مەنبە: «ئالىقاندىكى ئۈرۈمچى» ئابۇنىچىلار تېرمىنالى
يېقىندا ئاپتونوم رايونلۇق بازار نازارەت قىلىش- باشقۇرۇش ئىدارىسى شىنجاڭنىڭ 6- نۆۋەتلىك پاتېنت مۇكاپاتىنى باھالاش پائالىيىتىنى باشلىدى، بۇ قېتىمقى ئىلتىماس قىلىش توردا ئېلىپ بېرىلىدۇ، ماتېرىيال قوبۇل قىلىش ۋاقتى 2025- يىلى 3- ئاينىڭ 31- كۈنىگىچە بولىدۇ.
ئىگىلىنىشىچە، شىنجاڭ ئۇيغۇر ئاپتونوم رايونلۇق خەلق ھۆكۈمىتى 2013- يىلىدىن باشلاپ ئاپتونوم رايوننىڭ پاتېنت مۇكاپاتىنى تەسىس قىلغان بولۇپ، ھەر ئىككى يىلدا بىر قېتىم باھالايدىكەن، بۇنىڭدا يېڭىلىق يارىتىش ئارقىلىق تەرەققىياتقا تۈرتكە بولۇش ئىستراتېگىيەسى ۋە بىلىم مۈلۈك ھوقۇقى ئىستراتېگىيەسىنى زور كۈچ بىلەن ئالغا سىلجىتىپ، يېڭىلىق يارىتىشتىكى ئاساسىي گەۋدە ۋە جەمئىيەتتىكى ئاممىنىڭ كەشپىيات، ئىجادىيەت ئاكتىپلىقىنى ئۆستۈرۈش مەقسەت قىلىنغان.
مۇخبىرنىڭ 2- ئاينىڭ 27- كۈنى ئاپتونوم رايونلۇق بازار نازارەت قىلىش- باشقۇرۇش ئىدارىسىدىن ئىگىلىشىچە، ئومۇمەن «شىنجاڭ ئۇيغۇر ئاپتونوم رايونىنىڭ پاتېنت مۇكاپاتىنى باھالاش چارىسى (ۋاقىتلىق يولغا قويۇلىدۇ)»دىكى بەلگىلىمىگە ئۇيغۇن كېلىدىغان، ئاپتونوم رايوننىڭ مەمۇرىي رايون دائىرىسى ئىچىدىكى ئىدارە- ئورۇن ياكى پۇقرالار 2024- يىلى 12- ئاينىڭ 31- كۈنىدىن بۇرۇن دۆلەت بىلىم مۈلۈك ھوقۇقى ئىدارىسى ھوقۇق بەرگەن كۈچكە ئىگە پاتېنت (دۆلەت مۇداپىئە پاتېنتى، مەخپىيەتلىكنى ساقلاش پاتېنتىنى ئۆز ئىچىگە ئالمايدۇ)نى 6- نۆۋەتلىك ئاپتونوم رايوننىڭ پاتېنت مۇكاپاتىنى باھالاشقا قاتناشتۇرسا بولىدىكەن. ئالاقىدار تەلەپلەرگە ئاساسەن، ئالاھىدە دەرىجىلىك مۇكاپات 500 مىڭ يۈەن بولۇپ، مۇكاپاتقا ئېرىشكەن پاتېنت جۇڭگو پاتېنت مۇكاپاتىغا ئىلتىماس قىلىشقا ئالدىن تەۋسىيە قىلىنىدىكەن.
يېقىنقى يىللاردىن بۇيان، شىنجاڭ يۇقىرى قىممەتكە ئىگە كەشپىيات پاتېنتىنى مەبلەغ بىلەن مۇكاپاتلاش ۋە تۈر جەھەتتىن يۆلەش ئارقىلىق كارخانىلارنىڭ پاتېنت قىممىتىنى كېڭەيتىشىگە ياردەم بېرىپ، پاتېنت نەتىجىلىرىنى ئايلاندۇرۇپ ئىشلىتىشىگە تۈرتكە بولۇپ، رايونلارنىڭ يۇقىرى قىممەتكە ئىگە پاتېنتقا ئىگە بولۇش مىقدارىنىڭ ئۈزلۈكسىز ئېشىشىغا تۈرتكە بولدى. شۇنىڭ بىلەن بىللە، شىنجاڭ يۇقىرى قىممەتكە ئىگە پاتېنت دەرىجىسىنى ئۆستۈرۈش يۇمشاق تېما تەتقىقاتىنى يولغا قويۇپ، ئىلگىرىكى ھەر نۆۋەتلىك باھالاشتا مۇكاپاتقا ئېرىشكەن پاتېنتلار چېتىلىدىغان ساھەلەرگە قارىتا تەتقىقاتنى قانات يايدۇرۇپ، ئۇلارنىڭ يېڭىلىق يارىتىش قىممىتى ۋە ئۈلگىلىك ئەھمىيىتىنى قېزىپ چىقتى ھەم سىياسەت جەھەتتىن قوللاش ۋە مۇكاپاتلاشتىن ئىبارەت قوش رىغبەتلەندۈرۈش ئارقىلىق يېڭىلىق يارىتىشتىكى ئاساسىي گەۋدىسىنىڭ يۇقىرى قىممەتكە ئىگە كەشپىيات پاتېنت ئىجادىيىتىنىڭ ئىچكى ھەرىكەتلەندۈرگۈچ كۈچىنى تولۇق قويۇپ بەردى.
