ئانار بۇلۇت\شىنجاڭ گېزىتى مۇخبىرى بەي سۇجۈن
2-ئاينىڭ 22-كۈنى چۈشتىن كېيىن، جىڭ ناھىيەسىنىڭ داخىيەنزى بازىرىدا ئازراق قار ياغدى. پاتىگۈل قېيۇم ئەڭ ئاخىرقى بىر خىزمەتچىسىنى ئۇزۇتىۋېتىپ ئىشتىن چۈشكەندىن كېيىن، زاۋۇت دەرۋازىسىنى تاقاپ، ئوزۇقلۇق مەھسۇلاتىنى كۆتۈرگىنىچە خىزمەتچىسى ئاسىمخان قادىرنىڭ ئۆيىگە قاراپ ماڭدى.
خىزمەتچىلەرنىڭ ئائىلە تەۋەلىرىنى يوقلايدىغان بۇ ئادەتنى پاتىگۈل يەتتە يىلدىن بۇيان داۋاملاشتۇرۇپ كەلمەكتە، «پېچىنە-پىرەنىك پىششىقلاش زاۋۇتىنىڭ بۈگۈنكى كۈنگە كېلىشى پۈتۈنلەي ئاچا-سىڭىللارنىڭ بىر مەقسەتتە ھەمكارلىشىپ، جاپالىق ئەجىر سىڭدۈرۈشىدىن بولدى. ئۇلار مېنىڭ خىزمەتچىلىرىم بولۇپلا قالماي، يەنە مېنىڭ كەسىپ جەھەتتىكى قابىل ھەمراھلىرىم» دېدى پاتىگۈل كۈلۈپ تۇرۇپ.
41 ياشلىق پاتىگۈلنىڭ ئۆيى تۇرپان شەھىرىدە، ئۇنىڭ مۇخبىرغا دېيىشىچە، 2018-يىلى ئەتىيازدا، ئۇ يىغقان ھەممە پۇلىنى ئېلىپ جىڭ ناھىيەسىنىڭ داخېيەنزى بازىرى كۆكقاشا جەنۇبىي كەنتىگە كېلىپ ئىگىلىك تىكلىگەن.
ئورۇن تاللاش، دۇكان كۆرۈش، ئىشچى قوبۇل قىلىش... ئۈچ ئاي تەييارلىق قىلىش ئارقىلىق، ئۇنىڭ پېچىنە-پىرەنىك پىششىقلاش زاۋۇتى دەسلەپكى قەدەمدە قۇرۇلدى. ئۇ دەل تېخنىكا ۋە باشقۇرۇشتىن ئەندىشە قىلىۋاتقاندا، داشۆدىكى ساۋاقدىشى قۇربانگۈل روزاخۇن تەشەببۇسكارلىق بىلەن خىزمىتىدىن ئىستېپا بېرىپ، قەتئىي تۈردە پاي قوشۇپ ئۇنىڭ بىلەن بىللە ئىگىلىك تىكلىدى.
2-ئاينىڭ 22-كۈنى، پاتىگۈل قېيۇم (ئوتتۇرىدا) ۋە خىزمەتچىلەر يېڭى پىشۇرغان پىچىنە-پىرەنىكلەرنى تۈرگە ئايرىماقتا.
