولقۇنى ئالدىدا، شىنجاڭ تېخىمۇ ئاكتىپ قىياپەتتە دۇنياغا قۇچاق ئاچتى، دۆلەت ئىچى - سىرتى بىلەن بولغان ئالماشتۇرۇش ۋە ھەمكارلىشىشنى كۈچەيتتى، كەلگۈسىدىن ئۈمىد بار» دېدى مەملىكەتلىك سىياسىي كېڭەش ئەزاسى ليۇ ۋېي.
مەملىكەتلىك ئىككى يىغىندا، شىنجاڭ ئۆتكەن بىر يىللىق تەرەققىيات مۇۋەپپەقىيەتلىرىنى نامايان قىلىپلا قالماي، تېخىمۇ مۇھىمى دۇنياغا كەلگۈسى تەرەققىيات ئۇلۇغۋار پىلانىنى جاكارلاپ، جاسارەت بىلەن ئىلگىرىلەپ كەلگۈسىگە يۈزلىنىدىغان كۈچنى مۇجەسسەملىدى.
ئېچىۋېتىش تەرەققىياتنىڭ مۇقەررەر يولى. كەلگۈسىگە نەزەر سالغاندا، شىنجاڭ تۈرلۈك خىرىس ۋە پۇرسەتكە توغرا قارىدى.
«بۇ يىل، بىز ئىستراتېگىيەلىك ئورۇن بېكىتمىسىنى چىڭ كۆزلەپ، ئىستراتېگىيەلىك پىلانلاشنى كۈچەيتىپ، پەن - تېخنىكىدا يېڭىلىق يارىتىشنى يېتەكچى قىلىپ، نۇقتىلىق كەسىپلەردىكى يادرولۇق تېخنىكىلاردا ئۆتكەلگە ھۇجۇم قىلىش ۋە يېڭىلىق يارىتىش نەتىجىلىرىنى قوللىنىشنى كۈچەيتىپ، رەقەملەشتۈرۈش، ئەقلىي ئىقتىدارلاشتۇرۇش تېخنىكىسى، يېشىل تېخنىكىدىن پائال پايدىلىنىپ، ئەنئەنىۋى كەسىپلەرنىڭ سۈپىتىنى ئاشۇرۇپ دەرىجىسىنى ئۆستۈرۈشكە كۈچ قوشىمىز» دېدى ۋەكىل ۋاڭ كۇيرەن.
مەملىكەتلىك خەلق قۇرۇلتىيى ۋەكىلى لى لەن مۇنداق بىلدۈردى: پورتنىڭ يۇقىرى سۈپەتلىك تەرەققىياتىغا تۈرتكە بولۇشنى چۆرىدەپ، تېز سۈرئەتتە تەكشۈرۈپ ئۆتكۈزۈش، پورت سودا بىخەتەرلىكىگە كاپالەتلىك قىلىش ۋە ئۆزئارا ياردەم بېرىش ھەمكارلىقىنى كۈچەيتىش قاتارلىق جەھەتلەردىن تەكلىپ - پىكىرلەرنى ئوتتۇرىغا قويۇپ، سىياسەت تۈزۈشنى ئاساس بىلەن تەمىنلەپ، پورتنىڭ يۇقىرى سۈپەتلىك تەرەققىياتى ئارقىلىق «بىر بەلباغ، بىر يول»نى ئورتاق بەرپا قىلىشنىڭ چوڭقۇرلىشىشى، پۇختا ئەمەلىيلىشىشىگە مۇلازىمەت قىلىمىز.
بۇرغا چېلىنىپ، مەزمۇت قەدەم تاشلاندى، شىنجاڭ كۆتۈرەڭگۈ قىياپەت بىلەن دۇنياغا يۈزلەنمەكتە!