ئاپتونوم رايونلۇق بازار نازارەت قىلىش- باشقۇرۇش ئىدارىسىدىكى ئالاقىدار مەسئۇل تونۇشتۇرۇپ مۇنداق دېدى: ئاپتونوم رايوننىڭ پاتېنت مۇكاپاتىنى باھالاشتا «ئېھتىياتچان بولۇش، ئاز بولسىمۇ ساز بولۇش» پىرىنسىپىغا ئەمەل قىلىنىپ، تەكشۈرۈش، مۇتەخەسسىسلەر باھالاش، نەق مەيداندا تەكشۈرۈش قاتارلىق ھالقىلار ئارقىلىق ئىلتىماس قىلىنغان پاتېنت باھالىنىدۇ، پاتېنت سۈپىتى يۇقىرى، قوللىنىشچانلىقى كۈچلۈك، ئىقتىسادىي ئۈنۈمى كۆرۈنەرلىك مۇنەۋۋەر پاتېنت مۇناسىپ دەرىجە بويىچە مۇكاپاتلىنىدۇ. مۇكاپات تۈرىدە ئالاھىدە دەرىجىلىك مۇكاپات ۋە 1-، 2-، 3- دەرىجىلىك مۇكاپاتتىن ئىبارەت تۆت دەرىجە تەسىس قىلىنغان. ئالاھىدە دەرىجىلىك مۇكاپاتقا 500 مىڭ يۈەن، 1- دەرىجىلىك مۇكاپاتقا 150 مىڭ يۈەن، 2- دەرىجىلىك مۇكاپاتقا 100 مىڭ يۈەن، 3- دەرىجىلىك مۇكاپاتقا 50 مىڭ يۈەن مۇكاپات بېرىلىدۇ. بۇنىڭ ئىچىدە ئالاھىدە دەرىجىلىك مۇكاپات دۆلەتنىڭ تېخنىكىدا يېڭىلىق يارىتىش ساھەسىدە زور بۆسۈش ھاسىل قىلغان، پاتېنت تېخنىكىسىنى يولغا قويۇش، كېڭەيتىشتە زور ئىقتىسادىي ئۈنۈم ۋە جەمئىيەت ئۈنۈمى ياراتقان پاتېنتقا بېرىلىدۇ، ئاخىرقى باھالاش نەتىجىسى پاتېنت سۈپىتى، ئەمەلىي قوللىنىش ئەھۋالى قاتارلىق ئۇنىۋېرسال ئامىللارغا ئاساسەن بېرىلىدۇ.
1-، 2-، 3- دەرىجىلىك مۇكاپات يېڭى مەھسۇلات، يېڭى ھۈنەر- سەنئەت، يېڭى ماتېرىيال ۋە ئۇنىڭ سىستېمىسىنى تەتقىق قىلىپ ياساشتا مۇھىم كەشپىيات بارلىققا كەلتۈرۈلگەن ياكى قوللىنىلغان ۋە ئايلاندۇرۇلغان مۇھىم پاتېنت تېخنىكىسىغا، دۆلەت ئىچى- سىرتىدىكى بازار رىقابىتىگە قاتنىشىشتا مۇھىم رول ئوينىغان، شۇ ساھەنىڭ تېخنىكا تەرەققىياتى ۋە يېڭىلىق يارىتىشىنى ئىلگىرى سۈرۈشتە گەۋدىلىك تۆھپە قوشقان ھەمدە كۆرۈنەرلىك ئىقتىسادىي ئۈنۈم، جەمئىيەت ئۈنۈمىگە ئېرىشكەن پاتېنتقا بېرىلىدۇ. ئىلتىماس قىلغۇچى ئورۇن ياكى ئىلتىماس قىلغۇچى «ئاپتونوم رايوننىڭ پاتېنت مۇكاپاتى ئۇچۇرىنى باشقۇرۇش سىستېمىسى»غا كىرىپ توردا تىزىملىتىپ، ئىلتىماس ۋە ئالاقىدار ماتېرىياللارنى تاپشۇرسا بولىدۇ. (مۇخبىر ۋاڭ شۈەن)