مۇرادىل ماناس فوتوسى
«ياڭاقنى پوستىنى بۇياقتىن سويۇپ ئۇياقتىنلا ئىشلىتىمىز، قايماقنىڭ تېمپېراتۇرىسىنى چوقۇم ياخشى تىزگىنلەش كېرەك.» ئىشلەپچىقىرىش سېخىدا، پاتىگۈل ئۈلگە كۆرسەتكەچ، قولدا ياسايدىغان پېچىنە-پىرەنىكلەرنى پىشۇرۇشتا دىققەت قىلىشقا تېگىشلىك ئىشلارنى چۈشەندۈردى. ئىگىلىك تىكلىگەن دەسلەپكى مەزگىلدە، ئۇ كەسپىي پېچىنە-پىرەنىك ئۇستىسىدىن ئىككىنى ۋە يەرلىك كەنت ئاھالىسىدىن ئوننى تەكلىپ قىلىپ، ئۇلارنى خام ماتېرىيال تاللاشتىن ئوراپ-قاچىلاپ توشۇشقىچە بولغان ھەر بىر ھالقىدا تەلەپچانلىق بىلەن تەربىيەلىدى، «مەن ئون نەچچە يىل پىشۇرۇق دۇكىنى ئاچتىم، مەيلى پېچىنە-پىرەنىك ياساش ياكى سېتىش ماھارىتى بولسۇن، ھەممىسىنى ناھايىتى پىششىق ئىگىلىدىم.» پاتىگۈل مۇنداق دېدى: مەن بۇ تەجرىبىلەرنى قىلچە يوشۇرۇپ قالماي ئىشچى-خىزمەتچىلەرگە تولۇق ئۆگىتىپ، ئۇلارنى تېخنىكىنى ياخشى ئىگىلەش، ئىنچىكە ھالقىلارنى ياخشى ئىگىلەش ئىمكانىيىتىگە ئىگە قىلىمەن، مۇشۇنداق قىلغاندىلا ئاندىن كەسكىن بازار رىقابىتىدە پۇت تىرەپ تۇرغىلى بولىدۇ.
قاتتىق بولغان يېمەكلىك ماتېرىيالى ئۆتكىلى ۋە تازىلىق ئۆلچىمىگە تايىنىپ، بەش يىلدىن كېيىن، قول ھۈنىرىدە پېچىنە-پىرەنىك پىششىقلاش زاۋۇتىنىڭ مەھسۇلاتلىرى ئۆز ئەتراپىدىكى ۋە بورتالا شەھىرىدىكى 400دىن ئارتۇق تاللا بازارغا ئوڭۇشلۇق كىردى ھەم 20 ۋاكالەتچى سودىگەر بىلەن زىچ كەسپىي ئالاقە ئورنىتىلدى. 2024-يىلى 9-ئايدا، پاتىگۈل يەنە 150 مىڭ يۈەن مەبلەغ سېلىپ، قايماق ئىشلەپچىقىرىش سېخى قۇرۇپ، قول ھۈنىرىدە پىششىقلانغان پىچىنە-پىرەنىكلەرنىڭ تۈرىنى 40قا يەتكۈزدى.
«شىركىتىمىزنىڭ ھەر بىر تەرەققىياتى، ئىلگىرىلىشى خىزمەتچىلەرنىڭ جاپالىق ئەجرىدىن ئايرىلالمايدۇ.» پاتىگۈل مۇنداق دېدى: پىششىقلاش زاۋۇتىمىزنىڭ ئىشلەپچىقىرىش كۆلىمىنىڭ ئۈزلۈكسىز كېڭىيىشىگە ئەگىشىپ، خىزمەتچىلەرگە بولغان ئېھتىياج بارغانسېرى ئاشتى.
41 ياشلىق ئىشچى بۇئايشەم ئىسمايىل مۇنداق دېدى: پېچىنە-پىرەنىك سېتىشتىن ئىلگىرى، مەن كەنتتە ئىشلەمچىلىك قىلاتتىم، پېچىنە-پىرەنىك پىششىقلاش زاۋۇتىدا ئىشلىگەن تۆت يىلدا ئايلىق مائاشىم 3500 يۈەندىن 12 مىڭ يۈەنگە ئۆستى، بۇ يەرگە كەلگەندىن كېيىن، ئىمتىھان بېرىپ موتورلۇق قاتناش ۋاسىتىسى ھەيدەش كىنىشكىسى ئالدىم، يەنە تېخى ئامانەت پۇلۇم بار بولدى، بۇلتۇر 120 مىڭ يۈەن قىممىتىدىكى پىكاپ سېتىۋالدىم. كۈنلىرىم شۇنداق كۆڭۈللۈك ۋە مەنىلىك ئۆتۈۋاتىدۇ.
«مەن مېيىپ بولغاچقا، بۇ يىللاردا خىزمەت ئىزدەپ ھەممە يەرگە قاترىغان بولساممۇ خىزمەت تېپىشىم ئانچە ئوڭۇشلۇق بولمىدى. لېكىن پاتىگۈل مېنى تۆۋەن كۆرمىدى، يەنە مېنى كۆپرەك ماھارەت ئۆگىنىشكە ئىلھاملاندۇردى، خىزمەتداشلارمۇ دائىم ماڭا ياردەم بېرىپ كەلدى، ئائىلەمدىكىلەر مېنىڭ ئۆز كۈچۈمگە تايىنىپ ياشاۋاتقانلىقىمنى كۆرۈپ، قەۋەتلا خۇشال بولدى» دېدى خىزمەتچى ئاسىمەخان، ئۇ ئىلگىرى ئۆزىنى تۆۋەن كۆرەتتى، كۆپ گەپ قىلمايتتى، ھازىر مۇقىم كىرىمى بار بولدى، مىجەزىمۇ خېلى ئوچۇق بولۇپ قالدى.
2-ئاينىڭ 22-كۈنى، پاتىگۈل قېيۇم (ئوتتۇرىدا) خىزمەتچىلەرگە پېچىنە-پىرەنىكلەرنى ئوراپ قاچىلاشتا دىققەت قىلىدىغان ئىشلارنى چۈشەندۈرمەكتە.
مۇرادىل ماناس فوتوسى
خىزمەتچىلەرنى يېڭى تېخنىكا ئىگىلەش، نەزەر دائىرىسىنى كېڭەيتىش ئىمكانىيىتىگە ئىگە قىلىش ئۈچۈن، پاتىگۈل ھەر يىلى ئىشچى-خىزمەتچىلەرنى باشلاپ سىرتقا چىقىپ ئۆگەندى. ئائىلىسىدە قىيىنچىلىقى بار خىزمەتچىلەرگە قارىتا، ئۇ ھەر بىر كىشىنىڭ قىيىنچىلىق ئىلتىماس-تەلىپىگە ئاساسەن، تەپسىلىي ياردەم بېرىش-يۆلەش پىلانى تۈزدى.
داخىيەنزى بازارلىق پارتىيە كومىتېتىنىڭ مۇئاۋىن شۇجىسى لى شيۇلى مۇنداق دېدى: پاتىگۈلنىڭ قول ھۈنىرىدە پېچىنە-پىرەنىك پىششىقلاش زاۋۇتى 60 كەنت ئاھالىسىنىڭ ئىشقا ئورۇنلىشىشىغا تۈرتكە بولۇپلا قالماي، يەنە كۆكقاشا جەنۇبىي كەنتى نان يېقىش ھەمكارلىق كوپىراتىپى بىلەن ھەمكارلىق ئورنىتىپ، يېزا-كەنتلەرنى گۈللەندۈرۈشكە ھاياتىي كۈچ قوشتى.
پاتىگۈل مۇنداق دېدى: كېيىنكى قەدەمدە، مەن پاي قوشۇپ پايدا تەقسىملەش شەكلىدە، دۇكان ئېچىش ئويى بار خىزمەتچىلەرنىڭ ساۋەن، قەشقەر، ئىلى قاتارلىق جايلاردا دۇكان ئېچىشىغا ياردەم بېرىپ، كۆپچىلىكنىڭ تۇرمۇشىنى يەنىمۇ ياخشىلايمەن.
«كۆپچىلىكنىڭ ياخشى تۇرمۇش كەچۈرۈۋاتقانلىقىنى كۆرۈپ، بەك سۆيۈندۈم.» پاتىگۈل مۇنداق دېدى: بۇ يىل مەن يەنە دادىل ئىشلەپ، توردا ۋە تور سىرتىدا سېتىش يوللىرىنى داۋاملىق كېڭەيتىپ، كەنت ئاھالىلىرىنى يېتەكلەپ تېخىمۇ كۆپ يەرلىك خاسلىققا ئىگە يېمەكلىك ماتېرىياللىرىنى قېزىپ، يېڭى مەھسۇلاتلارنى تەتقىق قىلىپ ئېچىپ، قول ھۈنىرىدە پىششىقلانغان پېچىنە-پىرەنىكلەرنى يۇرتداشلارنىڭ كىرىمىنى ئاشۇرۇپ بېيىشىدىكى شېرىن كەسىپكە ئايلاندۇرىمەن.
«ئانار بۇلۇت»تىن ئېلىپ تەرجىمە قىلىندى
